Auto Theist Jester

Typical zombie trailblazer. Travel ninja. Total reader. Wannabe food buff. Social media evangelist.

[autotheistjester-blog]

அப்போ கிங்ஸ்மேன்... இப்போ ஸ்டேட்ஸ்மேன்... கிங்ஸ்மேன் கோல்டன் சர்க்கிள் படம் எப்படி?

ஜேம்ஸ் பாண்ட், மிஷன் இம்பாஸிபிள் படங்களுக்கு இருக்கும் ரசிகர் பட்டாளம் போலவே ஸ்பை த்ரில்லர் காமெடி படங்களுக்கும் ஒரு கூட்டம் எப்போதும் இருக்கும். ஜானி இங்கிலிஷ், ஸ்பை, ஏஜென்ட் கோடி பேன்க்ஸ் என பல படங்களை இதற்கு உதாரணமாக சொல்லலாம். 2014ல் வெளியான கிங்ஸ்மேன் தி சீக்ரெட் செர்விஸும் இதே வகைப் படம் தான். முதல் பாகம் ஹிட் அடிக்க, தற்போது இரண்டாம் பாகமான கிங்ஸ்மேன்: தி கோல்டன் சர்க்கிள் வெளிவந்து இருக்கிறது.

போதைப் பொருள்களை உலகமெங்கும் விற்கும் ஜூலியான மூர் கிங்மேன் குழுவை ஒட்டுமொத்தமாய் கொன்றுவிடுகிறது. மீதமிருக்கும் நபர்கள் கென்டக்கியில் இருக்கும் ஸ்டேட்ஸ்மேன் என்னும் சீக்ரெட் குழுவில் சேர்கிறார்கள். கிங்ஸ்மேனுக்குப் பதில் ஸ்டேட்ஸ்மேன்.. உலகை எப்படி மீண்டும் காக்கிறார்கள் என்பதுதான் கிங்ஸ்மேன்: தி கோல்டன் சர்க்கிள். ஜேம்ஸ் பாண்ட் படங்களில் வரும் கார் சேஸ் சண்டையை நக்கல் அடித்தபடி ஆரம்பிக்கிறது முதல் சண்டைக் காட்சி. நாயகன் எக்ஸி எப்படி எப்படியோ, அந்தக் காரில் சார்லியுடன் சண்டைபோட, ஒருவழியாய் தப்பிக்கிறார். 

அதற்குள், சார்லியின் இரும்புக்கை காரில் இருக்கும் கம்ப்யூட்டரை ஹேக் செய்து, கிங்ஸ்மேன் அணியில் இருக்கும் அனைவரது இடத்தையும் கண்டுபிடித்து தரைமட்டமாக்குகிறார்கள். மிச்சமிருக்கும் நபர்கள் என்ன செய்வதென்று தெரியாமல் விழி பிதுங்கி இருக்க, கையில் கிடைக்கிறது அடுத்த துருப்புச்சீட்டு. அதை வைத்துக்கொண்டு கென்டக்கியில் இருக்கும் ஸ்டேட்ஸ்மென் என்னும் கடைக்கு செல்கிறார்கள்.

 முதல் பாகத்தில் டெய்லர் கடையில் கிங்ஸ்மேன் என்னும் ரகசிய ஏஜென்சியை நடத்தியதுபோல், இந்த முறை ஸ்டேட்ஸ்மென் என்னும் மதுபான கிடங்கில் ஒரு ரகசிய ஏஜென்சி. பிறகு முதல் பாகத்தில் வருவது போலவே, உலகை காத்தல், வில்லன்கள் வெடித்துச் சிதறல், சில ஆபாசக் காட்சிகள் என அதே கதைதான்.

தன் போதைப் பொருள் கிடங்கை சுற்றி கன்னிவெடிகள் புதைத்து வைப்பது; தனக்குத் துரோகம் செய்த நபரை, அங்கேயே வெட்டி பர்கராக மாற்றி புது கூட்டாளிக்கு சாப்பிட கொடுப்பது; ரோபோ நாயை வைத்து கடிக்க விடுவது என டெர்ரர் காமெடி வில்லியாக கலக்கி இருக்கிறார் ஜூலியான மூர்.  

உலகம் முழுவதிலும் இருக்கும் மக்களுக்கு போதைப் பொருளை சப்ளை செய்துவிட்டு, அதில் இப்படியொரு வேலையை செய்வதெல்லாம் டூ மச். போதை வெறி தவறு இளைஞர்களே என்பதை இவ்வளவு அழுத்தமாய் சமீபத்தில் பதிவுசெய்த படம் எதுவும் இல்லை. சரி, படத்தின் லாஜிக் படி, ஹீரோ எல்லோரையும் காப்பாற்றிவிட்டால், மீண்டும் போதைப் பொருள் அப்படியேதான் இருக்கும்.

 நல்ல போதைப் பொருள் வாங்கி உபயோகியுங்கள் என்பதைப் பதிவு செய்கிறது கிங்ஸ்மேனின் இந்தப் பாகம். படத்தில் இருக்கும் ஒரே பாஸிட்டிவான விஷயம் படத்தில் வரும் அமெரிக்க அதிபர் டொனால்டு டிரம்ப் பற்றிய குறியீட்டு நக்கல்கள் தான். படத்தின் இயக்குநர் மாத்யூ வான் டிரம்ப் குறித்த நக்கல் காட்சிகளை நிக்கிவிட்டதாக சொன்னாலும், படத்தில் வரும் கதாபாத்திரம் அப்படியே டிரம்ப்புக்கு பொருந்திப்போகிறது. எதைப் பற்றியும் கவலைப்படாமல் இருக்கும் ஒரு அதிபராக வருபவர் செய்யும் கோமாளித்தனங்கள் டிரம்ப் அளவுக்கு இல்லை என்பது மட்டும் தான் நிதர்சனம்.

முதல் பாகம் ஹிட் அடித்த தைரியத்தில் இரண்டாம் பாகத்தை எழுதி இயக்கி இருக்கிறார்  மாத்யூ வான். அடுத்த பாகம் இருக்கும் என்பதில் மாத்யூ உறுதியாக இருக்கிறார். நாமும் உறுதியாக இருப்பது, நமது பர்ஸுக்கு நல்லது.

[autotheistjester-blog]

சுனாமி போன்ற இயற்கை சீற்றங்கள் எப்போதெல்லாம் பூமியைத் தாக்கும்?

இயற்கை எப்போதும் நமக்குச் சாதகமாக செயல்படுவதில்லை. அவ்வப்போது, ஏதாவது ஒரு வகையில் நம் மீதான கோபத்தை அது காட்டிக்கொண்டேதான் இருக்கிறது. அப்படி இயற்கை நிகழ்த்தும் பல  அழிவுகளில் மிகவும் முக்கியமானது நிலநடுக்கமும் சுனாமியும்தான் .

