چەند بۆچوونێک لە کوردستانەوە ...

لێرەوە هەوڵدەدەم چەند بۆچوونێکی خۆمتان ئاڕاستە بکەم لەسەر رووداو و پرسەکانی ئەمڕۆی کوردستان

[qubadjt]

جەژنی نەورۆزتان پیرۆز بێت

بە بۆنەی جەژنی نەورۆزەوە گەرمترین پیرۆزبایتان ئاڕاستە دەکەم، هیوادارم لەم ساڵی تازەیەدا هەموو خەون و خواستەکانتان بێنە دی. ‌ ‌ هەست دەکەم ئەم ساڵەی دێت ساڵێکی گرنگ دەبێت بۆ کوردستان. لە لایەکەوە بەرەو ٢ هەڵبژاردنی تردا دەڕۆین، لە لایکی ترەوە کێشەکانی نێوان بەغداد و هەرێم گەیشتوونەتە ئاستێک کە ناکرێت چیتر ئاوها بمێننەوە. ‌ ‌ساڵێکی گرنگیشە بۆ یەکێتیی نیشتیمانیی کردستان. لەم ساڵە دەبێت بگەرێنەوە بۆ ناو خەڵک، ببینەوە بە پارێزەر و خەمخۆری خەڵکی کوردستان، دان بە هەڵە و کەموکورتیەکانمان بدەین و بوێرانە بڕیار بدەین لەسەر هەنگاوە پێویستەکان بۆ نوێبوونەوەو گەشەکرنەوەمان. دەبێت کۆنگرە ببەستین و سەرکردەو هەیکەلیەو پەیڕەو و پرۆگرامێکی نوێ و گونجاو پێشکەش بە هاوڵاتی کوردستان بکەین. ‌ ‌هەروەها کابینەی نوێی حکومەت، کە هەر رۆژێک پێک دێت، بەرپرسیارەتیەکی مەزنی لە بەردەمدایە بۆ گەیاندی خزمەتی باشتر بە هاوڵاتی کوردستان. بیانووی نەبوونی شارەزایی و پسپۆڕیمان لە بوارە پێویستەکانی حکومڕانی نەماوە، دەبێت سیستەمی حکومڕانیمان چاک بکەین، سیستەمی دارایمان نوێبکەینەوە و رۆتینات بۆ هاوڵاتی کەم بکەینەوە. ‌ زۆر گرنگیشە هیمەتێکی جدی بدەین بۆ دروستکردنی بەرەیەکی نیشتیمانی بۆ پاراستنی مافە رەوا و دەستووریەکانی کوردستان لە ناو عێراق. زۆر ئاساییە لایەنە سیاسیەکانی کوردستان لە سەر پرسە ناوخۆیەکان ناکۆک بن، بەڵام بەهێزتر کردن و گەشەکردنی کوردستان بەندە یەکڕیزیمان لەسەر پرسە نەتەوەیی و چارەنووس سازەکان. ‌ ‌ هیوادارم ئەم ساڵە خۆشی بگەیێنێت بە خوشک و براکانی رۆژاڤامان. دوای ئەم هەموو ناخۆشی و دەربەدەریە، شایەستەی ژیانێکی ئاسودە و سەقامگیرن. ‌ ‌ لە کۆتایدا ئەمەوێت ئەم دەرفەتە بڕەخسێنم و سوپاسی خۆم ئاڕاستەی ئەو هەموو دڵسۆز و خۆشەویستانەی مام جەلالی خۆتان بکەم کە لە یەکەم رۆژی دوای خراپ بوونی باری تەندروستیەکەیەوە تاکو ئەمڕۆ خەمخۆر و پەرۆشی بوونە. دڵنیا بن کە ئەو خۆشەویستیەی ئێوەی بەڕێز پاڵپشتێکی بەهێز بووە بۆی تاکو زووتر بەرەو تەندروستیەکی باشتر بڕوات. بە خۆشحاڵیەوە دڵنیاتان دەکەمەوە کە بێ چاوێنی بێت باری تەندروستی ئێستای لە چاو نەورۆزی پارەوە بەراوورد ناکرێت. ‌ ‌دووبارە جەژنی نەورۆزتان پیرۆز بێت خۆشەویستان. ‌ ‌خزمەتکارتان ‌قوباد ‌

[qubadjt]

سەرچاوەیەک کە نەیویست ناوی ئاشکرا بکات....

