... á leiðinni er

Draugasögusmiðja Draumalands, Eldflaugarinnar og Halastjörnunnar veturinn 2014-15

[eitthvadillt-blog]

Höfundarnir: Marta Björg

Þetta er Marta Björg. Hún er níu ára og einn af höfundum Eitthvað illt á leiðinni er. Undraheimur minn - Tommi Teits, sem Gerður Kristný íslenskaði er uppáhaldsbókin hennar. Henni finnst skemmtilegt að skrifa því það er góð leið til að nota ímyndunaraflið meira. Ef hún mætti skrifa bók um hvað sem er þá myndi hún skrifa um drauga. Ein sagan úr Grænu höndinni, Lifrin úr frænku er hræðilegasta draugasaga sem hún hefur heyrt. Það hræðilegasta sem Marta getur ímyndað sér er að mamma og pabbi myndu deyja.

Eitthvað illt á leiðinni er er nú fáanleg í öllum helstu bókabúðum.

[eitthvadillt-blog]

Bókasafnsdraugurinn

Taktu þátt í draugasögukeppni Borgarbókasafnsins og skrifaðu þína eigin draugasögu. Verðlaun eru í boði. Samkeppnin er opin öllum börnum og einu skilyrði sögunnar eru að hún fjalli um draug á bókasafni. Það er gott að hafa eftirfarandi í huga:

Er þetta gamalt eða nýtt bókasafn? Hefur það áhrif á draugaganginn?

Kemur draugurinn bara fram á nóttinni og skilur eftir sig verksummerki eða verður fólk vart við hann á daginn?

Hvernig vera/manneskja myndi ásækja bókasafn? Hvað vill draugurinn?

Hvað myndi draugur á bókasafni gera? Hrindir hann bókum úr hillunum eða les hann þær?

Draugasögur mega vera einfaldari en venjulegar sögur og þurfa ekki endilega að hafa upphaf, miðju og endi. Hræðilegustu draugasögurnar útskýra heldur ekki allt heldur skilja lesandann eftir í óvissu.

Aðaláherslan ætti að vera á sögusvið (hvar og hvenær sagan gerist) og andrúmsloft.

Venjulegar aðstæður, þar sem eitthvað smávegis er óeðlilegt, eru venjulega draugalegri en kastalar og kirkjugarðar. Ímyndaðu þér aðstæður sem þú þekkir, en breyttu svo einhverju til að gera þær að einhverju leyti óeðlilegar (á bókasafninu gætu t.d. gangarnir verið of langir eða þröngir, bækurnar of stórar, allt of mikið eða lítið af fólki, starfsfólkið of þögult o.s.frv).

Vertu óhrædd/ur við að nota það sem þú sjálf/ur óttast. Hugsaðu um eitthvað skipti þegar þú varst hrædd/ur. Af hverju varstu hrædd/ur? Hvernig leið þér? Hvernig brástu við? Sögur eru alltaf lang mest sannfærandi þegar höfundurinn byggir þær á eigin reynslu.

Kveikjur sem má nota:

Krakkar sem eru alltaf á bókasafninu rekast allt í einu á bók uppi í hillu sem þau hafa aldrei áður séð þrátt fyrir að þekkja úrvalið vel. Hún er samt gömul og rykfallin og lítur út fyrir að hafa verið þarna lengi. Þegar þau opna hana þá….

Þú ert búin/n að sitja á bóksafninu djúpt sokkin/n í spennandi bók (kannski draugasögur) og þegar þú klárar tekurðu eftir því að það er búið að loka bókasafninu. Það er læst og þú ert ein/n inni. Eða hvað…?

Þú ert að ráfa um bókasafnið og sérð dyr úti í horni/nýjan hnapp í lyftunni sem á stendur „Lesstofa - ALGJÖR ÞÖGN!“ Þú ert forvitin/n og ákveður að opnda dyrnar/ýta á takkann…

Sögunum má skila í næsta útibú eða í tölvupósti til [email protected] merkt „Bókasafnsdraugurinn“. Skilafrestur er til fimmtudagsins 30. apríl.

[eitthvadillt-blog]

Höfundarnir: Gunnlaugur Jón

Þetta er Gunnlaugur Jón. Hann er níu ára (að verða tíu) og einn af höfundum Eitthvað illt á leiðinni er. Hobbitinn eftir J.R.R. Tolkien er uppáhaldsbókin hans og það skemmtilegasta við að skrifa finnst honum að fá að hugsa. Ef hann mætti skrifa bók um hvað sem er þá myndi hann skrifa um ungling og draug. Gunnlaugur er ekki viss hvað draugasaga honum finnst hræðilegust en það hræðilegasta sem hann getur ímyndað sér eru dónakallar.

