إسكندريلا

كلمات أغاني فرقة إسكندريلا

[eskenderella]

زينب

Watch on YouTube

https://www.youtube.com/watch?v=ID3qriA_FuU

Listen on SoundCloud

https://soundcloud.com/ahmed-haddad-25/ocnompguhfy1

قالوا لزينب العنب ف شفايفك عال ردت و قالت قال يعنى ده العنب قال و النرجس مال على نرجس و قالها دوقى زعتر فلسطينى بيهمس فى قلبى و عروقى

و بن يونس قال لمنال شو ها الدلالحدفتى بوسة ف الهوا .. فصلتها جاكتة يا مصر طول ماحنا سوا .. أنا ستة على ستة يا نور يا ضحكة يا هو ا امبارح القلب اتروى دلوقتى ميت حتة ياللى ابتسامتك .. آيس كريم بالمانجا وياللى قامتك .. زى قامة الكمانجا رغم حسنك ليه ملامحك رافضة بعض وجوا حضنك لسة ليه الدنيا برد ف ايديا ورد و ليه ف إيديكى طبنجة يا زينبف 19 نوفمبر كان الجميل زعلان قصدى الشتا وف 16 ديسمبر كان القمر بردان ومات كدا قلت الحنين مدمر طبطبتى على كتفى يا منجدة غنيتى بصوت مؤثر من غير ماتتكسفى قلتيلى بكرة جميل بكرة اللى جاى جميل جميل جميل جميل متأكدة؟

[eskenderella]

المعابد

Watch on YouTube :

https://www.youtube.com/watch?v=KEfww5P7k98

Listen on SoundCloud :

https://soundcloud.com/a_abousalem/5q0yu2yqq46w

_________________________________________________________

بقى هي دي المعابد بقى هو ده الإيمان

ولا كانت الساقية دايرة ولا كانت الدار أمان

ولا كانشي غيطك عنب ولا كان عنب ولا كان

ولا كانت أمك بتشقى ولا كان شقاها حنان

ولا كان شجر جميز و جدوره في الأزمان

هل هي دي المعابد هل هو ده الإيمان

مكنتش دي مدرسة ولا كانشي ده دكان

ولا كان شباب في الغيط ولا كان شباب في ميدان

ولا كانوا راصدين سما ولا كانوا فاتحين ببان

ولا كانت الحلوة قايمة ولا كان نغم ألحان

ولا كان في قلبك هم ولا كانشي قلب ميزان

هل هي دي المعابد هل هو ده الإيمان

بقى هي دي المعابد بقى هو ده الإيمان

مكنتش دي مدرسة ولا كنش ده دكان

ولا كانت أمك بتشقى ولا كان شقاها حنان

ولا كانشي غيطك عنب ولا كان عنب ولا كان

_________________________________________________________

قصيدة : المعابد

الشاعر : نجيب شهاب الدين

[eskenderella]

الميكروباص ( اصطبحنا )

Watch on YouTube :

https://www.youtube.com/watch?v=wr8YSXMnh3c

Listen on SoundCloud :

https://soundcloud.com/irahaal/microbus

_________________________________________________________

اصطبحنا واصطبح الملك للخلاق

اصطبحنا بعقب سيجارة وفول حراق

حف الدقون والنبي يا مقص

علشان بذمة حنبصبص

ونجر ناعم لنواعم

اللي بتركب ميكروباص

سلامين وألف حجر يترص

لسواقين الميكروباص

اللي يضايقنا ليه إستبن

وحبيبنا بنحطله قطرة

إن كنت ميه من تحت تبن

مالكش عندي كيلوباترا

حلاوة الشتا يا معلم

ونس ودفا جنب شفيقة

قاصدة ومش قاصدة تسلم

وإيدها على كتفي دقيقة

وأخوك بتولعله حريقة

وإن قلت تبقى قليل الأصل

سلامين وألف حجر يترص

لسواقين الميكروباص

وحياتك داحنا أكتر خلق بيتاخدوا مخالفة

في رمضان حاجة تفطر تكئبنا ليوم الوقفة

وحياة اللي سمعنا سورة يوسف وثوما

مافي حاجة ليها معنى الا نفسك يا حكومة

دي اللجنة زي البومة

وإحنا أطرى من الخس

سلامين وألف حجر يترص

لسواقين الميكروباص

_________________________________________________________

قصيدة : الميكروباص

شعر : أحمد حداد

[eskenderella]

