هذا المقطع صورته قبل لا اغرق بـ ساعه…
رحت البحر يوم الأحد ، مع امي وأختي وبنت اختي
كلنا ما نعرف نسبح 🫠، الشاطئ كان فاضي تماماً، موجود فقط موظف خفر السواحل يدور بالجتسكي وطول الوقت يروح ويجي علينا ويراقبنا.
لعلنا طولنا شوي، وهو طفش وقال، لا تبعدون كثير ترا في حفره هنا.. قلنا اوكي 👍🏻 وراح
في فاصل واضح في البحر ، لون ازرق فاتح ولون ازرق غامق
الفاتح هو القريب من الرمل والوضع السليم
اما الغامق هو العميق المنحدر الوضع الخطر
وفي الصورة توضح المنحدر تحت سطح البحر
أنا مليت من المياه الضحله وقررت ابعد شوي لحالي عشان اقدر اسوي حركة الطفو على ظهري "الحركه الوحيدة الي اعرفها"
واخذت راحتي وأنا اطفو وعشت الجو بعدها قلت يلا نعود إلى الشله
وفجأه! ما احس بالأرض! واشوف حولي المياه الزرقاااء وعرفت ان البحر سحبني شوي
والله يا جتني نوبة هلع ! وبنفس الوقت مابي أصرخ، أصلا مافي احد حولي غير اهلي وأكبر مخاوفي ان اختي او امي يجون يحاولون ينقذوني لان مابيهم يغرقون معي ..
سبحان الله واتذكر مقطع في التيك توك يتكلم عن "وش تسوي إذا غرقت" وهاذي فايدة التيك توك
تذكرت يقول لا تهلع وتتحرك بعشوائيه وتسحب نفسك للأرض اهدأ وخذ نفس وحرك رجولك كنك راكب سيكل ، وبيدينك ادفع نفسك للأعلى
سبحان الله الي الهمني وصرت ادفع نفسي قدر الإمكان لبر الأمان، والمويه كانت تغطي ذقني وتوصل فمي. تطلع وتنزل، وأنا احاول بس اخلي خشمي فوق مستوى الماء عشان اقدر أتنفس
وامي وأختي انتبهوا لي ، وأنا لحظتها بالرغم من الرعب الي أنا فيه قعدت ابتسم لهم مابيهم يعرفون اني اغرق 😭 عشان ما يجون
وفي اللحظه الي بديت اتعب وافقد قوتي ، اخيراً حسيت بأطراف أصابع رجولي بالرمل وصرت ادفع نفس اكثر لين قدرت انقذ نفسي 🌟 وبسرعه مشيت عند اهلي وتكتفت وجلست بصمت والطاقه صفر 🧎♀️احاول استوعب الي صار وأفكر بكل الاحتمالات الي كانت ممكن تصير لو لا سمح الله ما نجحت بالنجاة..، اهلي من وجهي الأصفر على طول فهموا وش صار وقالوا خلاص شبعنا سباحه يلا بس نرجع البيت 😭
وفي طريق الرجعه طول الوقت أفكر انا شلون سبحت وأنا ماعرف اسبح ! شلون وأنا أصلا كل مره ادخل المسبح اغرق على طول إذا صارت رجولي ما توصل للأرض!! يا ربي رحمتك 😭
ليلتها أحلامي كانت كلها كوابيس من الروعه كان يبيلي اشرب عصفر
فهمت الحين ليش يقولون البحر غدار
tangentwithtanner
yousharknotpass
jbbartram-illu
dededos
annaxmalina
