IFUSCO 2020.
Улонысь котькуд учыр бере яке кытчы ке ветлэм бере ми мукетгес луиськом, будӥськом. Оскисько, будӥськом шуыса. Мон котьмалы, анализировать карыса, выводъёс лэсьтыны тыршисько укыр трос малпасько. Таиз ИФУСКОе вуылэме туж тумошо вал, соин гожтытэк кельтэме уг луы.
Кылем арын трос туспуктэм вал, туэ кылъёс гинэ луозы, лэся. Малы ке чик ӧй вал мылкыд туспуктыны. Оло, дыры ӧжыт шуыса, киме мултэссэ телефонэ доры ӧй лэзья. Мон туэ уго кык нуналлы гинэ конференцие вуылӥ. Малы мынӥ? Тунсыко кылзыны адямиосыз, вераськыны соосын, мурт кылъёслэсь чузъяськемзэс кылзыны, таре вераськыны но ини, вдохновение шедьтыны. Кылем арын Тартуэ ветлэме бере Будапештэ дышетскыны вуи. Нош туэ мар луоз меда? Малы доклад ӧй лыдӟы? Мон малпай, али нокыӵе научной уж уг гожъяськы бере, мар сярысь вералом? Нош кулэ вылэм. Котькыӵе опыт сярысь веранлы инты сюре вылэм. Таре одно ик вуоно арын мыно но докладме лыдӟо. Оло огзэ гинэ уг, трос малпанъёсы йырам.
Маринаен но Валерияен ми вазь ӵукна четверге Будапештысь вырӟимы. Мон кык час иземын, угось уйин гинэ Москваысь вуи Венгрие. Куиньнамы ик мылкыдтэк вуимы кадь, нош кык нунал ортчыса куиньнамы ик жалямы, быдэс ИФУСКОе ӧм лыктэ шуыса. Кулэ ӧвӧл вунэтыны, кыӵе умой луэ астэ шӧдыны финн-угор компаниын.
Вуэм бере ик ми пумиськимы удмуртъёсын, куд-ог финн но мадьяр эшъёсынымы, оглом кампустӥ калгись студентъёс пӧлы ифускоос ышемын вал кадь. Куке ми ӝыны час пала мынӥмы трамваен улон интымы дорозь, мон валай, туэ мукет шуыса. Ӧвӧл нокинь ышемын, Вена гинэ бадӟым, Тартуэн ӵошатыса. Кылем арын гуртын кадь вал, кысыкен дэрем воштыны но бертаны луэ вал, секциос но пӧртэм этажъёсын гинэ ортчизы, кофе-брейк дыръя но ваньзы одӥг интыын люкаськемын вал, урамын кезьытгес вал уго. Нош туэ мукет. Но тазьы но умой.
Мон адямиосыз туж яратӥсько. Мыным номыр уродзэ адями уг лэсьты ке, мон уг адӟиськы мугъёс солы вожме поттыны, алама вераны со сярысь. Вераськыны но мыным котькинэн тунсыко. Соин кӧня ке нерваям йӧтэ вал, куке удмуртъёс люкисько. Мукетъёслэсь гинэ уг, асьсэ куспын но. Мон быдэс ар ӧй адӟы куд-ог удмурт эшъёсме, сиськыны милемын валче ӧти. Нош кинлэсь ке кылӥсько ни: тон-а мар-а сомында калыкез ми сьӧры ӧтид? Мон. И мыным сыӵе вераськонъёслэсь вӧсь луэ. Мынам уго сюлмысь потэ вераськеме удмуртъёсын, котькинъёс но котькытысь соос мед луозы.
Удмуртъёс трос кузя ик вал Венаын. 22 кузя шуыса лыдъямы. Нош, кылсярысь, УдГУысь студенткаосыз мон огпол адӟи, куке огез соос пӧлысь докладзэ лыдӟиз. Собере ик соос ышизы но огаз но ужрадэ ӧз вуылэ ини, лэся. Соин ваньмыныз валче туспуктэм но лэсьтыны ӧм быгатэ, то кин ке ӝыт концертэ ӧз вуы, то закрытие дыръя кин ке калгиз. Веналэн бадӟым но тунсыко луэмез ик татын нош валтӥсь интые потэ. Адямиос оло нырысьсэ вуизы Австрие, соослэн карез но адӟемзы потэ, оло Вена вӧзысь каръёсы но ветлэмзы, соин конференция нырысетӥ интыын ӧвӧл. Мон гинэ шузимисько, лэся, кык часлы музее кошкем понна но дырме юнме быдтӥсько шуыса. Конференцие вуи бере, конференциын ик луэме потэ.
