Pasensya Na
Patawarin mo ako.
Pasensya na at hindi kita rineregaluhan dahil akala ko sapat na ang presensiya ko. Pasensya na at hindi ko nabili ang gusto mong sapatos at inakala ko naman ay mas magugustuhan mo na ibigay ko na lang sa’yo ang lubos kong pagmamahal. Pasensya na at hindi ko pa napapanood ang paborito mong palabas dahil patuloy kong tinititigan ang taglay mong kagandahan at ayokong pumikit dahil baka sa aking pagmulat ay mawawala ka na sa aking harapan. Pasensya na at hindi kita masyadong yinayakap dahil hawak-hawak ko pa ang puso na binigay mo sa akin noong tayo’y nagsumpaan. Pasensya na at hindi tayo araw-araw nag-uusap dahil ang akala ko’y sobra sobra na ang pagmamahal na ibinahagi ko sa’yo na kahit na hindi tayo magkausap, may pagmamahal pa rin akong natitira sa mga palad mo na nagpapaalala sa’yo kung gaano ka kaganda, kung gaano ka kabait, kung gaano kita kamahal. Akala ko na nararamdaman mo ang bawat patak ng pagmamahal ko na kahit na tayo’y mawalay sa isa’t isa, hindi mo ako kakailanganin dahil nasayo na nga ang puso ko. Ang akala ko’y sapat na sa mga mata mo, kulang na kulang pa pala. Ako pala’y nagkamali.
Akala ko hindi ko na kailangan sabihin sa’yo na gusto kitang makasama dahil alam mo na. Akala ko hindi ko na kailangan sabihin sa’yo na miss na kita dahil alam mo na. Hindi na siya tinatanong dahil isa na itong katunayan. Alam na ng lahat na ikaw lang ang laman ng isip ko at ikaw lang ang sigaw ng dibdib ko. Alam na ng lahat. Kaya akala ko hindi ko na dapat sabihin pa, doon ako nagkamali.
Akala ko hindi ko na kailangan ulit-ulitin na mahal kita dahil alam na natin ‘yun. Akala ko hindi na kita kailangan siguraduhin pa dahil, oo, mahal nga kita. Mahal na mahal. Sobrang mahal kita na hindi ko na kailangan ulit-ulitin pa, dahil kahit na maghiwalay tayo at kahit na gusto mo na akong iwanan, mamahalin pa rin kita. Hindi mo pala alam ‘yon.
Walang bagay na kasing tunay ng pagmamahal ko sa’yo at akala ko’y hindi ko na dapat sabihin pa sa’yo. Ang pagmamahal ko sayo ay isang katotohanan na puwede nang isama sa mga history book dahil siguradong sigurado ako na mahal kita. Akala ko hindi ko na dapat ipaalala pa sa’yo ang katunayan na ito, pero mabilis ka nga pala makalimot. Kaya pasensya na at hindi kita natutukan at hindi ko naisip na may mga pagkakataon na kailangan ko pang ipaalala sa’yo kung gaano kita kamahal. Pasensya na at hindi ko ipinakita sa’yo ang lubos kong pagmamahal dahil sa aking mga maling akala. Pasensya na, nagkamali ako.
