#ramadan2014

[omarahmed1999]

درس ليلة ٢٩ رمضان

بسم الله والحمد لله والصلاة والسلام علي رسول الله

انتهي رمضان :') خالص العزاء لكل واحد ضاع عليه رمضان .. وخالص التهنية لكل واحد فاز برمضان موضوع النهاردة عن الناس البيتجي بعد رمضان تقول وقعت وعن العيد

ابليس كان مربوط طول الشهر ده .. تعب من كتر البيشوفوا .. الناس كلها صايمة الصبح وبتصلي بليل وبتقرأ قرآن وبتصلي في المساجد و بتزور بعض و مفيش معاصي و بتطلع فلوس و بتفطر الصائمين و بتدعي ربنا و عبادة ٢٤\٧ .. مرة واحدة لما يتفك ياخد نفس كبير و يهجم بقي .. يبقي واحد مبينامش في رمضان و مقتطع نفسه في العبادات و يجيي اول يوم .. يروح هادد الجبل الحسنات ده ..

مع ان رسول الله قال اتبع السيئة الحسنة تمحها .. هو مشي بمبدأ اتبع الحسنة السيئة

وتيجي ليلة العيد الشيطان عرف يضرب اول سهم فيها تبتدي بعد رمضان بذنب كبير عشان تنسي كل العملته وتقفل صفحة الايمان والحلاوة ..

وطبعا بقي سهر ليلة العيد .. وتضيع صلاة العيد والبيساعد علي كدة اصحاب السوء .. الماشين بيقولوا يا عم تعالي نفكها بقي دا الواحد تعب في رمضان صيام كل يوم .. الليلة ليلة العيد الليلة خمر ونساء 

لية يا اخي تبتدي بعد رمضان بالذنوب ؟ مع ان احنا توبنا في اول الشهر .. مش فاكر شروط التوبة ؟ الاقلاع عن الذنب والعزيمة علي عدم الرجوع اليه ابدا والندم عليه .. نسينا ده خالص ؟

لما تبتدي بعد رمضان بمعصية كبيرة انت كدة بتبين لله انك مكنتش مخلص في التوبة دي

بقول لنفسي وبقولكوا .. بلاش نستهزأ بالله .. انت كده بتقول لربنا انا مش هعبدك الا في رمضان .. مع ان رب رمضان هو رب السنة كلها .. شهر رمضان ده بيجي كل سنة عشان يفوقنا و نفتح صفحة جديدة لبقية السنة .. شهر رمضان بيقولك يلا فوق من الكنت فيه وافتح صفحة جديدة وعندك الشهر ده الثواب مضاعف اسعي فيه وكمل بعديه بلاش رمضان يبقي حجة عليك مش ليك يوم القيامة

ربنا قال : واعبد ربك حتي يأتيك اليقين .. مش اعبد ربك حتي انتهاء رمضان .. واليقين هو الموت لان مفيش اي يقين في حياة الانسان الا الموت

طيب فيه ما شاء الله ناس عايزة تكمل العلاقة الحلوة دي مع ربنا لكن بتقع كده وقعات .. لازم تعمل كذا حاجة

١- الدعاء

دعاء كان النبي عليه الصلاة والسلام بيدعيه كتييير : اللهم يا مقلب القوب ثبت قلبي علي دينك عايزين ندعي بالدعاء ده كتير وفي كل سجدة ندعي بيه زي ما كان النبي بيعمل .. احنا محتاجين الدعاء ده اوي .. لأن الثبات من عند الله .. و لازم نكون صادقين في الدعاء ده

٢-اوعي تعجب بعبادتك

خلي بالك من الكلمات دي .. الشيطان بيجيلك بعد رمضان يقولك ايه الجمال ده كله .. ده انت ختمت القران كذا مرة .. و تعبت جامد في عبادة الله و كنت بتصلي التراويح كل يوم وكلها .. ويقعد يفكرك بالكنت بتعملة ويكبرلك الطاعات ويحسسك كده انك عثمان بن عفان و مرة واحدة يقولك هي جت علي المعصية دي دا انت عبدت ربنا كتير في رمضان مش هتيجي عليها .. ويعمل كده مع كل معصية

٣- قال تعالي { وَلَا تَكُونُوا كَالَّتِي نَقَضَتْ غَزْلَهَا مِن بَعْدِ قُوَّةٍ أَنكَاثًا } تخيل معايا واحدة بتغزل مثلا لوحة كبيرة وعملت مجهود قوي و في الاخر راحت شادة الخيط من اخرة ومبوظة كل العملتة .. ربنا بيقول متكونش زيها بقي تغزل عمل قوي اوي و بعد كده تنقضة بالمعاصي و تضيع العمل ده

٤- الاستغفار

الاستغفار .. ختام الأعمال الصالحة , ( كالصلاة , والحج , والمجالس ) , وكذلك يُختم الصيام بكثرة الأستغفار .

