Untitled

[pachaiboomi]

கோடை உழவு கோடி நன்மை தரும்!

தமிழகத்தின் சாகுபடி நிலப்பரப்பில் சுமார் 50 விழுக்காடு மானாவாரி ஆகும். மானாவாரி வேளாண்மையில் விளைச்சல் என்பது, அங்கே பெய்யும் மழையைப் பொறுத்தே அமையும். பயிரின் குறிப்பிட்ட வளர்ச்சிப் பருவத்தில் மிக அதிகமாகவோ அல்லது குறைவாகவோ மழை பெய்தால், பயிரின் வளர்ச்சிப் பாதிக்கப்படும். மழையின் அளவு குறைவாகவோ அல்லது சீரற்றோ இருப்பின், மானாவாரிப் பயிர் மகசூல் வெகுவாகப் பாதிக்கப்படும். இத்தகைய சூழலில்,…

கோடை உழவு கோடி நன்மை தரும்!

[pachaiboomi]

கோடையில் கோழிகள் பராமரிப்பு!

கோடைக்காலத்தில் அதிகளவில் வெப்பத் தாக்கத்துக்கு உள்ளாகும் கோழிகள், வெப்ப அயர்ச்சியால் பாதிக்கப்படும். பகலில் உண்பதும் குறைவதால் உடல் எடையும் குறையும். எனவே, கோழிகளுக்கு உச்சி வெய்யில் நேரத்தில் தீவனத்தை அளிக்கக் கூடாது. இரவிலும், விடியற் காலையிலும், விளக்கொளியிலும் தீவனத்தை அளிக்க வேண்டும். அதாவது, வெய்யில் குறைந்த நேரத்தில் கோழிகள் நான்றாகத் தீவனத்தை எடுத்துக் கொள்ளும், வெய்யில் காலத்தில்…

கோடையில் கோழிகள் பராமரிப்பு!

[pachaiboomi]

அறுவடைக்குப் பிறகு நாவற் பழங்களைக் கையாளும் முறைகள்!

நாவற்பழம் (Syzygium cumini) சத்துகளும் மருத்துவக் குணங்களும் நிறைந்த வெப்ப மண்டலப் பழமாகும். இது, கருநிறம், துவர்ப்புச் சுவை மற்றும் அதிக நோயெதிர்ப்புக் கூறுகள் காரணமாகச் சிறப்பிடம் பெற்றுள்ளது. வைட்டமின்கள், தாதுகள் மற்றும் உயிர்ச் செயலூக்கச் சேர்மங்கள் இதில் அதிகமாக இருக்கின்றன. குறிப்பாக, இரத்தச் சர்க்கரைக் கட்டுப்பாட்டில், இதன் பாரம்பரியப் பயன்பாடு குறிப்பிடத்தக்கது. உலகளவில் பெருமளவில்…

அறுவடைக்குப் பிறகு நாவற் பழங்களைக் கையாளும் முறைகள்!

[pachaiboomi]

சன்னல் ஓரத்தில் சத்துச் சுரங்கம்!

இன்றைய அவசர உலகில், உடலுக்கு நலம் பயக்கும் உணவைத் தேடுவோர்க்குக் கிடைத்த ஒரு வரப்பிரசாதம் தான், மைக்ரோ கிரீன்ஸ் என்று அழைக்கப்படும் நுண் கீரைகள். இவை, சாதாரணக் கீரைகளை விடப் பல மடங்கு சத்துகள் நிறைந்தவை. உலகெங்கிலும் உள்ள நுகர்வோரின் ஆயுட் காலத்தையும் உடல் நலத்தையும் அதிகரிக்க உதவும் பல்வேறு சத்துகளைக் கொண்ட தனித்துவ உணவாக நுண் கீரைகள் வகைப்படுத்தப்படுகின்றன. இவை, மிகவும் குறைந்த செலவில்…

சன்னல் ஓரத்தில் சத்துச் சுரங்கம்!

[pachaiboomi]

நீரிழிவு நோய்க்கான எளிய சித்த மருத்துவம்!

இங்கே நீரிழிவு நோயைப் போக்க உதவும் எளிய மருத்துவ முறைகளைப் பற்றிப் பார்க்கலாம். தினமும் 1-3 தேக்கரண்டி வீதம், கோவைக்காய்ச் சாற்றைனை அருந்தி வரலாம். கேழ்வரகுக் கஞ்சி, அடை போன்றவற்றை அன்றாட உணவில் சேர்த்துக் கொள்ளலாம். தினமும் இருவேளை 2-4 கிராம் நாவல் கொட்டைப் பொடியை 50 மி.லி. வெந்நீரில் கலந்து குடித்து வரலாம். நிழலில் உலர்த்தித் தயாரித்த மாங்கொழுந்துப் பொடியை, தினமும் இருவேளை 1-3 கிராம் வீதம்…

நீரிழிவு நோய்க்கான எளிய சித்த மருத்துவம்!

[pachaiboomi]

கோடையில் பன்றிகள் பராமரிப்பு!

வியர்வைச் சுரப்பிகள் இல்லாத பன்றிகள், கோடைக்கால வெப்பத் தாக்கத்தால் மிகுந்த பாதிப்பை அடையும். அதிக உடல் எடையுள்ள பன்றிகள் மற்றும் இறைச்சிக்காக வளர்க்கப்படும் பன்றிகள், வெப்பநிலை அதிகரிப்பால் ஏற்படும் அசதி நிலைக்கு உட்படும். ஏனெனில், உடல் சத்துகள், பன்றிகளின் வெப்ப நிலையை, சூழ்நிலை வெப்ப நிலைக்கு ஏற்ப மாற்ற அனுமதிப்பதில்லை. இதனால், தினமும் சுமார் ஒரு கிலோ வீதம் உடல் எடை குறையும். பொதுவாகச்…

கோடையில் பன்றிகள் பராமரிப்பு!

[pachaiboomi]

கோடையில் ஆடுகள் பராமரிப்பு

பொதுவாக, வெள்ளாடுகளில் வெப்பத்தின் தாக்கத்தால் ஏற்படும் விளைவுகள் சற்றுக் குறைவாகவே இருக்கும். ஆனால், செம்மறியாடுகளில் உடல் ரோமங்கள் அதிகமாக இருப்பதால் அவற்றில் வெப்ப அயர்ச்சியால் ஏற்படும் விளைவுகள் அதிகமாக இருக்கும். கோடை வெய்யிலின் தாக்கம் அதிகமாக இருக்கும் போது, ஆடுகளைக் காலை 6 மணி முதல் 11 மணி வரை மேய்ச்சலுக்கு விடலாம். அதேபோன்று மாலை 3 மணி முதல் 6.30 மணி வரை மேய்ச்சலுக்கு அனுப்பலாம். ஒரே…

கோடையில் ஆடுகள் பராமரிப்பு

[pachaiboomi]

கோடையில் கறவை மாடுகள் பராமரிப்பு!

கால நிலையில் ஏற்படும் மாற்றங்கள் கால்நடைகளுக்குச் சவால்களாகத் திகழ்கின்றன. விலங்குகளின் ஆரோக்கியம் மற்றும் உற்பத்திக்கு, அதிக வெப்பம் பெரும் சவாலாக உள்ளது. கால்நடைகளில் ஏற்படும் பல்வேறு அயர்ச்சிகளில் உயர் வெப்பத்தால் ஏற்படும் அயர்ச்சியே பெருந்துயராக அமைவதுடன் உடலியல் மாற்றங்களையும் ஏற்படுத்துகிறது.   வெப்ப அயர்ச்சியின் அறிகுறிகள் கால்நடைகள் நிழலைத் தேடுதல். அதிகமாக நீரைப் பருகுதல். பசியின்றி…

கோடையில் கறவை மாடுகள் பராமரிப்பு!