الحضرة الزكية

Watch on YouTube :

https://www.youtube.com/watch?v=IneK7KqiOL4

Listen on SoundCloud :

https://soundcloud.com/karim-soliman-4/2yyugndmnn37

_________________________________________________________

تركت أهل المدارك يختموا السهرة

و مشيت بطول الخليج للسيدة الطاهرة

أما المقام سندسي

و خد في حضنك جناين قد ما تقدر

أخضر في أخضر

و من كم الهلال زهرة

في المغربية الشعاع و الضل لما يطول

أرفع إيديّا و أقول

يا رب

خلّي المراكب تهتدي للبر

خلي النايات اللي تمدح في النبي تخضر

في الفجر و النور

و الضلام بيزول

برفع إيديّا و أقول

يا رب

خلّي المراكب كلها تبحّر

خلي النبات اللي بيحب النبي يزهّر

كلامي في كل مرة بالأمل موصول

هداني في الدعوتين

أكرم نبي و رسول

يا أهل الأمانة و الندى و الشوق

يا مجمعين الشمل في الحضرة الزكية

أول ما نبدي القول

نصلّي على النبي

سيّد ولد عدنان .. رسول الله

المصطفى المختار يقوم الليل

و يقوم معاه المؤمنون الصحابة

و أنا معاهم في أنين الربابة

أنا عيني دارت

ياما دارت عيني

على جموع الذكر و الحلقات

و لقيت في قلبي رسم كل الآيات

الله بذكره تطمئن القلوب

إلهي قادر يمحي كل الذنوب

أنا كنت يوم بحلم بكل الزمان

و ماشي أستغفر في ألف أدان

و دخلت بيت رحب الفناء و الباحة

يا أهل المروءة و الكرم و السماحة

يا أهل الأمانة و الندى و الشوق

الله

الدنيا غرقت كلها في الضوء

الله

و العنبر الطيب و ريح الجاوي

و الليل سحاب أخضر لطيف الخطاوي

نهر العسل استعطف البساتين

و النخل غنّى و العنب و التين

يا عيني راحت فين

و يا عيني صاحية

يا جنّة الله اللي في كل ناحية

يا فطرة سمحة و إخوات شقايق

قال يا مريدي إن كنت صادق

في بحر عشقك ما تلاقي شاطئ

لا بالقصايد ولا الأغاني

بأي معنى من المعاني

غير الشهيد لا يسمى عاشق

أحلف بنون و المؤمنون

قلبي الليله دي أخضر حنون

يا فطرة سمحة و نفوس رقيقة

أنا لما جيت أخدم الطريقة

شيخنا اللي عارف سر الحقيقة

بسط يمينه و قال يا مريدي

عينك في عيني و إيدك في إيدي

كل الخلايق إخوات شقيقة

أحلف بنون و المؤمنون

قلبي الليله دي أخضر حنون

يا فطرة سمحة و إخوات شقايق

قال يا مريدي إن كنت صادق

في بحر عشقك ما تلاقي شاطئ

لا بالقصايد و الأغاني

بأي معنى من المعاني

غير الشهيد لا يسمى عاشق

أحلف بنون و المؤمنون

قلبي الليله دي أخضر حنون

خدني و عادني

و جاب و ودّى

قال يا مريدي

شوف أي وردة

لا هيّ أكتر ولا هيّ واحدة

مفيش حياة إلّا عند غيرك

تعيش في خيره و يعيش في خيرك

مش باقي منّا غير المودة

أحلف بنون و المؤمنون

قلبي الليله دي أخضر حنون

عيني رأت فجر طول الليل يناديني

