DRRM Kwentuhan

Barangay Disaster Risk Reduction and Management ng Talisay

[erica-mae-santos]

Masasabi ko na naging masagana ang aking DRMM Kwentuhan sa Talisay Barangay Hall kasama si Ginoong Sacdalan—ang Barangyay Konsehal. Marami akong nakuhang bagong kaalaman ukol sa mga preparasyon na inihahanda ng mga nangagngasiwa para sa komunidad. Gayunpaman, nakita ko ang Barangay Talisay—ang komunidad na aking kinabibilangan at kinalakhan—sa panibagong perspektibo sapagkat sinadya ko na lumibot sa buong Barangay at nakita ito muli sa bagong pananaw. Mahalaga ang aking karanasan sa aktibidad na ito sapagkat ito ay nagbigay daan sa akin upang makakuha ng mga bagong impormasyon at pananaw sa aking sariling komunidad. 

[erica-mae-santos]

Bukod sa historikal na destinasyon ay maipagmamalaki ng Barangay Talisay ang kanilang pagpapahalaga sa sports; it ay mga basketball courts na makikita sa Barangay at ang pinakasikat dito ay ang court sa Phase III, Talisay—madalas dito ay marami naglalaro dahil sa malaking espasyo na sakop ng court at sa maganda at maayos na bubungan nito. Sa court na it ay marami ring ibang itinatanghal katulad na lamang ng mga programang pang-aliw o kaya ay pagsasagawa ng misa. Maliban rito ay mayroon ding tennis court na matatagpuan lamang sa likod ng Balanga Elementary School. 

[erica-mae-santos]

Maipagmamalaki ng Barangay Talisay ang ‘Bataan World War II Museum’ kung saan ang mga aytem na narito ay patungkol sa panahon ng ikaliwang pandaigdigan digmaan. Partikular din na ipinakikita rito ay ang Bataan bilang huling lugar na sumuko sa mga Hapon noong mga panahon na iyon; kilala ang Bataan sa katapangan at kagitingan na ipinamalas nito noong WWII. Ang museo na ito ay matatagpuan sa loob ng Balanga Elementary School.

Image source: https://www.inspirock.com/philippines/balanga-city/bataan-world-war-ii-museum-a8301613107

[erica-mae-santos]

Ito ay isang halimbawang lugar sa Barangay Talisay na dapat pang bigyan ng tuon sa proper waste disposal. Marami ang mga kalat na makikita partikular na sa mga plastics at disposable items—ito pa ay sa tabi ng free-flowing water. Ang halimbawang ito ay kaugnay sa pangangailangan ng mga kanto sa Barangay Talisay upang mabawasan at maiwasan ang kapahamakan pagdating ng bagyo sapagkat mas lalong madaling bahain ang lugar kung walang maayos na pamamaraan ng pagtapon ng basura. 

[erica-mae-santos]

Kapag malala ang mga bantang panganib sa Barangay Talisay, halimbawa na lamang ay kapag sobra ang lakas ng bagyo, ay nagsasagawa ng ebakwasyon. Binibigynag prioridad ang mga mamamayan na nasa lugar na mas maaaring maapektuhan nito tulad na lamang ng mga nasa tabing-ilog o tabing-dagat. Ang ebakwasyon ay ginaganap sa Balanga Elementary School, particular na sa may audio visual room ng paaralan na ito sapagkat ito ay nakataas at hindi kaagad natutuntong ng baha. Ang BES ay tamang tama rin bilang ebakwasyon sa mga ganitong pangangailangan sapagkat madali lamang siyang marating, madaling makapasok, at maluwag ang lugar. Sa mga nakaraang pangyayari na rin ng pagdagsa ng bagyo at maayos itong naging lugar bilang ebakwasyon.

Noon ay malimit na bahain ang Barangay Talisay kapag may dumadagsang bagyo. Ngayon ay unti-unti naiaayos ang mga daan at ang mga kanal; dahil rito ay hindi na ganoon bahain ang Barangay Talisay, ang mga binabaha na lamang ay iyong mga maliit na kanto na ngayon ay pinaplano na nilang ayusin. Patuloy ang progreso ng Barangay Talisay laban sa mga bantang panganib at laban mula sa mga sakuna.

Ang mga mamamayan ay maayos naman na sumusunod sa mga ordinansang ipanapatupad subalit masasabi na kulang pa ang mga paghahanda laban sa mga bantang panganib ngunit ang mahalaga pa rin ay binibigyang pansin ito ng mga nangagasiwa at pinagpaplanuhan, kailangan lang talaga na ito ay madagdagan pa.

[erica-mae-santos]

Madalas na inaapektuhan ng bagyo ay iyung mga maliliit na kanto dahil sila yung malimit na bahain kaagad, ito rin ay dahil sa yung kanto na iyon ay pababa ang daan sa pagpasok kung kaya naman ay kailangan na maigawa ang daan na iyun sa pamamagitan ng pagtaas ng daan upang pumantay ito sa main road at kailangan din na magawan ang mga kanto na iyon ng maayos na drainage system kasama na rito dapat ay ang proper waste disposal dahil ang mga ito ay magkakaugnay sa paraan na kung mayroong proper waste disposal ay mababawasan at maiiwasan iyung mga kalat tulad ng plastics at disposable items na masama sa kanal at dumagdag pa lalo sa pagbaha ng lugar. Sa mga lugar na ito ay maaapektuhan, syempre, ang mga mamamayang nakatira rito sa mga kantong ito. Mahalaga na masolusyunan ito sapagkat sa progreso ng isang komunidad ay dapat kasama ang lahat—dapat na inklusibo sap ag-unlad.

Ang pagtama ng mga sakuna sa mga mamamayan ay kailangan ng agad na atensyon sapagkat kung hindi maagapan ang paglaganap ng sakuna ay darami pa ang maaapektuhan at kung titignan sa macro level ay magkakaroon ng negatibong epekto ‘di lamang sa pangindibidwal na pangkabuhayan ng mga mamamayan ngunit pati na rin sa serbisyong panlipunan dahil nga sa kawalan ng kakayahan ng mga mamamayang naapektuhan ng sakuna na makagawa at makapagtrabaho.

[erica-mae-santos]

Bilang requirement sa UST NSTP ay tumungo ako sa Barangay Hall ng aming komunidad upang makipagkwentuhan ukol sa Disaster Risk Reducation and Management Plan na mayroon sa amin. Kinunsulta ko ang isang Barangay Konsehal na si Ginoog Lee Sacdalan at pinahayag niya ng malinaw at ekstensibo ang mga kanyang sagot sa aking mga katanungan. 

Ayon kay Ginoong Sacdalan, kadalasan ang mga bantang panganib na dumadagsa sa barangay ng Talisay ay ang mga bagyo at pangalawa na rito ay ang mga lindol. Bagaman, higit na nakaaalarma ang mga lindol sapagkat walang tiyak na panahon o oras kung kailan ito dadagsa—kumbaga walang makapagsasabi, ‘di tulad kapag bagyo, kung kelan at kung gaano kalakas ang tama ng lindol. Gayunpaman, ipinakakalat ang mga bantang sakuna sa Barangay Talisay sa pamamagitan ng pagiikot sa Barangay habang bukas ang sirena at inaanunsyo ang balita. Pagdating sa bagyo ay mayroon namang  mga panahong nakatakda na na inaasahan ito, tulad ng mga buwan ng Hunyo at Hulyo, minsan ay pati sa mga “BER” months.