Əlqərəz

  Öz fəaliyyətimiz elə bundan ibarətdir.  

[elqerez]

Mənə hərdən baxır ol sevgilim biganə-biganə, Qızıl qanlar içirdir könlümə peymanə-peymanə.

Əli daşlı uşaqlar düşmüş arxamca, deyirlər ki, Budur zənciri-zülfə bağlanan divanə-divanə!..

Gülüzlü yar ilə həmsağər olmaqdan budur qəsdim: Ürək sirrin ona şərh eyləyim məstanə-məstanə.

Görüb rüsvayi-aləm olduğum tən eyləyən çoxdur, Düzəldibdir hərə həqqimdə bir əfsanə-əfsanə.

Dil açmış şölədən guya, axıtmış şəm göz yaşı, Yanarsan, ehtiyat ilə dolan, pərvanə-pərvanə!

Nə qalmış mülki Daranın, nə təxtü taci Cəmşidin,

Hanı Şəddad, Firondan qalan kaşanə-kaşanə?

Vəfadan dönmərəm, Vahid, əgər yüz min bəla çəksəm, Varam canan yolunda mən yenə mərdanə-mərdanə.

Əliağa Vahid ©

[elqerez]

Bir gün məhəbbət haqqında danışdım sənə, Sən məni başa düşmədin, duymadın yenə, Dedin yox... Mən dedim günəş sarıdır,sən dedin qara, Mən dedim qışda gəzərkən iz düşür qara, Dedin yox...

Dedim mən səni tək qalmağa qoymayacağam. Səni tərk edib başqasıyla olmayacağam. Dedin yox.. Dedin yox.. Dedin yox... Dedin yox.. Dedin yox.. Dedin yox...

Mən dedim fəsil dəyişir keçəndə aylar, Dedim bir il içində on iki ay var, Dedin yox... Mən dedim yumsan gözünü düşər qaranlıq, Yum gözünü məni düşün, düşün bir anlıq, Dedin yox...

Niyə bəs açıq söyləmədin istəyini sən. Sevsəm də səni indi məcburam gedəcəyəm. Dedin yox.. Dedin yox.. Dedin yox... Dedin yox.. Dedin yox.. Dedin yox...

Mən dedim bu davranışdır könlümü üzən. Gəlmişəm daha qərara getməliyəm mən. Dedin yox... Mən dedim quşlar uçarkən qanad açarlar. Mən dedim ulduzlar göydə işıq saçırlar. Dedin yox...

Dedim mən səni tək qalmağa qoymayacağam. Səni tərk edib başqasıyla olmayacağam. Dedin yox.. Dedin yox.. Dedin yox... Dedin yox.. Dedin yox.. Dedin yox...

Ədalət Şükürov ©

[elqerez]

Bilirəm səni sevəcəklər məndən sonra. Amma bilirsən, sıradan biriləri kimi sevəcəklər. Görüşmək, şam yeməyi, bir dəstə gül və.s Amma mənim kimi paltarını necə geyinməyini, Ayaqqabılarını təmizləməyini, şalvarının ütülənməyinə həssas yanaşmağını Eyvanda oturub siqaret çəkə-çəkə gözlərinin yol çəkməyini, səni yalandan qısqanmıram deməyini, Saçlarını daramağını, qalstkunu boynuna sıxmağını, Hətta əsəbləşib qapını çırpıb getməyinə kimi mənim tək səni sevən olmayacaq. Bax buna əminəm. Odur ki çox rahatam. Deyirəm yox!

Tural Manaflı ©

[elqerez]

Sən necə demişdin? Bir şey olarsa Sükutu birinci pozan qazanar. Hamı danışanda, hamı güləndə, Çəkilib kənarda duran qazanar.

Həzin bir küləyə qarşı durmuşam, Bir mənəm, bir qələm, bir də ki, kağız. Yenə fəsilləri qarışdırmışam, Gah sən gecikirsən, gah da ki, payız.

Məni axtarışa verib oradan, Heç vaxt görmədiyim Bağdad şəhəri. Deyirlər belə də yazılıb ünvan: İstanbul gecəsi, Bakı səhəri...

Bir məktub qoymuşam Eminönüdə, Uzunsaç, qəhvəyi, balaca məktub. Bax orda, düz sizin evin önündə, Hələ də gözləyir balaca məktub.

Bu gün bilmişəm ki, deməyəsən sən, Yazdığım məktublar nə üçün gəlmir. Poçtalyon deyir ki, o sən deyilsən, Yaşın da özünü büruzə vermir.