Hjálpaðu okkur að koma sögunni hans Gunnlaugs og 18 annarra ungra höfunda út með því að kaupa bókina í forsölu hér.

[eitthvadillt-blog]

Höfundarnir: Svanhildur

Þetta er Svanhildur Dóra. Hún er níu ára og einn af höfundum Eitthvað illt á leiðinni er. Reisubók Ólafíu Arndísar eftir Kristjönu Friðbjörnsdóttur er uppáhaldsbókin hennar. Henni finnst skemmtilegt að skrifa því þá getur hún búið til sína eigin sögu og látið hvað sem er gerast. Ef hún mætti skrifa bók um hvað sem er þá myndi hún skrifa um drauga og afturgöngur því það er svo spennandi. Bara Sara eftir Gerði Kristnýju úr bókinni Draugurinn sem hló er hræðilegasta draugasaga sem hún hefur heyrt. Svanhildur er hræddust við að vera stödd í snákagryfju fullri af eitursnákum, sem bíta til blóðs, og morðóðum ljónum.

Hjálpaðu okkur að koma sögunni hennar Svanhildur og 18 annarra ungra höfunda út með því að kaupa bókina í forsölu hér.

[eitthvadillt-blog]

Höfundarnir: Iðunn

Þetta er Iðunn Gróa. Hún er níu ára og einn af höfundumEitthvað illt á leiðinni er. Rottuborgari eftir David Walliams er uppáhaldsbókin hennar og það skemmtilegasta við að skrifa finnst henni vera að fá að ráða því sem gerist í sögunni. Ef hún mætti skrifa bók um hvað sem er þá myndi hún skrifa um krakka sem lenda i ævintýrum. Djákninn á Myrká er hræðilegasta draugasaga sem hún hefur heyrt og sjálf er Iðunn hræddust við að deyja.

Hjálpaðu okkur að koma sögunni hennar Iðunnar og 18 annarra ungra höfunda út með því að kaupa bókina í forsölu hér.

[eitthvadillt-blog]

Höfundarnir: Amelía

Þetta er Amelía. Hún er níu ára (að verða tíu) og einn af höfundum Eitthvað illt á leiðinni er. Hobbitinn eftir Tolkien er uppáhaldsbókin hennar og það skemmtilegasta við að skrifa finnst henni vera að geta búið til ævintýri. Ef hún mætti skrifa bók um hvað sem er þá myndi hún skrifa um skepnur í öðrum heimi. Hræðilegasta draugasagan sem hún hefur heyrt var í bókinni Draugurinn sem hló.

Hjálpaðu okkur að koma sögunni hennar Amelíu og 18 annarra ungra höfunda út með því að kaupa bókina í forsölu hér.

[eitthvadillt-blog]

Þrír fulltrúar höfundanna okkar fóru í gær í myndatöku og viðtal fyrir krakkasíðu Fréttablaðsins. Auðvitað stóðu þau sig með prýði og viðtalið verður hægt að lesa í Fréttablaðinu laugardaginn 1.. apríl.

[eitthvadillt-blog]

Höfundarnir: Víkingur Breki

Þetta er Víkingur Breki. Hann er níu ára og einn af höfundum Eitthvað illt á leiðinni er. Þín eigin þjóðsaga eftir Ævar Þór Benediktsson er uppáhaldsbókin hans og það skemmtilegasta við að skrifa finnst honum að gera sögur fyrir aðra til að lesa. Ef hann mætti skrifa bók um hvað sem er þá myndi hann skrifa um mann sem reyndi að bjarga jörðinni. Lifrin úr frænku (úr Grænu höndinni) er hræðilegasta draugasaga sem hann hefur heyrt. Það er því ekki skrýtið að það hræðilegasta, sem Víkingur Breki getur ímyndað sér, er dauð kona sem gengur aftur.

Hjálpaðu okkur að koma sögunni hans Víkings og 18 annarra ungra höfunda út með því að kaupa bókina í forsölu hér.

[eitthvadillt-blog]

Höfundarnir: Steinunn Margrét

Þetta er Steinunn Margrét. Hún er níu ára og einn af höfundum Eitthvað illt á leiðinni er. Tímakistan eftir Andra Snæ er uppáhaldsbókin hennar og það skemmtilegasta við að skrifa finnst henni vera að geta ímyndað sér hvað sem er. Ef hún mætti skrifa bók um hvað sem er þá myndi hún skrifa um vini sem byggju í skrýtnum bæ. Henni finnast draugasögur ekkert sérstaklega hræðilegar en Græna höndin kemst þó næst því. Steinunn Margrét verður stundum hrædd þegar hún horfir á sjónvarpið því hún heldur að eitthvað hræðilegt gæti gerst.