[pachaiboomi]

வேலி மசால் சாகுபடி!

வேலி மசாலில் 119.2 சதம் புரதமும், 55.3 சதம் செரிக்கும் தன்மையும் உள்ளன. சுமார் 2 மீட்டர் உயரம் வரை வளரும் இச்செடி, விதைத்த 60 நாட்களில் பூக்கும். இந்த நேரத்தில் அறுவடை செய்தால் மறுபடியும் துளிர்த்து 40 நாட்களில் பூக்கும். வேலி மசாலைக் கம்பு நேப்பியர் புல்லுடன் கலப்புப் பயிராகவும் சாகுபடி செய்யலாம். வேலி மசாலை ஆண்டு முழுவதும் எல்லா வகை மண்ணிலும் பயிரிடலாம். எக்டருக்கு 20 கிலோ விதைகள்…

வேலி மசால் சாகுபடி!

[pachaiboomi]

அகத்திக்கீரை சாகுபடி!

அகத்திக் கீரையில் 36 சதம் புரதமும், 5.5 சதம் கொழுப்பும், 6.40 சதம் நார்ச்சத்தும் இருக்கும். இது, பாசன வசதியுள்ள இடங்களில் நன்கு வளரும். நன்கு வளர்ந்த செடிகளை நமது மார்பளவு உயரத்தில் கிள்ளி விட்டு வாதுகளை உருவாக்குவதன் மூலம் மகசூலைக் கூட்டலாம். அறுவடை செய்த கீரையை 1-2 மணி நேரம் நிழலில் வைத்திருந்து எடுத்து, கால்நடைகளுக்குத் தீவனமாக அளிக்கலாம். சாகுபடி விவரம் நல்ல வடிகால் வசதியுள்ள இடங்களில்…

அகத்திக்கீரை சாகுபடி!

[pachaiboomi]

Integrated Pest Management (IPM) Methods for Controlling Fruit Flies!

Fruit flies are destructive pests that infest a wide range of fruits and vegetables by feeding on their pulp. Their attack leads to fruit rot, oozing of brownish liquid, premature fruit drop, and heavy yield losses. If left unchecked, fruit flies can cause 20–40% yield loss, and in severe cases, damage may reach 90–100%, affecting both field crops and post-harvest produce. Among the major…

Integrated Pest Management (IPM) Methods for Controlling Fruit Flies!

[pachaiboomi]

கால்நடைகளின் தாதுப்புகள் தேவையைச் சரி செய்யும் தாதுப்புக் கட்டி!

செய்தி வெளியான இதழ்: நவம்பர் 2025 கால்நடைகள் உயிர் வாழ, நீர், மாவுச்சத்து, புரதம், கொழுப்பு, உயிர்ச் சத்துகள், தாதுப்புகள் ஆகியன அவசியாகும். இவை, கலப்புத் தீவனம், பசுந்தீவனம் மற்றும் உலர் தீவனம் மூலம் கால்நடைகளுக்குக் கிடைக்கின்றன. தாதுப்புக் கட்டி என்பது, கால்சியம், பாஸ்பரஸ், மெக்னீசியம், இரும்பு, அயோடின், தாமிரம், மாங்கனீசு, கோபால்ட், துத்தநாகம், கந்தகம், ப்ளூரின், செலினியம் ஆகியவற்றை, தேவையான…

கால்நடைகளின் தாதுப்புகள் தேவையைச் சரி செய்யும் தாதுப்புக் கட்டி!

[pachaiboomi]

விதை விற்பனை உரிமம் பெறுவதற்கான விதிமுறைகள்! 

அத்தியாவசியப் பொருள்களான உணவுப் பயிர்கள், பழங்கள், காய்கறிகள், கால்நடைகள், விதைகள், சணல் ஆகியவற்றை, சிவில் சப்ளை அமைச்சகம் 24.04.1983-இல், அத்தியாவசியப் பொருள்கள் சட்டம் 1955-இன் கீழ் அறிவித்தது. அதன்படி அத்தியாவசியப் பொருள்கள் உற்பத்தி, விநியோகம், விநியோகத்தைக் கட்டுப்படுத்துதல் மற்றும் ஒழுங்குபடுத்துதல் மற்றும் விற்பனையாளர்களுக்கு விதை உரிமம் வழங்குதல் அதிகாரம் மத்திய அரசின் கீழ் கொண்டு…

விதை விற்பனை உரிமம் பெறுவதற்கான விதிமுறைகள்! 

[pachaiboomi]

தேசிய விவசாயிகள் தினம் 2025!

ஒவ்வொரு ஆண்டும் டிசம்பர் 23 ஆம் தேதி, இந்தியாவில் தேசிய விவசாயிகள் தினம் கடைபிடிக்கப் படுகிறது. இந்நாள், கிசான் திவாஸ் என்றும் அழைக்கப்படுகிறது. தேசிய விவசாயிகள் தினம் (Farmers Day) 2025 டிசம்பர் 23 ஆம் தேதியை விவசாயிகள் தினமாக அறிவித்ததற்கு காரணமே, நாட்டின் ஐந்தாவது பிரதமராக இருந்த செளத்ரி சரண் சிங்கின் பிறந்தநாள் என்பதே ஆகும். அவர், தனது ஆட்சிக் காலத்தில் கிராமப்புற பிரச்சினைகள் மற்றும்…

தேசிய விவசாயிகள் தினம் 2025!

[pachaiboomi]

தேனீக்கள் மூலம் கிடைக்கும் பொருள்கள்!

இந்தியாவில், தேன் மற்றும் மெழுகு உற்பத்தி உயிரினமாகவே தேனீக்கள் கருதப் படுகின்றன. ஆனால், இவற்றைத் தவிர, தேன் கூட்டிலிருந்து மகரந்தம், அரசகூழ், தேனீ நஞ்சு, பிசின் போன்ற மதிப்புமிகு பொருள்களும் கிடைக்கின்றன. இவற்றைப் பற்றி விரிவாகக் காணலாம்.

தேன்

தேனீக்கள் மதுரத்தில் இருந்து தேனை உருவாக்கும். பூக்களின் மதுரத்தைப் போல, தத்துப் பூச்சிகளின் கழிவுப் பொருளான தேன் துளியையும் தேனீக்கள் சேகரிக்கும். சில செடிகளில் பூக்களைத் தவிர மதுரச் சுரப்பிகளும் இருக்கும். இவற்றில் இருந்தும் தேன் கசியும். இந்த மதுரத்தையும் தேனீக்கள் பெற்றுக் கொள்ளும்.

இவற்றைத் தவிர, இனிப்பு பானங்களான, பழச்சாறு, கரும்புச்சாறு போன்றவற்றையும் சேகரிக்கும். மதுரம் பெறப்படும் பொருள் மற்றும் செடி வகைகளுக்கு ஏற்ப தேனின் தரம் வேறுபடும். இந்த அடிப்படையில் தேனை, பூவினத் தேன் அல்லது தேனினத் தேன் எனப் பிரிக்கலாம். தேனின் நிறத்தைப் பொறுத்தும் அதற்குப் பெயர் வைக்கலாம்.