சுனாமி என்றால் என்ன? அது எப்படி உருவாகிறது? சுனாமி என்ற வார்த்தை ஜப்பான் மொழியில் இருந்துதான் வந்தது இதற்கு பெரிய அலைகள் என்று பொருள். கடலுக்கு அடியில் ஏற்படும் நிலநடுக்கத்தால் கடலில் உள்ள நீரானது மிகப்பெரிய அளவில் உந்தப்பட்டு பெரிய பெரிய அலைகளாக உருவெடுத்து கரைக்கு வெளியே சேதத்தை ஏற்படுத்தும். இதைத்தான் நாம் சுனாமி என்கிறோம்

சுனாமி ஏற்படும்போது தோன்றக்கூடிய அலைகள் மிகவும் ஆக்ரோஷமாக மேலெழும்பும். இந்த அலைகளின் அளவும் வீரியமும் கடலுக்கடியில் ஏற்படுகிற நிலநடுக்கத்தின் அளவைப் பொறுத்து மாறுபடும். சுனாமி என்பது ஒரேயொரு பெரிய அலை அல்ல அது அடுக்கடுக்கான அலைகளின் தொகுப்பு.

பெரும்பாலும் இந்த அலைகளால் கடலில் இருக்கும் நீர் தரைப்பகுதியை நோக்கி இடம்பெயர்வதால் நிலப்பரப்பின் இயல்பான தன்மை முற்றிலுமாக மாறிவிடும். அதுமட்டுமல்லாமல் முன்பு நிலமாக இருந்த பகுதி நீராகவும்; நீராக இருந்த பகுதி நிலமாகவும் கூட மாற நேரிடும்.

சுனாமியின்போது அநேகமாக கடலில் உள்ள நீர் தரைப்பகுதிக்குச் சென்றுவிடுவதால் கடலுக்கு அடியில் உள்ள பவளப்பாறைகள் கூட எளிமையாகத் தென்படும். மணிக்கு சுமார் 1000 கீ.மீ வேகத்தில் வெகுன்டெழுகிற அலைகள் தன் பாதையில் உள்ள அனைத்தையும் நாசப்படுத்திக் கொண்டே முன்னேறும்.ஒரு சில நிமிடங்களில் நாம் நினைத்துப்பார்க்க முடியாத பேரழிவை ஏற்படுத்தி விடும்.

கடலில் இருந்து வெளிவருகிற ராட்சத அலைகளில் மாட்டிக்கொள்ளும்போது கூட எப்படியாவது தப்பித்துக்கொள்ள முடியும். ஆனால், இந்த நீர் திரும்ப கடலுக்குள் செல்லும்போது வழியில் உள்ள அத்தனையும் கடலுக்குள் சென்றுவிடும்.

பூமிக்கு அருகே சந்திரன் வரும் ஒவ்வொருமுறையும் சுனாமி, எரிமலை வெடிப்பு போன்ற இயற்கை சீற்றங்கள் அதிகமாக ஏற்படுவதாக விஞ்ஞானிகள் கணித்துள்ளனர். இந்தச் சமயங்களில் சந்திரனின் அளவு வழக்கத்தை விட பெரியதாக காட்சியளிக்கும். 1947, 1974,1992, 1995, ஆகிய ஆண்டுகளில் பூமிக்கு அருகே சந்திரன் வந்தபோது இதுபோன்ற கோரச் சம்பவங்கள் அரங்கேறின

உலகில் இதுவரை ஏராளமான நாடுகளில் சுனாமி தன் கோரத்தாண்டவத்தை நிகழ்த்தியுள்ளது. இவற்றுள் மிக அதிகமான சேதம் 2004 டிசம்பரில் நிகழ்ந்தது. இந்தச் சுனாமியில் இந்தியா, இலங்கை உள்ளிட்ட பல்வேறு நாடுகளைச் சேர்ந்த இரண்டு லட்சத்துக்கும் அதிகமானோர் பலியாயினர்.

1700களில் அமெரிக்காவின் வடக்கு கலிபோர்னியா ஓரிகன் வாஷிங்டன் ஆகிய நகரங்களைத் தாக்கிய பூகம்பம் ரிக்டர் அளவுகோலில் 9 ஆக பதிவானது. இதனைத் தொடர்ந்து ஜப்பானில் சுனாமி ஏற்பட்டது.

1755ல் போர்ச்சுகல் தலைநகர் லிஸ்பனில் 8.7 ரிக்டர் அளவுள்ள பூகம்பம் ஏற்பட்டது. அதைத் தொடர்ந்து ஏற்பட்ட சுனாமியால் 60 ஆயிரம் பேர் பலியானார்கள்.

1868ல் சிலியில் ரிக்டர் அளவில் 9 ஆக பதிவான நிலநடுக்கத்தை தொடர்ந்து ஏற்பட்ட சுனாமி தென் அமெரிக்காவைத் தாக்கியது. இதில் சுமார் 25 ஆயிரம் பேர் பலியானார்கள்.

1906ல் ஈகுவெடார் மற்றும் கொலம்பிய கடற்கரையில் ரிக்டரில் 8.8 அளவில் பூகம்பம் ஏற்பட்டது. அதைத் தொடர்ந்து ஏற்பட்ட சுனாமியில் 500 பேர் பலியானார்கள்.

1946ல் யுனிமாக் தீவுகளில் 8.1 என்ற அளவில் பதிவான நிலநடுக்கத்தால் ஏற்பட்ட சுனாமிப் பேரலைகள் அலாஸ்காவைத் தாக்கியது. இதில் நூற்றுக்கணக்கானோர் இறந்துபோனார்கள்.

1960 ல் தெற்கு சிலியில் ஏற்பட்ட சுனாமியின்போது ஆயிரக்கணக்கானோர் பலியானார்கள். ரிக்டர் அளவுகோலில் நிலநடுக்கம் 9.5 ஆக பதிவானது.

1976-ம் ஆண்டு பிலிப்பைன்ஸ் நாட்டில் ஏற்பட்ட சுனாமி ஐயாயிரம் உயிர்களை காவு வாங்கியது. அப்போது ஏற்பட்ட நிலநடுக்கம் 9.2 ஆக பதிவாகியிருந்தது

2007 ல் சாலமன் தீவுகளில் 8.1 ரிக்டர் அளவில் பூகம்பம் பதிவானது அதனால் ஏற்பட்ட சுனாமியில் 28 பேர் பலியானார்கள்.

2009ல் தெற்கு பசுபிக் பகுதியில் 8.1 என்ற ரிக்டர் அளவில் பதிவான நிலக்கடுத்தால் ஏற்பட்ட சுனாமி நூற்றுக்கணக்கான உயிரை பறித்துச் சென்றது.

2011 - ஜப்பானில் 8.9 ஆக பதிவான நிலநடுக்கத்தை தொடர்ந்து ஏற்பட்ட சுனாமி ஜப்பானை நாசமாக்கியது.

[autotheistjester-blog]

வேட்டங்குடி பறவைகள் சரணாலயத்தில் குவியும் பறவைகள்!

சிவகங்கை மாவட்டம் வேட்டங்குடி பறவைகள் சரணாலயத்தில் வெளிநாட்டுப் பறவைகள் குவிவதால், சுற்றுலாப் பயணிகள் மற்றும் கிராம மக்கள் மகிழ்ச்சியடைந்துள்ளனா்.