Hjálpaðu okkur að koma sögunni hennar Steinunnar og 18 annarra ungra höfunda út með því að kaupa bókina í forsölu hér.

[eitthvadillt-blog]

Eitthvað illt á leiðinni er - Karolina Fund

Söfnunarsíðan okkar er komin upp!

[eitthvadillt-blog]

Hann Sigmundur, sem myndskreytti þrjár sögur í bókinni okkar, útbjó þessa skemmtilegu skýringarmynd til að útskýra ferlið við að myndskreyta sögur.

Til að skoða myndina almennilega þarf að smella hér.

[eitthvadillt-blog]

Bókin er farin í prentun!

Undanfarna viku höfum við verið að leggja lokahönd á bókina og í gær fórum við Steinþór í prentsmiðjuna Odda að samþykkja próförkina. 

Það getur alltaf eitthvað farið úrskeiðis þegar verið er að vinna skjölin og senda þau á milli manna. Því þarf prentsmiðjan að prenta út svokallaða próförk sem við svo skoðum vel til þess að sjá hvort allar blaðsíðurnar séu á réttum stað, hvort litirnir séu réttir og orðin líka.

Maður vill vera með allt á hreinu áður en maður lætur prenta 2.500 eintök af bók.

[eitthvadillt-blog]

Hér eru dæmi um önnur verkefni sem myndskreytarnir okkar hafa verið að gera.

[eitthvadillt-blog]

Myndskreytar

Nú er komin mynd á listamannahópinn okkar. Sjö ólíkir en bráðflinkir listamenn vinna nú hörðum höndum að því að myndskreyta bókina. Þetta eru þau Erla María Árnadóttir, Fanney Sizemore, Inga María Brynjarsdóttir, Linda Ólafsdóttir, Sigmundur Breiðfjörð, Sigrún Eldjárn og Þórey Mjallhvít. Við hlökkum mikið til að sjá afraksturinn á næstu dögum.

[eitthvadillt-blog]

Linda Ólafsdóttir og Erla María hafa bæst í hóp þeirra listamanna sem eru að myndskreyta bókina okkar. Markús heimsótti vinnustofuna þeirra og Linda sýndi honum skyssurnar að fyrstu myndinni, sem var tilbúin í bókina.

[eitthvadillt-blog]

Í vikunni hittust allir höfundar bókarinnar (að undanskildum nokkrum sem forfölluðust) í fyrsta sinn í Hólavallakirkjugarði, þar sem Markús fór með þá í draugagöngu. Við byrjuðum á stuttri og gamansamri draugasögu úr Grænu höndinni, sem heitir Eftirförin í kirkjugarðinum, og svo var gengið að leiði Steinunnar frá Sjöundá. Þar fengu krakkarnir að heyra af misgjörðum og örlögum Steinunnar og Bjarna og vofu Steinunnar, sem sögð var ásækja jarðafarir í Dómkirkjunni þar til hún fékk loks hvíld í vígðri mold. Þvínæst heimsóttum við klukkuportið og heyrðum af líkhúsinu, sem lengi stóð þar. Í nokkur ár fóru skírnir, fermingar, brúðkaup og messur fram þar inn um líkin þegar kirkju vantaði í Reykjavík og það heyrðist í bjöllunni um alla Reykjavík þegar hringt var í útfarir. Líkhúsið er löngu farið en bjallan stendur enn þó hún hafi ekki fengið að hljóma um árabil. Neðst í garðinum sést yfir Tjörnina og þar sagði Markús mildaða útgáfu af „sönnu“ sögunni um útburðinn sem skríður að leiði móður sinnar þegar frýs á Tjörninni (fullorðinsútgáfu sögunnar er að finna í bókinni Reimleikar í Reykjavík eftir Steinar Braga). Við heimsóttum líka leiði Guðrúnar Oddsdóttur, vökumanns garðsins, heyrðum af hverju og hvernig íslenskir galdramenn kváðu upp uppvakninga og að lokum las Markús draugasöguna Kólerukirkjugarðinn eftir Atle Hansen á þeim sem slóðum sem fórnarlömb spænsku veikinnar eru grafin.

(Það má líka taka það fram að til er frábær draugasaga í fullri lengd eftir Gerði Kristnýju sem gerist í og við Hólavallagarð enda er titill hennar Garðurinn.)

[eitthvadillt-blog]

Í dag fórum við Steinþór hönnuður upp í prentsmiðjuna Odda og hittum Grím og Díönu, sem sjá til þess að bókin sé prentuð alveg eins og við viljum. Í þetta skiptið vorum við að velja pappírstegund í bókakápuna. Þá er úr vöndu að ráða og öruggast að skoða bæði vel og snerta pappírinn til að finna hvernig hann er viðkomu.