يفتح مياديني

ياخدني مني لكل الناس يودّيني

و يردّني في الندا و يقولّي اسعى لي

أقوم من السجدة ماشي في طريق عالي

و أقرا الضحى في الطريق العالي

تهديني

أحلف بنون و المؤمنون

قلبي الليله دي أخضر حنون

_________________________________________________________

من قصيدة : أحلف بنون

ديوان : على أعتاب الحضرة الزكية

شعر : فؤاد حداد

[eskenderella]

سوبر مان

Watch on YouTube :

https://www.youtube.com/watch?v=vrvoJk4_WDg&feature=youtu.be

Listen on SoundCloud :

https://soundcloud.com/elzomor13/eskenderellasuperman

_________________________________________________________

هو انت يا سوبرمان مش ناوي تعقل

ولا تـتهد

ده الكون كله عيان و ماحدش فاضي

العالم بقى نصاب

و كلامه فرانكو اراب

ياما لعبنا حرامية

إمتى ح نلعب أصحاب

طارق ضربوه بالنار

محسن فكوا له زورار

و سنوسي الضو عنده

حساسية م الدولار

حسونه دخل النت

بــذكاءه بهر البت

يرحم حنـَك نبوية

كانت تحلب و تفت

و بقينا كتير نتخم

بين الضحكة و الهم

هو انت يا سوبرمان

مش ناوي بقى تتلم

و رجعنا بالسلامه

و هللنا لــ أوباما

حـنعيش كام قرن تاني

راسنا زي النعامة

دي رعشه و دي هزة

من قنبلة غزة

و ده دمي ماهو نبيت

و ده قلبي مش مـَـزة

_________________________________________________________

قصيدة : سوبر مان

شعر : أحمد حداد

[eskenderella]

الكلب كنيش

Watch on YouTube :

https://www.youtube.com/watch?v=ulVdShtNsyE

Listen on SoundCloud :

https://soundcloud.com/elzomor13/chfdgzshbtqz

_________________________________________________________

الكلب كنيش و الهم مفيش

و الدنيا لسه فيها حشيش

الضرب هناك ، و إحنا الأصحاب

و أهو أحسن شيء إننا هنعيش

هنعيش بأنفاس أمريكا

أوامرها بدل المزيكا

تحت الطلب دايماً علشان

تمسح دماغنا بأستيكة

ألعاب دمار لكن رايقة

تمحينا لكن مش فارقة

و نسلهم أقصى طموحنا

و نجيب عيون خضرا و زرقا

يا فتوة .. ياللي اسمك عدوي

يا فتوة ياللي اسمك عدوي

كل التفاهم بقى نووي

هيجرّبوه فينا قريب

في حفلة العنف السنوي

ال إف ستّاشر هتبوس

أرضك على قد ما هتعوز

الهم ضحّكني و فجأة

بكّتني أغنية فيروز

يا سنين كئيبة يا ريت متجيش

عدّي الفرح من غير تفتيش

يا رب نرجع زي زمان

الكلب كنيش و الهم مفيش

و الدنيا لسه فيها حشيش

الضرب هناك و إحنا الأصحاب

و أهو أحسن شيء إننا هنعيش

هنعيش هنعيش

_________________________________________________________

قصيدة : الكلب كنيش

ديوان : حبّة تراب

شعر : أحمد حداد

[eskenderella]

بورتريه ( فان جوخ )