Gəlmişəm deyim ki, çıxıb gedirəm, Bu adsız, yiyəsiz, yönsüz şəhərdən. Bağdada xəbər ver, hicrət edirəm, Ünvanım növbəti sənsiz şəhərdə...

Raqif Raufoglu ©

[elqerez]

Budaq töküb barını bir quru çomaq qalıb. Hər yer solub şəkildə, təkcə saçlar ağ qalıb.

Son addım idi, atıb ta dayandım həyatda: axx, qaldı həmişəlik izim ayağım altda.

Mən də vətən yolunda başımı qoydum yatdım. Gördüm ki, yuxum gəlmir, sonacan saydım yatdım.

Ay qız, sən kimsən belə qarış-qarış gəlirsən. Bir vaxt Tanrı gəlirdin, indi Tanış gəlirsən.

Salam Sarvan ©

[elqerez]

Hər kəs özünü ağıllı sayır Dəli xırdalayır ağıllı sayır Amma artmır ki, ağıllı sayı Kimə can deyirəm çıxır axırda zayı

Gözümdən düşənlər üzürü istər Enişdə dəyərlər üzünün üstə Çıxart maskavı əsl üzüvü göstər Əksərinin çörəyi onsuzda dizinin üstə

Böyük adamın səhvi də böyükdür Böyüklük də özü böyük yükdür Qələmim yazır dərdi qova-qova Namərd elədilər mərdi qova-qova

Allaha inanmır inanır bürcə Geri düşüncə ya geri düşüncə Sürgünə gedib soyuqdan üşüyüncə Küncə düz sözü yapışdır yeri düşüncə

Kitablar rəfdə, öyrən əlifbanı əlifdən Həriflər hərifləri həriflər hərifdən Məsləhət alma verir hərəsi bir tərəfdən Yaxşılar susur şərəfsiz danışır şərəfdən

O bir tərəfdən bu bir tərəfdən.

Orxan Qarabasma ©

[elqerez]

Xoş gəlmisən!! Keç! qapıda dayanma. Sən ki tez-tez gəlirsən. Öz evindir, utanma!

Onsuz soyuqdur hər yer. Soyunma, keç eləcə. Sevincimi görmədin? Burda idi indicə.

Kədəri də, qəmi də Gətirmisən özünlə! Görən hələ neçə gün Qalmalıyam sizinlə!

Azdır, çoxdur hər kəsin Vüsalına qənimsən. Alnımdakı qırışım Saçımdakı dənimsən.

Üzümdəki saqqalın Ağları da sənindir. Ayrılığın ən acı Çağları da sənindir.

Ye ömrümü! götür ye! Buyur, hər cür yemək var. Damla-damla yaş yaşı, Parçalanmış ürək var.

Girib mələk cildinə Sarılmısan boynuma. Gündüzü gəz yanımda Gecə də gir qoynuma.

Əlindən itirdiyim Başımın üstündəsən. Kirpiyimin ucunda Qaşımın üstündəsən.

Gözlərimin içində Səhərəcən oyaqsan. Niyə qoymursan yatım?! Sən nə üzlü qonaqsan!

Gül-çiçəkli ömrümü Sən eylədin ağ-qara. Necə edim bilmirəm Səndən canım qurtara...

Qəhrəman Kamiloğlu ©

[elqerez]

İndi rahatam daha çox İndi rahatam daha çox İstəmirəm səni düz demirəm denən üz çevirib sənə Rahatam daha çox

Güldün yenə gəldi bahar Get məni özünlə aparma Yolumuzdan uzun qısa saçların var

Baxışlarım ac baxmalısan Demirəm daha sənə qalmalısan mənnən Qaçmalısan İstiyirəm deyə yad qalırsan

Rahatam daha çox

İndi rahatam daha çox İndi rahatam daha çox İstəmirəm səni düz demirəm denən üz çevirib sənə Rahatam daha çox

Sən yoxsan rızlam var Sənsiz neçə gecə belə keçəcəy Mən yaxın ulduzlarnan Sənsiz neçə gecə belə keçəcəy

Rahatam daha çox

İndi rahatam daha çox İndi rahatam daha çox İstəmirəm səni düz demirəm denən üz çevirib sənə Rahatam daha çox

RZZA ©

[elqerez]

Müəllim olsaydım, öyrədərdim, Xalqıma vicdanla xidmət edərdim Bankir olsaydım, xeyir verərdim, Şərik olardım hər kasıbın dərdinə

Həkim olsaydım, nəbzini tutardım, Hər xəstəyə düzgün edərdim yardım Alim olsaydım, dünyanı açardım Polis olsaydım, özümü tutardım