بەڕاستی نیگەران دەبم کە هەواڵێک لە دەزگا راگەیاندنەکانی کوردستان دەبیستم، کە زانیاریەکی ئاسایی بڵاو دەکاتەوە بە ناوی "سەرچاوەیەکی نزیک لە...یان سەرچاوەیەکی شارەزا لە..کە نەیویست ناوی ئاشکرا بێت”.

سەرچاوەیەک کە نەیویست ناوی ئاشکرا بکات....

بەڕاستی نیگەران دەبم کە هەواڵێک لە دەزگا راگەیاندنەکانی کوردستان دەخوێنمەوە، کە زانیاریەکی ئاسایی بە ناوی "سەرچاوەیەکی نزیک لە...یان سەرچاوەیەکی شارەزا لە..کە نەیویست ناوی ئاشکرا بێت” بڵاو دەکاتەوە.

ئەگەر بابەتەکە گرنگ بێت، یاخود زانیاریەکە زۆر تایبەت یان پەیوەندیدار بێت بە ئەمنی قەومی وڵاتەکەمان ئاساییە. لە جیهاندا نموونەی بەرچاویش هەیە کە سەرچاوەیەک دەورێکی گرنگی هەبووە لە ناساندنی بابەتێکی زۆر گرنگ بە هاوڵاتی. زۆریش گرنگە لەو کاتانەش نهێنی ئەو سەرچاوەیە بپارێزرێت. سەرچاوەکەی Watergate ی ئەمریکا دوای 31 ساڵ ئنجا ئاشکرا بوو.

بۆ ئەوەی خوێنەر متمانەی هەبێت بە بابەتەکان و دەزگاکانی راگەیاندن پیشەیی بونی خۆیان لەدەست نەدەن، کە وتەیەکی سەرچاوەیەکی نا ئاشکرا بەکاردەهێنرێت پێویستە رای سەرچاوەیەکی ناونراویش وەربگیرێت. هەر چەندە بەشێکی زۆر لەو بابەتانەی کە 'سەرچاوەکە' ئاشکرا نیە هی ئەوە نییە بەو شێوە نهێنیە پێشکەش بکرێت. بە تایبەت لە کاتێکدا کە یاسای پیدانی زانیاری پەسەندکراوە کە بەرپرسی دەستکراوە کردووە زانیاری بدات.

بۆ ئەوەی باوەڕمان بە بابەتەکانتان هەبێت پێویستە بەرپرسی راگەیاندنەکان بزانن کەی پێویست دەکات سەرچاوەکان ناوبنرێن و کەی شاراوە بمێننەوە. ئەگەر ئەمە بۆ میدیاوانێک کارێک بێت تیبینی لەسەر بێت ئەوە بۆ سیاسیەک کارێکە کە جێگای گومان و گلەیە. پێویستە سیاسیەکان بزانن کە زۆر روون و ئاشکرایە کە زۆرجار ئەو "سەرچاوەی کە نەیویست ناوی ئاشکرا بێت" هەمان کەسە کە بابەتەکەی پێی پەیوەنددارە، بۆیە باشترە یان لێدوان نەدەن، یان بوێر بن و بە ناوی خۆتانەوە لێدوان بدەن.

لەگەڵ ئەو پەڕی رێزمدا. 

[qubadjt]

8ی ئادار، رۆژی ژنان و کوردستان

لە مێژووی کوردستاندا ژن پیرۆزییه‌کی تایبه‌تی خۆی هەبووە. بەدرێژایی شۆرشەکانی گەلی کورد، ژن و شۆرش دوانەیەکی لێک دانەبڕاو بوون. بەڵام بە داخەوە ئەمڕۆ لە کورستان یەکسانیی جەندەر له‌ ئاستی پێویستدا نییە. ئه‌مه‌ش هه‌ڵبه‌ت لە ژیانی سیاسی، لە بواری ئابووری و کەرتی تایبەتدا، لە ئاستی کۆمەڵگه‌ش به‌گشتی ره‌نگی داوه‌ته‌وه‌.