தேன் வகைகள்

தேனீப் பண்ணைகளில் இருந்து கிடைப்பது, Apiary Honey. இது, இயந்திரம் மூலம் பிரித்து எடுக்கப்படும். அடுத்து, வனங்களில், காடுகளில் இருந்து கிடைப்பது, Forest Honey. இது, பிழிந்தும், அழுத்தியும் எடுக்கப்படும்.

தேனீப் பண்ணைத் தேன்

இந்திய தேனீக்களாகிய அடுக்குத் தேனீக்கள் மற்றும் ஐரோப்பிய தேனீக்களை, தேனீப் பண்ணைகளில் வைத்துச் சேகரித்து, இயந்திரம் மூலம் பிரித்தெடுக்கும் தேனுக்குப் பண்ணைத் தேன் என்று பெயர். இந்தத் தேன், தெளிவாகவும், மெழுகு, மகரந்தம், தேனீப் புழுக்கள், தேனீ இறகுகள், கால்கள் போன்றவை இல்லாமல் இருக்கும்.

வனங்களில், காடுகளில் இருந்து கிடைக்கும் தேன்

காடுகளில் அல்லது வனங்களில் அல்லது மலைகளில், மலைத் தேனீக்கள் அல்லது கொம்புத் தேனீக்கள் அல்லது அடுக்குத் தேனீக்கள் சேர்த்த தேனை, அடைகளில் இருந்து பிழிதல் அல்லது அழுத்தல் என்னும் மிகப் பழைய முறைப்படி சேகரிக்கும் தேன் வனத் தேனாகும். இந்தத் தேனில், மெழுகு, மகரந்தம், தேனீப் புழுக்கள், இறகுகள், கால்கள் கலந்து இருப்பதால், அது, தெளிவின்றி இருக்கும்.

ஒரே பூத்திரள் தேன்

ஒரே விதமான தாவரங்களின் பூக்களில் இருந்து சுரக்கும் மதுரத்தைச் சேகரித்துத் தேனாக மாற்றி வைப்பது, ஒரே பூத்திரள் தேன் எனப்படும்.

எடுத்துக்காட்டு: ரப்பர் தேன், புளியந்தேன், நாவல் தேன், வேப்பந்தேன், சூரியகாந்தி தேன், கடுகுத் தேன்.

பலவகைப் பூத்திரள் தேன்

பலவிதமான தாவரங்களின் பூக்களில் இருந்து சுரக்கும் மதுரத்தைச் சேகரித்துத் தேனாக மாற்றி வைப்பது, பலவகைப் பூத்திரள் தேன் எனப்படும். எடுத்துக்காட்டு: பல மரங்களின் கலப்புத் தேன், வனங்களில் இருந்து கிடைக்கும் தேன்.

தேனில் அடங்கியுள்ள பொருள்கள்

நீர்: 20%

கரும்புச் சர்க்கரை: 5%

பழச் சர்க்கரை: 37%

திராட்சைச் சர்க்கரை: 34%

தாதுப்புகள்: 0.2%

அங்கக அமிலங்கள்: 0.2%

புரதம், அமினோ அமிலங்கள்: 1.5%

பிற பொருள்கள்: 2%

தேனிலுள்ள நீரின் அளவைப் பொறுத்து, அதை மூன்று நிலைகளாகப் பிரிக்கலாம். முதல் நிலைத் தேனில், நீரின் அளவு 18 சதம் இருக்கும். இரண்டாம் நிலைத் தேனில், 20-22 சதம் நீர் இருக்கும். மூன்றாம் நிலையிலுள்ள தேனில், நீரின் அளவு 22-24 சதம் இருக்கும்.

பயிர்களும் தேனின் நிறங்களும்

ரப்பர்: தெளிவான வைக்கோல் நிறம்.

புளி: தங்கம் போன்ற மஞ்சள் நிறம்.

பருத்தி: வெள்ளை நிறம்.

சூரியகாந்தி: மஞ்சள் நிறம்.

எள்: இள நிறம்.

நாவல்: இளஞ்சிவப்புக் கலந்த பழுப்பு நிறம்.

தைல மரம்: அடர்ந்த நிறம்.

ஈட்டி: அடர்ந்த நிறம்.

கடுகு: மஞ்சள் நிறம்.

தேன் மருத்துவக் குணங்கள்

தேன் ஓர் அமிர்தமாகும். அமெரிக்கா மேற்கொண்ட ஆய்வின்படி, ஒரு மனிதன் மூன்று மாதம் வரையில், தேனையும், ஆரஞ்சு பழச் சாற்றையும் மட்டுமே பருகி வாழ முடியும். இதன் சிறப்பு யாதெனில், அந்தக் காலக் கட்டத்தில், அந்த மனிதரின் உடல் சிதை மாற்றங்களில் பெரியளவில் எந்த வேறுபாடும் நிகழவில்லை. இத்தகைய சிறப்பான உணவை, பச்சிளம் குழந்தைகளுக்குக் கொடுக்கும் பழக்கம், நம் நாட்டில் தொன்று தொட்டு இருந்து வருவதில் வியப்பேதும் இல்லை.

எலுமிச்சைச் சாற்றையும் தேனையும், தலா ஒரு தேக்கரண்டி எடுத்து, ஒரு தம்ளர் சுடுநீரில் கலந்து, காலை எழுந்ததும் ஒருமுறையும், இரவு தூங்குமுன் ஒருமுறையும் பருகி வந்தால், உடல் இளைக்கும், ஈரல் நோய்களும், மலச்சிக்கலும் தீரும். இரவு உறங்குமுன் பாலில் ஒரு தேக்கரண்டி தேனைக் கலந்து அருந்தி வந்தால், நரம்புத் தளர்ச்சி, இரத்தழுத்தம் குணமாகும்.

செரிமானச் சிக்கல்கள், வயிற்றுப் புண், சளி, இருமல், வாய் மற்றும் நாக்குப் புண் ஆகியன தேனால் குணமாகும். இரத்தத்தைச் சுத்திகரிக்க, இரத்தச் சிவப்பு அணுக்களை உறுதிப்படுத்த, தேன் உதவும். இதய மற்றும் நீரிழிவு நோயாளிகளுக்கு, தேன் சிறந்த மருந்தாகும்.

பற்கள், எலும்புகள், தசைகள் மற்றும் தோலை, தேன் வலுப்பெறச் செய்யும். குணமாகாத, நாள்பட்ட காயங்கள், கட்டிகள், புண்கள் ஆகியவற்றில் தேனைத் தொடர்ந்து தடவி வந்தால் விரைவில் குணமாகும்.

ஆயுர்வேத மருத்துவ லேகியங்கள் தயாரிப்பில், தேன் முக்கியப் பங்கு வகிக்கிறது. ரொட்டி, கேக், மிட்டாய்த் தயாரிப்பிலும், மது மற்றும் அழகுப் பொருள்கள் தயாரிப்பிலும், தேனின் பங்கு முக்கிய இடத்தில் உள்ளது. ரோமானியர்களும், கிரேக்கர்களும் தேனை, மயக்க மருந்தாகப் பயன்படுத்தி உள்ளனர்.

எகிப்திய பிரமிடுகளில் இறந்தவர்களின் உடலைப் பதப்படுத்துவதில் தேன் பயன்பட்டுள்ளது. பிரான்ஸ் மக்களிடம், திருமணமான முதல், முப்பது நாட்களுக்கு மணமக்களுக்குத் தேனை உண்ணத் தரும் பழக்கம் இருந்தது.

