ورد أكثر @wardakthar - Tumblr Blog

instagram | krissmacd

Roses

أتمنى ييجي يوم وكل الناس في مصر تاخد أجازة في العيد، كل العاملين والعاملات في المولات والمطاعم والكافيهات والحمامات والنوادي لغاية نصبات الشاي والقهوة، لأنهم بني آدمين ومن حقهم يعيّدوا مع أهلهم.

كل عمال النضافة والسيّاس وحرّاس الأمن والبوابين، كل عمال اليومية واللي بيستنوا رزق اليوم بيومه عشان ياكلوا، وعمال الدليفري، كل أصحاب الأكشاك والبقالة والعاملين في الهايبر ماركت، كل موظفي خدمة العملا، من حقهم يقضوا العيد مع أهلهم وحبايبهم أو على الأقل يناموا ساعتين زيادة ويصحوا براحتهم، بني آدمين يا جماعة، بني آدمين.

أتمنى كل الناس بلا استثناء تحصل على الحد الأدنى للأجور ويكفيهم فعلا ما يبقوش من المساكين اللي تجوز عليهم الزكاة، أتمنى يبقى فيه جناين واسعة وكبيرة ومجانية، اللي حابب يخرج ويتفسح في العيد يروح الجنينة، وينضف وراه ويروّح.

أتمنى، ولا يكتر على الله شيء، إن البيوت تخلو من العنف، بحيث لما كله يقعد في نفس الوقت مفيش إيد تتمد على حد، وإن البيوت الآمنة ومؤسسات الدعم تنتشر بشكل كبير عشان محدش يضطر يبات جنب حد مغتصِب أو معنِّف أو مشروع قاتل.

كل دي تبدو أماني مستحيلة، لكن عندي أمل إنها يوما ما تتحقق، ومفيش حاجة كبيرة على ربنا.

28-5-2026

حميد الشاعري- في دايرة الرحلة - SoundCloud

Listen to حميد الشاعري- في دايرة الرحلة by Kareem Eissa on #SoundCloud