(8)ی ئادار، رۆژی جیهانیی ژنانه‌. ئه‌مڕۆ رۆژێکه‌ بۆ یادکردنه‌وه‌و به‌رزڕاگرتنی سەرکەوتنەکانی ژنان لە بواره‌کانی ئابووری، کۆمەڵایەتی و سیاسیدا. هەرچەندە ئەم رۆژە جەژنێکە و لە هەندێ وڵاتانی وەک چین، رووسیا، بولگاریا پشووی فەرمیە، هەمیشە لەم رۆژه‌دا کەموکوڕی و ئه‌و غەدرانه‌ش کە لە ژنان دەکرێت، دێتەوە بیرمان. سه‌ره‌ڕای ئه‌مه‌، ده‌مه‌وێت له‌ دڵه‌وه‌ پیرۆزبایی رۆژی جیهانیی ژنان، له‌ ژنانی کوردستان و جیهان بکه‌م.

ئه‌گه‌ر له‌چوارچێوه‌ی کوردستاندا باسی ئه‌م رۆژه‌ و باسی پێگه‌ و مافی ژن بکه‌ین، بە فەخرەوە ده‌بینم که‌ له‌ کوردستانی باکوور ژنانی ئازا و بەتوانا شان بە شانی پیاو جێی خۆیان لە ناو کۆمەڵگه‌دا کردووەتەوە. کەسانی وەک لەیلا زانا، گولتان کیشەنەک و چەندین ژنی تریش لە بواره‌ جیاوازه‌کاندا، له‌سه‌رووی هه‌موویانه‌وه‌ له‌ بواری سیاسی و بازرگانیدا، لەبەر لێهاتووی و توانای خۆیان، نەک ته‌نیا لە بەر ئەوەی ژنن، بوون و توانای خۆیان سه‌لماندووه‌ و لەلایه‌ن پیاوانیشەوە جێگه‌ی رێز و شانازین.

پێویسته‌ ئێمەش لە باشوور له‌و رووه‌وه‌ شتێک لە خوشک و براکانی باکوورمان وەربگرین و فێر بین. به‌هیچ شێوه‌یه‌ک مه‌به‌ستم ئه‌وه‌ نییه‌ که بڵێم‌ لە کوردستانی عێراقدا ژنانی ئازا و بەتوانامان نین کە هاوشێوه‌ی ئه‌وانه‌ی باکوور جێگه‌ی خۆیان له‌ گۆڕەپانی سیاسیی کوردستاندا کردبێته‌وه‌. به‌ڵکو ده‌مه‌وێت ئاماژه‌ به‌ جیاوازییه‌کی بچوک به‌ڵام گرنگ بکه‌م، ئه‌ویش ئه‌وه‌یه‌ کە لە کوردستانی باشور ژماره‌ی ئه‌و ژنانه‌ زۆر کەمن و دەتوانیت بە پەنجەکانی دەست بیانژمێریت، به‌ڵام له‌ باکوور به‌شێوه‌یه‌کی تره‌.

لە ناو حکومەتدا، زۆرینه‌ی فەرمانبەرانی حکومەت پیاون، بەتایبەتی له‌ ئاستی پله‌ی بەرێوەبەر و بەرەو سەرەوە. هەروەها، هێشتا بیرۆکەیەک هەیە کە دەڵێت ژنان بۆ کاری کارگێڕی و سکرتێری باشترن، بەڵام پیاوان له جێبه‌جێکردنی ئه‌رکی به‌رپرسیارییدا‌ سه‌رکه‌وتوو ترن. تکایە قسەم پێ مەکەن.

لە وڵاتانی پێسکەوتوو دەرکەوتووە کە ژنان نەک تەنیا دەتوانن شان بە شانی پیاوان کار بکه‌ن، بەڵکو سەرکردەی باشتر و کاریگەرتریان تیادا هه‌ڵده‌که‌وێت. بۆ نموونە، خاتوو ئانگێلا مێرکڵ-ی ئەڵمانیا، خاتوو دلمە رووسەف-سەرۆکی برازیل، یان کێ ده‌توانێت بڵێت مارگرێت ثاتچەری "خانمی ئاسنین" سەرکردەیەکی لاواز بوو! دوور لە سیاسەت، له‌ ئێستادا سەرۆکی کۆمپانیای Yahoo ژنێکە بە ناوی ماریسە مەیەر و تەمەنی 38 ساڵە! ئیندرە نووی سەرۆک و بەرپرسی جێبەجێکاری کۆمپانیای PepsiCo ە، مێگ ویتمان سەرۆکی کۆمپانیای Hewlett Packardە. لیستی ژنه‌ سه‌رکرده‌کان دوورو درێژه‌ و ناتوانم لێره‌دا ئاماژه‌ به‌ ناوی هه‌موویان بده‌م.

