Yorbav Daefzir-euq Ardeuv Artiv
Tsawrhaq tiqghaq-euq daefzir lafkhoer tiqjeqpaq pyeuflar lufgar haw-awr, aqjeq mirnae teulof-aer pyeuflar-euq ngalaer ghovshaw-eu maqawq-a, yawshaq mae. Ghawqmyapov, mawrlar-eu tiqjeq mar-iq, aqdir ma-aer nar-aq yawqjeq yawqkhawf pyeufnya-eu mae. Yorbav-euq daefzir-anr hawngae, ‘Mawrlar-eu & Marmarni’maqdurni beugar-eu mae.
Yorbav sanqbof, sharnoeq paq-aer ghae-eu jeq & dzawgeuf paq- aer ghae-eu jeq ghawqmya’ni anr-eu mae. Aerkhawf, tiqdzer dzaq-anr paraer nar-aq, Yorbav sanqbof-aq, Yaerbof lafkhoer nae ghovshaw-eu gharduq shaqdzaeq dzaeq-eu tiqpur mae. Tiqghaqnav guingae, ‘ghaq zalar-eu navmaqtser, maqghovshaw nya-aer narhaq mawf-eu dawq ghawqmya’ni javlarnya’ laer aer-eu mae. Ardanqbae lar-euq naef-aer, Yorbav-aq Miqyaer-anr jan-awr yawzeu baw-eu lafkhoer yawtsaq yawdawr dawr- aer daef-eu mirnae, Miqyaer nuima tsaq-awr nuikhanr shirdui dui-eu tiqghaq pyeufnga laer mawrlar-eu mae.
Aerkhawf, tiqnan Yorbav maqsiq maqmawr nyagar, mq yawgor-anr mqdmr tanqzanr ghaelef-awr, aqyawf-euq daefzir-anr yawkhav-aer ciqtanq ciqtuv lar-eu jeq keuvle-euq mae. Aqjeq ngalaer aernar-aq, naef Saqdaq, Miqyaer jawrgar le-awr aer-eu, ‘Yorbav, Miqyaer-anr uqduq tanq-eu khoer-aq, Miqyaer-euq guiqlanq yawmuiqjeq za-euq mirnae taefmae. Yawdoerjeq keuvle nar-aq, Miqyaer-anr uqduq maqpar tanq-ar.’ Khoernar-aq, Miqyaer pyaeq-eu mirnae, naef Saqdaq dov-ir-awr, Yorbav-anr yawkhav-aer khaeqnaeq khavnaeq-euq mae. Maqaernya paq-aer ghae-eu shaqzanq, Yorbav-euq daefzir & aqyawf kharjawr kharjav-eu jeq-anr keuvle-euq mae.
Yorbav shaqzanq-anr yawkhav-aer yadaq lufngae, Yorbav-euq cawqdeuq lar-awr, tiqghaq sair tiqghaq, aqyawfmaf yawqha kharnoeq- eu lof-aer Yorbav aqjeq ghae-eu yashaq-awr, aqjox-aer janrnar-aq yabuq-ir-eu lalaer yawkhav-aer aernaeq-euq mae. Yorbav, aqyawf-euq cawq ngaeq-eu jeq-anr sharnoeq ngae maqtsaq nyalaer dawqpyaer yawkhav-aer pyaerkhof-euq mae. Yorbav dawqpyaer pyaerngae, aqyawf maqghovshaw nya-eu lafkhoer Miqyaer-euq garkawv khawf, arcuiv yawmyaqjeq noeqbanq-awr, ngaeqlaeq-euq mae. Aerkhawf, arsaq saqlar ngae, Miqyaer, Yorbav-anr ghawqmyajeq ja’naeq-awr, Yorbav noeqbanq-euq jeq noeqpov-awr, noeqlaeq-euq jeq ghovshaw lar-awr, Miqyaer-anr jan-awr uqduq yawmuiq-aer tanqlar-euq mae. Khoernar-aq, Miqyaer, Yorbav-anr guiqlanq bikeuv le-euq mae.