ஒரு தேக்கரண்டி தேனைச் சேகரிக்க, ஒரு தேனீ சுமார் 154 முறை மலருக்கும், தேன் கூட்டுக்கும் இடையே பயணம் செய்யும். எனவே, தேனின் மருத்துவக் குணங்களுக்குப் பிறகுள்ள உழைப்பு, கருத்தில் கொள்ளப்பட வேண்டியது ஆகும்.

ஏற்றுமதிக்கு உகந்த தேன்

தேனிலுள்ள நீரின் அளவு 19%க்கு மிகாமல் இருக்க வேண்டும். இல்லையேல், தேனின் மணமும் சுவையும் மாறி விடும். தேனைச் சூடாக்கும் போது, ஹைட்ராக்ஸி மெத்தைல் பர்பியூரைல் என்னும் வேதிப் பொருள் உருவாகும். இதன் அளவு, ஒரு கிலோவுக்கு 10-15 மில்லி கிராமுக்கு மிகாமல் இருக்க வேண்டும்.

தேனில் மகரந்தம் அதிகமாகக் கலந்திருந்தால் அல்லது மெழுகு, தேனீக்களின் உறுப்புகள், செடிகளின் பகுதிகள், தூசு முதலியன கலந்திருந்தால், அவற்றை வடிகட்டி நீக்க வேண்டும். தேன், வெளிர் மஞ்சள், பழுப்பு அல்லது அடர் நிறத்தில் தெரிவது இயற்கையே. அடர் நிறத்திலுள்ள தேன், அதிக நுண்சத்து, வாசனை, மணம் உள்ளதாக இருக்கும்.

தேன் விற்பனை

உற்பத்தி செய்த தேனை வணிக நோக்கில் விற்பனை செய்யக் கூட்டுறவுச் சங்கத்தை அமைக்கலாம். அல்லது மார்த்தாண்டம் தேனீ வளர்ப்போர் கூட்டுறவுச் சங்கம் தேனைக் கொள்முதல் செய்கிறது. ஆண்டுதோறும் தேனின் விலையை, சென்னை கதர் மற்றும் கிராமத் தொழில் முனையம் முடிவு செய்கிறது.

தேனீ மெழுகு

தேன் மெழுகு, தேனைவிட விலை மதிப்புள்ள பொருள். 14-18 நாள் வயதுள்ள வேலைக்கார தேனீக்களில் மெழுகு சுரக்கும். இது, நீரைப் போல இருக்கும். ஆனால், காற்றுப் படுவதாலும், செதில்கள் உருவாகும் போதும், கெட்டியாகி விடும்.

கூட்டிலுள்ள தேனீக்கள், செதில்களைப் பிரித்து அடை கட்டப் பயன்படுத்தும். சுரக்கும் போது வெள்ளையாக இருக்கும் மெழுகு, மகரந்தத்தின் நிறத்தைப் பொறுத்து நிறமாறி விடும். தேனீ வகைகளுக்கு ஏற்ப, மெழுகுத் தன்மையில் சிறிய மாற்றங்கள் இருக்கும்.

மெழுகைப் பதப்படுத்துதல்

தேனைப் பிரித்தெடுக்கும் போது மெழுகுக் கால் மூடுதலில் இருந்து தேன் மெழுகு கிடைக்கும். சில அடைகள் தேனை எடுக்கும் போது சேதமடையும். பழைய அடைகளில் இருந்து கிடைக்கும் மெழுகு பயன்படுத்த உகந்ததல்ல. மெழுகுக் கால் மூடுதலில் இருந்து கிடைக்கும் மெழுகே தரமானது. இந்தியாவில் மலைத்தேனீ அடைகளில் இருந்து, அதிகளவில் மெழுகு கிடைக்கிறது.

மெழுகு பல முறைகளில் சேகரிக்கப்படும். அடை அல்லது கழுவிய மெழுகுக் கால் மூடுதல் நீர், தொட்டிகளில் வேக வைத்து வடிகட்டப்படும். அப்போது கெட்டியான மெழுகுத் துண்டு கிடைக்கும். தேன் மெழுகு பெரும்பாலும் மெழுகுவர்த்தி ஆலை மற்றும் தேனீ சார்ந்த ஆலைகளில் அடை அஸ்திவாரத் தாள் செய்யப் பயன்படுகிறது.

அழகுப் பொருள்கள் தயாரிப்பிலும் முக்கியப் பங்கு வகிக்கிறது. ஏனெனில், இது தோலுடன் நன்கு ஒட்டிக் கொள்ளும் தன்மை மிக்கது. மருந்து, மாத்திரை, களிம்பு மற்றும் வாசனைத் திரவியங்கள் உற்பத்தியிலும் தேன் மெழுகு பயன்படுகிறது. மரப் பொருள்கள் மற்றும் காலணிகளை மெருகேற்ற உதவுகிறது. பசை, மிட்டாய், மை மற்றும் பல் மருத்துவத்தில், மாதிரிப் பற்கள் தயாரிப்பிலும் பயன்படுகிறது.

தேனீ நஞ்சு

வேலைக்கார தேனீக்களின் கொடுக்கிலுள்ள ஒரு பையில் நஞ்சு இருக்கும். இரண்டு வாரத் தேனீக்களில் அதிகளவில் நஞ்சு இருக்கும். ஆனால், இதற்கு மேல் கூடாது. இந்நஞ்சில் பல பொருள்கள் உண்டு. தேனீக்களில் 12 வோல்ட் பாட்டரி உதவியுடன் மின்சார அதிர்வைக் கொடுத்து, மெல்லிய நைலான் துணியில் நஞ்சைக் கொட்ட வைக்க முடியும்.

அப்போது வெளிப்படும் விஷம், அதற்குக் கீழே வைக்கப்பட்டு உள்ள கண்ணாடித் தகட்டில் சேகரிக்கப்படும். ஒரு இத்தாலிய தேனீக் கூட்டத்தில் இருந்து 50 மி.கி. நஞ்சு கிடைக்கும். தேனீ இறக்கையை விரல்களால் பிடித்துக் கொண்டு, நோயாளியைக் கொட்டச் செய்தல் தேனீ சிகிச்சையாகும். இரண்டு மூன்று வாரங்களில், ஒரு நேரத்தில் கொட்டுவதை, ஒன்று முதல் மூன்றாக உயர்த்தலாம்.

தேனீ விஷத்தை ஊசி மூலமும் செலுத்தலாம். பாதிக்கப்பட்ட இடங்களில் பசை வடிவிலுள்ள தேனீ நஞ்சைத் தேய்க்கலாம். இது பல நோய்களுக்கு நிவாரணி. மூட்டுவலி, தசைப்பிடிப்பு மற்றும் முடக்குவாதம் குணமாகும். கொழுப்பு, இரத்தழுத்தம் குறையும்.

தேன் பிசின்

தேன் பிசினை, மொட்டுகளில் இருந்தும், மரப் பட்டைகளில் இருந்தும் தேனீக்கள் சேகரிக்கும். தேனீக் கூட்டிலுள்ள சட்டங்களை ஒட்டவும், வெடிப்பு, துளைகளை அடைக்கவும், தேனீக்கள் பிசினைப் பயன்படுத்தும். ஆனால், இதனால் சட்டங்களைக் கையாளுவதில் இடையூறும், அடை மெழுகில் கலப்படமும் ஏற்படும்.

