#tuspuktem

[muketulon]

Сюанын вал кылем шутэтскон нуналъёсы. Мамае палась родняосын шулдыръяськи. Эшшо огпол валай, аслым сюан лэсьтэме уг поты шуыса.

[muketulon]

Уг яратӥськы кузь шутэтскон нуналъёсыз, ял карыку кемагес мед кыстӥсткозы кадь потэ ке но. Мон одно ик дышем улон радлэсь куштӥськисько, ӧжыт ветлӥсько, трос сиськисько но пукисько. Мон котырын соку одно ик трос калык. Мон яратӥсько ӝытъёсы семьяен яке эшъёсын пукыны, нош ӵукна но нуназе мыным кулэ оген яке ӵошен улыны. Ӵошен но секыт ай. Мыным малы ке одно ик со адямиен вераськоно кадь потэ, ӵош мар ке кароно. Собере гинэ валасько, одӥг но книга ӧй лыдӟы шуыса, весь кин ке сьӧры ветлӥ. Таяз арняе кема гуртын вал, мамаен пумитамы мынӥсь-ветлӥсь открыткаез. Папа мар ке ялан ужаз. Яратончикъёсы вуизы но утыр кошкизы. Огеныз зол ик даллашыса но вуи. Со вылэ но шутэтскон нуналъёс алама влиять каро лэся. Пиосмуртъёсмы кошкизы гинэ но лиметысь лымы усиз. Сӥть. Мон Казаньын ни. Ӵуказе мыноно обследование лабораторие. Изем уг луы, мкш дышемын берозь пукыны. Шуисько ук кема шутэтскыны уг яра.

[muketulon]

IFUSCO

Макем зол мон яратӥсько Тартуэз! Соин ик туж шумпотыса вуи отчы выльысь. Толалтэ ай мыным гожтӥзы: тани ссылка, лэзь заявка. Монэ кема куроно ӧвӧл, мон лэзи заявкаме. Трос кепырай на, мон студент ӧвӧл ни шуыса. Юнме вылэм, ачим студент луытэк но туж умой шӧдӥ асме студентъёслэн конференциязы. 

Тартуэ вуон - со нырысь ик тодмо интыос. Быдэс уй автобусын ортчем бере, гостиницае заселениез возьман дыръя, ветлӥмы чебер интыостӥ. 

Нырысетӥ нуналаз регистрация но картӥ экскурсия гинэ вал, нуназе мон шузи сямен ветлӥ лавкаостӥ, огнам калги. Дырыз дыръя Ларисалы гожтысал ке, Тартуын улӥсь удмуртъёслэн пумиськоназы сюрысал. Туж жаляй ӧй вуы шуыса, озьы ке но мукет нуналаз тодматки Оляен Егорова (солэн сузэреныз ӵош куасэн бызьылӥм ог вакытэ) но Наташаен Баталова (улэ Таллинын). 

Тартуысь ботанической садлэн чеберез. 

Горд удмурт дэремен нылашез сю ар тодӥсько кадь ини потӥз. Дото шаплы но шулдыр удмурт нылаш, Кировской областьысь вуэмын, одӥг интыяз улыны чик уг быгаты, али лобӟемын Грузие. Маша Вятчина, тон прекрасна!

Пор кышноос сярысь вераськон кӧня ке нунал ӵоже ми сьӧры ветлӥз, ялан серекъям. нош собере Коля Анисимов тодматӥз монэ пор нылъёсын. Кельшизы! Табере яратӥсько поръёсыз. 

Мон ук пор гурт вӧзын будэмын, мон котьку поръёсыз уг яратӥськы вал, недоразвитоесь кадь йӧто вал. Нош наукая докторъёс пӧлын ветлыса, пор кырӟанъёс кырӟаса, вань шузи стереотипъёсылэсь куштӥськи. (Но алама дӥсяськем нылэз всё равно пор кышно шуо) Лена Ласточкина, Таня Алыбина, Инга Погонина, Аня Мишина, Валя Семенова - туж визьмоесь но тунсыкоесь пор нылъёс. Мӧзмисько но возьмасько выльысь адӟиськеммес!

Тартуын ми трос калгим...(туспуктэм зэмзэ ке чик Тартуын лэсьтэмын ӧвӧл, но ми всё равно трос калгим)

...трос туспуксим удмуртъёсын...

комиосын...

МАФУНлэн президентэныз, яке шишкаен...

нош удмуртъёсын...

...трос юим. Эстонецъёс туж быгатыса куно пумитяло, сиён-юонэн ӟеч утялто. Соослэн пӧрмиз котькуд ӝыт конференцие пыриськисьёсыз огазе люканы. Ӝытъёсы но уйёсы пукыса кырӟам-верамъёс тужгес дуно.