٥- إياك وهبوط العزيمة ( خمس أشياء تساعدك على تثبيت مستواك الايماني ) :

من احلي الحجات في رمضان انك تخش المسجد تلاقي يا اما واحد راكع او ساجد او بيقرأ قرآن او بيدعي و شباب كتير ما شاء الله مرة واحد في أول أيام العيد يجي الكسل فا نأخر الصلاة ومنا اليقوم يحط المصحف في المكتبة لرمضان الجاي ويترك الدعاء وينسي قيام الليل ( كل دي من خطط الشيطان )

هنتفق على التزام بخمس حاجات بعد رمضان ولا نفرط فيها ابدا (منقولة)

أ- المحافظة على الصلوات الخمس جماعة وخصوصا صلاة الفجر . احنا اثبتنا لأنفسنا في رمضان اننا قادرين على اداء صلاة الجماعة في المسجد وقادرين على صلاة الفجر يوميا

ب- القرآن : لا تكن ممن يقرآن القرآن في رمضان فالقرآن انزل لنتلوه في رمضان وغير رمضان ... انت قدرت ان تقرأ كل يوم جزء او جزئيين أو ثلاث واجتهدت في ذلك وخصصت وقت من يومك فحاول أنك تخلي لنفسك ورد يومي ثابت من القرآن ولو صفحة واحدة يوميا

ج- ذكر الله : اجتهد بعد رمضان على ان تحافظ على اذكار الصباح والمساء اذكار النوم ، اذكار الخروج من المنزل، استغل وقت فراغك بذكر الله .

د- الصحبه الصالحة : اختار اليعينك على طاعة الله فالمرء على دين خليله والأخلاء بعضهم يومئذ لبعض عدو الا المتقين ، والمؤمن للمؤمن كالبنيان يشد بعضه بعضا فاختار صاحب لو رأى منك معصية حذرك ودلك على طريق الخير

ة- الدعاء : ( وإذا سألك عبادي عني فإني قريب . أجيب دعوة الداع إذا دعان ) ، (وقال ربكم ادعوني استجب لكم ) ( من لم يسال الله يغضب عليه ) الكثير من الآيات والأحاديث في فضل الدعاء ومكانته

و متحرمش نفسك من قيام الليل ولو يوم واحد في الأسبوع واعرف فضل قيام الليل ، والصوم مش في رمضان بس .. ومتنساش تصوم الستة البيض بعد رمضان قال رسول الله صلي الله عليه وسلم : من صام رمضان ثم أتبعه ستا من شوال كان كصيام الدهر واعرف ان احب الاعمال الي الله ادومها وان قلت

_________________

العيد

بسم الله والحمد لله والصلاة والسلام علي رسول الله

العيد ده مش لكل الناس .. العيد لبعض الناس كده الشدت في رمضان و جري منهم و خلاص رمضان خلص وهم في اشد الاحزان ان الهدية دي هتمشي ..

اول كلمة بتاعة (انتهي رمضان) كان شيخ المسجد بيقولها والدمعة هتنزل من عينه .. فا ربنا بيديك هدية تانية عشان متزعلش علي الهدية الاولي

عارف العيد لمين ؟ العيد لمن اطاع الله زي ما ابن الخليفة الزاهد عمر بن عبد العزيز قال لما جيه العيد وابناء المسلمين كانوا جايبين لبس جديد .. عمر بن عبد العزيز رضي الله عنه دمعت عينة كده فا سأله ابنه ليه كده يا والدي فقال عمر خفت ان ينكسر قلبك وانت بالهدوم القديمة دي .. فقال انما ينكسر قلب من عرف الله فعصاه وعق امه واباه اما انا فلا والله انما العيد لمن اطاع انما العيد لمن اطاع الله

وعشان تحس بالعيد .. ١- حمومة العيد ٢- تصلي صلاة العيد باحلي لبس عندك و احلي عطر عندك ٣- تكلم كل قرايبك واصحابك .. و اي حد مخاصمة كلمة و قولة متزعلش مني حتي لو هو الغلطان و قوله كل سنة وانت طيب .. وتعمل ده لوجه الله .. حتي لو اساء ليك وشتمك قوله شكرا والسلام عليكم واقفل بس اجرك كبير والله ٤- ارجع كل كحك 

و علي فكرة اسمة عيد الفطر .. مش عيد الكحك وكل سنة وانتوا طيبين وانا زعلان والله ان دا اخر درس في رمضان بس ان شاء الله ارجع بدروس كل اسبوع.

سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتة

[omarahmed1999]

للأسف لسة في ناس مبتصليش التراويح .. اذا كان ربنا مغفرلكش في رمضان هيغفرلك امتي ‫#‏فاضل_يوم_الحق‬ نفسك

[omarahmed1999]

كان الامام الشافعي يختم القرآن في رمضان ٦٠ ختمة وفي كل شهر ٣٠ ختمة

[omarahmed1999]

درس ليلة ٢٤ رمضان

بسم الله والحمد لله والصلاة والسلام علي رسول الله

هنتكلم النهاردة عن سهم من سهام سموم الشيطان .. وانا بصراحة كنت عايز اتكلم في الموضوع ده من زمان .. لأنه بصراحة منتشر جدا .. والموضوع للشباب عشان ممكن بعض الكلمات تضايق حد

هي عبارة عن نعمة استخدمناها غلط .. ربنا سماها حبيبتيك .. وقال في الحديث القدسي : إذا ابتليت عبدي بحبيبتيه فصبر عوضته منهما الجنة [رواه البخاري]

بص .. المعاصي وممتعة و حلوة .. ودي الحقيقة .. واني مغضش بصري امتع واحلي .. بس استني .. ياريت تسمعني للأخر و متمشيش .. لأن والله كل واحد فينا محتاج يسمع الكلمتين دول .. مع كل نظرة تبص لواحدة كده ابليس واقف شادد السهم واول ما تبص و متشلش عينك من عليها يقوم رامي السهم المسموم في قلبك .. وللأسف عدم غض البصر ده بيودي في داهية والله وكتير منه بيخلص بمعاصي كبيرة

ولعل حد يسأل هو ربنا حرم حاجة بسيطة قوي ده نظرة يعني .. ايوة .. اعرف ان العين مرآة للقلب عشان كده القلب بيشتهي ما يري وشوف الايات والاحاديث دي

١- قال تعالي : { قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ } الشهوة شئ اساسي جدا عند كل راجل واليقول غير كده ميبقاش راجل .. بس الحيوانات عندها شهوة بردو .. يا اما نتحكم فيها .. يا اما نبقي زيهم ..

٢- وقال : { يعْلَمُ خَائِنَةَ الْأَعْيُنِ وَمَا تُخْفِي الصُّدُور } ايه خائنة الاعين ؟ قال ابن عباس في قوله : ( يعلم خائنة الأعين وما تخفي الصدور ) وهو الرجل يدخل على أهل البيت بيتهم ، وفيهم المرأة الحسناء ، أو تمر به وبهم المرأة الحسناء ، فإذا غفلوا لحظ إليها ، فإذا فطنوا غض ، فإذا غفلوا لحظ ، فإذا فطنوا غض بصره عنها وقد اطلع الله من قلبه أنه ود أن لو اطلع على فرجها .

٣- قال تعالي : { يَوْمَ يُحْشَرُ أَعْدَاءُ اللَّهِ إِلَى النَّارِ فَهُمْ يُوزَعُونَ * حَتَّىٰ إِذَا مَا جَاءُوهَا شَهِدَ عَلَيْهِمْ سَمْعُهُمْ وَأَبْصَارُهُمْ وَجُلُودُهُمْ بِمَا كَانُوا يَعْمَلُونَ } .. ايه ده يعني انا مش هعرف انكر ؟ لا طبعا .. لو انكرت انك منظرتش مثلا النظرة كذا في يوم كذا وقت كذا .. بصرك هيشهد عليك ويقول لا نظر شوف الاية البعديها { وَقَالُوا لِجُلُودِهِمْ لِمَ شَهِدْتُمْ عَلَيْنَا ۖ قَالُوا أَنْطَقَنَا اللَّهُ الَّذِي أَنْطَقَ كُلَّ شَيْءٍ وَهُوَ خَلَقَكُمْ أَوَّلَ مَرَّةٍ وَإِلَيْهِ تُرْجَعُونَ * وَمَا كُنْتُمْ تَسْتَتِرُونَ أَنْ يَشْهَدَ عَلَيْكُمْ سَمْعُكُمْ وَلَا أَبْصَارُكُمْ وَلَا جُلُودُكُمْ وَلَٰكِنْ ظَنَنْتُمْ أَنَّ اللَّهَ لَا يَعْلَمُ كَثِيرًا مِمَّا تَعْمَلُونَ }

*الاحاديث

١- قال رسول الله صلي الله عليه وسلم : إياكم والجلوس في الطرقات فقالوا: يا رسول الله ، ما لنا من مجالسنا نتحدث فيها ، فقال: فإذا أبيتم إلا المجلس فأعطوا الطريق حقه قالوا : وما حق الطريق يا رسول الله ؟ قال: غض البصر ، وكف الأذى ، ورد السلام ، والأمر بالمعروف والنهي عن المنكر [رواه البخاري ومسلم]

٢- قال رسول الله صلي الله عليه وسلم : { كُتب علي آدم نصيبه من الزنا ، مدرك ذلك لا محالة ، فالعينان زناهما النظر ، والأذنان زناهما الاستماع ، واللسان زناه الكلام ، واليدان تزنيان وزناهما البطش ، والرجلان تزنيان وزناهما المشي ، والقلب يهوى ويتمنى ، ويصدق ذلك الفرج ، أو يكذبه } [رواه البخاري ومسلم ]

٣- وعن جرير بن عبدالله قال: { سألت رسول الله صلى عليه وسلم عن نظرة الفجاءة قال له اصرف بصرك } [رواه مسلم وابو داود ]. يعني واحدة ماشية في الشارع وانت مش عارف و مرة واحدة بتبص في الشارع لقيت واحدة .. تصرف بصرك علي طول

٤- وقال عليه الصلاة والسلام. { يا علي، لا تتبع النظرة النظرة فإن لك الأولى، وليست لك الآخرة } [رواه الترمذي وأبو داود].