பிசினில், 55 சதம் ரெசின் மற்றும் பால்சம், 10 சதம் எத்தனால், 5 சதம் மணமுள்ள எண்ணெய் மற்றும் மகரந்தம் இருக்கும். சட்டங்களில் இருந்து பிசின் சுரண்டி எடுக்கப்படும். இது, புண்ணுக்கு மருந்தாகும். பிசினையும் வாசலினையும் கலந்து பூசினால் தீப்புண்கள் குணமாகும். ஒரு இத்தாலிய தேனீப் பெட்டியில் இருந்து ஆண்டுக்கு 300 கிராம் தேன் பிசின் கிடைக்கும்.

அரச கூழ்

ஆறு முதல் பன்னிரண்டு நாட்களான பணித் தேனீக்களின் சுரப்பிகளில் இருந்து அரச கூழ் சுரக்கும். இது, மிகவும் சத்தான உணவாகும். இது, பணித்தேனீ மற்றும் இராணித் தேனீயின் புழுக்களுக்கும், வளர்ந்த தேனீக்களுக்கும் வழங்கப்படும்.

அரச கூழானது, பாலைப் போல அல்லது இள நிறத்தில் இருக்கும். இதில், 15-18 சதம் புரதம், 2.6 சதம் கொழுப்பு, 9-18 சதம் கார்போ ஹைட்ரேட், 0.7-1.2 சதம் சாம்பல் சத்து, 65-70 சதம் நீர் ஆகியன இருக்கும். குழந்தைகள் விரைவாக வளர, இளமையாக இருக்க, சுறுசுறுப்பைப் பெற அரச கூழ் உதவும். குறைந்த இரத்தழுத்த நோயைச் சரி செய்யும். ஒரு இத்தாலிய தேனீப் பெட்டியில் இருந்து ஆண்டுக்கு 50 கிராம் அரச கூழ் கிடைக்கும்.

மகரந்தம்

இது, தேனீப் புழுக்களின் முக்கிய உணவாகும். வயல்வெளித் தேனீக்களின் உடல், மகரந்தத்தால் மூடியிருக்கும். முன்னங்காலில் இருந்து நடுக்காலுக்கு வந்து, பின்னங்காலில் உள்ள மகரந்தக் கூடைக்குச் செல்வதற்கு முன், மகரந்தம் உமிழ் நீருடன் கலந்து பசையைப் போல மாறும்.

இப்படி, கூட்டுக்குத் திரும்பியதும் கூட்டிலுள்ள அறையில் மகரந்தத்தைச் சேர்த்து வைக்கும். வயல்வெளித் தேனீக்கள் காலை 9-11 மணிக்குள், அதிகளவில் மகரந்தத்தைச் சேகரிக்கும். ஒரு இத்தாலிய தேனீக் கூட்டிலிருந்து ஆண்டுக்கு 3-5 கிலோ மகரந்தம் கிடைக்கும். மகரந்தம் மிகவும் சத்துள்ள உணவாகும். இது, குடல் சார்ந்த சிக்கல்களைச் சரி செய்யும். முடி உதிர்தல் மற்றும் நகங்கள் முறிவதைத் தடுக்கும்.

இரத்தக்குழாய் வலுப்பெற, நரம்பு நோய்கள் குணமாக, கண் பார்வை சிறக்க மகரந்தம் உதவும். ஆண்மைக் குறைவைப் போக்க, பாலியல் உணர்வைக் கூட்ட, மகரந்தக் கலவையை உண்ணலாம்.

களைப்பும் மன உளைச்சலும் அகலும். இதைத் தினமும் ஒரு தேக்கரண்டி எடுத்து, நீரில், பாலில் அல்லது தேனில் கலந்து உண்டு வந்தால் நல்ல பலனை அடையலாம். காலை உணவுக்கு முன் இதை உண்ணுதல் சிறந்தது.

முனைவர் ஜே.இராஜாங்கம், முனைவர் சே.சரஸ்வதி, முனைவர் செ.சுகன்யா கண்ணா, முனைவர் சு.முத்துராமலிங்கம், முனைவர் மு.உமா மகேஸ்வரி, தோட்டக்கலைக் கல்லூரி, பெரியகுளம், தேனி மாவட்டம்.

[pachaiboomi]

கறவை மாடு வளர்ப்பில் கவனிக்க வேண்டியவை!

உலகிலேயே கால்நடைச் செல்வங்கள் அதிகமாக இருப்பது நமது நாட்டில் தான். அதைப் போல, பால் உற்பத்தியிலும் உலகின் முதல் இடத்தில் நாம் உள்ளோம். ஆனால், கறவை மாடுகளின் உற்பத்தித் திறனில் நாம் பின்னோக்கி உள்ளோம். எனவே, கறவை மாடுகளின் பால் உற்பத்தியை மேம்படுத்தும் அறிவியல் சார்ந்த உத்திகள் குறித்து இங்கே பார்க்கலாம்.

கொட்டகை அமைத்தல்

மாட்டுக் கொட்டிலை, நீர்த் தேங்காத, சற்று உயரமான இடத்தில் அமைக்க வேண்டும். கொட்டிலின் நீளவாட்டம் கிழக்கு மேற்காக இருக்க வேண்டும். அதன் சுற்றுச் சுவர் 1.5-2 மீட்டர் உயரம் இருக்க வேண்டும். சுவரில் ஈரக்கசிவு இல்லாமல் இருக்க, மேற்பூச்சுப் பூச வேண்டும். கூரையின் உயரம் 3-4 மீட்டர் இருக்க வேண்டும். கொட்டிலில் காற்றோட்ட வசதி இருக்க வேண்டும்.

கொட்டில் தரை, உறுதியாக, நீர்த் தேங்காததாக, வழுக்கும் தன்மை அற்றதாக இருத்தல் அவசியம். கொட்டிலைச் சுற்றிலும் நிழல் தரும் மரங்கள் இருப்பது மிகுந்த பயனைத் தரும். வளர்க்கும் மாடுகளின் எண்ணிக்கைக்கு ஏற்ப, குடிநீர்த் தொட்டிகள் மற்றும் தீவனத் தொட்டிகள் இருக்க வேண்டும். சாணத்தை உடனுக்குடன் அகற்றி, கொட்டிலில் சுத்தத்தைப் பேணிக் காக்க வேண்டும்.

கறவை மாடுகள் தேர்வு

எவ்வகைக் கலப்பின மாடுகளை வளர்க்கலாம் என்பதை முடிவு செய்ய வேண்டும். பண்ணை அமையவுள்ள இடத்தின் தட்ப வெப்ப நிலைக்கு உகந்த மாடுகளை வளர்ப்பது சாலச் சிறந்தது. வெளிநாட்டுக் கலப்பின மாடுகளை விட, நமது மாடுகளின் பால் உற்பத்திக் குறைவாக இருந்தாலும், நாட்டின மாட்டுப் பாலின் தரம் உயர்ந்து இருக்கும்.

மேலும், நமது நாட்டின மாடுகளுக்கு நோயெதிர்ப்புத் திறன் அதிகமாகும். பொதுவாக, தமிழகத்தின் சமதளப் பகுதிகளில் ஜெர்சி கலப்பின மாடுகளை அதிகளவில் வளர்க்கின்றனர். எனவே, வளர்க்கப் போகும் மாட்டினத்தை முடிவு செய்து விட்டு, அவற்றை வாங்கும் போது கீழ்க்கண்ட விதிகளைப் பின்பற்றுவது நல்லது. அதாவது, அருகிலுள்ள சந்தையில் மாடுகளை வாங்க வேண்டும்.