Sharnoeqpaq-aerghae-eu Narhaq-euDawq
Yorbav sanqbof guingae, narhaq-eu dawq-anr aerkhof-eu maqawq-a—yawshaq mae. Sharnoeq ngae maqnoeqdov nya’ni zanqler paq-aer ghae-eu, narhaq-eu dawq ghawqmya’ni jav-eu mae.
1. Miqyaer aqjeq mirnae naef Saqdaq-anr pyaeq-awr, Yorbav-anr teunav nav-aer bikhaeq-euq la? Yorbav shaqzanq daq-euq gar haw-awr, aqjeq yadzaw geuf-eu la? Miqyaer, Yorbav-euq daefzir yur-awr nae, naef Saqdaq naef-aer aqmui mui-euq lalaq?
2. Yorbav-aq, hawgeuf paq-aer ghae-eu tsawrmuiq maelaer Yaerbof aertaq-euq mae (Ezk.14:14; Yk.5:11). Miqyaer khawf, Yorbav-anr nuikhanr shir-awr, Yorbav ngaeq-eu tsaqmae laer aertaq-euq mae (Yb.42:7-8). Aerkhawf, Yorbav noeq-eu maqtsaqgar, Miqyaer yawkhav-aer aerkhof naeq-euq mae laerkhawf paraer taq-euq mae. Tiqgar tiqjeq aertaq-euq heu aqjox-aer sharnoeq-eu tsaqla?
3. Yorbav shaqzanq keuvle ngae, yawmuiq-aer daqnya-euq maelaq?Miqyaer, Yorbav-anr nuikhanr shirmae laq?
4. Yorbav aqjeq-anr laeq-ir-euq la? Aqjeq mirnae laeq-ir-euq la Yawkhav-aer laeq-ir-euq jeq pyeufmae laq? Yorbav teunav nav-aer laeq-ir-euq mar-iq, aqjeq ghae-eu Yaerbof, Yorbav-anr dzawgeuf-awq laer maeq-eu la? Yorbav maqlaeq-ir-euq ngeurnar- aq, Miqyaer aqjeq mirnae teunav nav-aer aernaeq-euq nga?
5. Naef Saqdaq ghaqler-euq lalaq?
6. Miqyaer, Yorbav-anr dawq ngaeqkhof ngae, aqjeq ghae-eu khoerlof-aer ngaeqkhof-euq la? Yorbav narhaq-eu jeq-anr aerkhof naeq-euq maelaq? Aerkhof nar-aq, aqjox-aer aerkhof-euq la? Maqaer khof-euq nar-aq, aqjeq mirnae maqaer khof-euq nga?
7. Yorbav sanqbof-anr nae dzawgeuf paq-aer ghae-eu aqjerjeq javla?
Tiqdzer dzaq-anr hawngae, Yorbav sanqbof -aq, ‘aqjeq mirnae tsawrhaqzaq-anr shaqzanq nargawr keuvle-eu ngalaer tiqghaq-iq maqsiqnya, maqghovshaw jirnya-a’ laer ngaeq-aer parmawrmaq dzaeqlar-eu mae. Aerkhawf, aqjeq keuvle-eu lawkhawf, Kalizaq lafyaq-anr haw-awr, Miqyaer, aqdui-anr ghawqshaq gaq-awr ngaeqghae lufmae laer zifdan’ni jan-eu tsaqmae. Yorbav sanqbof-anr guingae, zanqler paq-aer ghae-eu jeq jav-eu mae. Aerkhawf, yawmuiq-aer gui-awr yawmuiq-aer povtser povtser-aer sharnoeq sharsawx ngae, Miqyaer-anr yawmuiq-aer siqnya-awr, cawq cawq-eu gharduq dzawgeuf paq-aer ghae-eu jeq, ghaq zalar-eu ghawqmya’ni anr-eu mae.
Yorbav-euq garkawv, ghawqmya dzerdzaq-anr nae hawnya-eu mae. Heugar, maeqhupaw Yorbav-anr shaqzanq keuvle-euq maeqhu, shaqzanq keuvle lufngae & shaqzanq keuvle-euq maeqnan, tiqjeq sair tiqjeq tsermr ma. Yorbav aqjerjeq, aqjox-aer sharnoeq-awr, aqcawq, aqyawf-euq garkawv aqjox-aer sharnoeq-eu nga laerkhawf haw-awr, aqdui aqjox-aer sharnoeq-eu tsaqla laerkhawf hawtaef-a.