به‌ڵام هه‌ڵبه‌ت ئەمانە به‌ رۆژ و دووان نەگەیشتوونه‌ته‌ ئەم ئاستەی ئه‌مڕۆیان. هەموویان به‌رامبه‌ر بیرکردنه‌وه‌ی توندی ناو حکومەته‌کانیان یان کۆمپانیاکانیان وەستاونه‌ته‌وه‌. بەڵام دواجار سەرکەوتن. هەریەکەشیان لە کۆمەڵگه‌یەکدان کە رێگه‌ به‌ سه‌رکه‌وتنی ژنان ده‌ده‌ن. هه‌موو ئه‌و ژنانه‌ به‌ پێوەری لێهاتووی و توانای خۆیان ئه‌و سەرکەوتنه‌یان به‌ده‌ستهێناوه‌، نەک لەبەر ئەوەی ژنن.

هێشتا هیوای ئێمه‌ و ئاسۆی سه‌رکه‌وتنی ژنان له‌ کوردستان گه‌شه‌. مایه‌ی دڵخۆشی بوو کە هەفتەی رابووردوو لە کۆڕبەندی 'دیداری سلێمانی' لە زانکۆی ئەمریکی لە سلێمانی بەشداربووم. له‌وێ بینیم که‌ ژمارەیه‌ک کچانی زیرەک و خاوەن متمانە وەک خۆبەخش کاریان دەکرد. دڵنیام ئەمانە، لەگەڵ هەزارەها کچانی زانکۆکانی تری کوردستان، دەبن بە نموونه‌ی ئەو ژنه‌ سه‌رکه‌وتووانه‌ی کە دەتوانن کۆتوبه‌نده‌کانی به‌رده‌م پێشکەوتنی ژنان لە کوردستان بشکێنن. بۆ ئه‌مه‌ش پێویسته‌ پیاوانیش هاوکاریان بن و له‌جیاتی دانانی ئاسته‌نگ، هانده‌ر و پشتیوان بن.

له‌کۆتاییدا، پەیامێک بۆ پیاوە کۆنەپەرستەکان کە هێشتا هەوڵدەدەن ژن بچەوسێننەوە: سەردەم دەگۆڕێت هاورێیان، ئەگەر هاوکار نابن وا باشترە رێگه‌ چۆڵ بکه‌ن و بوار بەو کەسانە بده‌ن کە تێده‌کۆشن بۆ به‌دیهێنانی مافه‌کانی خۆیان و خۆشکەکانیان. دووباره‌ یادی (8)ی ئادار له‌ ژنانی کوردستان و جیهان پیرۆز بێت.

[qubadjt]

دانوستاندن...