கால்நடை மருத்துவரின் ஆலோசனைப்படி நலமும் நல்ல பால் உற்பத்தித் திறனும் உள்ள மாடுகளை வாங்க வேண்டும். இரண்டு அல்லது மூன்றாம் ஈற்றில் உள்ள மாடுகளை வாங்குவது நல்லது. கறவை மாடுகளை வாங்கு முன், ஒருநாளில் குறைந்தது மூன்று முறை பாலைக் கறந்து, அவற்றின் தினசரி உற்பத்தியைத் தெரிந்து கொண்டு வாங்க வேண்டும். தேவையான தடுப்பூசிகள் மாடுகளுக்குப் போடப்பட்டுள்ளதை உறுதி செய்து கொள்ள வேண்டும்.

தீவனமளித்தல்

கறவை மாடு வளர்ப்பில் ஆகும் மொத்தச் செலவில், தீவனச் செலவு 60%க்கும் அதிகமாகும். மேலும், கறவை மாடுகளின் உடல் நலனைப் பேணித் தரமான பால் உற்பத்தியை மேற்கொள்ளச் சமச்சீர் உணவு அவசியம். சமச்சீரான கால்நடைத் தீவனத்தை உண்ணும் மாடுகளின் பாலில் தான், மக்களுக்குத் தேவையான சத்துகள் போதியளவில் அடங்கி இருக்கும்.

கறவை மாடுகளின் வயிறு அசையூன் தன்மை மிக்கது. எனவே, உலர் தீவனம், அடர் தீவனம் ஆகிய மூவகைத் தீவனங்களை, மாடுகளின் உடல் எடை மற்றும் பால் உற்பத்திக்கு ஏற்ப தர வேண்டும். மாடுகளுக்குத் தேவையான பசுந் தீவனங்களைச் சொந்தமாக உற்பத்தி செய்தல் நலம். ஏனெனில், ஆண்டு முழுவதும் மாடுகளுக்குப் பசுந்தீவனம் அவசியம்.

மேலும், தீவனக்கருவி மூலம் பசுந்தீவனத்தைச் சிறிய துண்டுகளாக நறுக்கிக் கொடுத்தால், மாடுகளின் செரிப்புத் திறன் கூடும். தீவனமும் வீணாகாது. அடர் தீவனம் தற்போது குச்சி வடிவில் கிடைக்கிறது. கன்றுகள், கிடேரிகள், பால் மாடுகள், சினை மாடுகள், பால் வற்றிய மாடுகள் என, ஒவ்வொரு வகைக்கும் தேவையான அளவில் தீவனத்தைக் கணக்கிட்டு வழங்க வேண்டும்.

மாடுகளுக்கு எப்போதும் கிடைக்கும் வகையில் குடிநீர் இருத்தல் அவசியம். ஆய்வகம் மூலம் தரமான குடிநீர் கிடைப்பதை உறுதி செய்த பிறகே கறவை மாடுகளை வாங்க வேண்டும். ஏனெனில், குடிநீரும் முக்கியச் சத்தாகும்.

நோய் மேலாண்மை

கறவை மாடுகளில் நோய்த் தாக்கம் ஏற்பட்டால், அதன் முதல் அறிகுறி பசியின்மை ஆகும். எனவே, மாடுகள் உண்பதைத் தினமும் கவனித்து வர வேண்டும். நமது தட்ப வெப்ப நிலையில் மாடுகளைத் தாக்கும் நோய்களுக்கு எதிரான தடுப்பூசிகளை, கால்நடை மருத்துவர் மூலம் போட வேண்டும்.

கன்றுகள் மற்றும் கறவை மாடுகளுக்குக் குறித்த காலத்தில் குடற்புழு நீக்க மருந்துகளைக் கொடுத்து, நல்ல நிலையில் பராமரிக்க வேண்டும். கோமாரி நோயின் தாக்கம் நமது பகுதிகளில் அதிகம். எனவே, மழைக்காலம் வருமுன், கோமாரி நோய்த் தடுப்பூசியை அவசியம் அளித்தல் வேண்டும்.

இனவிருத்தி

கறவை மாடுகள் வளர்ப்பில் வெற்றியின் தாரக மந்திரமே, ஒவ்வொரு மாடு மூலமும் ஆண்டுக்கொரு கன்றைப் பெறுவது தான். மாடுகள் சராசரியாக 21 நாட்களுக்கு ஒருமுறை பருவத்துக்கு வரும். இந்தப் பருவமானது 12-18 மணி நேரம் இருக்கும். எனவே, மாடுகளைச் சரியாகக் கண்காணித்து, பருவத்தில் இருக்கும் போது சினை ஊசியைப் போட்டு விட வேண்டும்.

பால் பொருள்கள் உற்பத்தி

கறவை மாடு வளர்ப்பில் உள்ள முக்கியச் சிக்கல், பாலுக்கு ஏற்ற விலை கிடைக்காதது தான். எனவே, பண்ணையாளர்கள் பாலை உற்பத்தி செய்யும் இடத்தில் சுத்தத்தைப் பேணிக் காக்க வேண்டும். மேலும், பாலாக மட்டும் விற்காமல், வெண்ணெய், நெய், கோவா, பன்னீர் போன்ற மதிப்புக்கூட்டுப் பொருள்களாக மாற்றி விற்றால், கூடுதல் வருவாய்க் கிடைக்கும்.

செ.இரமேஷ், இரா.துரைராஜன், கால்நடை மருத்துவ அறிவியல் பல்கலைக் கழகப் பயிற்சி மற்றும் ஆராய்ச்சி மையம், மேல்மருவத்தூர், செங்கல்பட்டு - 603 319.

[pachaiboomi]

மிளகாய் சாகுபடி!

உலகளவில் காரச் சுவையைக் கொடுப்பது மிளகாய். காரமற்ற உணவைப் பெரும்பாலான மக்கள் விரும்புவது இல்லை. இப்படி, உணவில் அவசியமாக உள்ள மிளகாய் 6000 ஆண்டுகளுக்கு முன்பிருந்தே உணவில் பயன்பட்டு வருவதாக ஆய்வாளர்கள் கூறுகின்றனர்.

17 ஆம் நூற்றாண்டில் தான் இந்தியாவுக்கு மிளகாய் வந்தது. அதற்கு முன், மிளகு தான் காரத்துக்குப் பயன்பட்டது. இது, உணவில், சுவை, மணம் மற்றும் நிறத்தைச் சேர்க்கிறது. சிவப்பு மிளகாயில், வைட்டமின் சி-யும், கொஞ்சம் கரோட்டீனும் உள்ளன. மஞ்சள் மற்றும் பச்சைநிற மிளகாயில் இந்த இரண்டும் குறைவாக உள்ளன.

புலம் பெயர்ந்து வெளிநாடுகளில் வாழும் பலர், அங்குள்ள நாகரிகம், பண்பாட்டுக்கு ஏற்ற வகையில் தங்களை மாற்றிக் கொண்டாலும், உணவை மட்டும் மாற்றிக் கொள்ள முடியவில்லை. தங்களின் ஊர்களில் இருந்து பொட்டலம் பொட்டலமாக மிளகாய்ப் பொடியை வரவழைத்து, சமையலில் பயன்படுத்தி வருவதைப் பார்க்கிறோம். காய்கறிப் பயிர்களில் முக்கியமானது மிளகாய்ப் பயிர். இது, சோலனேசியே என்னும் தாவரக் குடும்பத்தைச் சேர்ந்தது.