சிவகங்கை மாவட்டம் திருப்பத்தூர் அருகே உள்ள கொள்ளுகுடிப்பட்டி கண்மாயில், சுமார் 38.4 ஏக்கர் பரப்பளவில் வேட்டங்குடி பறவைகள் சரணாலயம் அமைந்துள்ளது. சமீபத்தில் பெய்த மழையால், பசுமையாக இயற்கை எழிலுடன் காணப்படுகிறது. ஆண்டுதோறும் செப்டம்பர்-அக்டோபர் மாதங்களில் தமிழக நீர்நிலைகளை நாடி லட்சக்கணக்கான பறவைகள் இங்கு வருகை தருகின்றன. இனப்பெருக்கம் முடிந்து, ஏப்ரல்-மே மாதங்களில் தங்கள் இருப்பிடங்களுக்குத் திரும்பிச் செல்கின்றன.

உண்ணிகொக்கு, முக்குளிப்பான், நீலச்சிறவி, சாம்பல் நிற நாரை, பாம்புதாரா, கருநீல அரிவாள் மூக்கன், கரண்டி வாயன், நத்தை கொத்திநாரை போன்ற 217 வகையான சுமார் 8,000 வெளிநாட்டுப் பறவைகள், மழைக்காலத்தில் இங்கு வருகின்றன. கடந்த ஆண்டு போதிய மழை இல்லாததால், தாமதமாக வந்த பறவைகளும் டிசம்பா் மாதத்திலேயே தமது இருப்பிடத்துக்குச் சென்றுவிட்டன. சமீபத்தில் பெய்த தென்மேற்குப் பருவமழையால் குளங்கள், கண்மாய்களில் நீா் வரத்து அதிகமானதால், இம்மாத தொடக்கத்திலிருந்தே இங்கு  நாள்தோறும் பறவைகள் வந்து குவியத் தொடங்கியுள்ளன.

இதனால், இந்த ஆண்டு மழை அதிகமாகப் பெய்து விவசாயம் செழிக்கும் என்று கொள்ளுகுடிப்பட்டி கிராம மக்கள் வயல்களில் விவசாயப் பணிகளைத் தொடங்கிவிட்டனா். விதவிதமான பறவைகள், காலையில் இரை தேடிச் சென்று, மாலையில் சரணாலயத்தில் வந்து கூடுகட்டி, இனப்பெருக்கம் செய்கின்றன. கிராம மக்கள், தீபாவளி மட்டுமல்லாது எந்த நிகழ்ச்சிக்கும் வெடி வெடிப்பதில்லை. பறவைகளுக்காகத் தங்களின் மகிழ்ச்சியைத் தியாகம்செய்துவருகிறார்கள். இவர்களைப் பாராட்டி, வனத்துறை ஒவ்வோர் ஆண்டு தீபாவளிக்கும் இனிப்புகள் வழங்கிவருகிறது.

இந்தப் பறவைகளைக் காணவரும் சுற்றுலாப் பயணிகளுக்கு, தொலைநோக்கி உள்ளிட்ட அடிப்படை வசதிகளைச் செய்து தர வேண்டும் என்ற கோரிக்கை எழுந்துள்ளது. மேலும், வேட்டங்குடி பறவைகள் சரணாலயம்குறித்து வனத்துறை, சுற்றுலாத்துறை மற்றும் மாவட்ட நிர்வாகங்கள் விளம்பரப்படுத்தி, சுற்றுலாப் பயணிகள் இங்கு வந்து கண்டுகளிக்க நடவடிக்கை எடுக்க வேண்டும் என்றும் பொதுமக்கள் கோரிக்கை விடுத்துள்ளனர்.  

[autotheistjester-blog]

தமிழகத்தில் மோடி செய்த இரண்டு பொம்மைகள்!

''என்னடா நடக்குது இங்கே...'' என்று நடிகர் வடிவேல் சொல்லும் ஒரு காமெடி வசனத்தைப்போலவே இருக்கிறது இன்றைய தமிழக அரசியல். ஜெயலலிதா மரணம் அடைந்து, இந்த ஒன்பது மாதங்களில் தமிழகத்தில் தலைசுற்றும் அளவுக்கு எத்தனையோ அரசியல் மாற்றங்கள் அரங்கேறியிருக்கின்றன. அந்த மாற்றங்களுக்கு எல்லாம் காரணம் யார்? அ.தி.மு.க-வினரை ஆட்டிவைக்கும் பிரதமர் மோடியா அல்லது அ.தி.மு.க-வை அடைகாக்க நினைக்கும் மன்னார்குடி கோஷ்டியா என்பது பற்றி அந்தக் கட்சிக்காரர்களிடமே பேசினோம்.

''இறைவன் இரண்டு பொம்மைகள் செய்தான், தான் விளையாட... அவை இரண்டும் சேர்ந்தொரு பொம்மையைச் செய்தன தாம் விளையாட... என்கிற திரைப்படப் பாடல் வரிகளுக்கு ஏற்றாற்போல், தமிழகத்தில் பிரதமர் மோடி, தான் விளையாடுவதற்குத் இரண்டு பொம்மைகளைச் செய்திருக்கிறார். அந்த இரண்டு பொம்மைகளும் தாங்கள் விளையாடுவதற்குத் தமிழகத்தைத் தேர்ந்தெடுத்திருக்கின்றன. இந்தப் பொம்மைகள் யாரென்று உங்களுக்கே... ஏன் உலகத்துக்கே தெரியும். ஜெயலலிதாவின் மரணத்துக்குப் பிறகு, ஓ.பன்னீர்செல்வம் தலைமையில் பிளவுபட்ட அ.தி.மு.க., இப்போது பி.ஜே.பி மத்தியஸ்தத்துடன் ஒட்டவைக்கப்பட்டிருக்கிறது... இல்லை...இல்லை... ஒன்றுக்கும் உதவாத நிலைக்குத் தள்ளப்பட்டிருக்கிறது என்றுகூடச் சொல்லலாம். எடப்பாடி பழனிசாமி தலைமையிலான ஆட்சியைச் சில தினங்களுக்கு முன் 'ஊழல் ஆட்சி' என்று சொன்ன ஓ.பி.எஸ்., இன்று பதவிக்காக அவரோடு கைகோத்திருக்கிறார். தன்னை ஏற்றிவிட்ட ஏணியையே (சசிகலா குடும்பத்தை) எட்டி உதைத்திருக்கிறார் எடப்பாடி.

