معقوله كل السنين دي عدت
صدمه - مرض - خذلان - فراغ اجتماعي بكل ما تحمله الكلمة من معنى وبعد كدا اختفيت من هنا نهائي
سيبت كل حاجه وقفلت على نفسي مكنش عندي طاقه اخرج ولا أخرج نفسي ولا حد غير ربنا يخرجني .. لأول مرة من 2018 أدخر تمبلر ( الكورنر الآمن ) قوضتي الاليكترونيه اللى بعلق على حيطانها صور بحبها وبكتب فى دفاترها اللى بيجي على بالي من خواطر واحكي فيها حاجه خاصه جدا جدا محتاجه اخلي ذكراها عايشه فى بالي وعالورق وبالحروف ومتشافه نوعا ما من بعض الاصدقاء القريبين جدا ليا
كمية الحنين والهدوء اللى حاسه بيهم دلوقتى فى قوضتي هنا مش طبيعية .. دماغي مليانه أفكار حلوة ووحشه وصعبه .. صوت أنغام شغال فى الخلفيه .. ازاي يا آيه كل دا عدى .. ازاي طيب هان عليكي تسيبي نفسك للدنيا وتنسي نفسك وتنسي كتبك وكتابتك .. ازاي نسيتي الدفى اللى خلقتيه لنفسك وملاقيتيهوش مع حد ؟!
أبله نظيره _ الاسم اللي مرسوم عالحيطه .. اتعرفتي بيه لانه وصفك اوي في وقت من الاوقات .. حصلها ايه أبلة نظيرة ؟ لسه زي ما هي ولا اختفت مع اللى اختفوا ؟ شكلها اتغير .. لبسها .. حبها .. هواياتها .. واتغير كمان ازاي بتقضي وقتها قلبها دخل ف غيمة سودة لمدة 4 سنين .. تاهت اوى من نفسها .. تعبت .. قويت .. أكتشفت انها أقوى مما تتخيل وعرفت قد ايه بتحب نفسها وبتحترمها ومستحيل تسمح لحد يجي على كرامتها
أبلة نظيرة زمان كانت حاجه كدا خااام اوى بس عرفت قد ايه فى ناس وحشه وناس صعبه وناس خاينة وقد ايه كانت طول عمري متغطيه ببطانة في شتا وضلمة مكنتش تعرف انها موجودة وفاجاة اتشالت منها وبقى منها للبرد بدون حجاب ولا ساتر
أبلة نظيرة بقت فارس شغلته بس يحمي الباقي من نور روحها اللى مقدرتش الضلمة تضلمه بكل شراسة وعنف .. فارس قدر يحارب اكتر ناس كان فاكر الأمان معاهم لانهم مكانوش أبدا الأمان اللى هو محتاجه و من غير قصد منهم او بقصد كانوا سبب خوف ورعب !!
ومن هنا بقول محدش هيحميك قدك .. وسيلة الخروج الوحيدة هي الإيمان في نفسك انك قادر تخرج وان ليك رب اسمه الكريم وهو فارسك ومنقذك الوحيد