மானாவாரிக் கரிசல் பயிர்களில் குறிப்பிடத்தக்கது. தமிழகத்தின் பல்வேறு பகுதிகளில் மிளகாய் விளைகிறது. பச்சை மிளகாய் உற்பத்தி, ஏற்றுமதி, இறக்குமதியில் இந்தியா முக்கியப் பங்கு வகிக்கிறது.

நிலம்

மானாவாரிக் கரிசலில் சம்பா வகைகளை விட மானாவாரி வகைகளே அதிகமாக சாகுபடி செய்யப் படுகின்றன. இதில், விதை முளைத்தல், இளம் செடிகளின் வளர்ச்சி, நாற்றங்காலில் ஏற்படும் பயிரிழப்பு ஆகியன முக்கியச் சிக்கல்களாக உள்ளன. நல்ல வடிகால் வசதியுள்ள இருமண், 6.5-7.5 கார அமிலத் தன்மையுள்ள நிலம் மிளகாய் சாகுபடிக்கு ஏற்றது.

மிளகாய் இரகங்கள்

மிளகாயில், கே. 1, கே. 2, பிகேஎம் 1, கோ. 1, கோ. 3, கோ. 4 ஆகிய சம்பா இரகங்களும், கோ. 2, பிஎம்கே 1, பிஎல்ஆர் 1 ஆகிய குண்டு இரகங்களும் உள்ளன.

கோ 1: இது, சாத்தூர் சம்பா இரகத்தின் மறு தேர்வாகும். பழங்கள் நீளமாக, இளஞ் சிவப்பு நிறத்தில் இருக்கும். இதன் வயது 210 நாட்கள். எக்டருக்கு 2.1 டன் காய்ந்த வற்றல் கிடைக்கும். கேப்சிசின் அளவு 0.72 மி.கி/கி. ஆகும்.

கோ 2: இது, உருண்டை நம்பியூர் நாட்டு இரகம் மூலம் பெறப்பட்டது. பழங்கள் கருஞ்சிவப்பு நிறத்தில் இருக்கும். அதிக விதைகள் மற்றும் காரத்தன்மை மிக்கது. இதன் வயது 210 நாட்கள். காயாகவும் பழமாகவும் அறுவடை செய்யலாம். எக்டருக்கு 2.2 டன் காய்ந்த வற்றல் கிடைக்கும்.

கோ 3: இது, திறந்த மகரந்தச் சேர்க்கை வகையில், இலங்கையில் இருந்து தெரிவு செய்யப்பட்டது. 30x15 செ.மீ. அளவில் நெருக்கமாகப் பயிரிட ஏற்றது. அதிகக் காற்றைத் தாங்கக் கூடியது. இதன் வயது 165 நாட்கள். எக்டருக்கு 15-18 டன் பச்சைக் காய்களும், 3.00-3.5 டன் காய்ந்த வற்றலும் கிடைக்கும். பழத்தில் 13% ஒலியோரசின் இருக்கும்.

கோ 4: இது, திறந்த மகரந்தச் சேர்க்கை வகையில், இலங்கையில் இருந்து தெரிவு செய்யப்பட்டது. சட்னி, பொரியல் மற்றும் ஊறுகாய் செய்ய உகந்தது. இதன் வயது 165 நாட்கள். காரத்தன்மை 0.29% இருக்கும். எக்டருக்கு 23 டன் பச்சை மிளகாய் கிடைக்கும்.

த.வே.ப.க. வீரிய ஒட்டு கோ. 1: காய்கள் இளம் பச்சையாக 10.5-12 செ.மீ. நீளத்தில் இருக்கும். கேப்சிசின் மற்றும் ஒளியோரசின், 0.58% மற்றும் 14.0% இருக்கும். காயழுகல் நோயைத் தாங்கி வளரும். இதன் வயது 195-205 நாட்கள். எக்டருக்கு 28.10 டன் பச்சை மிளகாயும், 6.74 டன் காய்ந்த வற்றலும் கிடைக்கும்.

கே 2: இது, கே 1 மற்றும் சாத்தூர் சம்பா மூலம் பெறப்பட்டது. இதன் வயது 210 நாட்களாகும். எக்டருக்கு 2.1 டன் உலர் வற்றல் கிடைக்கும்.

கே.கே.எம் (சி.எச் 1): எக்டருக்கு 3.03 டன் வற்றல் கிடைக்கும். 0.54% கேப்சிசின் இருக்கும். 92 நாட்களில் காய்களை அறுவடை செய்யலாம். காய வைத்த பின் சுருங்காமல் இருப்பதால் ஏற்றுமதிக்கு உகந்ததாக உள்ளது.

பி.கே.எம் 1: இது AC1797xCO1 இன் நான்காம் தலைமுறைக் கலப்பு மற்றும் தன் மகரந்தச் சேர்க்கை மூலம் பெறப்பட்ட இரகம். இதன் வயது 180 நாட்கள். காய்கள் கருஞ்சிவப்பாக இருக்கும். எக்டருக்கு 30-32 டன் மிளகாய் கிடைக்கும்.

பி.எல்.ஆர் 1: இது கண்டான் காடு வகையில் இருந்து பெறப்பட்ட இரகம். இதன் வயது 210 நாட்கள். எக்டருக்கு 18.4 டன் பச்சை மிளகாய் கிடைக்கும். பழமானது மணியைப் போல, மிதமான அளவில், கூரற்ற நுனியுடன், குண்டாக, பளபளப்பாக இருக்கும். மோர் வற்றல் மற்றும் ஊறுகாய்த் தயாரிப்புக்கு ஏற்றது.

பி.எம்.கே 1: இது, கோ. 2 மற்றும் இராம்நாடு முண்டு மூலம் பெறப்பட்டது. மானாவாரி சாகுபடிக்கு ஏற்றது. எக்டருக்கு 2.3 டன் மிளகாய் வற்றல் கிடைக்கும். இதில் 0.36% கேப்சிசின் இருக்கும்.

மிளகாய் சாகுபடி பருவமும் விதைப்பும்

ஜனவரி- பிப்ரவரி, ஜூன்- செப்டம்பர் ஆகிய பருவங்கள், மிளகாய் சாகுபடிக்கு ஏற்றவை. எக்டருக்கு ஒரு கிலோ விதை தேவைப்படும். கோ.3 இரகத்தை 30-15 செ.மீ. இடைவெளியிலும், மற்ற இரகங்களை 45-30 செ.மீ. இடைவெளியிலும் விதைக்க வேண்டும்.

நேரடி விதைப்பு

கடைசி உழவுக்கு முன், ஏக்கருக்கு 10 டன் தொழுவுரத்தை அடியுரமாக இட வேண்டும், மேலும், 52 கிலோ யூரியா, 75 கிலோ சூப்பர் பாஸ்பேட், 32 கிலோ பொட்டாசையும் இட வேண்டும். நன்கு புழுதியாக உழுத நிலத்தில், பருவமழைக்கு முன், கைவிதைப்பாக வரிசையில் விதைக்க வேண்டும்.