Xaker olsaydım, sistemə sızardım, Risk edib elə bir plan cızardım Əhalinin borcu əhalidən silinib, Köçərdi hər hansı bir məmurun hesabına

Не на вижу эту тему Мне нужен этот "Grammy" У меня больше нету времени Мне нужен этот "Grammy"

Rejissor olsaydım, "Oskar" alardım, Kinomotoqrafiyamız bir az tanınardı Vizyonum "Hollywood"a xas kanallarda, Filmlərim dillərə dastan olardı

İdmançı olsaydım, seçərdim futbolu, Alardım rəqibimin ayağından topu Aldadardım onu, qaçıb vurardım qolu, Cırardım Kurtuanın qapısının torunu

Rəssam olsaydım, ağ olardı tonum, Beynim olardı kreativ ideyalarla dolu Dizayner olsaydım, ən azından fontum, Hamı indi istifadə edərdi onu

Rüzgar ©

[elqerez]

Ulduz sayaraq gözləmişəm hər gecə yarı, Gec gəlmədədir yar, yenə olmuş gecə yarı.

Gözlər asılı yox nə qaraltı, nə də bir səs, Batmış qulağım gör nə düşürməkdədi darı.

Yatmış hamı, bir Allah oyaqdır, daha bir mən, Məndən aşağı kimsə yox, ondansa yuxarı.

Qorxum budu yar gəlməyə birdən açıla sübh Bağrım yarılır, sübhüm açılma səni tarı.

Dan ulduzu istər çıxa, göz yalvarı çıxma! O çıxmasa da ulduzumun yoxdu çıxarı.

Gəlməz, tanıram bəxtimi, indi ağarar sübh, Qaş böylə ağardıqca, daha qaş da ağarı.

Eşqin ki, qərarında vəfa olmayacaqmış, Bilməm ki, təbiət niyə qoymuş bu qərarı?

Sanki xoruzun son banı xəncərdi soxuldu, Sinəmdə ürək varsa, kəsib qırdı damarı.

Rişxəndilə qırcandı səhər, söylədi: durma! Can qorxusu var eşqin, uduzdun bu qumarı.

Oldum qara gün ayrılalı, ol sarı teldən, Bunca qara günlərdir edən rəngimi sarı.

Göz yaşları hər yerdən axarsa, məni tuşlar, Dəryaya tərəf bəllidi çayların axarı.

Əz bəs məni yarpaq kimi, hicrində saraldıb, Baxsan üzünə, sanki qızıl güldü qızarı.

Mehrabi şəfəqdə özümü səcdədə gördüm, Qan içrə qəmim yox, üzüm olsun sənə sarı.

Eşqi var idi Şəhriyarın güllü çiçəkli, Əfsus qəza vurdu, xəzan oldu baharı.

Məhəmmədhüseyn Şəhriyar ©

[elqerez]

Elə cəhənnəmdir sənin yoxluğun, Yandırmır, həsrətdən buz kəsir adam. Hər dəfə cənnətə ümid etdikcə Eyni cəhənnəmə öyrəşir adam Elə qaranlıqdır sənsiz bu şəhər, Zülmətdən az qala kor olur adam. Gecəni gecəyə təhvil verməkdən Hər dəfə daha çox yorulur adam. Elə mənasızdı sənsiz bu ömür, Ölümə hey elə gün sayır adam. Sənsiz yaşamağın məchulluğundan Sanki intihara susayır adam...

Əhrəman Göyüşov  

[elqerez]

Evdə təkəm, şəkilinə baxıram Zəng eləyir arvadımın xalası Yağış yağır çəkdirdiyin şəkildə Bir it də var, arsız həyət tulası Yağış yağır çəkdirdiyin şəkildə Hətta bir az külək əsir, sazaqlı Sol yanında hüzünlü bir uzaq var Şəkillərdə yaxşı düşür uzaqlıq Bir kişi də keçir arxa tərəfdən Heç baxmırsan, gözün elə məndədir Həyata bax, necə gözəl yalandı Gecə keçir, ömür qalır, gün gedir O kişidən mənim gözüm su içmir O kişini tanımırıq sən, ya mən. O kişini evdən qova bilmirəm Neçə ildir, bizdə qalır şəkilnən Bir uşaq da bərk-bərk tutub əlindən Sağın uşaq, sol tərəfin uzaqlıq Mən bilirəm, şəkillərə çəkilib Qocalıqdan daldalanır uşaqlıq Bilirəm ki, yorulmusan şəkildə Necə alım əlindəki səbəti Necə öpüm yanındakı uşağı Necə qovum o kişini, o iti Necə qovum, kişi bəlkə ərindir Uşaq sizin, it də evin tulası Evdə təkəm, şəkilinə baxıram Zəng eləyir arvadımın xalası.

