#nstplts

[mairnclls-blog]

Reaksyon sa Demo-Teaching

           Sa huling araw ng klase namin sa NSTP ay mayroong nag-demo teaching kung saan ipinakita ang paraan ng pagtuturo sa mga batang nasa Kinder pa lamang. Nais ipakita sa amin ng aming mga instruktor kung ano ang aming papasukin sa susunod na semestre kung saan nga ay kami na mismo ang sasabak sa pagtuturo. Habang pinapanuod ko ang nag-dedemo ay halong kaba at pagka-excite ang nararamdaman ko dahil nga mararanasan kong muli ang magturo sa ibang tao. Ang unang pagkakataon ay noong nagturo kami noon sa Alternative Learning System (ALS) sa klase naming ng EDUC 101.

             Sa kabuuan ay naging maayos ang demo-teaching at marami akong natutuhan. Ibang-iba ang atake ng pagtuturo dahil mga batang nasa Kinder pa lamang ang tuturuan. Nakita ko na dapat ay lagi kang masigla sa harap ng mga bata at dapat lagi mong bitbit ang mga ngiti sa iyong labi dahil kailangan mo silang mahimok na mag-aral ng mabuti. Dapat ding siguraduhin na magiging masaya ang klase at gumamit ng makukulay at magagandang mga visual aids para magisurado na makukuha mo ang kanilang atensyon.

 Isa sa pinakamagandang natutunan ko noong araw na iyon ay hindi natin dapat binibigyan ng pare-parehong pagsusulit ang mga bata. Dapat ay iayon natin ito sa kanilang kakayahan upang masigurado ang kanilang pagkatuto. Hinahati ang isang klase sa tatlong grupo – mga batang below average, average at above average. Sinisiguradong hindi alam ng mga bata na ang pagkakahati nila ay dahil dito dahil magududulot ito ng diskriminasyon sa kanila. Ginagawa natin ito upang masigurado na matututo ang lahat ng mag-aaral. Hindi maaaring kuhanin ang kaparehong pagsusulit ng isang batang nasa mas mababang antas ang para sa mas mataas na antas dahil siguradong di niya ito mauunawaan. Hindi rin epektibo na kukuhanin ng mga nasa mas mataas na antas ang pagsusulit ng mga nasa mas mababang antas dahil baka hindi sila ganahang sagutan ito sa dahil maaaring nadadalian sila dito. Ito ay isang magandang kaparaan upang ating matiyak na natutunan ng mga bata ang kanilang aralin dahil ang guro mismo ang nag-aadjust sa kung ano ang kakayahan ng bata.

[mairnclls-blog]

Reaksyon sa Pelikulang Three Idiots

           Ang pelikulang ito ay isa sa mga pinakamagagandang pelikulang aking nasilayan sa tanang buhay ko. Hindi ka magsasawang ulit-ulitin ang pelikulang ito kahit na ang running time nito ay aabot ng halos tatlong oras. Ang tema ng pelikulang ito ang siya naman talagang pupukaw sa iyong damdamin dahil makikita mo rito bilang kabataan ang iyong mga karanasan. Naging mahusay rin ang mga aktor na gumanap sa pelikula.

             Ang pangunahing tema ng pelikulang ito ay tungkol sa edukasyon. Masasalamin sa daloy ng pelikula kung ano ang pinahahalagahan ng mga estudyante at ng sistema ng edukasyon. Tila nga yata ay mas pinahahalagahan dito ang marka at isinasawalang bahala ang tunay na pagkakaunawa. Ipinakita sa simula ng pelikula na mas ninais ng guro ang depinisyon mula sa libro kaysa sa simpleng depinisyon na ibinigay ng kaniyang estudyante. Ipinapakita nito na mas pinahahalagahan ng sistema ng edukasyon ang laman ng tinuturo kaysa ang kakayahan ng estudyante na matuto. Hindi ito maganda dahil isinasawalang bahala natin ang potensyal ng estudyante na makapag-isip sa kanyang sarili. Ang nangyayari ay idinidikta na lamang natin sa ating mga estudyante ang dapat nilang matutunan at di natin sila binibigyan ng kalayaang magbigay ng kanilang sariling pananaw ukol sa araling tinatalakay.