والحديث ده بيوضح القبلية اول نظرة ليك لكن التانية عليك .. ومش معني ان اول نظرة ليك انك تبصلها ساعتين و تقول دي الاولي اول نظرة علي طول اصرف بصرك .. و في ناس تقول دي حلال طلاما انا مبربشتش .. اول ما ابربش تبقي حرام علي طول وده لا طبعا .. اول ما تلاحظ تغض ..

٥- قال رسول الله صلى الله عليه وسلم : { يا معشر الشباب من استطاع منكم الباءة فليتزوج؛ فإنه أغض للبصر وأحصن للفرج، ومن لم يستطع فعليه بالصوم فإنه له وجاء } [متفق عليه]

٦- قال النبي صلى الله عليه وسلم: اضمنوا لي ستا من أنفسكم أضمن لكم الجنة: اصدقوا إذا حدثتم، وأوفوا إذا وعدتم، وأدوا إذا ائتمنتم، واحفظوا فروجكم، وغضوا أبصاركم، وكفوا أيدكم. [رواه احمد وابن حبان والحاكم]

من احلي الحاجات ان غض البصر من اسباب دخول الجنة ..مش نفسك تخش الجنة الي ربنا قال في الحديث القدسي : { أعددت لعبادي الصالحين في الجنة ما لا عين رأت، ولا أذن سمعت، ولا خطر على قلب بشر } [رواه البخاري ومسلم ] اقولك حاجة حلوة ؟ خلي غض البصر هو مهر للحور العين في الجنة

الامام ابن القيم قال : النظر أصل عامة الحوادث التي تصيب الإنسان ، فإن النظرة تولد الخطرة ، ثم تولد الخطرة فكرة ، ثم تولد الفكرة شهوة ، ثم تولد الشهوة إرادة ، ثم تقوى فتصير عزيمة جازمة ، فيقع الفعل ولا بد ما لم يمنع مانع ، ولهذا قيل : الصبر على غض البصر أيسر من الصبر على ألم ما بعده .

وده صح جدا .. واحد بيبص .. و يجيلية خطرة كده يقعد شاغل دماغة بيها .. و الخطرة تتحول لفكرة .. فكرة انه يجرب يلمس .. و بعديها شهوة عالية .. و الارادة والعزيمة علي المعصية فتقع فيها .. مهو سبب التحرش دلوقتي ايه ؟ واحد استخدم نعمة البصر عنده غلط .. ساب عينية تلف هنا وهنا .. جالة خطرة انه يلمس ... فكرة انه يتحرش .. شهوة .. ارادة .. عزيمة .. يقع في المعصية بعد ما كان مبيغضش بصرة كتير قلبة اتملي من سهام ابليس المسمومة .. وقعد يتحرش .. وانتقل لمراحل تانية والعياذ بالله اغتصاب بقي و زنا

عشان كده موضوع غض البصر ده مهم جدا والادلة جبتهالك وكتيرة .. مهم اوي لإن العواقب البعدها اصعب .. وان ناس كتير دلوقتي قلبها بقي اسود من غلطة اول نظرة و دلوقتي بقي صور ماشي .. افلام ماشي .. تحرش ماشي .. وهكذا

هل غض البصر للرجال بس ؟ لا .. للنساء بردو .. قال تعالي { وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنّ}َ و للأسف وصل لبعض البنات انها بتجيب صور ولاد من بتوع بره دول ويحطتوا الصورة ويتكلموا علي جمالة و مش عارف ايه .. زي ما ولاد بتعمل بتحط صور بنات تكاد تكون مش لابسة .. الاتنين هياخدوا ذنب كل واحد شاف للصورة .. عشان كده بقول انت عملت المعصية ليييييه بقي تاخد ذنوب غيرك

بالنسبة للبيقول انت مش شايف لبسها عامل ازاي و ربنا جميل بيحب الجمال .. انت ملكش دعوة بلبسها انت مأمور تغض بصرك ايا كان لبسها ايه

واختي في الله ساعدي اخوكي المسلم في انه يغض بصرة

هذكرلك كده بأختصار العوامل التساعدك علي غض البصر

١- الاستعانة بالله : لأن الله علي كل شئ قدير ومش هيجي عليك وانت بتقول يا رب اعني علي غض البصر وميقدرش لا طبعا ارفع ايديك وادعي

٢- استحضار مراقبة الله : انت لدوقتي صايم .. طب افطر ؟ هتقول لا طبعا ازاي ربنا شايفني .. طيب ما هو بيشوفك وانت بتشوفها بردو ؟ سئل بعض السلف : بم يستعان على غض البصر ؟ فقال: بعلمك أن نظر الله إليك أسبق من نظرك إلى من تنظر إليه.