 இவர்கள் இருவரும் இணைந்த பிறகு, ஜெயலலிதா உயிருடன் இருந்தபோது, அ.தி.மு.க-வில் கோலோச்சி வந்த மன்னார்குடி குடும்பத்தைச் சேர்ந்த அனைவரையும் அக்கட்சியிலிருந்து புறந்தள்ளிவிட்டனர். எனினும், துணைப் பொதுச்செயலாளர் என்ற முறையில் டி.டி.வி.தினகரன், எடப்பாடி உள்ளிட்ட அமைச்சர்கள் மற்றும் பல நிர்வாகிகளைக் கட்சிப் பொறுப்புகளில் இருந்து நீக்கி நடவடிக்கை எடுத்து வருகிறார். 'தினகரன் நியமனமே செல்லாது என்ற நிலையில், அவரின் அறிவிப்பு எங்களைக் கட்டுப்படுத்தாது' என்று, எடப்பாடி தரப்பினர் கூறிவருகிறார்கள். இதற்கெல்லாம் யார் காரணம்...இவர்களை ஆட்டிவைப்பவர்கள் யார்? ஒருகாலத்தில் அம்மாவுடன் கூட்டணி சேர எள்ளளவும் வாய்ப்பில்லாத நிலையில் இருந்த பி.ஜே.பி-தான் இன்று, ஒட்டுமொத்த அ.தி.மு.க-வையும், தமிழக அரசையும் ஆட்டிப்படைத்துக் கொண்டிருக்கிறது... அறுந்து விழுந்த நிலையிலும் ஆதரவு கொடுத்து ஆளவைத்துப் பார்க்கிறது.

தமிழகத்துக்குள் கொல்லைப்புறமாக வந்து பிள்ளையையும் கிள்ளிவிட்டு, தொட்டிலையும் ஆட்டிக்கொண்டிருக்கும் மத்திய பி.ஜே.பி. அரசின் ஆதரவினால்தான் ஓ.பி.எஸ்ஸும், இ.பி.எஸ்ஸும், தமிழகத்தில் தலைவிரித்தாடும் பிரச்னைகளைத் தீர்க்க நடவடிக்கைகள் மேற்கொள்ளாமல், 'தங்களுக்கு எவ்வளவு கிடைக்கும்... பதவியில் இருக்கும் தங்களை யாரும் தீண்டாமல் இருக்க என்ன செய்யவேண்டும்' என்ற நோக்கிலேயே நாள்களைக் கடத்திக் கொண்டிருக்கின்றனர். 

ஒட்டுமொத்த அ.தி.மு.க உறுப்பினர்களின் ஆலோசனைகளைக் கேட்கிறார்களோ... இல்லையோ, தற்போது உயிராய், உறவாய் இருக்கும் பி.ஜே.பி-யின் அறிவுரைகளை ஒருநிமிடம்கூடக் கேட்கத் தவறுவதில்லை. மோடி நடத்திவரும் இந்தச் சதுரங்க விளையாட்டில் மோட்சம் பெறத் தொடங்கிவிட்டனர் அவர்கள் இருவரும். அதனால்தான் அரியலூர் மாணவி அனிதாவின் தற்கொலை; தமிழக விவசாயிகள் பிரச்னை; நெடுவாசல், கதிராமங்கலம் கிராம மக்களின் போராட்டங்கள் என நிலத்துக்குப் பாதிப்புகளைத் தரக்கூடிய எந்தவொரு பிரச்னைகளைப் பற்றியும் அவர்கள் கண்டுகொள்வதில்லை.

இதுபோன்ற பிரச்னைகளை எதிர்த்துக் குரல் கொடுக்க வேண்டியவர்கள் எதுவும் தெரியாததுபோல் மெளனம் காக்கிறார்கள். ஜெயலலிதா பாணியில் குட்டிக்கதை மூலம் உள்கட்சிக்குப் பதில் சொல்லும் எடப்பாடி, ஊர்ப் பிரச்னைக்கு எந்தக் கதையும் சொல்வதில்லை. உருப்படியாய் எந்தத் திட்டங்களையும் செயல்படுத்துவதுமில்லை. தங்கள் கட்சி சார்ந்த பிரச்னைகளைத் தீர்ப்பதற்கே எடப்பாடிக்கு நேரமில்லாதபோது, தமிழக மக்களின் பிரச்னைகளை எப்படித் தீர்ப்பார்? மூச்சுக்கு முந்நூறு தடவை 'அம்மாவின் ஆட்சி' என்றும், 'அம்மா' பெயரையும் உச்சரித்துவரும் ஆட்சியாளர்களின் உதடுகளில் எல்லாம், இன்று 'மோடி' என்கிற பெயர்தான் அசைபோட்டுக் கொண்டிருக்கிறது. அப்படியென்றால், அவர்களை இயக்குவது மோடிதானே?! சோனியா காந்தி இயக்கிய மன்மோகன் சிங் போலவும், ஜெயலலிதா இயக்கிய ஓ.பி.எஸ் போலவும் இப்போது ஓ.பி.எஸ்ஸும், இ.பி.எஸ்ஸும் மோடியால் இயக்கப்படுகின்றனர்'' என்று அங்கலாய்த்தனர்.

மேலும் அவர்களிடம், ''நீங்கள் டி.டி.வி.தினகரனுக்கு ஆதரவாகப் பேசுகிறீர்களா'' என்று வினவினோம். ''நாங்கள் யாருக்கும் ஆதரவாகப் பேசவில்லை. அ.தி.மு.க.-வைச் சேர்ந்தவர்கள் என்ற அடிப்படையில் நியாயத்தைத்தான் பேசுகிறோம்'' என்றவர்கள், ''இப்படியே சென்றால், எதிர்காலத்தில் மக்கள் அ.தி.மு.க-வையும், அதனை இயக்கும் பி.ஜே.பி-யையும் திரும்பிக்கூடப் பார்க்க மாட்டார்கள் என்பது நிச்சயம்'' என்றனர் தீர்க்கமாக.

"நாம் ஒரு கணக்குப் போட்டால் ஆண்டவன் ஒரு கணக்குப் போடுவான்" என்பது கிராமத்துப் பழமொழி. இப்போது, தமிழகத்தில் நடைபெறும் கூத்துகளை எல்லாம் பார்க்கும்போது, மோடி ஒரு கணக்குப் போடுகிறார்; இ.பி.எஸ் - ஓ.பி.எஸ். கூட்டணி ஒரு கணக்குப் போடுகிறது. ஆனால், இவர்களின் கணக்குகள் எல்லாம், தேர்தல் வரும்போது, மக்களின் முன் பலிக்குமா என்பதைப் பொறுத்திருந்துதான் பார்க்க வேண்டும்.  மக்களின் தீர்ப்பே மகேசன் தீர்ப்பு!

[autotheistjester-blog]

கார், வீடு, கல்விக்கு கடன் வாங்காமல் சமாளிப்பது எப்படி?

மாத இறுதியில் இருக்கிறோம். இந்த மாதத்தில் மட்டும் கடன் வேண்டுமா என்று கேட்டு போன் வராத நபர்கள் யாரேனும் இருந்தால் கையைத் தூக்குங்கள் என்றால் மிக சொற்பமான நபர்களே கையை தூக்குவார்கள். ஏனெனில் இன்றைய நிலையில் நம் வாழ்க்கையில் கடன்களுக்கு பஞ்சமே இல்லை. அந்த அளவுக்கு கடன்களை நம் தலையில் கட்டுவதில் கடன் நிறுவனங்கள் தீவிரமாக இருக்கின்றன. கைமாத்து முதல், காலம் முழுக்க வட்டி கட்டுவது வரை எல்லா தேவைகளும் கடன்களைச் சுற்றியே நிகழ்கிறது.

