Laurent Thiry

poesie | laurentthiry.lu

[laurentthirypoesie]

ech wëll éierlech sinn ech hat gegleeft et wier alles scho gesot hunn aus angscht virun den äntwerten keng froe méi gestallt aus angscht op féiss ze trëppelen kee schrëtt méi gewot ech hunn an eidel raim gejaut a mech gewonnert dass näischt zeréck geschalt huet hunn ëmmer manner gefillt keng péng méi an och soss - mee sou laang nach loft meng longe fëllt zitt de bläistëft läinzeechen an d'heft ech zwénge mech z'erliewen verbidde mer d'vergiessen ni méi roueg ni méi op zéiwespëtzen ech wëll opstoen an éierlech sinn ech hat gegleeft et wier alles scho gesot dobäi geet no all punkt en neie saz un

[laurentthirypoesie]

läinzeechen un de knéien wéi eng ënnerschrëft opgekraazte rëff blutt an tréinen sinn d'zeien mir waren hei d'zäit schléit eis an d'gesiicht a mir halen hir den anere bak dohin mam bléck riicht no vir mam gudde gewëssen mir hunn eis ni opginn mir waren hei mir këssen d'liewen op de mond danzen ouni grond am beschte gezei duerch de reen dëst hëlt eis keen mir waren hei

[laurentthirypoesie]

et gëtt keen hale méi et kënnt alles wéi gefaart mir falen a wa mer falen da fale mer haart dat ass schéin wann alles no blutt schmaacht et wëll keen al gi méi mir sinn hei fir eng gutt zäit keng laang egal wéini mer ginn mee wann dat geet ouni dass et wéi deet dann ass d'saach gutt gaang wann den damm brécht gëtt an der mëscht geschwomm dann ass all insel en hill i'm willing to die on mee ech di keen helm un

[laurentthirypoesie]

mir liewen an zäiten do ass pabeier knapp ech sëtzen trotzdeem all owend do mat der fieder am grapp a fëllen d'blieder mat deem wat vun dir bleift am kapp verschwëmms de lues awer sécher mat menge wieder bedreiwen ech aquarellmolerei et erkennt ee kaum nach d'strécher just eng iddi vun deem wat s du vläicht waars a wann ech kee pabeier méi hunn dréien ech d'säit ëm a fänken uewe rëm un palimpsest

[laurentthirypoesie]

all meng frënn gesinn duebel si hunn ze vill gesoff oder ze mann geschlof si si virwëlzeg wéi heescht dat lidd a wéi danzt een drop si ginn ni midd e sonnenënnergang ass kee weltënnergang all meng frënn sinn duuschtereg ech sinn net hongereg net no dir net no nach du sees de wee ass d'zil an ech soen ass et nach wäit ech mengen dat graf op deem ech danzen ass mäint

[laurentthirypoesie]

dat ganzt ass méi grouss wéi sengen deeler hir zomm soen d'leit mee wat déi soen huet eis nach ni eppes bedeit wann ech am fong un näischt gleewen mëss du dat heiansdo schwéier et gëtt deeg déi ginn net ëm mee mat dir gi se ni laang net eng eenzeg kéier a menger welt ass näischt wierklech wat net gedeelt gëtt an alles deele geet net mee ech freeë mech a ville joren op déi terrass an der sonn an dat lidd ouni dat keen dag op en enn goe konnt léi a so dass et fir ëmmer ass

[laurentthirypoesie]

sou vill leit déi hir leitliewe liewen an hir leitweeër ginn déi kräize sech sou vill leit déi hir leitglaawe gleewen hir leitrelioun hunn déi bekräizege sech sou vill leit déi am wee stinn och sech selwer d'liewen ass e leitslalom fir deen et kee präis gëtt sou vill leit stinn op der leitung heiansdo trëppels de op leitschong da jäize se

[laurentthirypoesie]

et hänkt e juddestär un der gëlle fra gëtt mam impfzertifikat gläichgesat a si stinn ze jäize virun de privathaiser vu politiker deet dat net gutt an engem land ze liewen wou d'fräiheet sou wäit geet dass et kee bengel an d'schnëss gëtt wa viru politiker hiren haiser e grupp nazischwäi steet fréier krus de fir sou e schäiss eng virum kaffi an d'zänn da wousst de wat d'majoritéit iwwert deng gesënnung denkt an haut hu mir mam roy reding op twitter, facebook an telegram en deputéierten deen extremisten d'nummer vu journalisten schenkt si geheie mat verbale steng ech mengen et hänkt et hänkt e juddestär un der gëlle fra an deng froen nom firwat beweisen dass de déi lescht joren net waakreg wars mir weisen op eis matmënsche mam fanger da bematleede mer eis selwer e bësse manner mee aus "mir" an "déi aner" gëtt keen zesummenhalt an aus "déi aner si manner wäert" gëtt iergendwann gewalt d'wourecht ass eppes wat net jidderee gutt verdaut de gromperekichelche par contre, dee schmaacht mir gesinn eis um chrëschtmaart wann s de dech traus