٣- تتجوز او تصوم ، قال رسول الله صلى الله عليه وسلم : { يا معشر الشباب من استطاع منكم الباءة فليتزوج؛ فإنه أغض للبصر وأحصن للفرج، ومن لم يستطع فعليه بالصوم فإنه له وجاء } [متفق عليه]

٤- احفظ الحديث ده { ومن هَمّ بِسَيّئَةٍ فَلَمْ يَعْمَلْهَا كَتَبَهَا الله عِنْدَهُ حَسَنَةً كَامِلَةً } [رواه البخاري ومسلم] يعني لما تكون ماشي في الشارع وتبص علي الطريق وتلاقي واحدة وتصرف بصرك علي طول وتستعيذ بالله من الشيطان يتكتبلك حسنة انك جاهدتك نفسك عن النظرة ..

٥- ترك صحبة السوء ومصاحبة الاخيار : لأن ببساطة وده مشهور جدا لو ماشي مع صاحب سوء وعدت واحدة هيقولك بص شوف .. وتبصوا انتوا الاتنين .. انما صاحب الخير .. يا اما يبعدك عنها .. او يقولك تعالي نطلع قدامها لو لاحظ انك بصيت .. وينصحك .. يقولك اتقي الله .. بتساعدوا بعض في الدخول للجنة

٦- ملازمة المصحف في كل مكان ٧- ملازمة ذكر الله ٩- متوقفش في الاماكن البتعدي منها الستات .. زي مدرسة بنات او جماعة ١٠- حاول تنشغل بالدعوة الي الله ١١- التوبة ١٢- استحضار الحور العين في الجنة وان جمال واحدة في الدنيا مايساويش ظافر من الحور العين .. قال رسول الله صلى الله عليه وسلم : " لو أن امرأة من نساء أهل الجنة اطلعت إلى الأرض لأضاءت ما بينهما , ولملأت ما بينهما ريحا , ولنصيفها على رأسها خير من الدنيا وما فيها) رواه البخاري

رمضان خلاص قرب يخلص خد القرار دلوقتي واطلع من رمضان بتوبة من المعصية دي وقرر انك هتغض بصرك من دلوقتي سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتةُ

[omarahmed1999]

درس ليلة ٢٣ رمضان

بسم الله والحمد لله والصلاة والسلام علي رسول الله

الحديث ده جميل اوي قال رسول الله صلي الله عليه وسلم : { العبادة في الهرج كهجرة إلي } [رواه مسلم]

قال النووي في شرح مسلم: المراد بالهرج هنا الفتنة واختلاط أمور الناس، وسبب كثرة فضل العبادة فيه أن الناس يغفلون عنها ويشتغلون عنها، ولا يتفرغ لها إلا أفراد.

قال،الحافظ ابن رجب،وسبب ذلك أن الناس في زمن الفتن يتبعون أهواءهم ولا يرجعون إلى دين، فيكون حالهم شبيهاً بحال الجاهلية، فإذا انفرد من بينهم من يتمسك بدينه، ويعبد ربه، ويتبع مراضيه، ويجتنب مساخطه، كان بمنزلة من هاجر الي رسول الله

قال تعالي {أَحَسِبَ النَّاسُ أَنْ يُتْرَكُوا أَنْ يَقُولُوا آَمَنَّا وَهُمْ لَا يُفْتَنُونَ،وَلَقَدْ فَتَنَّا الَّذِينَ مِنْ قَبْلِهِمْ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِين } [العنكبوت]

من احلي حاجة إن يبقي فيه ماتش وقت التراويح بظبت و ممكن يبقي النهائي واسيبة عشان هصلي انا عارف ان كده كأني هاجرت الي رسول الله او تبقي الناس كلها نايمة وانزل انا في وسط البرد عشان اصلي الفجر او يبقي في مسلسل او برنامج بحبة جدا واسيبة عشان هنزل اصلي وغيرة كتير اوقات كتير بتبقي الناس مشغولة عن الله في الدنيا في مواقف معينة .. افتكر ربك واعرف ان العبادة مش هي الصلاة بس قال شيخ الإسلام ابن تيمية - رحمه الله - في "العبودية": "العبادة هي: اسم جامع لكل ما يحبه الله ويرضاه، من الأقوال والأعمال الباطنة والظاهرة.