மேலும், நடவு முறையில் இட வேண்டிய உரங்களில் பாதியை மட்டுமே மானாவாரி மிளகாய்க்கு இட வேண்டும். விதைத்த பிறகு, இரண்டு கிலோ அசோஸ் பைரில்லம் அல்லது சூடோமோனாசை, 20 கிலோ தொழுவுரத்தில் கலந்து, நிலத்தில் போதுமான ஈரம் இருக்கும் போது தூவ வேண்டும்.

மிளகாய் நடவு முறை

நாற்றங்கால்: ஒரு ஏக்கர் நடவுக்கு 100 ச.மீ. நாற்றங்காலை அமைக்க வேண்டும். ஒரு கிலோ விதைக்கு 4 கிராம் டிரைக்கோ டெர்மா விரிடி அல்லது 2 கிராம் கேப்டான் திரவம் வீதம் கலந்து விதைநேர்த்தி செய்து, மேட்டுப் பாத்திகளில் 10 செ.மீ. இடைவெளியில் சீராக விதைக்க வேண்டும். 40-50 நாட்களில் பறித்து நடலாம்.

உரமிடுதல்: எக்டருக்கு 25 டன் தொழுவுரம், 30:60:30 கிலோ வீதம், தழை, மணி, சாம்பல் சத்தை அடியுரமாக இட வேண்டும். நடவு செய்த 30, 60, 90 நாட்களில், 30 கிலோ தழைச்சத்தை மேலுரமாக இட்டுப் பாசனம் செய்ய வேண்டும்.

களையெடுப்பு: எக்டருக்கு ஒரு லிட்டர் ஃபுளுகுளோரலின் என்னும் ஃப்ரிஎமர் ஜென்ஸ் களைக் கொல்லியைத் தெளிக்க வேண்டும். பிறகு, 45 நாட்கள் கழிந்து மண்ணை அணைக்கும் போது, கொத்தால் களைகளை அகற்ற வேண்டும்.

வளர்ச்சியூக்கித் தெளிப்பு: நடவு செய்த 20, 40, 60, 80 நாட்களில் டிரை கான்டினால் என்னும் வளர்ச்சி ஊக்கியை, 10 லிட்டர் நீருக்கு 12.5 மில்லி வீதம் கலந்து தெளிக்க வேண்டும். காய்ப்பிடிப்பு அதிகரிக்க, என்.ஏ.ஏ. என்னும் வளர்ச்சி ஊக்கியை, 10 பி.பி.எம். வீதம், நடவு செய்த 60, 90 நாட்களில் தெளிக்க வேண்டும்.

பயிர்ப் பாதுகாப்பு: இலைப்பேன்: இது, இலையைச் சுருட்டிச் சாற்றை உறிஞ்சும். இதைக் கட்டுப்படுத்த, ஏக்கருக்கு 200 மில்லி மீத்தைல் டெமட்டான் வீதம் தெளிக்கலாம்.

அசுவினி: இது, செடிகளின் குருத்துகள், பூ மொட்டுகள் மற்றும் காய்களில் கூட்டமாக இருக்கும். இதைக் கட்டுப்படுத்த, ஏக்கருக்கு 200 கிராம் அசிப்பேட் அல்லது 200 மில்லி மாலத்தியான் வீதம் தெளிக்கலாம்.

மஞ்சள் சிலந்தி: இதனால் தாக்குண்ட செடிகளின் இலைகள் கீழ்நோக்கிச் சுருண்டு, சொரசொரப்பாக, இலைக்காம்புகள் நீண்டு இருக்கும். இதைக் கட்டுப்படுத்த, ஒரு லிட்டர் நீருக்கு 6 கிராம் நனையும் கந்தகத் தூள் வீதம் கலந்து தெளிக்க வேண்டும். அல்லது ஒரு லிட்டர் நீருக்கு 3 மில்லி டைக்கோபல் அல்லது 4 மில்லி எத்தியான் வீதம் தெளிக்கலாம்.

காய்ப்புழு: புரட்டீனியாப் புழு மற்றும் பச்சைக் காய்ப்புழு, இலைகளையும், காய்களையும் தின்று பெரும் சேதத்தை ஏற்படுத்தும். இவற்றைக் கட்டுப்படுத்த, வரப்பு ஓரத்தில் ஆமணக்குச் செடிகளைப் பொறிப்பயிராக வளர்த்து, புரட்டீனியாப் புழு முட்டைக் குவியல்களைச் சேகரித்து அழிக்கலாம். வேப்பெண்ணெய் 3 சதம் அல்லது வேப்பங் கொட்டைச் சாறு 5 சதக் கரைசலை, சோப்பு போன்ற ஒட்டும் திரவத்துடன் கலந்து தெளிக்கலாம்.

நாற்றழுகல் நோய்: விதைகளை நேர்த்தி செய்து விதைக்க வேண்டும். ஒரு லிட்டர் நீருக்கு 2.5 கிராம் காப்பர் ஆக்ஸி குளோரைடு வீதம் கலந்து, சதுர மீட்டருக்கு 4 லிட்டர் கரைசல் வீதம் நாற்றங்காலில் ஊற்ற வேண்டும்.

சாம்பல் நோய்: ஒரு லிட்டர் நீருக்கு 2 கிராம் நனையும் கந்தகம் அல்லது ஒரு கிராம் கார்பன்டாசிம் வீதம் கலந்து, 15 நாட்கள் இடைவெளியில் மூன்று முறை தெளிக்க வேண்டும்.

இலைக் கருகல் - பழ அழுகல் நோய்: நோய் அறிகுறிகள் தெரிந்ததும் ஒரு லிட்டர் நீருக்கு 2 கிராம் மேங்கோசெப் அல்லது 2.5 கிராம் காப்பர் ஆக்ஸி குளோரைடு வீதம் கலந்து, 15 நாட்கள் இடைவெளியில் மூன்று முறை தெளிக்க வேண்டும்.

மகசூல் மற்றும் அறுவடை

210-240 நாட்களில் எக்டருக்கு 10-15 டன் பச்சைக் காய்களும், 2-3 டன் காய்ந்த மிளகாய் வற்றலும் கிடைக்கும். செடியிலுள்ள காய்கள் முழுவதும் சிவப்பு நிறப் பழங்களாக மாறியதும் பறிக்கலாம். காம்புடன் பழங்களைப் பறித்ததும் காயப்போட வேண்டும். மணலைப் பரப்பிய களத்தில் பழங்களைப் பரப்பி உலரவிட வேண்டும்.

வெய்யில் மிதமாக இருக்கும் காலை, மாலையில் நான்கு நாட்கள் உலர விட வேண்டும். பிறகு, காய்ப் புழுக்கள் தாக்கிய, பழ அழுகல் நோய் தாக்கிய, நிறமாறிய சண்டு வற்றல் மற்றும் உடைந்த வற்றல்களை நீக்கி, நல்ல வற்றலைப் பிரித்தெடுக்க வேண்டும்.

அறையின் ஈரப்பதம் வற்றலைத் தாக்காமல் இருக்க, தரையில் மணலைப் பரப்பி, அதன் மேல் சேமிக்க வேண்டும். இரவில் பனியால் பாதிக்காமல் இருக்க, வற்றல் மீது லேசான படுதாவைப் போட்டு மூடி வைக்கலாம்.

முனைவர் செ.முத்துராமு, முனைவர் தி.இராகவன், வேளாண்மை ஆராய்ச்சி நிலையம், பரமக்குடி, இராமநாதபுரம் மாவட்டம்.