தேடிவந்து கொடுக்கிறார்களே என்று தேவையிலாமல் கடன் வாங்கி அவதிக்குள்ளானவர்களே அதிகம். கையில் பணமே இருந்தாலும் கூட, இ.எம்.ஐ- யிலும் கிரெடிட் கார்டிலும் தான் செலவு செய்ய விரும்புகிறார்கள். இதன் விளைவுகளைப் பற்றி யாரும் யோசிப்பதில்லை. கடன் பட்டார் நெஞ்சம் என்பது ஒருபோதும் நிம்மதி அடையாது. கடன் வாங்கிவிட்டு அடைக்க முடியாமல் உயிரை மாய்த்தவர்களையும் பார்த்திருக்கிறோம்.

டிவி, எஸ்எம்எஸ், ஃபேஸ்புக் என்று எல்லா இடத்திலும் கவர்ச்சிகரமான விளம்பரங்களால் நம்மை கடன் வாங்க வைத்துவிட்டுத்தான் தூங்குவோம் என்ற நிலையில் கடன் நிறுவனங்களோ கடன் வலைகளை வீசிக் கொண்டேதான் இருக்கின்றன. ஏன் கடன் இல்லாமல் ஒருவர் தன் எல்லா தேவைகளையும் நிறைவேற்றிக்கொள்ளவே முடியாதா?

நிச்சயமாக முடியும். எப்படி என்கிறீர்களா?

கடன் எதற்கெல்லாம் வாங்குகிறோம் என்பதை பட்டியல் போடுங்கள். குழந்தைகள் கல்வி, அறுவை சிகிச்சை, பைக், கார், வீடு......... பிசினஸ். அவ்வளவுதானே. இதில் பிசினஸுக்கு கடன் வாங்குவதை மட்டும் விதிவிலக்காக எடுத்துக்கொள்ளலாம். பிசினஸ் செய்வது ரிஸ்க், கடன் வாங்கி செய்வது இன்னும் ரிஸ்க். ரிஸ்க் எடுக்க துணிந்தவர்கள் சிலரே. எனவே அதை விட்டுவிடுவோம்.

கல்வி, திருமணம், மருத்துவம், கார், வீடு இவற்றைக் கடன் வாங்காமல் சமாளிப்பதற்குப் பல வழிகள் உள்ளன. கல்விக் கடன் என்பது பிள்ளைகளின் எதிர்காலத்துக்கானது. நம்முடைய சம்பாத்தியத்திலிருந்து பிள்ளைகளின் கல்விக்கென்று ஒரு தொகையை அவர்களின் சிறு வயதிலிருந்தே ஒதுக்கி சேமித்து வந்தாலே பிள்ளைகளுக்குக் கல்விக்கடன் வாங்க வேண்டிய அவசியமே வராது. கல்விக் கடனைப் போலவேதான் திருமணமும். பிள்ளைகளின் திருமணத்துக்கென்று ஒரு தொகையைச் சேமித்து வரலாம். குழந்தைகளின் எதிர்காலத்துக்காகவே மியூச்சுவல் ஃபண்ட், இன்ஷூரன்ஸ், அஞ்சலகத் திட்டங்கள் என அனைத்திலும் பல்வேறு முதலீட்டு திட்டங்கள் இப்போது வந்துவிட்டன.

மருத்துவ செலவுகளுக்கான கடன். விபத்துக் காப்பீடு, ஆயுள் காப்பீடு ஆகிய இரண்டையும் மிகக் குறைவான பிரீமியச் செலவில் எடுத்துக்கொள்வதன் மூலம் மருத்துவச் செலவுக்கான செலவையும், உயிரிழப்புக்குப் பின் ஏற்படும் நிதி நெருக்கடியையும் சமாளிக்க முடியும். திடீர் நிதி நெருக்கடிகளுக்கு ஆளாகாமல் நம்மை நாம் பாதுகாத்துக்கொள்ள முடியும். ஆனால் சரியான பாலிசிகளைத் தேர்வு செய்வது அவசியம்.

வீட்டுக் கடனைப் பொறுத்தவரை சற்று நிதானம் அவசியம். வாடகை கட்டி மாளவில்லை என்பது உண்மைதான் என்றாலும் நகரங்களில் கடன் வாங்கி வீடு வாங்குவதில் அவ்வளவு விரைவாக முடிவெடுத்துவிடக் கூடாது. நகர வாழ்க்கையும் சரி, நாம் பார்க்கும் வேலையும் சரி ஒரே இடம் என்பதில் எந்த உத்தரவாதமும் இல்லை. அவசரப்பட்டு கெளவரத்துக்காக கடனை வாங்கி வீடு வாங்குவதைத் தவிர்க்கலாம். மேலும் ரூ. 40 லட்சம் கடனுக்கு இருபது வருடத்துக்கு மாதம் 30 ஆயிரம் ரூபாய் இ.எம்.ஐ செலுத்த வேண்டியிருக்கும் பட்சத்தில் நீங்கள் 20 வருடங்களில் தோராயமாக ரூ. 60 லட்சம் செலுத்துவீர்கள். ஆனால் வீடு வாங்குவதில் அவசரம் கொள்ளாமல் அதே ரூ. 30 ஆயிரத்தை ரூ. 10 ஆயிரம் வாடகைக்குப் போக மீதமுள்ள ரூ. 20 ஆயிரத்தை மியூச்சுவல் ஃபண்ட் ஃபிக்சட் டெபாசிட், பிபிஎஃப் போன்றவற்றில் முதலீடு செய்துவந்தீர்கள் எனில் 20 வருடங்களில் உங்களின் முதலீடானது ரூ. 1 கோடியைத் தாண்டியும் வருமானமாக ஈட்ட முடியும். அப்போது உங்களுடைய நிரந்தர வசிப்பிடமும் உறுதியாகியிருக்கும். கடனில்லாமல் உங்களுடைய பணத்தை வைத்தே அழகான தனி வீட்டை கூட உங்களால் வாங்க முடியும்.

கார் என்பது ஆடம்பரம். சென்னையின் போக்குவரத்து நெரிசலுக்கு கார் உரிமையாளர்கள் மிக முக்கிய காரணம். அந்த நெரிசலில் பாதிக்கப்படுபவர்களும் அவர்களே. கொஞ்சம் யோசித்த்துப் பாருங்களேன் சென்னை போன்ற மாநகரங்களில் பொதுப் போக்குவரத்து வாகனங்கள் மட்டுமே இயங்கினால் அந்தச் சூழல் எவ்வளவு அழகாக இருக்கும்!  விரைவான பயணமும், காற்று மாசில்லா நகரமும் சாத்தியமாகும். அதுமட்டுமல்லாமல் கார் வாங்குபவர்களில் பாதிக்கும் மேலானவர்கள் மாதத்தில் ஓரிரு முறைதான் பயன்படுத்துகிறார்கள். மற்ற நேரங்களில் பார்க்கிங் வசதியில்லாமல் சாலைகளை அடைத்துக்கொண்டிருக்கின்றன. கார் வாங்குவதற்கு பதிலாக வாடகைக் கார்களை பயன்படுத்திக்கொள்வதே புத்திசாலித்தனம்.

