#km64

[wanstar]

Somehow, nakuha ko na ang tamang timpla ng ikalawang Martes ng buwan ko. Wala akong relong titignan. Wala akong mga upuan at mesang papangaraping mapuno. Wala akong hahawakang mga pangalan na nakasulat sa papel. Wala akong entradang sisilip-silipin para abangan ang hindi pagdating ng mga hinihintay kong mga mukha. Natapos ang Aug 11 na hindi ako nastress. Dapat ko nang ikatuwa yun.

[mykelandrada-blog-blog]

SIPON

  SIPON

Mykel Andrada

Bukas raw ay magtataas na naman ng presyo

ang langis. Dumaloy ang masaganang

sipon mula sa kanang kuweba ng aking ilong.

Ipinampunas ko ang kamisetang

may mukha ni Superman.

Kumapit ang ilang natirang lagkit

sa aking kaliwang hintuturo’t hinlalaki.

Piningot ko ang sariling ilong

at dahan-dahang suminga para bumulwak

ang naimbudong hangin sa aking mga tainga.

Humikab ako at narinig kong lumabas

mula sa mga tarangkahan kong labi

ang urong-sulong na hilik ng madaling araw,

ang paghaharutan ng mga pusa,

ang namamaos na tilaok ng tandang,

ang garalgal ng konstruksyon ng condo,

ang nangangasong sipol ng takore,

ang nagmumumog na makina

ng mga jeep, bus at iba pang sasakyan.

Hindi pa naiuutot ng aking mga tainga

ang lahat ng bigat ng hangin sa likod

ng aking noo. Lumabas ako ng bahay

at pinausukan ng nikotina ang nagmamadaling

langit: sing-itim ng gasolina ang mga ulap,

minamantsahan ang mayabang

at naninilaw na buwan.

Humatsing ako na parang sunud-sunod

na busina ng nagmamartsang trapik

sa kalsada.

Iba, QC. March 29, 2011. 3:57am.