Watch on YouTube :

https://www.youtube.com/watch?v=mJc018YB_8M

- Solo Hazem Shaheen & Ahmed Haddad :

https://www.youtube.com/watch?v=yLKXpCcHz50

Listen on SoundCloud :

https://soundcloud.com/mohamed-el-zomor/rhzwul3clxh1

_________________________________________________________

فان جوخ صحّي مونيه

يا بيكاسّو نايم ليه

يا سلفادور يا جويا

آه يا بنات يا بنات

فضّوا الطريق ليها

لا مؤاخذة يا آنسات

حلوين أوي عنيها

و شعرها المموّج

و حَمار الشفتين

فان جوخ صحّي مونيه

يا بيكاسّو نايم ليه

يا سلفادور يا جويا

ارسملي بنت الإيه

بحبها يا بنات

و الحب سهمدني

كل السما أموات

لكن بتحسدني

و المتوفّي بيرقص

لمّا تسلّم عليه

فان جوخ صحّي مونيه

يا بيكاسّو نايم ليه

يا سلفادور يا جويا

ارسملي بنت الإيه

كل الألوان خدوها

و ورق فاضي و باليتة

قبل ما تمشي ارسموها

مش رسمة واحدة لأ ستة

خدوها قبل ما تمشي

ميت مليون بورتريه

فان جوخ صحّي مونيه

يا بيكاسّو نايم ليه

يا سلفادور يا جويا

ارسملي بنت الإيه

_________________________________________________________

قصيدة : فان جوخ

شعر : أحمد حداد

[eskenderella]

آه يا عيني آه يا ليل

Watch on YouTube :

https://www.youtube.com/watch?v=SoGsjfXRQ2Q

Listen on SoundCloud :

https://soundcloud.com/amr-ezzat-1/hmgakmhgcogu

_________________________________________________________

آه يا عيني و آه يا ليل

حنجرتي عاشقة الميكروفون

ضاع نص عمري في ربع تون

لو غنوتي تبكّي العيون

خد رموشي مناديل

آه يا عيني و آه يا ليل

عشت أغنّي لألف جيل

يا دنيا حلوة و مؤسفة

يا عبط على فلسفة

مع إن عيشتك مقرفة

البعد عنك مستحيل

آه يا عيني و آه يا ليل

عشت أغنّي لألف جيل

مفيش عشّاق على الكورنيش

ولا حتى في شارع الجيش

كل الأحبة اتنين اتنين

و مزنوقين في طابور العيش

آه يا عيني و آه يا ليل

عشت أغنّي لألف جيل

عملت الشاي و مشربتوش

عزفت الناي و مسمعتوش

و حلمي عدا و ما شوفتوش

قالوا لو عطشت اشرب م النيل

آه يا عيني و آه يا ليل

عشت أغنّي لألف جيل

شفتك ظاهرة وسط الناس

في المظاهرة و بعد الكاس

ليه يا مصر بقينا مداس

و ضحكنا بقى دمه تقيل

آه يا عيني و آه يا ليل

عشت أغنّي لألف جيل

_________________________________________________________

قصيدة : آه يا عيني آه يا ليل

شعر : أحمد حداد

[eskenderella]

لبن

Watch on YouTube :

https://www.youtube.com/watch?v=TJzHi2iUmN0

Listen on SoundCloud :

https://soundcloud.com/sheko-alnoby/im70goothcgb

_________________________________________________________

لبن لبن

اشرب يا شاطر يا حسن

لبن لبن

اشرب و دوق طعم الوطن

البوسطجي بطل يدق الباب

لغوا الكلام و الود ويّا الجواب

لكن اللي قال لغوا النهار كداب

داب اللي داب

اشرب لبن

ريحة الحليب مفروشة فوق الإمام

و منشطة في غمرة سرب الحمام

و مجهّزة للنونو صدر المدام

يصحى ينام

يرضع لبن

حليب حبيب طعمه لذيذ و مسكّر

شبهك زمان لو كنت مش متذكّر

اشرب و لو كان البياض اتعكّر

معلش ده فعل الزمن

لبن لبن

اشرب يا شاطر يا حسن

لبن لبن

اشرب و دوق طعم الوطن

لبن لبن

اشرب لبن و كن سعيد

قبل ما تموت

و اما تموت

دلدل رجليك

جوا التابوت

حتقابل اللبّان

و جدك

و البيوت

و ترجع الطفل الكتكوت

نايم مبسوط

و جمبكوا

بايت لبن

لبن لبن

اشرب يا شاطر يا حسن

لبن لبن

اشرب و دوق طعم الوطن

لبن لبن

_________________________________________________________

قصيدة : لبن

شعر : أحمد حداد

[eskenderella]