             Makikita rin na mas pinahahalagahan ang grado sa sistema ng edukasyon. Matapos ang pagsusulit ay ipinapakita ang rankings ng mga estudyante. Malinaw na makikita ang diskriminasyon sa pagitan ng nakakuha ng mataas at mababang marka noong nagkaroon ng picture taking kung saan ang nakakuha ng pinakamataas na marka ay katabi ang director ng eskwelahan sa pinakagitna sa harap samantalang ang nakakuha ng mababang grado ay nanatili sa itaas na sulok ng litrato. Hindi natin dapat ginagawa ito dahil ito magdudulot lamang ng di-pagkakapantay-pantay sa hanay ng mga estudyante. Oo, alam nating mayroong nakakuha ng mataas at mas mababang marka ngunit maaari naman nating isikreto na lamang ito. Ito kasi ay nakapagpapababa ng self-esteem ng isang estudyante at maaaring idulot nito ang pagkawala ng gana ng estudyante na mag-aral. Bilang mga guro ay dapat tayo ang humimok sa ating mga estudyante na pagbutihan ang kanilang pag-aaral.

[mairnclls-blog]

CIVIC LITERACY

           Ayon sa Urban Agenda, ang Civic Literacy ay ang kaalaman kung papaano aktibong lumahok at magsimula ng pagbabago sa iyong komunidad at sa lipunan. Sa madaling salita, ang literacy na ito ang tumutukoy kung paano ka magiging kapaki-pakinabang na mamamayan sa iyong komunidad.

           Mahalaga na bawat isa sa atin ay maging isang kapaki-pakinabang na mamamayan at magagawa lamang natin ito kung alam natin ang mga suliraning panlipunan ng ating bayan. Sinasabi nga nila na ang unang dapat mong gawin ay dapat magkaroon ng kamalayan sa kung ano ang nagyayari at dito ay bubuo ka ng konklusyon sa kung ano ang mga maaaring gawin bilang solusyon. Ngunit hindi sapat lamang na malay ka sa kung ano ang meron at mayroon kang komento tungkol dito. Kailangan mong kumilos kung pabor ka ba o di pabor sa mga kaganapan sa iyong lipunan. Dapat rin ay nakikinig ka sa ibang mga komento ng iba dahil maaaring mayroon ka pa lang mga bagay na nakalimutang isaalang-alang. Hindi sagot ang pagsasawalang-bahala kaya naman ay dapat manindigan ka at ipaglaban ang kung ano pinaniniwalaan mong tama.

           Kailangan nating imulat ang ating mga kabataan sa kung ano ba ang dapat nilang malaman sa kanilang lipunan. Mahalaga na maunawaan ng mga bata ang civic literacy dahil sila ang susunod na henerasyon at dapat turuan nating silang kumilos para sa ikabubuti ng lahat.

[mairnclls-blog]

SOCIAL LITERACY

           Ayon sa website na diligo.com, ang Social Literacy ay ang paghubog sa kaparaan sa pakikisalamuha sa ibang tao. Alam natin na mahalagang mapag-aralan kung paano ba ang mahusay na pakikisalamuha sa ibang tao. Sabi nga ng isang kasabihan sa Ingles – “No man is an island”. Sinasabi sa kasabihang ito na walang tao ang makapapamuhay mag-isa at kailangan niya ng makakasama. Kaya natin kailangan ng social literacy ay upang matutunan natin kung paano ba tayo makisasalamuha sa isang magandang paraan. Kailangan nating ipakita sa ating kapwa ang pagrespeto natin sa kanila.

           Halimbawa ng paggamit ng social literacy ay ang pagbili sa tindahan. Nakikisalamuha ka sa tindera sa pagkakaroon ninyo ng interaksyon sa isa’t isa. Sa iyong pagsasabi ng kung ano ang iyong bibilhin ay dapat ipakita mo na ang parespeto mo sa kaniya, maaari kang gumamit ng po at opo kung mas matanda sa iyo ang tindera at gumamit ka ng malumanay na boses pa pakikipag-usap sa kaniya.

           Mahalga rin sa social literacy ang pagkakaintindihan kaya naman iyong siguraduhin na iyong naipapaliwanag ng maayos ang iyong sarili sa iyong kapwa. Hindi maganda ang magiging resulta kung hindi pala kayo nagkakaintindihan ng iyong kausap.