Программаын вал на Тартуысь музее ветлон. Мон бырйи финн-угор экспозицити экскурсиез. Вань мур малпанъёсме мон верай ни экскурсиез ортчытӥсь Танялы. Просто вуылэ отчы, сюлэмез бугыртэ.  Эшшо эркын дыр кылем бере ми вуттӥм на Эстонилэн историезлы сӥзем кӧня ке экпозициосты учкыны. Соос но паймыто! Туала музейёс кулэ, коть кӧня миллион соос мед сылозы. Тартуысь музей бере ми пырамы Санкт-Петербургысь этнографи музее, ӵошатыны уг луы чик. Бен, Питерын музей узыр экспонатъёсыныз, нош Тартуысез оглом малпанэныз но лэсьтэменыз. 

Улонын ваньмыз дырыз дыръя луэ кадь. Оглом конференция но, отысь адямиос но, адямиослэн мыным сётэм юанъёссы но кулэ дыре вуизы улонам. Еваен вераськон тужгес дуно мон понна, макем визьмо адями ук! Эшшо удмурт дэремзэ кыльылытэк нуллэ ук :) 

Таосыныз воксё родня кариськыса бертӥ ни. Тэремшур выжыос уго ми. Сергей Сидоровлы но солэн ужезлы мон копак паймемын! Виртуальной экспедиция туж тунсыко! Аслам кулэ программаосты умой дышетыса мар ке сыӵе лэсьтэме потӥз. Эх, котькуд удысэн тунсыкъяськисько но, кудаз ке но асме куке но шедьто меда...

Берпуметӥ нуналаз ми Чудской озерое экскурсие мынӥмы, нырысь пырам ӟуч староверъёслэн музеязы, собере цикорийлы сӥзем музее, сиським нош воксё замокын. Нош туспуксим... 

Озероез возьматыны нуо шуыса малпам гинэ но, вуимы эстон семьяе. Отын милемыз возьмало ни вал ческыт сиёнэн, кужмо аракыен но пӧсь мунчоен. Шуисько ук эстонецъёс куно карыны быгато шуыса!

Аракызы милемлы дото яраз ни. 

Комиослы мунчо но ярам. 

Котьку сямен ваньзэсты удмуртъёс шулдырто. Яратӥсько удмуртъёсыз. Ваньмыз ярато удмуртъёсыз, весь кырӟаны куро. Мон тани уг быгатӥськы ке но ялан кырӟай. Ӵапак сыӵе вакытъёсы мон туж зол мӧзмисько Удмуртилэсь. Нош улон шулдыр кырӟан гинэ ӧвӧл. 

Вить нунал куспын тужгес трос дыр ми докладъёс кылзыса ортчытӥм. Туспуктэмъёсъя оло малпады ни, шулдыръяським гинэ шуыса. Оглом сю пала доклад вал, ваньмаз вуыны уг луы, соин ик тырши тужгес тунсыкооссэ кылзыны. Нырысетӥ нуналаз Литература но Культура секциосы вуылӥ. Кельшиз, кызьы комиос эскеро асьсэ авторъёссэс. Кельшиз Ларисалэн Дмитриева выступлениез, со наивной литература сярысь вераз. Культура секциын котьку сямен Ежевика Спиркина яркыт вал, дыр но ӧз тырмы солы вань материалзэ возьматыны. Со сяна тунсыко на вал пор нылъёслэн сюан но кулэм ватон сярысь верамъёссы. Соку ик мон вуттӥ на кык кино учкыны, Денислэсь Корнилов Анай картиназэ но Комиысь документальной кино. Мукет нуналаз Общество и СМИ но Фольклор секциосын удмуртъёсыз кылзӥ. Куинетӥ нуналаз Лингвистика но Образование секциосы вуылӥ. Котькуд доклад ас сяменыз тунсыко вал. Соку ик адске, кин рос-прос дасяськемын, кин огшоры гинэ. Озьы ке но визьмо адямиос пӧлын кадь мон нокытысь сыӵе зол вдохновение уг шедьтӥськы. Паймисько наукаен вырисьёслы! 

Мон кӧня ке нунал кылли номыр гожъятэк, возьмай вал фотографъёслэсь туспуктэмъёссэс. Али мылкыд сыӵе зол лӧптэмын ӧвӧл ни, оло гожъяменым ифускоен тунсыкъяскытыны ӧй быгаты чик. Егит студентъёс, ветлэ таӵе ужрадъёсы! Отысь тодон-валан но выль тодматсконъёс тӥледлы туж трос сётозы. Ӧвӧл жаляно уксёез но дырез, ваньмыз кыкполлы берытскоз на, тӥ уд луэ ни азьло кадь. Вуоноез конференция ортчоз Венаын. Кин тодэ, оло адском отын, лыдӟисе?