[laurentthirypoesie]

siwen deeg d'woch stinn ech op a si midd siwen deeg d'woch hunn ech bauchwéi siwen deeg d'woch stinn ech eng stonn am stau well een naass gëtt um vëlo an dat wëll ech net fënnef deeg d'woch op de weekend waarden an um weekend saufen bis e riwwergeet ech kucken zeréck op d'joer gesi siwen deeg eng woch an endlosschläif an denke wéi schnell vergeet d'zäit

[laurentthirypoesie]

deng ae si falen do fält een déif wéi gär ech mech fale loosse géif falen an deng aen deng aen droe falen wann s de laachs wéi wann et kee ronderëm eis gëtt laachs well s de mech beim stuerken erwëschs stuerken an deng aen wierder sinn net genuch kee lidd kee buch keng foto déi dech wierklech weist all versuch dech festzehalen wier dreist an iwwerhieflech méi net wann ech iwwert d'freed schreiwen iwwert d'liewen iwwert d'léift da schreiwen ech iwwert dech all gedanken un d'heemecht a wourecht e gedanken un dech un eis déi et net gëtt deng ae si falen do fält een déif wéi gär ech dir dat heiten alles soe géif mee ech wäert et fir mech halen ech wëll net falen well ech ni méi opkéim

[laurentthirypoesie]

ech hunn e buch geschriwwen mat gedichter fir leit déi keng gedichter verdéngt hunn et kascht 10 euro wann s de sou eent wëlls da schreif mer ënnert laurent[at]laurentthiry.lu oder op instagram @laurentthiry

[laurentthirypoesie]

et soll een ophalen wann et am schéinsten ass an heiansdo fäerten ech ech hunn dee moment schonn ëm jore verpasst et gëtt wanter et gëtt summer mir reide wellen wéi eng aner méiglechkeet hu mer wa mer näischt aneres méi kennen mir reide wellen si geheien eis vu säit zu säit d'mier ass wëll haut an et dréit eis wäit duerch eng welt an där all drëps wéi déi nächst drëps ausgesäit mir reide wellen verléier net den horizont hal d'rudder fest an der hand mat all meter deen s de schwëmms verschwëmmt d'erënnerung un d'land verschwënnt an dir d'kand a gëtt ersat duerch ee mann deen s de net leide kanns mir reide wellen

[laurentthirypoesie]

du wëlls zäitgeescht hei kriss de zäitgeescht meng bescht joren si gezeechent vun depressioun déi ech just net sou nennen well ech mengen ech géing leit kennen deenen et nach méi schäiss geet du sees du wëlls zäitgeescht ech ginn der zäitgeescht ech kucken an de spigel a gesinn de leschten äisbier gesinn de leschten elefant gesinn e papp dee senge kanner erkläre muss d'liewen ass vläicht net gutt mee sou gutt wéi lo wäert et ni méi sinn e papp deen dofir ni papp wäert ginn du wëlls zäitgeescht ech wëll wanter mat schnéi mee et gëtt kee wanter méi déi eenzeg konstant an deem land ass de reen an déi onfrëndlech leit ech kenne vun hinne keen wat net bedeit dass ech se net haasse kann mir zéien d'liewen op d'long och wa mer et net verdroen dat ass vläicht ongesond mee wat soll ech der soen et ass den zäitgeescht

[laurentthirypoesie]

rezept

wéi kann esou e bedréckend klenge raum sou grouss a kal an eidel sinn wéi kann ech tëscht all deene leit mech sou aleng fillen sou onzefridden tëscht all deene saachen ech brauch waasser a sonn an e klore kapp an de recht vu mengem liewen mat dir

[laurentthirypoesie]

dat do muss esou

wann ech elo einfach stierwe ginn ech buedem an dann e bam beem fueren net all dag gestresst op eng plaz wou se och net frou sinn fueren net owes heem a soe sech dat do muss esou well déi aner maachen et d'selwecht wann ech elo einfach stierwe schreift net an d'zeitung et koum onerwaart ech hu keng anung wéi een op fotoe laacht wann ech elo einfach stierwen ass dat lescht wat ech giess hu spaghetti domat kann ech liewen villmools äddi

[laurentthirypoesie]

bréif u mäin dag

verschidden deeg wëll een dohalen géi net, bleif nach méi laang mee mat all dag ass den dag virdru vergaang an alles wat bleift ass zeréck ze kucken wann och just kuerz mat enger tréin am an a ganz lues ze soen äddi a merci fir déi schéin zäit wann s de goe muss, géi du gees ni wäit du bleifs nach laang probéieren eis net ze verléiwen an eppes wat jo dach net fir éiweg ni éiweg ni fir éiweg mee firwat sou séier fort géi net, bleif nach méi laang wann och just fir e bëssen a wann s de da gees wie weess vläicht ginn ech och ech wäert dech vermëssen

[laurentthirypoesie]

kraul

zu lëtzebuerg wäscht eng hand déi aner mee dat bréngt näischt wann d'waasser knaschteg ass all krunn am land ass verbonnen iwwert e rouer mat enger lëtzebuerger baach do schwammen d'fësch um réck kraul