يا بعضشي

Watch on YouTube :

https://www.youtube.com/watch?v=tIcrvkC6v5M

Listen on SoundCloud :

https://soundcloud.com/mohamed-el-zomor/xgnfzy8nv823

_________________________________________________________

إزاي تشوفني يا بعضشي

بقميص النوم الشفتشي

و أزعل تقولي فرفشي

معطلكشي يا أفندينا

مبروحش سيما ولا جنينة

أنا ماشية على كلمة نينة

لو حد عاكسك خربشي

إزاي تشوفني يا بعضشي

بقميص النوم الشفتشي

و أزعل تقولي فرفشي

لأ ! لحد عندي و اختشي

بتجر ناعم ع المسا

يا الافندي عيب دنا آنسة

مالك رقيق زي النسا

يا بيضة ليه بتوشوشي 

يا بعضشي

في المشربية أنا يوماتي

الهئ و المئ حياتي

و تقولي " شايفة شنباتي

السبع من فوقها مشي "

يا بعضشي

تسرقني و تقول فتشي

و تجيب سوداني و قرمشي

و بقالنا ساعة على كده

و المحشي مش راح يتحشي

يا بعضشي

يابو وردتين و شنب تفّة

و بدلة جاية من الرفّة

أنا شايفة ف عنيك الزفة

وإشي كوشة و جرنة و إشي

يا بعضشي

أنا ست بيت صيفي و شتوي

فاتحة الببان بس انتا انوي

بطبخ حمام و أعرف أكوي

يا هدومه يلّا اتكرمشي

إزاي تشوفني يا بعضشي

بقميص النوم الشفتشي

و أزعل تقولي فرفشي

لأ ! لحد عندي و اختشي

عايزني هات شجر النعناع

و مستكة و شبشب بصباع

أنا عمري ماجي بلوي دراع

يابو الجاكتة المشمشي

إزاي تشوفني يا بعضشي

بقميص النوم الشفتشي

و أزعل تقولي فرفشي

لأ ! لحد عندي و اختشي

_________________________________________________________

قصيدة : يا بعضشي

من : اسكتش عشريناتي

شعر : أحمد حداد

[eskenderella]

حارة الشقفتية

Watch on YouTube :

https://www.youtube.com/watch?v=phXfSdFQ2T4

Listen on SoundCloud :

https://soundcloud.com/elzomor13/7aretelsh2fteya

_________________________________________________________

رجلي ضحكت عليّا

و خدتني ف خطوتين

لحارة الشقفتية

و أمّا كتر الكلام

خدتني لحد النيل

و خدتني للإمام

ساعة نشر الغسيل

أتوبيس أحمر معدّي

و الصبح جديد مندّي

كانت الشمس في ضميري

و صحيت لقيتها في يدي

بيجامات .. كستور تِذاكر

و عنيها مرغرغة

شايل صور و تذاكر

تذكار عصر اتلغى

التلفزيون بيعوي

في نشرة الأخبار

و سوبر مان هينوي

يملى العالم دمار

كل تاريخنا اتسرق

و طفولتنا و شبابنا

و المسرح اتحرق

و فيه جميع صحابنا

نرقص عاملين دماغ

على أنغام عم سام

و الله ولا نسوى صاغ

جوا محل الطعام

يا رجل ما تاخدينيش

يا عين متفكرينيش

بولد فلّاح بفاس

و بنيّة بالكرانيش

مصر بتصعب عليّا

و شايفها بدمعتين

رجلي ضحكت عليّا

و خدتني في خطوتين

لحارة الشقفتية

و حارة علم الدين

_________________________________________________________

قصيدة : حارة الشقفتية

شعر : أحمد حداد

[eskenderella]