فالصلاة، والزكاة، والصيام، والحج، وصدق الحديث، وأداء الأمانة، وبر الوالدين، وصلة الأرحام، والوفاء بالعهود، والأمر بالمعروف، والنهي عن المنكر، والجهاد للكفار والمنافقين، والإحسان للجار واليتيم، والمسكين، وابن السبيل، والمملوك من الآدميين والبهائم، والدعاء والذكر والقراءة، وأمثال ذلك من العبادة.

سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتة

[omarahmed1999]

درس ليلة ٢٢ رمضان

بسم الله والحمد لله والصلاة والسلام علي رسول الله

موضوع النهاردة عن كلمة ربنا مذكرهاش بخير في القرآن الدنيا .. الدنيا مش هي الحياة .. الدنيا حالة إن الانسان يعيش مبيدورش الا علي حظ نفسة ومتعتة .. دون النظر لحق الله او حقوق الناس

- لو داخل لنقاش لاثبات ذاتك مش اثبات الحق تبقي دي دنيا - لو بتشتغل والهدف يبقي الفلوس بس حتي لو كانت حرام دي دنيا - لو نايم ومصلتش الفجر دي دنيا - لو خارج بتتعشي مع صحابك ووالدتك عند الدكتور لوحدها دي دنيا - لو قاعد علي القهوة طول اليوم ومبتشاركش مراتك في تربية عيالك تبقي دي دنيا - لو اتجوزت بنت بس عشان جميلة منغير متراعي التقارب الاجتماعي والفكري او حتي دينها واخلاقها .. او انتي اتجوزتي راجل بس عشان فلوسة وبعدين اتخانقتوا وبهدلتوا بعض تبقي دي دنيا - لو بتغير تليفونك مع انك مش محتاج بس عشان يتقال معاك التليفون الجديد دي دنيا

خدت بالك ؟ انا متكلمتش علي حاجة حرام دي حالة انسان عايش لنفسة وناسي حق ربنا في خطوات حياتة

- لو فلوسي من حلال والفقير ليه فيها حق اصبحت هي وشغلي كلها اخرة - لو خروجاتي مفيهاش تضيع لصلواتي ولا تريقة علي الخلق تبقي كلها اخرة

مراعي حق ربنا .. الدنيا مش مكان ولا زمان الدنيا حالة قلب بيدور علي اللذة

تفهم لما ربنا قال { بلْ تُؤْثِرُونَ الْحَيَاةَ الدُّنْيَا (16) وَالْآخِرَةُ خَيْرٌ وَأَبْقَى } تفهم تاني لما يقول { يَا أَيُّهَا الَّذِينَ آَمَنُوا مَا لَكُمْ إِذَا قِيلَ لَكُمُ انْفِرُوا فِي سَبِيلِ اللّهِ اثَّاقَلْتُمْ إِلَى الأَرْضِ أَرَضِيتُم بِالْحَيَاةِ الدُّنْيَا مِنَ الآخِرَةِ فَمَا مَتَاعُ الْحَيَاةِ الدُّنْيَا فِي الآخِرَةِ إِلاَّ قَلِيلٌ }

وربنا سبحانة وتعالي وصي انك تعيش الدنيا وتنبسط فيها وانت مش ناسي حق ربنا قال تعالي كلام موجة لقارون ال كان فلوسة بيتباهي بيها قدام الفقراء ويكسر قلوب الغلابة ويطلع في الزينة بتاعتة عشان يقول انا صاحب الفلوس .. الناس الصالحين قالوا له : { وَابْتَغِ فِيمَا آتَاكَ اللَّهُ الدَّارَ الْآخِرَةَ ۖ وَلَا تَنْسَ نَصِيبَكَ مِنَ الدُّنْيَا ۖ وَأَحْسِنْ كَمَا أَحْسَنَ اللَّهُ إِلَيْكَ ۖ وَلَا تَبْغِ الْفَسَادَ فِي الْأَرْضِ ۖ إِنَّ اللَّهَ لَا يُحِبُّ الْمُفْسِدِينَ } عيش الدنيا وانت فاكر حق ربنا تبقي كلها اخرة والا تبقي الدنيا الربنا ذمها اكتر من ١٠٠ مرة في القرآن

دنيا - برنامج كلمة - مصطفي حسني سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتة

[omarahmed1999]

درس ليلة ٢٠ رمضان

بسم الله والحمد لله والصلاة والسلام علي رسول الله

العشرة الاواخر .. خلاص عدي تلتين رمضان فاضل اخر تلت .. جيه وقت الجهاد .. هنجاهد نفوسنا و نموتها في الايام دي .. عشان خلاص ١٠ ايام و رمضان خلاص .. عايزين الايام نعمل كل الفرائض بشكل مظبوط زي الصلاة والصوم والنوافل كلها بقي تراويح و قيام وغيره .. مش عايز الاقي حد جاي في الاخر يقول انا معملتش حاجة في رمضان .. عارف لو العشرين يوم الفاتوا معملتش فيهم حاجة .. تعالي دلوقتي وتوب عن كل دقيقة ضيعتها معملتش فيها حاجة .. وقدامك ١٠ ايام اهو .. مفتحتش المصحف ؟ ممكن تختم القرآن اكثر من ٣ مرات في الايام دي .. شوف بقي الرسول كان بيعمل ايه