இவை தவிர தவிர கிரெடிட் கார்டு, மொபைல் போன், காய்கறி வாங்க கடன் என எல்லாவற்றையும் நம்மால் தாராளமாகத் தவிர்க்க முடியும். சிம்பிள் விஷயம்தான். கையில் பணம் இருக்கும் போது ஏன் கடன் வாங்க வேண்டும்? என யோசித்தாலே போதும், கடனில்லாத வாழ்க்கை வசமாகும்.

முக்கியமாக கவனத்தில் கொள்ள வேண்டியது, வருமானம் ஈட்டக்கூடிய எந்தக் காரியத்துக்காகவும் கடன் வாங்கலாம். நம்முடைய செலவை அதிகரிக்கும் காரியங்களுக்காகக் கடன் வாங்குவதைத் தவிர்க்க வேண்டும். கடனில்லாத வாழ்க்கைக்கு நீங்கள் உடனடியாகத் துவங்கும் சேமிப்பும், முதலீடும் தான் மருந்து.

[autotheistjester-blog]

குடும்ப உறவுகளைப் பேணுவதற்கான நெறிமுறைகள்! - ரம்ஜான் சிறப்பு கட்டுரை-3

நெறிமுறைகளைக் கையாள வேண்டும்? ‘வேத வரிகளும் தூதர் மொழிகளும்' நூலின் ஆசிரியரும் பேராசிரியருமான டாக்டர் K.V.S.ஹபீப் முஹம்மத் தனது அடுத்த நூலுக்காக தொகுத்துள்ள கட்டுரை நம் விகடன் வாசகர்களுக்கு வழங்குகிறார். இதில் உறவுகளைப் பராமரிப்பதில் உள்ள நெறிமுறைகளை அழகாக தொகுத்து வழங்கியுள்ளார்.

பெற்றோரைப் பேணுக ! நபி (ஸல்) அவர்கள் கூறினார்கள்:

* அவன் அழிந்து போகட்டும் ! அவன் அழிந்து போகட்டும் ! அவன் அழிந்து போகட்டும் ! என்றார் நபி அவர்கள். யாரைக் குறித்து இப்படிச் சொல்கின்றீர்கள் என அவரிடம் கேட்கப்பட்டபோது ‘பெற்றோர்களில் ஒருவரோ, அல்லது இருவரோ, முதுமையான நிலையில் இருந்தும் அவர்களுக்குப் பணிவிடை புரியாது சுவனம் (சொர்க்கம்) செல்லாதிருப்பானே அவன்' என பதிலளித்தார்கள்.(நூல்: முஸ்லிம்)

* கீழ்படியும் மகன் பெற்றோர்களை அன்புடன் பார்க்கும் ஒவ்வொரு பார்வைக்கும் இறைவனால் ஏற்றுக்கொள்ளப்பட்ட ஒரு ஹஜ் கடமை செய்ததற்குரிய கூலியை இறைவன் வழங்குவான்.

தோழர்கள் கேட்டார்கள்: அவர் ஒவ்வொரு நாளும் நூறு முறை பார்த்தாலுமா? ஆம்! இறைவன் மிகப் பெரியவனும் அருளாளனும் ஆவான், என்றார் நபிகள் நாயகம் .(நூல்:பைஹகீ)

*  இறைவனுக்கு இணை வைத்தல், பெற்றோருக்கு நோவினை செய்தல், கொலை செய்தல், பொய் சத்தியம் செய்தல் ஆகியவன பெரும் பாவங்களாகும்.(நூல்: புகாரி)*  நீங்கள் உங்கள் தந்தையை வெறுக்காதீர்கள்; தந்தையை வெறுப்பது இறை மறுப்புக்கு (குப்ரு) இணையான செயலாகும். (நூல்: புகாரி, முஸ்லிம்)

*  ஒரு  மனிதன் தந்தையின் நண்பரை ஆதரிப்பது நன்மையில் மிகப் பெரிய நன்மையாகும். ( நூல்: முஸ்லிம்) தாய்மை, இறைவன் கூறுகின்றான்:

* தன்னுடைய தாய் தந்தையிடம் நல்லவிதமாக நடந்துகொள்ள வேண்டுமென்று நாம் மனிதனுக்கு அறிவுறுத்தினோம். அவனுடைய அன்னை, அவனைச் சிரமத்துடனேயே கருவுற்று சுமந்திருந்தாள். சிரமப்பட்டுத்தான் அவனைப் பெற்றெடுத்தாள். மேலும், அவனைச் சுமந்திருப்பதற்கும் அவனுக்கு பால் குடிப்பை மறக்கடிப்பதற்கும் முப்பது மாதங்கள் ஆகின்றன. (திருக்குர்ஆன் :46:15) நபி (ஸல்) அவர்கள் கூறினார்கள்:

* நபித்தோழர் ஒருவர் நபிகளிடத்தில் வினவினார்:

“இறைத்தூதரே! நான் நல்லவிதமாக நடந்துகொள்ள அனைவரையும் விட அதிக உரிமை பெற்றவர் யார்? நபி (ஸல்) அவர்கள்: உம் அன்னையே மிகவும் உரிமை பெற்றவள். நபித்தோழர்: அன்னைக்குப் பிறகு யார்? நபி (ஸல்) அவர்கள்: உம்முடைய அன்னை. நபித்தோழர்: பிறகு யார்? நபி (ஸல்) அவர்கள்: உம்முடைய தந்தை. அதற்கு அடுத்தபடியாக உமது நெருங்கிய உறவினர், உம் நன்னடத்தைக்கு உரியவர்கள். (நூல்: புகாரி,முஸ்லிம்) இல்லறம் ஒரு நல்லறம் நபி (ஸல்) அவர்கள் கூறினார்கள்:

* நீங்கள் உங்களுடைய மனைவியிடத்தில் இல்லறத்தில் ஈடுபடுவதும் ஒரு நல்லறம் என்றார்கள். நபித்தோழர்களோ , இறைத்தூதர் அவர்களே!  நாங்கள்  எங்களது இச்சைகளைத் தீர்த்துக் கொள்ள எங்களது மனைவியரிடத்தில் உறவில் ஈடுபடுவதும் நல்லறமாகுமா? எனக் கேட்டனர்.

நபி(ஸல்) அவர்கள் கூறினார்கள். நீங்கள் உங்களுக்கு அனுமதிக்கப்படாத வழியில் உங்கள் இச்சைத் தீர்த்துக் கொண்டால் தீமை எழுதப்படுவது போல. அனுமதிக்கப்பட வழியில் இல்லற வாழ்வில் ஈடுபவதற்கும் நன்மை எழுதப்படுகிறது என்றார்கள்.(நூல்: முஸ்லிம்)  

நல்ல துணையை நாடுக! நபி (ஸல்) அவர்கள் கூறினார்கள்: குலமா! குணமா! பணமா! அழகா!