يا زين ما قالت مصر في الحواديت

- Watch on YouTube :

https://www.youtube.com/watch?v=tw68hV6jgrs

- Solo by Hazem Shaheen 

https://www.youtube.com/watch?v=NUVKnkGVB5Q

________________________________________________________

يا زين ما قالت مصر في الحواديت

بتخاف من الأحلام

بتخاف من الموتى اللي في التوابيت

بتخاف من الشعرا في ساعات التجلّي

بوطّي صوتي

و أعلّي

و أفتح عينيّ

تملّي

على الجمال اللي بينوّلني طولة العمر

و أقول يا سبحان اللي بدعت السمر

و أقول يا سبحان اللي بدعت البيض

مصر البنات اللي استووا بدري

و الملح بيحلّي بنات بحري

و في الغروب

برج الحمام بيغنّي للقمري

بحب بنت القاهرة

و هيّ راسمة التقل ع الصبيان

في ساعة المرواح

و هيّ راسمة الكحل ف عنيها

و بين عنيها براح 

بحبها فنانة

و أحبها هادية

و أحبها في السطوح

بتغني كما شادية

بحبها شخصيّة

و أحبها فلسفة

و أحبها عصبية

و في الحنان مرهفة

بحبها أمي و أختي و مراتي

و أحبها في قصيدة

و بعيدة و قصادي

بحب بنت البلد

كما عم بيرم قال

و أقعد في وسط البلد

سرحان كما التمثال

بكتب قصيدة غزل

تتقال في أي جمال

نوّلني طولة العمر

يا زين ما قالت مصر في الحواديت

________________________________________________________

قصيدة : يا زين ما قالت مصر

شعر : أحمد حداد

[eskenderella]

مجنون

ًWatch on YouTube :

https://www.youtube.com/watch?v=p0SOWR9Za-Y

Listen on SoundCloud :

https://soundcloud.com/abd-alrhman-zakaria-1/sr66b9cw9mre

_________________________________________________________

مجنون ، مجنون ، مجنون ، مجنون

بتمشى في شارع ريحته ليمون

ولا حد بيتمشى جنبي

و بولع ف فتيلة قلبي

و بغنّي و فاكرنّي

ممنون يا أحلى عيون

يا ريتتنا ناخد أوي على بعض

مجنون .. مجنون

هاتولي مأذون

أكتب كتاب السما و الأرض

مجنون .. ممنون

و مش زعلان

مزعلتش من بلوى كبيرة

ولا جنيّة شريرة

رغم إن في وشي تكشيرة

أنا مش زعلان

طب و المصحف أنا مش زعلان

مش شايف غير ورد قصادي

حتى الزنزانة في عيني نادي

و النشرة فيديو كليب لطيف

و موظف المصلحة هادي

و أنا مش زعلان

مجنون مجنون

و مش سكران

ولا بحلم

ولا مبلبع

مجنون مجنون

يا لاللي آمان

و لجل الضحكة مستبيع

يا تبسطوني يا أبسطكم

من إمتى الغمّة لبستكم

و نفختكوا زي البالونة

إيه رأيكوا لو فسّتكوا

مجنون مجنون

أنا عودي مُنجلي و قوّال

و عودك مفتري و ميّال

يرضيكي يا حلوة نسّهم

و لسه فينا ميت موّال

مجنون مجنون

بدل ما اتشل

و أنا طفل شايب

راضع خل

بموت لكنّي بحييكوا

يمكن غنايا يكون الحل

و نكون أنا و انتا و انتي

و كلنا

بني آدم عادي

زيّنا

لكن مجنون

_________________________________________________________

قصيدة : مجنون

شعر : أحمد حداد

[eskenderella]