Tif, Shaqzanq Keuvle-euq Maeqhu
Yorbav sanqbof ardanqbae lar-euq naef-aer, Yorbav bym-awr nya-eu tsawrmuiq tsawrjaq maelaer byacaevni ciqpoeq taq-euq mae.
1Urzav mirkhanq lafkhoer, Yorbav laer kur-eu tsawrhaq tiqghaq jawr-eu mae. Aqyawf-aq, Miqyaer-anr sarjax zif-eu lafkhoer uqduq tanq-eu mae. Yawlaeqjeq maqmrni yanryanr-aer daefluf-eu, muiq-awr jaq-eu tsawrhaq tiqghaq khawf pyeuf-eu mae. 2Aqyawf-aq, aqli shifli jawr-awr, aqbur smqbur jawr-eu mae. 3Yawr 7,000 mawr jawr-eu mae.
Aqyawf-aq, zaqkhav khawf ghawqmya’ni jawr-awr, nanrma dovkhaeq paw coer-anr aqcawq navmaqtser smrmuiq muiq-eu ghaq pyeuf-eu mae.
1.Hawgeufdzawgeufpaq-aerghae-eu
Yorbav-aq, iqbax taqkhar maqza-aer, yawtsaq yawdawr, Miqyaer-anr guv-awr yawdoer yawcawv jeq-anr byae-awr yanr-eu tsawrhaq tiqghaq pyeuf-eu mae. Yorbav, zaq ghawqmyaghaq jawr-awr smrmuiq smrbaw tiqghaq mae. Miqyaer-euq guiqlanq za-awr pyurshuir myawqganq sanrdui dui-eu uqtaf, myavpyawq narmaer jav-awr tsawrmyanr yawkhav-aer dov-eu tiqghaq mae.
Sanqpaq Miqyaer aer-eu, “Ngaq-euq zaqkhav Yorbav-anr nawr siqnya malor? Aqyawf lof-aer sarjax zif-eu muiq-eu jaq-eu tsawrhaq mirtsaq khoertav tiqghaq-iq maqjawr-a. Aqyawf, ngaq-anr uqduq tanq-awr, yawlaeq yawcajeq maqya mrni yanrdui dui-eu lafkhoer daefluf-eu mae.”
Miqyaer, naef Saqdaq naef-aer jacawq ngae, aqcawq yawqghaqyawq tiqghaq-iq-euq garkawv maqja’ni, nuikhanr shirlar paq- aer ghae-eu Yorbav-euq garkawv taef-aer ja-euq mae. Miqyaer, tsawrhaq-anr Yorbav lof-aer daefgar nuima tsaq-eu mae. Yorbav-aq, iqbax taqkhar maqza-aer, shaevdzeuf muiq-awr, yawtsaq yawdawr dawr-aer Miqyaer-anr guv-awr yawzeu baw-eu lafkhoer, yawdoer yawcawv jeq-anr yanryanr-aer daefluf-eu mae.
2.Zanrsanrkhof mrbyan sharbyan-eu
Yorbav, Miqyaer-anr jan-awr uqduq tanq-eu-aq, aqcawq kharmr-eu lof-aer taef-aer mr-eu maqngeur-a. Aqjeq mr-eu tsaqnga laer hawdov noeqdov-awr, nuima keuv-awr mr-eu tsawrhaq tiqghaq mae.
Dzaqbyawr kharlawr ngae, uqshawq yawqshawq navluf yawnaf-aer, Yorbav tur-awr, aqyawf-euq zaq, aqyawfghaq yawf-euq gharduq lawr-eu shaer-eu jeq mr-awr, shawrnaeq-eu mae. Aqyawf-euq zaq tiqghaqnav maqnoeq maqdur-aer Miqyaer-anr mrbanq-euq baw-mr laer aqyawf khanqlanr-eu baqda’nae, khoerlof-aer mr-euq mae.
romaincrisis
germansingergirl
izzy806
kaledo-art
theartofmadeline
jacobvanloon