我。
我唔知道,擋住我千思萬緒嘅堤壩幾時會崩堤。 我唔明白點解自己要有咁多情緒,咁多執著。 我有時會諗,如果我頭腦簡單啲,我就唔使咁多嘢諗。 或者我嘅執著來自於我唔忿氣,我唔忿氣香港點解要變成一個咁嘅地方。 自細開始,我父母都想我成為一個知書識禮嘅人,我唔知我依家(客觀地)係唔係,但係我(主觀地)覺得我係。我諗我青春期之後,已經對好多社會規範有好多執著,例如,排隊,唔好阻到人,喺公眾地方注意自己嘅舉止等。 有啲人或者會覺得好似我咁生活好攰,點解要俾咁多枷鎖自己,但係呢個就係我。如果每個人都以自己為先,不顧其他人死活,我哋個社會仲運唔運作到?我諗大家最近睇新聞都睇到利益行先嘅後遺。 我無啲咩好宏大嘅目標,話要「90後整頓社會」乜乜乜,但係當我目擊呢啲事發生,而我無能力捍衛自己呢啲基本嘢嘅時候,我嘅負面情緒就接踵而來。 我執筆嘅時候,其實思緒都仲係好亂,我唔知自己應該用咩語氣去寫呢篇…