* ஒரு பெண் அவளது செல்வம், குடும்பம், அழகு, மார்க்கப்பற்று என்ற நான்கு விஷயங்களுக்காக மணமுடிக்கப்படுகிறாள். எனினும், மார்க்கப்பற்றுள்ள பெண்ணையே மணமுடித்து வெற்றி பெறுவீராக என நபி (ஸல்) அவர்கள் கூறினார்கள். (நூல்: புகாரி, முஸ்லிம்)

* இல்லறம், நல்லறமாக மனைவியை நேசி! உள்ளங்கள்  இணைவதே உண்மையான காதல்; இல்லறத்தின் மூலமே அது முழுமைபெறுகிறது .

இறைவன் கூறுகின்றான்:

*  அவன் உங்களுக்காக உங்கள் இனத்திலிருந்தே மனைவியரைப் படைத்தான்; நீங்கள் அவர்களிடம் அமைதி பெறவேண்டும் என்பதற்காக! மேலும், உங்களிடையே அன்பையும், கருணையையும் தோற்றுவித்தான். திண்ணமாக, சிந்திக்கும் மக்களுக்கு இதில் நிறையச் சான்றுகள் உள்ளன. 30:22 வானங்கள் மற்றும் பூமியைப் படைத்திருப்பதும், உங்கள் மொழிகளும், உங்கள் நிறங்களும் மாறுபட்டிருப்பதும் அவனுடைய சான்றுகளில் உள்ளவையே! திண்ணமாக, இவற்றிலெல்லாம் அறிவுடையோருக்கு நிறையச் சான்றுகள் உள்ளன. (திருக்குர்ஆன் :30:21)

நபி (ஸல்) அவர்கள் கூறினார்கள்:

* இறைநம்பிக்கை கொண்ட எந்த ஆணும் இறைநம்பிக்கை கொண்ட மனைவியை வெறுக்க வேண்டாம். அவளிடமுள்ள ஒரு குணம் பிடிக்கா விட்டாலும், இன்னொரு குணத்தை நேசிக்கக் கூடும்! (நூல்: முஸ்லிம்)

*  ஒருவரை நேசிப்பதற்கு திருமணத்தை விடச் சிறந்த வழி வேறு எதுவும் இல்லை. (நபி மொழி)

*  மனைவியிடத்தில் சிறந்தவரே மனிதரில் சிறந்தவர் ஆவார். (நூல்:திர்மிதி)

*  உங்கள் ஒருவர் தம் மனைவியரை பகலில் அடிமையை அடிப்பது போல் அடித்து விட்டு, பின்னர் அதே நாளின் இறுதியில் (இரவில்) அவளுடன் உறவு கொள்கின்றனர். (இவ்வாறு செய்வது கேவலம்  இல்லையா?) (நூல் : புகாரி 4942, 5204)

* மனைவியை  (தவறுகளுக்காக) தண்டிப்பதாயின் வீட்டில் மட்டுமே தண்டிக்கவேண்டும்.( நூல்: அபூதாவூத்)

* அல்லாஹ்வின் திருப்தியை மட்டுமே நாடி நீர் எதைச் செலவு செய்தாலும், அதற்காக கூலி வழங்கப் படுவீர். உமது மனைவியின் வாயில் நீர் ஊட்டும் ஒரு கவள உணவு உள்பட என்று அல்லாஹ்வின் தூதர் (ஸல்) அவர்கள் கூறினார்கள். (நூல் : புகாரி 56)

* அல்லாஹ்வின் தூதரே! எங்களில் ஒருவர் தன் மனைவிக்குச் செய்ய வேண்டிய கடமை என்ன? என்று நான் கேட்ட போது, "நீ சாப்பிடும் போது அவளுக்கு சாப்பிடக் கொடுக்க வேண்டும். நீ உடை உடுத்தும் போது அவளுக்கும் உடை கொடுக்க வேண்டும். முகத்தில் அடிக்கக் கூடாது. அவளை நீ மனம் நோகச் செய்யக் கூடாது. வீட்டிற்குள்ளேயே தவிர (வேறு இடங்களில் அவள் மீது) வெறுப்பைக் காட்டக் கூடாது'' என்று அல்லாஹ்வின் தூதர் (ஸல்) அவர்கள் பதிலளித்தார்கள்.(நூல் : அபூதாவூத் 1830)

[autotheistjester-blog]

அ.தி.மு.க-வில் தனி அணியானதா ‘நமது எம்ஜிஆர்’?

அதிமுகவில் எந்த அணிக்கு உரிமை உள்ளது எனச் சட்டரீதியாக வழக்கு நடந்துவரும்நிலையில், அக்கட்சியின் அதிகாரபூர்வ ஏடான நமது எம்ஜிஆர் நாளிதழ், திடீர்ப் பரபரப்பைக் கிளப்பியுள்ளது.

முதலமைச்சர் எடப்பாடி பழனிச்சாமியும் முன்னாள் முதலமைச்சர் ஓ.பன்னீர்செல்வமும் இரு வேறு அணிகளாக எதிரெதிர்த் திசைகளில் பயணித்தாலும், மத்திய பாஜக அரசை ஆதரிப்பதில் போட்டிபோட்டுக்கொண்டு நிற்கின்றன. எம்ஜிஆர் நூற்றாண்டு விழாவுக்கு வருகைதருமாறு பிரதமர் மோடியை இரண்டு அணிகளின் தலைவர்களான - பன்னீர்செல்வமும் பழனிச்சாமியும் டெல்லிக்குச் சென்று நேரில் சந்தித்து அழைப்புவிடுத்தனர். குறிப்பாக, மறைந்த ஜெயலலிதா முதலமைச்சராக இருந்தபோது நீட் போன்ற சில விவகாரங்களில் எடுத்த நிலைப்பாட்டுக்கு மாறாக, மத்திய அரசை ஆதரிக்கிறது, பழனிச்சாமி தலைமையிலான அதிமுக அரசு.

நீட் தேர்வுகூட உயர்கல்வி சார்ந்த ஒரு விவகாரம்; அதனால் நேரடியாகப் பாதிக்கப்படுபவர்கள் குறிப்பிட்ட பிரிவினர் மட்டுமே என்பது ஒரு கருத்து. அதைப்போலத்தான் மாட்டிறைச்சி விவகாரமும் என்கிறார்கள். ஆனால் ஜிஎஸ்டி வரிவிதிப்போ சமுதாயத்தின் எல்லா பிரிவு மக்களையும் அன்றாடம் நேரடியாகப் பாதிக்கக்கூடியது என்றாலும்கூட, அதிலும் மத்திய அரசுக்கு எதிராக வாய்மூடி மௌனமாகவே இருந்துவருகிறது, எடப்பாடி அரசு. சட்டமன்ற எதிர்க்கட்சித்தலைவர் மு.க.ஸ்டாலின், மாநில அரசை வறுத்தெடுக்கிறார். காங்கிரஸ், கம்யூனிஸ்ட் கட்சிகள் உட்பட மற்ற எதிர்க்கட்சிகளும் கடுமையாகச் சாடுகின்றன. முதன்மையாக, மாநில உரிமைகளை மத்திய அரசு படிப்படியாக காலிசெய்துவருகிறது; அதற்கு மாநில அரசு சார்பில் கடுமையாக எதிர்ப்புத் தெரிவிக்காவிட்டாலும், சிறிதளவு அதிருப்தியைக்கூட வெளிப்படுத்தவில்லை என்பது இக்கட்சிகளின் முக்கியக் குற்றச்சாட்டு.