ئەمڕۆ ڕاستەقینانە دانوستاندن دەست پێ دەکات لەسەر پێکهێنانی کابینەی هەشتەمی حکومەتى هەرێمى کوردستان. خۆی لە خۆیدا ووشەی دانوستاندن ووشەیەکی جوانە. دان-و-ستاندن. هەموو هەنگاوێک کە بریتی بێت لە دان-و-ستاندن وەخت دەخایێنێت بۆیە نابێت چاوەڕێ بکەین بە یەک دوو دانیشتن ئەم پرۆسەیە کۆتایی پێ بهێنرێت. بەڵام ئەوەی گرنگە نییەتەکەیە یان ئامانجە سەرەکیەکەی دانوستاندنەکەیە. دەبێت ئامانجی سەرەکی ئەم کۆبوونەوانە تەنها پێکهێنانی حکومەتێک نەبێت، ئەوە ئاسانە. دەبێت ئامانجی ئەم دانیشتنانە رێکەوتنێک بێت، بەڵکو گرێبەستێک بێت لە نێوان لایەنە سیاسیەکانی کوردستان لەسەر چۆنیەتی گەیاندنی باشترین خزمەت بە هاوڵاتیان و بەدیهێنانی خواستی خەڵک، نەبوونى مەرجى نەگونجاوى پێش وەخت لەلایەن لایەنە سیاسیەکانەوە. هەندێک جار ئەوەندە دەکەوینە ناو جەرگی ململانێی سیاسی و هەوڵدان بۆ سەپاندنی بۆچوونێک بەسەر بۆچوونێکی تر، ئەرکی سەرەکیمان لە بیر دەچێت. لەو ساتە وەختانەی دەوری سەرکردە گرنگە. سەرکردە نابێت تەنها کار بکات بۆ ئەوەی خۆی خۆشەویست بکات لای خەڵک، ئەمە ئەرکی سەرکردە نییە. هەندێ جار سەرکردە دەبێت بڕیار بدات کە رەنگ بێت بڕیارێکی ویستراو نەبێت، بەڵام بریارێک بێت کە لە ئایەندەدا بەرژەوەندی گشتی لەبەر چاوبێت. لێرەدا هیوادارم، پێوەری راستەقینە بۆ کابینەی نوێ تەنها راگرتنی هاوسەنگیەکی سیاسی نەبێت، بەڵکو گرنگیدان بە بەرنامەی کاری لایەنە سیاسیەکان بێت. کام هێزی سیاسی باشترین و واقیعترین بەرنامەی کاری هەیە بۆ خزمەت کردنی خەڵک کە دوورە لە دروشمی سیاسی و بریتی بێت لە سیاسەت کە مایەی جێبەجێ کردنە؟ کام بەرنامە لەگەڵ بەرنامەکانی تر دەگونجێن؟ و ئەگەر ناگونجێت کێ هەندێک لە بابەتەکانی بەرنامەی کاری خۆ دەکشێنێتەوە لە پێناوی بەرژەوەندی گشتی؟ ئاڵۆزی دانوستاندن ئەمەیە هاوڕێیان، هەبوونی دیدێک کە گەورەترە لە بەرژەوەندی تاکی، یان تەنها بەرژەوەندی حزبێک یان لایەنێکی سیاسی. ئێمە یەکەم حکومەت نین کە کابینەیەکی فرە حزبیمان هەبێت. هەندێک نموونە سەرکەوتوو بوونە، هەندێکیش سەرکەوتوو نەبوونە. تەماشای بەریتانیا بکەین، لەوە ناچێت هاوپەیمانیەتی پارێزگارەکان لەگەڵ لیبراڵەکان سەرکەوتنی هێنابێت. ئاسانیش نییە ئەم هاوپەیمانەتییە سەربکەوێت لەبەر ئەوەی دوو بۆچوونی زۆر جیاوازیان هەیە. سیاسەتێکی لیبراڵی ناگونجێت لەگەڵ سیاسەتێکی محافزکارانە. هیوادارم ئەم پرۆسەیەدوور بکەوێتەوە ە لە دروشمی سیاسی و زیاتر گرنگی بدات بە پلان و سیاسەتەکان کە مایەی جێبەجێ کردنن. با لەم پرۆسەدایە خەڵکی خۆمان، کە هەموو گەلی کوردستانە نەکەین بە قوربانی ململانێیەکی سیاسی کە ناوەڕۆکەکەی پێکهاتبێت لە هەوڵدانی سەپاندنی داوایەکی نەگونجاو ی حزبێکیان لایەنێک بەسەر پرۆسەیەکی گشتگیری. با لە بیرمان بێت کە دانوستاند بە راستی ئەوەیە، دان-و-ستاندن، لەکۆتایدا هیوام وایە ئەم پرۆسەیە سەرکەوتووبێت و ئامانجەکانى خۆى بپێکێت .