عن عائشة رضي الله عنها قالت : {كان رسول الله صلى الله عليه وسلم إذا دخل العشر الأواخر من رمضان، أحيا الليل، وأيقظ أهله، وجد ، وشد المئزر.} [متفق عليه]

كان النبي لما بيجي العشر الواخر احيا الليل بالصلاة وايقظ اهله لذكر الله و اجتهد في العبادة زيادة على عادته

و عن عائشة رضي الله عنها قالت { كان رسول الله صلى الله عليه وسلم يجتهد في العشر الأواخر ما لم يجتهد في غيره } [رواه مسلم]

مش بس كده ده انت عندك في العشر الاواخر هدية الرحمن .. ليلة القدر .. انت لما تشد وتجتهد في العبادات في كل ليلة اكيد هتحصل علي اجر ليلة القدر .. لما تصلي التراويح والتهجد في المسجد .. لو حبيت تقرأ قرآن بين التراويح والتهجد او بعد التهجد قبل الفجر .. اكيد لما تعمل كده كل يوم هتاخد اجر كبير جدا وهتكون متأكد ان ليلة القدر عملت فيها الانت عايزة .. طيب بالنسبة للبيبقي هيموت وينام ساعة بعد التراويح .. عشان لو منامش ممكن ميقدرش علي التهجد .. او بينام للتقوي علي التهجد .. نومك ده عبادة ومأجور عليه .. ايوا انت لما تنام عشان تتقوي علي طاعة الله دي عبادة ..

طيب كان النبي بيعمل ايه في العشر الواخر ؟ كان بيعتكف الاعتكاف هو لزوم المسجد بنية مخصوصة ، لطاعة الله تعالى : وهو سنة مؤكدة عن النبي صلى الله عليه وسلم ، قال الزهري رحمه الله : ( عجباً للمسلمين ! تركوا الاعتكاف ، مع أن النبي صلى الله عليه وسلم ، ما تركه منذ قدم المدينة حتى قبضه الله عز وجل ) . فعن عائشة رضي الله عنها أن النبي صلى الله عليه وسلم كان يعتكف العشر الأواخر من رمضان حتى توفاه الله عز وجل ثم اعتكف أزواجه من بعده . رواه البخاري ومسلم .

يلا شد حيلك ‫#‏بسم_الله‬ سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتة

[omarahmed1999]

درس ليلة ١٩ رمضان

بسم الله والحمد لله والصلاة والسلام علي رسول الله

ليلة القدر اهم ليلة في السنة كلها كان رسول الله صلي الله عليه وسلم يقول للصحابة في أول رمضان: {أتاكم شهر رمضان، شهر مبارك، كتب الله عليكم صيامه، فيه تفتح أبواب الجنة، وتغلق أبواب الجحيم، وتغل مردة الشياطين، فيه ليلة هي خير من ألف شهر، من حرم خيرها فقد حرم } رواه احمد

بسم الله الرحمن الرحيم { إنا أنزلناهُ في ليلةِ القدر (1) وما أدراكَ ما ليلةُ القدر (2) ليلةُ القدرِ خيرٌ من ألفِ شهر (3) تَنَزلُ الملائكة والروح فيها بإذن ربهم من كل أمر (4) سلامٌ هي حتى مطلع الفجر (5) }

تفسير الايات (إنا أنزلناهُ في ليلةِ القدر) : الله انزل القرآن في ليلة القدر قال ابن عباس ترجمان القرءان في قول الله :{إِنَّا أَنزَلْنَاهُ فِي لَيْلَةٍ مُّبَارَكَةٍ إِنَّا كُنَّا مُنذِرِينَ (3) فِيهَا يُفْرَقُ كُلُّ أَمْرٍ حَكِيمٍ (4) } هي ليلة القدر، ففيها أنزل القرآن وفيها يفرق كل أمر حكيم أي كل أمر مُبْرَم، أي أنه يكون فيها تقسيم القضايا التي تحدث للعالم من موت وصحة ومرض وغنى وفقر وغير ذلك، مما يطرأ على البشر من الأحوال المختلفة من هذه الليلة إلى مثلها من العام القابل. وقال ابن عباس وغيره: أنزل الله القرآن جملة واحدة من اللوح المحفوظ إلى بيت العزة من السماء الدنيا، ثم نزل مفصلا بحسب الوقائع في ثلاث وعشرين سنة.