           Mahalgang maikintal natin ang social literacy lalo na sa mga bata dahil kailangan nila ito upang makapagtuloy sa pamumuhay ng matiwasay. Darating at darating ang araw na kailangan na nilang makipag-usap sa isang tao ng walang gumagabay sa kanila kaya naman dapat natin silang mahubog sa literacy na ito.

[mairnclls-blog]

MATHEMATICAL LITERACY

           Ayon sa Programme for International Assessment (PISA) Students Ang Mathematical Literacy ay ang kapasidad ng isang indibidwal na tukuyin at unawain ang gampanin ng matematika sa mudo, upang gumawa mga mahuhusay na desisyon at magamit ito sa mga kaparaanan na nakakamit ng isang indibidwal ang kaniyang mga pangangailangan bilang isang mamamayan.

           Tulad ng ibang mga literacy ay kailangan ng isang idibidwal na magakaroon ng mathematical literacy dahil ito ay magagamit niya di lamang sa eskwelahan kung hindi pati na rin sa labas nito. Balikan natin ang nabanggit na sa scientific literacy na pagluluto. Gumagamit naman tayo ng mathematical literacy dito sa pamamagitan ng pagsusukat sa mga sangkap na gagamitin sa pagluluto. Magagamit mo rin ito sa pagbibilang kung magkano ang ibabayad mo sa tindahan at kung magkano ang sukli mo. Hindi rin mawawala ang iyong pagkwenta sa kung magkano ba ng interes mula sa inutang mo. Makikita natin dito na gamit na gamit ang matematika sa ating pang-araw-araw na buhay kahit marami ang mga may ayaw dito.

[mairnclls-blog]

SCIENTIFIC LITERACY

            Ayon sa literacynet.org, ang Scientific Literacy ay ang kaalaman at pagkaunawa sa mga konsepto at prosesong siyentipiko sa ating paligid na mahalaga sa ating pang-araw-araw na buhay. Mahalaga na ang bawat isang tao ay magkaroon ng scientific literacy dahil ito ay tiyak na magagamit niya kahit sa mga simpleng bagay lamang.

           Kailangan natin ng scientific literacy sa mga gawaing di natin iisipin na kakailanganin nito, halibawa ay sa pagluluto. Kapag tayo ay nagluluto at kailangan natin alamin kung sapat na ba ang init ng tubig bago natin ilagay ang mga sangkap. Maniwala man kayo o sa hindi ay mayroong siyensiya sa likod ng bagay na ito. Ang nagdudulot ng pag-init ng tubig ay ang apoy ng kalan. Para kontrolin ang init ay maaari nating lakasan o hinaan ang apoy. Nakikita natin sa pagkontrol sa apoy ang pagiging literate sa agham dahil alam mo na depende sa init ng apoy ang bilis ng pag-init ng tubig.

           Makikita natin na mahalaga ang scientific literacy dahil hindi mo matatakasan ang pangangailangan nito sa ating araw-araw na pamumuhay. Bilang isang guro ay isa ito sa mga bagay na dapat nating ikintal sa isipan ng ating mga mag-aaral dahil mahalaga itong matutunan upang labis nilang maunawan ang mga pangyayari sa kanilang paligid.

[mairnclls-blog]

MEDIA LITERACY

            Ayon sa medialit.org, ang Media Literacy ay ang kakayahang mag-access, mag-analisa, mag-evaluate at bumuo ng media sa iba’t ibang porma. Mahalaga ang literacy na ito dahil sa epektong dulot ng media sa atin mapa-positibo man ito o hindi. Kailangan nating alamin kung ang ipinapakita ba ng media ay tama o mali. Kailangan maalaman tayo sa pagsala ng mga impormasyong pumapasok at di dapat tayo basta-basta naniniwala sa ating mga nakikita at naririnig. Dapat ay tingnan natin ang mga bagay sa kaibuturan nito at di lamang sa kung ano ang nakikita natin sa ibabaw. Hindi rin dapat tayo bulag sa kung ano ang sinasabi ng iba ukol sa mga isyu dahil maaaring ang mga impormasyong hindi natin binibigyang halaga ay siya palang susi upang tunay na maunawan ang mga isyu.

           Ang literacy na ito ay dapat matamasa ng mga bata upang maging mapanuri sila sa mga bagay na kanilang nakikita at naririnig. Dapat ay masanay silang kuwestiyonin ang mga bagay-bagay at di lamang basta tanggap ng tanggap sa kung ano ang sinasabi at ipinapakita sa kanila.