#txt117

[senya-sj]

جات البسة إللي كل فترة أصورها في سناپ عند رجلي وأنا مو منتبهة وصارت تلعب حولي وانفجعت ودحين قلبي بيدق بسرعة واتذكرت قد إيش تؤرقني الحيوانات وقد إيش يرعبني كوني ما أقدر أتوقع تصرفاتها ، وقفت أطالع فيها أراقبها إلين راحت بعيييد عني بعدين رجعت لوضعي الطبيعي كإنسان منتج مو ميت رعبة ، افتكرت لمن الرومميت جابت بسة للبيت حرفيا كنت أبغى أبكي من كتر التوتر لمن يجيني نفس أروح الحمام ولازم أطلع أمشي الخطوتين من غرفتي للحمام مع احتمالية نط البسة فوقي خلال هذي الخطوتين ، شي ينرفز الخوف الغبي 😒😒😒😒😒😒😒

[senya-sj]

بأقرأ كتاب اسمه حكايات يابانية قديمة وفيه قصة اسمها ذراع الغول عن غول يجيب بنت ويقول كلي هذي الذراع البشرية المليئة بالدود وإلا حآكلك ويطلع من البيت وهيا تخبي الذراع ، لمن يرجع يسأل الذراع إذا انأكلت أو يناديها وتجي لعنده إذا ما انأكلت ، المهم جدتي كانت تحكينا هذي القصة ونحنا صغار أتوقع في تفاصيل مختلفة والقصة إللي كانت تحكيها جدتي أطول وأكثر حماسا وأحلى بس أبغى أعرف إذا تعرفوا القصة كلكم ولا جدتي يابانية 😋😂 –

[senya-sj]

قبل أمس قعدت مع واحد في الجامعة حرفيا وبكل جدية بيقول أنا البنات يحبوني ما يرفضوني وفي بنت قلتلها أطلعي معايا قالت ما أبغى فأكيد بتتغلى وصرت أطلع مع صحباتها عشان أقهرها وأخليها تجيني ، نعمممممممممممممم ؟؟!!؟!!؟!!!!!!! ياربيه مدري كيف ما انقرض هذا النوع المصدق نفسه وغير القادر على تقبل فكرة إنه ممكن ما يعجب بنت ، ارحمنا يا مدهش يا مذهل يا أعظم واحد في الوجود إنت 😒 – Read on Path.

[senya-sj]

اليوم شفت الأطفال السوريين إللي شفتهم قبل فترة بيشحتوا في نفس المكان ، بنتين أخوات وولد أعمارهم ١١ والصغيرة يمكن ٦ ، شفتهم قدامي الولد خنق البنت الصغيرة والبنت راحت تجري لعند درج وصارت تصرخ وتبكي ، رحت عندها حضنتها قلت سلامتك وجات البنت الكبيرة وصارت تتكلم عن سوء الولد بعدين جا الولد عشان يبرر موقفه -كوننا المرة الماضية كنا بنتكلم واتعرفنا وصرنا “ أصحاب ” - وقال هيا سبتني وسبت أهلي قلت طيب إذا سبتك سُبّها ما يصير تضربها الضرب خطأ ، وقدامي صاروا البنت الكبيرة والولد بيتناقشوا بصوت عالي والولد رفع يده عليها كمان تهديدًا بالضرب بس ما ضرب ، رجعت قلت غلط تضرب وبس تركتهم وكملت طريقي ويحزن إنه مافي حل ولا شي أقدر أسويه ، حتى الولد يحزّن ، أحس وضعهم كأطفال محتاجين يشحتون كله غلط وطبيعي يتسبب في مشاكل ، ما أقدر أسوي شي أغيره ، قلت للبنات وله ترا الضرب ممنوع والشرطة حتمسكك بس أصلا الشحتة ممنوعة كمان ، المهم في طريق الرجعة مريت بنفس المكان وسويت للصغيرة باي بيدي راحت سوتلي باي وأرسلتلي بوسة في الهوا مع ابتسامة ألطف شي في الحياة ، 😢💙

[senya-sj]

شفت فيلم “هيومان” = إنسان الوثائقي وقعدت أبكي في النهاية فجأة بشكل غير متوقع وهذا إنجاز اليوم وأول دموع في السنة ، مع إني حسيته -الفيلم- بطيء وأنا الأتنشن سپان* حقي ثانيتين ، بس المناظر إللي يصوروها مدهشة والقصص شديدة اللطف ، ولمن خلص كان شعوري شعور إني قاعدة أفارق النوع البشري وعشان كدة بكيت ، ههههه ، يمكن ، أعطوني وثائقيات حلوة إذا عندكم 💙