( وما أدراكَ ما ليلةُ القدر ) : ربنا بيعظم من شأن ليلة القدر

(ليلةُ القدرِ خيرٌ من ألفِ شهر ) : العمل فيها أفضل من عبادة ألف شهر .. و ربنا قال خير من الف شهر .. مقالش الثواب عشان مش هتقدر تتخيلة زي الصبر قال تعالي : {إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ} والعفو قال تعالي { فَمَنْ عَفَا وَأَصْلَحَ فَأَجْرُهُ عَلَى اللَّهِ ۚ } .. فثواب ليلة للقدر مستحيل تقدر تتخيلة عشان كده سيدنا محمد قال : «من قام ليلة القدر إيمانا واحتسابا غفر له ما تقدم من ذنبه» رواه مسلم

( تَنَزلُ الملائكة والروح فيها بإذن ربهم من كل أمر) : الروح هو جبريل مع نزول البركة والرحمة.

(سلامٌ هي حتى مطلع الفجر) الليلة هتبقي سلام يعني مفيش اي ابتلائات هتنزل لحد ولا مرض ولا ضرر ولا اذي ولا صواعق قال مجاهد: يعني أن ليلة القدر سالمة لا يستطيع الشيطان أن يعمل فيها سوءا ولا أن يحدث فيها أذى. وقال الشعبي: تسليم الملائكة ليلة القدر على أهل المساجد حتى يطلع الفجر.

ميعاد ليلة القدر في كذا رواية ١- قال رسول الله صلي الله عليه وسلم :« تحروا ليلة القدر في العشر الأواخر من رمضان» رواه البخاري

٢- عن ابن عمر رضي الله عنهما: أن رجالا من أصحاب النبي صلى الله عليه وسلم أروا ليلة القدر في المنام في السبع الأواخر، فقال رسول الله صلى الله عليه وسلم: ((أرى رؤياكم قد تواطأت في السبع الأواخر، فمن كان متحريها فليتحرها في السبع الأواخر)). متفق عليه.

٣- عن عائشة رضي الله عنها: أن رسول الله صلى الله عليه وسلم قال: ((تحروا ليلة القدر في الوتر من العشر الأواخر من رمضان)). رواه البخاري. قوله: ((في الوتر)) أي: الحادية والعشرين، والثالثة، والخامسة، والسابعة، والتاسعة.

عن عبد الله بن أنيس أنه قال: «يا رسول الله، أخبرني في أي ليلة تبتغى فيها ليلة القدر. فقال: "لولا أن يترك الناس الصلاة الا تلك الليلة لأخبرتك"»

قال الحافظ: ليلة القدر منحصرة في رمضان، ثم في العشر الأخير منه، ثم في أوتاره لا في ليلة بعينها، وهذا هو الذي يدل عليه مجموع الأخبار الواردة فيها. وقال بعد ما ذكر الاختلاف فيها على ستة وأربعين قولا: وأرجحها كلها أنها في وتر من العشر الأخير، وإنما تنتقل، وأرجاها عند الجمهور ليلة سبعة وعشرين.

يلا نجهز نفسنا ليلة والعشر الواخر تبدأ وممكن ليلة للقدر تبقي في اول ليلة يعني بعد بكرة بليل .. نتمسك اوي بالعبادات .. صلاة التراويح والقيام وقراءة القرآن وغيرها من العبادات والدعاء عن ام المؤمنين عائشة بنت أبي بكر وارضاها أنها قالت: «يا رسول الله، أرأيت إن علمت أي ليلة ليلة القدر ما أقول فيها؟ قال : "قولي: اللهم إنك عفو كريم تحب العفو فاعف عني"» رواه الترمذي

طيب بالنسبة لعلامات ليلة القدر .. عمتا مش هتدفيك بحاجة لأن العلامات بتظهر تاني اليوم الصبح هي بشارة بس لإجتهد في اليلة دي .. يعني مثلا لو ليلة القدر ليلة ٢١ يبقي يوم ٢١ الصبح هتظهر العلامات دي والعلامات هي ١- قال صلى الله عليه وسلم : وأمارتها أن تطلع الشمس في صبيحة يومها بيضاء لا شعاع لها . رواه مسلم .

٢- قال عليه الصلاة والسلام : ليلة القدر ليلة طلقة لا حارة ولا باردة ، تصبح الشمس يومها حمراء ضعيفة . رواه ابن خزيمة

٣- وقال عليه الصلاة والسلام : إني كنت أُريت ليلة القدر ثم نسيتها ، وهي في العشر الأواخر ، وهي طلقة بلجة لا حارة ولا باردة ، كأن فيها قمرا يفضح كواكبها ، لا يخرج شيطانها حتى يخرج فجرها . رواه ابن حبان .

سبحانك اللهم وبحمدك اشهد ان لا اله الا انت استغفرك واتوب اليك وصلي الله علي نبينا محمد والسلام عليكم ورحمة الله وبركاتة