[qubadjt]

"کە لە تیمێک بوویت، تیمەکە پێکەوە دەیباتەوە و پێکەوە دەیدۆڕێنێت"

کە تەمەنم 11 ساڵ بوو، بۆ تیمێکی دووگۆڵی یاریم دەکرد، ناوی تیمی شەرابیەکان بوو ( واته ڕەنگی مارۆنی) (The Maroons) لە 'خولی بچووک' (Little League) بەشدار بووین. تیمەکەمان زۆر بەهێز بوو، چەندین یاریمان لەسەر یەک بردەوە و کەس دەرەقەتی ئێمە نەدەهات، هێنده له خۆمان گۆڕابووین واماندەزانی ئەگەر لەگەڵ لیڤەرپوول یاری بکەین دەیبەینەوە. (لیڤەرپوولی ساڵانی پێشوو وەک لیڤەرپوولی ئەمڕۆ نەبوو، وەک بەرشلۆنەی ئەمڕۆ وابوو!). لە پڕ لە یارییەکدا لەگەڵ تیمی 'سوورەکان'، کە تیمێکی زۆر لاوازبوو، چاک دۆڕاین بە ئەنجامی (4-0) ، کەس چاوەڕێی ئەوەی نەدەکرد بەم شێوەیە لەگەڵ تیمێکی لاوازدا شکست بێنین. لە هەمووی ناخۆشتر، یەکێک لە ئامۆزاکانم بۆ تیمەکەی تر یاری دەکرد! زۆر نیگەران ببووین لەناو خۆماندا، یەکترمان تاوانبار دەکرد، ئەم دەیووت خەتای تۆ بوو، ئەو دەیووت خەتای گۆڵچیەکەمان بوو، دوو یاریکەر لە یەکتریان دا، منیش ئەوەندە پەست ببووم قسەم لەگەڵ کەس نەدەکرد. دوای ئەو هەمووە هات و هاوار و فەرتەنەیە، مامۆستاکەمان هەموومانی بانگ کرد و ئێمەش لێمان پرسی، چۆن یاریەکەمان دۆڕاند؟ لەوەڵامدا هەموومانی وەک یەک تاوانبار کرد. هەرگیز قسەکانیم لەبیر ناچێتەوە، وتی" کە لە تیمێک بوویت، تیمەکە پێکەوە دەیباتەوە و پێکەوە دەیدۆڕێنێت، ئێمە ئەمڕۆ هەموومان دۆڕاندمان" دوا قسەکانیشی زۆر سەرنجی ڕاکێشام، کە وتی: "پێم خۆش بوو کە دۆڕاندمان و بە تایبەت بەو شێوەیەش، لەبەرئەوەی، یەک: لەخۆبایی و بێمنەت ببوون، دوو: پێم خۆش بوو چونکە تا نەیدۆڕێنیت، قەدری بردنەوە نازانیت". ئەم قسانەی دوو وانەی گرنگی فێرکردم، لە لایەک فێربووم دۆڕاندن مانای شکست و بێ هیوایی نیە بەڵکو هاندەرێکی گرنگە بۆ بە خۆداچوونەوە و خۆباشترکردن و لە لایەکی دیکەوە گەر دۆڕاندنیش نەبێت ئەوا سەرکەوتن مانا نابەخشێت یاخود شتێک نیە پێی بووترێت سەرکەوتن و چێژی سەرکەوتن. لەهەمان کاتدا هیچ تیم و گرووپ و حزب و مرۆڤێک نیە تەواو بێگەردبێت و هەرگیز نەدۆڕێت، تەنها دیکتاتۆرەکان نەبێت کە ئەمەش سەرکەوتنیان بە زۆرەملێ و بە سەپاندنە. کە ئەنجامەکانی هەڵبژاردنەکەی 21/9 دەرچوون، و بە داخەوە لە لایەن هەندێکەوە گلەیی و گازەندە و خۆدزینەوە لە بەرپرسیارەتی هاتە ئاراوە، ڕاستەوخۆ قسەی مامۆستاکەم هاتەوە بیر. بێ گومان باوەڕ ناکەم هیچ ئەندامێکی دڵسۆزی یەکێتیی نیستیمانیی کوردستان رازی بووبێت بە ئەنجامی ئەم هەڵبژاردنە، جا ناوی دەنێیت دۆڕاندن، پاشەکشەکردن یاخود هەر ناوێکی تر، گرنگ ئەوەیە، نەمان