ALV E COTSCHEN
BLOG DA LA LIA RUMANTSCHA SCRIT DA JON DUSCHLETTA POSTA LADINA/ENGADINER POST
RED AND WHITE
The medals are awarded in a sea of red and white, as Austria and Switzerland seem to ski in a league of their own. For most of the other 75 nations it's not the winning but the taking part that counts. They can showcase themselves instead in shops and restaurants all over the village thanks to a local initiative called the Nations-Walk – colorful encounters between locals and guests only steps away from the dichromatic main stage.
La medaglia d’or dals champiunedis mundiels da skis, per quella vain fat bger brimbori. La valur da la medaglia es l’onur da l’atleta, da l’atlet – vain dit. Fotografia: Jon Duschletta
Che banalited! Da profetiser, chi chi guadagna la prosma cuorsa da skis, que saun be ingiuvineders e singuls schurnalists da sport, quels drets, quels chi saun eir, cha’l muond es üna schaibgia, simil ad ün frisbee, be bgerun pü granda. Però, da presümer, cha sül podest da las cuorsas da skis dal champiunedi mundiel a San Murezzan dominessan las culuors alv e cotschen, que savaiva dafatta eau scu «banausa-expert». Austriacas, Canadais ed eir ils Svizzers, tuots portan alv e cotschen – chi in strivlas orizontelas, chi in verticalas e chi – quels chi nu saun as decider – in fuorma d’üna crusch alva sün fuonz cotschen. Ed eir süllas tribünas a Salastrains ho domino ün mer da binderas alv e cotschnas. Tuot la cuolpa d’ün numerus ed alleger public chi sventulaiva üna pruna queders da stoffa cotschna cun sü cruschs alvas. E vais vis quellas cumbinaziuns da culuors sül podest? Ün masdügl sgrischaivel da strivlas, cruschs e föglias in alv e cotschen. Logic cha quell’impreschiun as repeta eir guardand il spievel da las medaglias illa «Posta Ladina»: alv e cotschen tuot que cha l’ögl vezza. Da pür alv e cotschen am vain la sön, che lungurella!
Ma a do sclaridas i’l desert alv-cotschen: «Merci» Frauntscha, «hvala» Slovenia, «takk» Norvegia, «thank you» Stedis Unieus e «dankschön» Principedi da Liechtenstein per quel miel blov. «Tack» Svezia pella crusch melna, e «grazie mille» Italia per dafatta üna strivla verda! Almain vus avais purto düraunt ils ultims dis ün pô culur in quist cumbat alv-cotschen. Ma, insè pudess tuot esser bgerun pü fras-ch, alleger e culurieu. 75 naziuns sun nempe preschaintas als champiunedis mundiels da skis a San Murezzan. E traunter da quellas eir naziuns pü curaschusas a reguard la concepziun da lur culuors naziunelas, scu per exaimpel l’Andorra, l’Azerbaijan, la Bolivia, la Germania (es quella insomma da la partida tar quists champiunedis?) u il Brasil.
Grazcha a l’iniziativa da las indigenas Eveline Fasser Testa, Heidi Kopp e da l’indigen Christian Gartmann, s’haun pudieu preschanter düraunt quists dis las singulas naziuns tar divers affers, butias e restorants in tuot San Murezzan. «Nationen-Walk» ho nom la spassageda sur 84 posts, sustgnieu da la Societed da commerzi e misteraunza da San Murezzan, la Societed da cura e preschanteda da l’«Engadiner Post/Posta Ladina». Divers afferists haun uschè invido ad inscunters traunter la populaziun indigena e giasts culs atlets ed ils funcziunaris da las singulas naziuns. Els tuots insembel haun do als champiunedis ün culurit fantastic e contribuieu lur part a las duos eivnas «festa da skis» cun bgers inscunters, plaschair ed armonia traunter las naziuns. Scha nu füss be na steda quista dominanza alv e cotschna.
Be üna minurited dals arduond 600 skiunzs activs da 75 naziuns es riveda düraunt las ultimas duos eivnas a la fin finela eir sül podest. «Que es oramai part of the game», s’haun dit bgers oters, surtuot quels cullas binderas culuridas, e s’haun partecipos i’l sen sportiv, nempe d’esser sto tiers. Guadagner dessan, scu’l solit, quels alv e cotschens. Fotografia: Jon Duschletta
Hoz dumengia vaun a fin ils champiunedis mundiels da skis cul slalom dals homens. A las 15.00 ho alura lö la ceremonia ufficiela da finischun illa cuntredgia dal böt a Salastrains.