جت جت .. ماجتش إن شا الله ما جت

Listen on SoundCloud :

https://soundcloud.com/imadeid/hqkrrnp90d6o

_________________________________________________________

جت جت .. ماجتش إن شا الله ما جت

مطرح ما ترسي هدقّ لها

أنا بعتلها الدعوة

ما جتش هيّ الخسرانة

أنا كنت قصدي أريّحها

أبقى هوا لو حرّانة

في البرد أنا البالطو بتاعها

و في الدموع أنا منديلها

جت جت .. ماجتش إن شا الله ما جت

مطرح ما ترسي هدقّ لها

لو جت هغني و هلاغيها

مجتش دغري راح ألغيها

لو جت هجيب البلادوسة

عشان تنوّر ليالينا

عشرة الاف مليون بوسة

مبوسناهمش لبعضينا

ما جتش برضه يحقّ لها

جت جت .. ماجتش إن شا الله ما جت

مطرح ما ترسي هدقّ لها

أنا هنا ساكن أوضتي

بسمع طلب و الهلالية

لو جت جسّت على أورتي

و حققت جوا عينيّ

راح أخدها ويايا بشويش

ناكل بطاطا

و نخبز عيش

نقطف جوافة في أوائلها

جت جت .. ماجتش إن شا الله ما جت

مطرح ما ترسي هدقّ لها

هدقّ خيمتي قدامها

و هدقّ ع العود أنغامها

و أدقّ وشمها على صدري

و مش هدقّ على كلامها

و الدقّة هفرشها ف حجري

و سميطة و جنينة و نجري

و أقعد في حجرها و أحكيلها

جت جت .. ماجتش إن شا الله ما جت

مطرح ما ترسي هدقّ لها

و يوم ما جت .. جت ملقتنيش

لقت دموع الناس بتجيش

صوت همهمة و رادّين الشيش

لسّه النهاردة يا ولداه

فتحنا شبابيكنا و لقيناه

في الجو طاير من غير ريش

سافر و خد غنوته ويّاه

كان نفسه تيجي و هوّ يعيش

________________________________________________________

قصيدة : الدقة

شعر : أمين حداد

ديوان : حلاوة الروح

[eskenderella]

إحنا الشعب

Listen on SoundCloud :

https://soundcloud.com/mohamed-el-zomor/zhmzsktuq0zh

_________________________________________________________

احنا الشعب احنا الشعب

قلب وقلب وقلب وقلب

ماشيين ع الأرض تاريخ موصول

خطوتنا نبض يدق طبول

 قدامنا القاتل والمقتول

والمجهول ما بقاش مجهول

قلب وقلب وقلب وقلب

الشعب شوارع حاضنة بيوت

أصواته هدير من بعد سكوت

خارجين في مظاهرة ترج الكون

يا نعيش بكرامة يا إما نموت

احنا الشعب احنا الشعب

قلب وقلب وقلب وقلب

الدم شهيد الدم حياة

والثورة طريق الثورة نجاة

حيغيب الظلم وييجى النور

والحرية هي المساواة

احنا الشعب احنا الشعب

قلب وقلب وقلب وقلب

ونقول للورد صباح الورد

أولادنا مددنا وهمَّ الغد

الجدر يمد لسابع جيل

من فجر لفجر الضوء ممتد

احنا الشعب احنا الشعب

قلب وقلب وقلب وقلب

 احنا الشعب احنا الشعب

بنت وابن وأم وأب

 احنا الشعب احنا الشعب

قلب وقلب وقلب وقلب

احنا الشعب احنا الشعب

بنت وابن وأم وأب

_________________________________________________________

قصيدة : إحنا الشعب

شعر : أمين حداد

[eskenderella]