بردەوە. کە نەمان بردەوە، پێویستە هەموومان، هەر ئەندامێک، یان دڵسۆزێکی یەکێتی بە پێی بەرپرسیارێتی و قەبارەی ئەو رۆلەی کە هەیبووە خۆی بە بەرپرسیار بزانێت. لە جێگرەکانی سکرتێری گشتییەوە، تاکو ئەندام کەرتێک، ئێمە هەموومان بەرپرسین لە دەرئەنجامی هەڵبژاردنەکە و کەس نابێت خۆی جیا بکاتەوە لەم راستییە و لە هەمانکاتیشدا هەموومان بەرپرس دەبین لە هەستانەوە و گەشەدان بە یەکێتی. دەبێت ئەو ڕاستیەش لە بەرچاوبگرین کە ئەم ئەنجامە، کۆتایی دونیا نیە و کۆتا هەڵبژردانیش نیە، وەک چۆن ئاماژەم بە وتەکانی مامۆستاکەم کرد ئێمە گرنگە وانەی لێ فێربین و ئەوەی کە بەسەر یەکێتیەکەمان هات بکەینە هۆکارێک بۆ سەرکەوتنەوەمان. هەر چەندە، پێم وایە نەمانتوانی دەرس وەر بگرین لە دەرئەنجامی هەڵبژاردنەکانی ٢٠٠٩ و ٢٠١٠، بە هۆی هاوپەیمانێتیمان لەگەڵ پارتی چونکە یەک-لیست بووین، ئەمەش تا ڕادەیەک ئەم هاوپەیمانێتیە ڕاستیەکانی ئەو هەلبژاردنانەی شاردبووەوە، ئێستا خۆدزینەوە لەم دەرئەنجامە ناکرێت. بۆیە با سوودی لێوەربگرین، دەرسی لێ وەر بگرین و با ئێمە ئەم دەرئەنجامە بکەین بە هۆیەک بۆ ئەوەی هەڵسەنگاندنێکی راستەقینە و واقیعبینانە و بێ سانسۆر بکەین. با بێتەوە بیرمان چێژی بردنەوە چەند خۆش بوو و ئەو هەستەش کە دوای 21ی 9 هەمان بوو چەند ناخۆش بوو. با ئەم هەستە بکەین بە هۆیەک بۆ پێداچوونەوەی سەرتاسەری حزبەکەمان، لە پەیکەری ڕێکخراوەیی حزبەکەمان، تاکو شێوازی کارکردنی حزبەکەمان، لە فەرهەنگ و ئایدیۆلۆجی حزبەکەمان، تا سیاسەت و بۆچوونمان. دڵنیام، ئەگەر دەرس وەر بگرین لە ڕابردووی ئەم چەند ساڵەمان، نەک تەنها دەتوانین یەکێتی بکەینەوە بە هێزی کاریگەر و خەمخۆری گەلەکەمان، بەڵکو دەتوانین یەکێتی بگەیێنینەوە ئەو ئاستە کە شایستەیەتی، ئاستی دارێژەری سیاسەت و ستراتیجی کوردستان بۆ بەدیهێنانی خواستی گەلەکەمان. نوێکردنەوەی یەکێتیی نیشتمانیی کوردستان، نەک تەنها بە هێنانە پێشەوەی روخساری نوێ، بەڵکو بە دەستپێکردنی گۆڕانکاریەکی سەرتاسەری حزبی، بە سوود وەر گرتن لە رابردوو، لە پێناو ئایندەیەکی گەش و دووبارە هاتنەوە ناو خەڵک و گرنگی دان بە ڕای گشتی، چونکە دروستبوونی یەکێتی دەرئەنجامی ئازار و نەهامەتی خەڵکەکەی بوو. وەک چۆن هێزی هیوا بەخشبووین دڵنیام دەبینەوە بە هێزێکی خاوەن هیوا بۆ گەلەکەمان بە گشتی نەک تەنها کادر و ئەندامەکانمان. تێبینی: پاش دۆڕاندنمان لەگەڵ تیمی سوورەکان، دەرسمان وەرگرت و خۆمان کۆکردەوە و دەست لە ناو دەست وەک یەک تیم یاریمان کرد و خولەکەمان بردەوە.

[qubadjt]

Sunset view of Piramegroon Mountain.