Fréttahelstið

Úrklippur af íslenskum fréttamiðlum sem fá hárin til að rísa á hnakkanum.

[frettahelstid]

Segir viðbrögð ríkisstjórnarinnar dýrkeyptari en hrunið

Eins og útreikningar sýna?

„Tjónið af þessarri ríkisstjórn er orðið meira en tjónið af hruninu, þau klikkuðu á því að taka á lánamálum heimilanna, fjárfesting fór í sögulegt lágmark, atvinnuleysi hefur aukist meira en það þurfti að gera - þegar allt kemur saman þá er það tjón meira en nam hruninu sjálfu," segir Sigmundur Davíð Gunnlaugsson, formaður Framsóknarflokksins.

[frettahelstid]

Glæpum fækkar um fjórðung

Það að fækkun lögreglumanna er 14% á tímabilinu hefur líklega ekkert með skráð afbrot að gera.

Skráðum afbrotum hjá ríkislögreglustjóra fækkaði um 23,5 prósent í fyrra sé miðað við árið á undan. Heildarfjöldi glæpa árið  2010  var  73.525  en  56.257  í fyrra, samkvæmt bráðabirgðatölum frá embættinu. Tölurnar spanna tímabilið frá 1. janúar til 29. desember 2011.

Þegar litið er til fjölda glæpa í öllum flokkum má sjá  fækkun alls staðar, að undan skildum fíkniefna- og kynferðisbrotum. 

Friðrik Smári Björgvinsson, yfirmaður rannsóknardeildar lögreglunnar á höfuðborgarsvæðinu, segir erfitt að tilgreina eitthvert eitt atriði sem geti útskýrt þróunina.

„Ég hef trú á því að aðgerðir lögreglu er varða innbrot og þjófnaði séu að skila árangri,“ segir Friðrik Smári. „Það er fylgst náið með síbrotamönnum og málum er fylgt vel eftir.“

Varðandi fjölgun skráðra fíkniefnabrota telur Friðrik Smári að ástæðan liggi meðal annars í því að lögreglan sé virkari og vinni þar mikla frumkvæðisvinnu. „Það þarf þó að skoða betur hvað gerir það að verkum að kynferðisbrotum sé að fjölga. Hvort fólk sé gjarnara að tilkynna brot eða hvort þeim sé beinlínis að fjölga?“

Ögmundur Jónasson innanríkisráðherra tekur undir orð Friðriks Smára. „Við erum einhvers staðar á réttri leið. Kannski eru forvarnir farnar að skila sínu tilætlaða verki,“ segir Ögmundur. „Lögreglan er að sinna sínu hlutverki mjög vel og það er að skila sér út í samfélagið.“ 

Umferðarlagabrot hafa ekki verið færri síðan árið 2005, en í skýrslunni segir að ástæðuna megi að hluta til rekja til bilana í hraðamyndavélum á vegum þar sem umferð er mikil.

Tilkynntum afbrotum til lögreglu hefur fækkað jafnt og þétt síðan árið 2007. Sé fjöldi afbrota í fyrra borinn saman við árið 2007, hefur glæpum fækkað um tæp 30 prósent. 

Heildarfjöldi starfandi lögreglumanna hefur að sama skapi dregist saman síðustu ár. Árið 2007 voru starfandi 827 lögreglumenn en 716 í fyrra, sem er fækkun um 111 manns.