"ABSEITS" OP KÖLSCH - FÖR DE MÄDCHER: Stell Dir vür, Do stehs im DEICHMANN an dr Kass in dr Schlang. Vür Dir steht de Frau Schmitz, dat widderlije Freesen. Un die is jlich als Nähkste dran bei dr Kasseererin. Op einmol sühs Do im Rejal hinger dr Kasseererin e Paar schicke Schoh, die Do han wills ! Do häs zwar schon jenoch Schoh, ävver die Schoh sin esu schön - die muss Do han, domet et Levve för Dich widder ne Sinn kritt, do jeht keine Wäch dran vürbei !!! Un Do weiss jenau: "ohne DIE Schoh kann ich he NIT erus jon". Dann fällt Dir op, dat de blöd Frau Schmitz, dat widderlije Freesen, vür Dir in dr Schlang die Schoh och jrad entdeck hät ! Se luhrt Dich an als wenn se sare wullt "die Schoh sin mir, die kris Do nit !!!" Die Schoh koste 20 €. Jetz hät ävver jede von Üch zwei Euro zowinnig in dr Täsch, öm de schicke Schoh zo bezahle. Die Schmitz un Do sid jetz beide in dr Täsch noh Jeld am sööke. De Kassiererin luhrt Üch zo un waat jespannt, dat jet passeet...!!! Dich an dr Frau Schmitz, dem Freesen, vürzodrängele mäht keine Sinn, weil Do jo nit jenoch Jeld häs, öm de Schoh zo bezahle. Ding Fründin, die hinge im Lade jrad selvs 5 Paar schicke Schoh anprobiert, kritt endlich met, wat vürren an dr Kass loss is !!! Flöck will se Dir et Jeldbüggelche zowerfe, domet Do de blöd Frau Schmitz övverholle un Dir de schicke Schoh kaufe kanns. Un jetz pass op: Domet dat funktioniert, muss Do dr Jeldbüggel vun Dinger Fründin opfange, sulang der sich noch in dr Luft befing, un dann entweder mit dem Jeldbüggel tirek an dr blöd Frau Schmitz vürbei träcke, odder dr Jeldbüggel flöck övver dem Freesen ihre Kopp hinweg - dr Kasseererin op de Thek schmieße ! Ävver... Sulang Ding Fründin dr Jeldbüggel noch selvs in de Häng hät un der noch nit durch dr Lade am fleeje is, därfs Do Dich zwar NEVVEN dr Frau Schmitz, ävver noch nit VÜR dem widderlije Freese befinge.... ...süns bes Do im ABSEITS !
origamiaround
dailybridgerton
gummygunk
ellievsbear
theartofmadeline
blakekathryn
titsay