[senya-sj]

من لمن صرت أكتب نهاية كل يوم إيش صار في اليوم صرت أحب مدونتي وأفتحها أقعد أتفرج ، أحسها مرتبة وبيتي أكتر من زمان ، وصار ما يهمني تجيني لايكات كتير زي زمان ، حرفيا في فترة كنت فيها أسوي ريبلوقات بس عشان أشوف اللايكات وأرتاح نفسيا ههههه ، أحس في ناس حولي ، اهتمام ، دحين ما همني عشني أشوف جمالية في كتابتي للكلام وهذا يعبي شي جوتي ما أحتاج رضى الآخرين ، جمالية مو بمعنى إنه أسلوبي حلو -باين إني لا أهتم عشني أكتب عامي- بس بمعنى إني أحس كلامي حقيقي وقريب ، اعترافات ، مدري إذا الكتابة تريحني نفسيا عشان كدة أحب أشوف نتيجتها ولا النتيجة -المكتوب- يعجبني بحد ذاته ، بس أحب أشوفه وأنبسط كأنه كلامي بناتي الصغيرات ، ما أحب فكرة الالتزام بالكتابة دائما كنت أنظر للي يشوف الكتابة كمهمة وواجب وشي لازم ينجزه يسيء لها ، أحس الكتابة إللي ما تجي من نفسها مهي حقيقية وصادقة كفاية ، بس أنا ، مع إني في الحقيقة ما اتخذت قرار لفعل الأمر ، صرلي كم يوم ملتزمة بالأمر ، وبالنسبة لي يمكن هذا جزئي المفضل من اليوم ، أتمنى ما يتحول الأمر لإنه يصير كواجب ووظيفة ، ومالي نفس أقطع سلسلة الفضفضات ما قبل النوم هذي وشعوري هذا ب “ مالي نفس ” مزعجني عشنه يحسسني إني بأكتب بالغصب ، مع إنه مو بالغصب ، ستوپ ثينكينق أباوت إت توو متش ، حرفيا محا يصير شي لو بطلت ، الكتابة شي يجيب السعادة ، مع إنه مدح الكتابة يبدو شي غبي ومزعج ، بالمناسبة ، أنا ما أقرأ الكلام الكتير إللي يكتبوه الناس عن حيواتهم ، أحس نفسي لا أهتم ، هل أتوقع أن يهتم الناس بما أكتب أنا ؟ ، أتوقع في شخصين تلاتة يهتمون ، يمكن عشني أمثّل بالنسبة لهم ذاك الشخص الذي لمن يصير العالم كله يبدو ضدهم أكون أنا معاهم ، ويحسوا إني معاهم بإنهم يقرؤوا إللي أكتبه ، ومرة أحب إنه في ناس يشوفوني كدة ، وغالبا يشوفوني كدة لأني شخص يتكلم عن سوئه وأخطائه، الأمر الذي يجعلهم يشعرون بتحسن تجاه أنفسهم ، يمكن ، المهم ، ننام وورايا يوم حافِل بالتعب

[senya-sj]

.

[senya-sj]

نفسي أحذف پاث -التطبيق مو الحساب أحب ذكرياتي أنا- ، العادة أحذفه وأرجعه بدون ما أتكلم ، خانقني اليوم عشان كل شوية أفتحه تعبت أحس ما عندي حياة ، كنت حاذفة تمبلر عشان آخد مساحة كبيرة في الجوال وأطلع من پاث أرجع لپاث مافي تمبلر ، أيام الاختبار لمن حطيت في بالي محا أدخل وسائل تواصل أنجزت في حياتي مع إني كنت دائما أقول إذا أبغى أنجز حأنجز مو لازم أحذف شي ~ تيپيكال مدمن غير معترف بإدمانه ، پاث مفيد -حرفيا في ناس عندي أستفيد منهم- وأكثر وسيلة تواصل يتكلموا الناس فيها عن حياتهم الشخصية بطريقة عفوية وهذا لطيف ويحسس بقرب مو زي داشبورد تمبلر كأني في صحراء أجنبية -عشان أغلب إللي متابعتهم أجانب- ، المهم بأعيش أزمة وجودية غبية بتخليني أكتب دا الكلام اليوم كلّه كان عبارة عن رحلة بحث عن طعام طول اليوم جوعانة وأبغى آكل ودحين جوعانة كمان وحاسة بضعف يخليني أبغى أدور شي أزعل بشأنه 🙃