يعني أعمل إيه

Watch on YouTube :

https://www.youtube.com/watch?v=acABbwJK0js

Listen on SoundCloud :

https://soundcloud.com/user832837174/qjycgcway1er

_________________________________________________________

يعني أعمل إيه أنا دلوقتي

يعني أعمل إيه

يا تجيبي قلبي اللي سرقتيه

ناديله

و قوليله بحبك

كده ع المكشوف و المتغطي

و قلبي يرقص مع قلبك

الحب مدرسة مشتركة

إيدي في إيدك و إحنا عيال

و الحب بيحب الحركة

و يحب برضه خلو البال

لكن أعمل إيه

لكن أعمل إيه أنا دلوقتي لكن أعمل إيه

يا تجيبي قلبي اللي سرقتيه يا تنادي عليه

قوللي يا واد ياللي سرقتك

على قلبي أنا دوم على قلبي أنا دوم

اديني ثانية من وقتك

تتك دودوم تتك دودوم

تكتك دودوم دوم راكتكتك

و عيوني أهم جم في شبكتك

يا رب أكون أنا من بختك

و يا رب إنتا تكون بختي

لكن أعمل إيه

لكن أعمل إيه أنا دلوقتي لكن أعمل إيه

يا تجيبي قلبي اللي سرقتيه يا تنادي عليه

غنّيله من فيروز حتة

يا جايبلي سلام كيفك إنتا

عبد الوهاب عاش في الأوهام

كل ده كان ليه ، أو من غير ليه

غنيله حبّينا لفريد

و أم كلثوم ليلة العيد

و مطلب مبيسألش

و بتسأليني بحبك ليه

سؤال غريب مجاوبش عليه

لكن أعمل إيه

لكن أعمل إيه أنا دلوقتي لكن أعمل إيه

يا تجيبي قلبي اللي سرقتيه يا تنادي عليه

_________________________________________________________

قصيدة : يعني أعمل إيه

شعر : أمين حداد

[eskenderella]

مجنون أمنيّات

Watch on YouTube :

https://www.youtube.com/watch?v=Y8SauUaCYso

Listen on SoundCloud :

https://soundcloud.com/ahmedsabri-1/j2zngnnm4mem

_________________________________________________________

هدّى أنوار العيون

يعنى غمّض

انت مجنون أمنيات

اقفل الشبابيك وهات

سافر البحر اللى مستنيك ، من الصيف اللى فات

بس ساب لك

ضلّ شمسية ونسيم

خلى صوت الموج يغنى :

"ياللى مجنون بالتمنى"

سافر الحلم القديم ... اللى مستنيك من الحلم اللى فات

لمّا قال لك

بص للعالم بقلبك

بابتسامة بنت عايشة العمر جنبك

بص للعالم وحبّه واكرهه

واخطفه من شعر تانى

"يا حبيباً زرت يوماً أيكه"

لم أجد إلا الأغانى

وام كلثوم اللى ساكنه الراديوهات

قاعده ويا الجده فى الدور الفوقانى

كل حواديتهم آهات

تنهيدات

صوتهم الهادى يشقر ... ع البنات

يا حبيباً زرت يوماً

بيته فى الملك المظفر ... ذكريات

راديو بيخروش وعالى

قاللى غنوه وأهدهالى

"يا قمر من غير ليالى

لا أبالى بالسهر  .. ويّاك هناك

يا قمر يا غريب وشايب

ليه تفرط فى الحبايب

تبقى خايب .. فى سماك

تبقى دايب فى الثوانى

تبقى تايه يا قمر "

والأغانى بتنتهى وما بتنتهيش

أم كلثوم اللى قالت للهوا "خلينى اعيش" ـ

ردت الشيش فى الإمام ... لمّا شمس الضهر شدّت

ردّت الغنوة يا وردة .. حب صافى وانسجام

والعيال ناموا فى سلام

وانت منهم ، والاّ صاحى

قول فى سرك

"بسمك اللهم بارك فى صباحى"

اشرب الشاى باللبن ويا ابتسام

وابتدى نطق الكلام

واحضن العالم ونادى ... للحمام

ثم ييجى الليل هديه

ينكشف لك أغلى سر

تبقى شايف

كل أحلامك بتمشى فوق ايقاع القلب تسكن ع الشفايف

تملا كل الكون موسيقى

تملا كل الدنيا شعر

_________________________________________________________

قصيدة : مجنون أمنيّات

شعر : أمين حداد