Aqşin Yenisey ©

[elqerez]

Göy qurşağı minib dəbə Adam tapa bilmir oğlan evlənə, qız ərə gedə. Bü sürətlə vuracağıq lap dibə Dövran o dövran deyil ,dünya. (Müasirliyin budur ,dünya?) Qardaş qardaşa qazır quyu, Kimiləri bir şirin dilə uyur. Əl əli, əllər isə üzü yuyur. Beləcə də firlanır dünya. (Ədalətin budur ,dünya?) Bir işə bax çevirib rəqəmlər bizi qula Tək bədən deyil, vicdanda artıq satılır pulla . Deyirəm bəlkə bu kəfənində bir cibi ola, Rahatlaşar, gözü doyar insan məxluqunun ,dünya! Və Allah qınamıram mən heç kimi Belələrindən var 100 bəlkədə 1000, Amma danışmasan, bilməyəcəklər dərdini Susmağın vaxtı deyil ,dünya! .

Günay Cəfərli ©

[elqerez]

İşlər tərs gətirəndə həyatdan küsməməliyik, Gücdən, əldən düşəndə yola davam etməliyik. Zirvələr bizdən uzaq , şikayət etməməliyik, Həyat amansız  yarış, sürətli ol, birinciyik.

Sən güc tap özünə inan, Söz ver özünə, sına, Dünya sənin əlində , Yaşa ömrün sonuncu günü kimi.

Gözəlliklərə inan, gözəlliklər yaranacaq, Bədbinliyə qapılsan həyat biri unudacaq, Əməllərini düşün,   etdiklərin qayıdacaq, Həyat amansız yarış, güclü olan qazanacaq.

Murad Arif ©

[elqerez]

Səni sevməyin yanında Yaşamaq heç nədi, heç nə! Gərək səni sevəm... sevəm Ürəyi şüşə qabda yox, Elə səndə olan divəm.

Adın da mürəkkəbdi, adın dilimə dəyməz. Özün demişdin axı, Adam bəxtindən qaçıb Gülləyə gələnə dəyməz.

Qırmızı şərab kimi Ölümcül dodaqların, içkiyə tövbəliyəm mən yazıq yenə. Səni qucaqlamaqdı Kəbədə dövrəm.

Əynində dodaqlarımın qarışqa yerişləri, yer altında metro kimi dərd altından barmaqlarımın “stansiya” gedişləri... hesablaya bildinmi, bu gediş-gəlişləri?!

Sərhədləri itirilmiş Məmləkətin küncündəyəm. Daha bu kağız ölkədə Kiməm ki, kimdən inciyəm.

Sağımda sən, solumda sən. De, nə qədərsən, Neçəsən?! Bəlkə o qədər sənlərdən Birin mənimçün keçəsən?

Emin Piri ©

[elqerez]

Dünya darıxdırıcıdır, Bir az dəyişmək istəyir. Başqa yağış, başqa günəş, Başqa cür külək istəyir.

Şəhər bezib adamlardan, Rəngli kəpənək istəyir. Əli qanlı adamlar da, Qanadlı mələk istəyir.

Heç kim günahını bilmir, Allahı görmək istəyir. Allah belə yerə gəlmir, O da təkbətək istəyir.

Bu da mənə heç nə demir. Görəndəsə bərk istəyir. Başqa da heç nə istəmir, Harasa gedək istəyir.

Heç bir ürək sözlə qızmır, Yalandan bəzək istəyir. Daha heç kim şeir yazmır, Hamı görüşmək istəyir.

Raqif Raufoğlu ©

[elqerez]

Deyirlər soruşursan, Halımı, əhvalımı. Sonra da bədduallar, Yağdırırsan arxamca. Səksənirsən hər səsdə, Eşididəndə adımı. Çörək didib atırsan, Həsrətinə, yavanca.

Deyirlər ki, yalandan, Elə deyib, gülürsən. Gözün qapıda qalır, Pəncərəni güdürsən. Vecimə də deyil heç! Qışqıraraq deyirsən. Mənə oxşar görəndə, İkimizi də söyürsən.

Deyirlər ki, daha sən, Keçmirsən o küçədən. Yolunu dəyişmisən, Bu sevginin səmtindən. Amma sonda demisən, Olsa, yaxşı olardı. Kaş ölərdi, eybi yox, Məni də qurtarardı.

Bəhruz Əli ©