இவ்வளவுக்குப் பிறகும் ஆளும் கட்சியிடமிருந்தோ ஆட்சிக்குத் தலைவரான எடப்பாடி பழனிச்சாமியிடமிருந்தோ பதில் எதுவும் வராதநிலையில், ஜூன் 1ஆம் தேதி ’நமது எம்ஜிஆர்’ நாளேட்டில், மத்திய அரசைக் கடுமையாக விமர்சித்து எழுதப்பட்டுள்ளது. இந்த விமர்சனம் வெளியான நாளில்தான், டெல்லி சிறையில் அடைக்கப்பட்டிருந்த அதிமுக சசிகலா அணியின் துணைப்பொதுச்செயலாளர் டி.டி.வி.தினகரனுக்குப் பிணை கிடைத்துள்ளது.

முன்னதாக, அதிமுகவின் சசிகலா அணிக்கு இரட்டை இலைச் சின்னத்தைப் பெறுவதற்கு லஞ்சம் கொடுத்த வழக்கில் கடந்த ஏப்ரல் 26ஆம் தேதி தினகரன் கைதுசெய்யப்பட்டிருந்தார். அதற்கு முன்னர் நான்கு நாள்களாக டெல்லியில் வைத்து அவர் விசாரிக்கப்பட்டிருந்தார். அதையொட்டி  தினகரனுக்கு மிக நெருக்கமானவரான அமைச்சர் விஜயபாஸ்கரின் வீடு, அலுவலகம் உள்பட பல இடங்களிலும் அதிரடிச் சோதனை நடத்தப்பட்டு, அவரிடமும் வருமானவரித் துறை அதிகாரிகள் விசாரணை நடத்தினர். இப்படித் தினகரன் தரப்பின்மீது கடுமை காட்டியபோதும் அதைப் பற்றிய செய்திகளை, ஜெயா டிவியிலோ நமது எம்ஜிஆர் நாளேட்டிலோ வெளியாகவில்லை.

சொத்துக்குவிப்பு வழக்கில் பெங்களூரில் சசிகலாவுடன் சிறையிலிருக்கும் இளவரசியின் மகன் விவேக்தான், தற்போது ஜெயா டிவியில் நிர்வாகத்தில் முக்கிய பங்கு வகிக்கிறார். நமது எம்ஜிஆர் நாளேடும் அவர்களின் குடும்பத் தரப்பினரை மீறிப் போகவில்லை. இந்த நிலையில், ஜூன் 1ஆம் தேதியன்று சித்திரகுப்தன் எனும் பெயரில் நமது எம்ஜிஆர் நாளேட்டின் ஆசிரியர் மருது அழகுராஜ், ’மூச்சுமுட்ட பேச்சு, மூன்றாண்டு போச்சு’எனும் தலைப்பில் அரைப் பக்கம் நையாண்டி செய்துள்ளார். ’நாடு கடக்கும் அரசா, மாடு காக்கும் அரசா’ எனத் தொடங்கி, ’எந்திர தந்திர மந்திரத்தை நம்பியே, எகத்தாளத்தில் நடக்குது தாமரையின் வீச்சு’ என முதல் முறையாக, மத்திய பாஜக அரசைப் பற்றி விமர்சனத்தை வைத்துள்ளது, அதிமுக.

இது குறித்து நமது எம்ஜிஆர் நாளேட்டி ஆசிரியர் மருது அழகுராஜிடம் கேட்டதற்கு, “வாக்களித்த மக்களுக்கு நன்மை செய்வதற்காக, வருத்தங்கள் இருந்தாலும் மாநில மக்களின் பிரதிநிதியாக மத்திய அரசோடு இணக்கத்தோடு இயைந்துபோய் நடந்துகொள்வது, ஆட்சியின் முடிவு. அதற்கு கட்சி இடையூறாக இருக்காது. அதே சமயம் அத்துமீறி ஏவப்படும் விமர்சனங்களுக்குப் பதிலடி தருவது, கட்சியின் அதிகாரப்பூர்வ நாளேட்டின் கடமை. அதைச் செய்திருக்கிறோம்” என அழுத்தமாகச் சொல்கிறார்.

பன்னீர்செல்வமும் பழனிச்சாமியும் என இரண்டு அணிகள் இருக்க, தினகரன் வெளியே வந்துள்ளநிலையில் நமது எம்ஜிஆர் தனிக் குரலாக ஒலிக்கிறது என்றுதான் தோன்றுகிறது.

[autotheistjester-blog]

சென்னை ஐ.ஐ.டி வளாகத்தினுள் மாட்டிறைச்சி திருவிழா!

மத்திய அரசைக் கண்டித்து சென்னை ஐ.ஐ.டி வளாகத்தில் மாணவர்கள் மாட்டிறைச்சி உண்ணும் திருவிழாவை நடத்தியுள்ளனர்.

கால்நடை வர்த்தகத்துக்கான விதிமுறையில் மத்திய அரசு மாற்றம் கொண்டுவந்தது. அதன்படி இறைச்சி மற்றும் தோல் பொருள்கள் தயாரிப்புக்காக மாடு, கன்று குட்டி, எருமை, ஒட்டகம் உள்ளிட்ட கால்நடைகளை விற்க மத்திய அரசு  தடை விதித்துள்ளது. மேலும் இந்த உத்தரவு உடனடியாக அமலுக்கு வந்தது. மத்திய அரசின் இந்த நடவடிக்கையை எதிர்த்து நாடு முழுவதும் போராட்டங்கள் அதிகரித்து வருகின்றன.கேரளாவில் காங்கிரஸ் மற்றும் மார்க்சிஸ்ட் கம்யூனிஸ்ட் கட்சியினர்  மாட்டிறைச்சி திருவிழா நடத்தி தங்கள் எதிர்ப்பைத் தெரிவித்தனர். இந்நிலையில் சென்னை ஐ.ஐ.டி மாணவர்கள் கேரளாவில் நடைபெற்ற Beef Festival போன்று பல்கலைக்கழக வளாகத்தில் மாட்டிறைச்சி உண்ணும் திருவிழாவை நடத்தியுள்ளனர். நேற்று மாலை சுமார் 80 மாணவர்கள் இணைந்து மாட்டிறைச்சி திருவிழா நடத்தியுள்ளனர். மாட்டிறைச்சி உணவு வகைகளை ஹோட்டலில் வாங்கிவந்து வளாகத்தின் உள்ளேயே இணைந்து சாப்பிட்டுள்ளனர். இந்தச் சம்பவம் பெரும் சர்ச்சையை கிளப்பியுள்ளது. மத்திய அரசின் கீழ் இயங்கும் ஐ.ஐ.டி.யில் மத்திய அரசை எதிர்த்து போராட்டம் நடத்திய மாணவர்களுக்கு இணையத்தில் ஆதரவு பெருகி வருகிறது.