Австрилэн шоркараз мон кыкетӥзэ вуылӥ, синмаськон ми куспын ӧз кылды, но Вена озьы гинэ уг сётӥськы... Курткаме вунэтыса кельтӥ, уске вуыло на. Венаын туж трос мае луэ учкыны, сое ваньзэ мон учки вал ини куать ар талэсь азьло. Ваньмыз туж ик умой тодам кылемын ӧвӧл. Со эшшо огпол мынэсьтым пуктэм коркаослы но дворецъёслы паймыны быгатымтэме возьматэ. Мон ӧй на буды картинаос шоры учкись луыны, уг валаськы малы замоктӥ ветлыкум мыным верало, мар вал таяз бӧлетын но эксэйлэн кудӥз нылыз лемлет шпалер лякытэм мукетаз бӧлетэ. Соин мон Венаын но ӝоканы кутски. Туж ӟоскыт урамъёс, азе учкыса сю метр гинэ адске, бере учкыса сомында ик, паллян но бур пала оло солэсь но ӧжытгес. Туж кельшиз Венаысь Университетлэн кампусэз. Кар шорын ик нимысьтыз пичи аслаз улонэныз кар, ву пазянъёсын, писпуос улын скамъяосын, аслаз лавкаеныз, сиськонниеныз но бареныз.
Котьку сямен лумбыт финн-угор калыкъёслэн тужгес шулдыр кырӟанъёссы чузъяськизы. Со понна ифускоын вузаськиз “вож книга”, кудаз люкамын со кырӟанъёс. Али кема ӧвӧл Валерия шуиз, жаль, пе, отын нотаосыз ӧвӧл шуыса. Ми Маринаен куараен серекъямы. Нокыӵе нотаос кулэ ӧвӧл, мылкыд вань ке. Мон уг быгатӥськы чебер кырӟаны, гурез шӧдыны, нош малы уд кырӟа, со сюлмысь потэ ке?
Нокин уз паймы, дыр, удмурт кырӟанъёс тужгес ӵем кылӥськизы шуыса, гожтӥ ке. Котькин тодэ “лымы тӧдьыез”, яке ваньзы ми сьӧры “марлы тӥяй” шуыса кырӟало. Нош куке ини лэзё Despasito удмурт кылын, соку финкаос яке ещё кин ке быдэс кырӟанэз книгае учкытэк кырӟало. Ми палэнысен синъёсмес усьтыса кылзӥськом, собере Bobolenin-лэсь крезьгурзэ лэзиськомы, мед качественной крезьгурмы но вань шуыса тодозы. Дискотека каллен пӧрме удмурт позыръяськонлы, кудаз куддыръя лэзё пор яке мукет калыклэсь кырӟанзэ.
Оглом, туж кельше мыным ифуско. Сое огшоры студентъёс мукет студентъёслы асьсэс радъяло шуыса. Капчи эшъяськон мылкыд гинэ шӧдӥське шуыса. Тунсыко адямиосыз кылзын яке вераськын луонлык вань шуыса. Луэ адӟыны котькуд калыклэсь али улон статуссэ шуод-а мар-а. Конференцие вуэм эрзя кылын вераськисьёс пӧлын: американец, венгер ныл, японец. Асьсэс эрзяос лыктӥллям ке но, анай кылынызы уг верасько. Поръёс пӧлысь, кылсярысь, одӥг Аня Мишина вуэмын вал, со но Таллинысь. Тодмо поръёсмылы гожтӥмы но соос ас шаеразы пӧзё лэся, кытчы ке ветлон сярысь уг малпасько. Комиосын вераскон куспамы утыр кылӥськиз, соосыз, пе, лыктыны ик уг лэзё вал шуыса. Соин, Махотина Анназы лыктымтэ, репутациез урод луэмлэсь курдаса. Чынзэ, озьы ик веразы, ачим ӧй малпа. Но со серем ук. Мар сюлмаськонэз на репутация сярысь, куке “Ми” котырзы номыр выльзэ ӧз малпа со кивалтэм улсын. Яке Яна Сажиналэн ужаменыз ӵошатыса, яке калыккуспо проектъёссы улэмысь дугдӥзы но соин озьы йӧтэ-а мар-а мыным. Яратӥсько комиосыз, коми шаерез, кылэз, вконтакте коми группаосы но удмуртъёсызлэсь тросгес кадь, соин дӥсьтӥсько тазьы вераськыны.
Мар веранэз ни, удмуртъёс финн-угор дуннелэн азьпалаз. Ханты эше весь вера мыным, тӥ, пе, удмуртъёс, ми понна котыр ласянь адӟем карымон, финн-угор иньмаръёс шуэ, ява. Мадьяръёслэн, финнъёслэн, эстонъёслэн асьсэ кунъёссы вань, нош удмуртъёслэн туала культуразы.
Нош Будапештэ бертон мыным капчиен ӧз сётӥськы. Потэ на вал, лэся, кылеме финн-угор дуннее. Изьыса астобусам бере кыли, эшъёсы монтэк кошкизы. Ярам, Лариса ӵукна юрттӥз котырме бичаны, вуонояз но автобусэ бере кылисько ни вал. Оглом, туж трос вывод лэсьтӥ аслым адямиос ласянь.
Ветлэ таӵе ужрадъёсы, пыриське соосыз радъянэ, дышетэ мукет кылъёсыз. Ваньмыз со тӥ понна умой гинэ луоз.
