يعني إيه فن، إيه المقياس اللي نقدر نقول بيه على حاجة آرت وحاجة تانية مش آرت؟!
في الأول كنت فاكر إن الفن مقتصر على اللوحات والمزيكا والكتب، هما دول الحاجات الوحيدة اللي نقدر نقول عليهم فن ونقول على أصحابهم فنانين، ومن خلال المفهوم الضيق أوي ده، نبدأ بقى نصنف فن وحش وفن حلو (ده لو افترضنا إن فيه حاجة اسمها كده أصلا)
إنما بعد كده المفهوم بدأ يوسع اكتر، لما لاقيت دكتور الرسم في كليتنا بيتكلم عن العِمارة وكأنها مزاج، ويوصفها بالfrozen music .. روحتله مكتبه قبل كده برسمة، وكان قاعد بكوباية شاي وسيجارة في إيده، بدأ يبص للرسمة وكأنها مزيكا فعلا لو ينفع تتشاف، فضل يحسس بايده على زوايا الرسمة، يحس بتفاصيلها ويقيس أبعادها من غير مسطرة، يشم ريحة الرصاص وكأنها تمثل كل شئ جميل في الحياة.
وبعدين افتكرت إن مدرس الرياضة بتاعي في ثانوي كان بيقعد ماسك نفس كوباية الشاي والسيجارة قدام مسائل حساب المثلثات وكأنها الافيون الخاص بيه، يفضل يدقق في المسألة بالدقايق وكأنه مستنيها تقوله على حلها، تشاورله على المعادلة الصح، توشوشه بمفتاحها وتديهوله في ايده وكأنه سر الخلود.
نفس النظرة، نفس كوباية الشاي، نفس السيجارة .. شوفتهم عند الصنايعي وهو واقف يجيب العربية من فوق لتحت بعينه، يطبطب عليها ويستنى تهمسله بشكوتها، ينزل يقرفص جنبها مستنيها تقوله يبدأ شغل منين عشان ميضيعش وقت.
في الفترة دي، اختزلت الفن بعيني في النظرة الحالمة وكوباية الشاي والسيجارة😂 .. أي حد عنده التلاتة دول يبقى فنان حقيقي، من أول عازف الاكورديون لحد سواق الميكروباص.
لحد ما حضرت عزا ولأول مرة كان فيه مقرئ جاي يقرا مش قرآن متسجل، ووسط القهوة والماية اللي بتتوزع والناس اللي بتسلم على بعضها وتعيط، كان المقرئ قاعد على كرسيه ولا كأنه في عالم تاني .. مغمض عينه وسرحان في الملكوت، مرّكز جدا وكأنه شايف وهو مغمض عينه، يتلو الآية ويسكت شوية وكأنه مستني الرد، وأول ما الرد يوصل يرجع تاني يطرب ويتمزج بالتلاوة ويلتهم الآيات بفمه وكأنه يُقبّل الوجود والوجود بيُقبله.
خرجت من العزا وفي راسي سؤال واحد: لو ده مش فن، أمال الفن إيه؟
وهكذا بدأ مفهومي للفن يوسع اكتر واكتر، عشان يضم كل شئ .. نظرة الأم لإبنها ونبرتها وهي بتدعيله الصبح وهو رايح الامتحان، كلمة "الله" لما تطلع من قلب راجل عجوز لما يشوف حاجة حلوة، لمعة عيون أي حد بيتكلم عن حاجة بيحبها وشغوف بيها، حتى ولو عن قطته!
جميل، بس برده لازم ألاقي مقياس أقيس بيه الفن .. إيه شروطه؟ وعشان كده بدأت أبص لكل الحاجات اللي بقول عليها فن دي، وأحاول ألاقي نمط معين بيميزهم كلهم.
في الأول لاقيت إن الفن هو أي حاجة بتخلي جسمي يقشعر، أي حاجة تلهمني، أي حاجة فيها حياة.
بس مع الوقت لاقيت مفهوم أوسع، الفن هو كل شئ حقيقي، سواء كان لوحة أو لحن أو كتاب، أو حتى نظرة أو ضحكة أو نبرة صوت .. المهم يكون حقيقي مش مزيف ولا مصطنع. الفن مفيهوش صح وغلط، ولا حلو ووحش، أي تعبير صادق عن إحساس حقيقي هو فن بحد ذاته مهما اختلفت طريقة التعبير.
#إيه علاقة كل ده بالكتاب بقى، عايز أقولك إن عمر طاهر ساعدني في الكتاب ده أكتشف نوع جديد من الفن، أو على الأقل جانب جديد منه مكنتش مدركه قبلها .. جانب كله إخلاص وحب وشغف، فن أن تكون نفسك وتعبر عنها بأصدق طريقة ممكنة، فن أن تحب من غير ما تخاف، وأن تفعل ما تحب حتى ولو هتموت من الجوع .. الفن يستاهل، والشغف بيشبّع، والحب كفاية، اكتر بكتير من كفاية.
كل شخصية في هذا الكتاب فنان بطريقته، دون أن يخضع لقيود العالم ولا قصور التنظير المجرد من كل إحساس، من أول حكاية وزير الداخلية أحمد رشدي لحد جوزيف ماتوسيان مخترع السيجارة الكليوباترا وتومي خريستو صاحب مصنع شوكولاتة كورونا .. كلهم حقيقين وبيعملوا اللي بيحبوه بكل شغف وإخلاص، وأي شئ ينتج عن ذلك فهو فن خالص يستحق كل تقدير واحترام .. وأخيرا، عمر طاهر فنان حقيقي جميل شغفه لا يفشل في إلهامي♥
andulkaphoto
germansingergirl
