كان نفسي دلوقتي أني أكون مرتبط ، ويكون معايا شريك يهون علي اللي ممكن أكون حاسه ، وكان ممكن يسمعني بطيب نفس ، و يطبطب من غير حلول ولا نصايح ، مجرد طبطبه .
مهما كانت العلاقه بينك وبين اخواتك او أصحابك حتي لكن علاقتك مع شريك حياتك مختلفه تماما ، سبحان الله الحدود كلها بتدوب و بتبقي علي راحتك فتقدر تحكي و ترتاح من أي هم او ثقل علي قلبك .
أنا حاولت كتير ولكن محصلش نصيب ، مش عارف المشكله عندي ولا ايه !؟ . مشكله شكلي ولا شغلي ولا ماديا ولا نفسيا !!! المهم انه فيه مشكله ما ومش عارف ايه عشان اعرف احلها !؟
أنا واصل ل ٣٤ سنه تقريبا كل اللي أنجزته هو إني حمار شغل و يعتمد عليه 🤷 لا أخذت مركز وظيفي كويس زي زمايلي ولا قدرت اعمل ليا مستقبل و حاجه اقدر اتسند عليها ، ولا عرفت أتجوز ويكون عندي أولاد اقدر أربيهم عشان ميبقوش نسخه مني ، للأسف عدت سنين كتير و جريت بسرعه اوي 🥹 .
مش قادر خلاص دلوقتي اعمل حاجة ، مش قادر دلوقتي اشتغل تاني زي زمان ، مش قادر كمان ارجع أبدا من البدايه!، تقريبا أنا وصلت للنهايه بالنسبالي !
اتمني لو يرجع بيا الزمن ، مكنتش أبدا هختار الحياه اللي عشتها دي ، كان ممكن أغير طرق كتيره مشيتها وأنا حاسس إنها مش صح ، كنت صبرت علي فرص كانت هتكون افضل من الحاجات اللي كانت قدامي سهله مكنتش هختار الأسهل عشان مكونش ضعيف مش عارف يواجه مشاكله دلوقتي ، كنت هتجوز اول حد حسيت انه دخل قلبي ، مكنتش هسيبه يضيع ، كنت لحقت نفسي من الأمراض اللي جاتلي بسبب الإهمال اللي انا فيه ، كنت قدرت اختار نفسي بدون مبررات. مش زي دلوقتي لازم تبرر لأنك عمرك معملتها
أنا حاليا تعبان و زعلان و ندمان بجد ، ومش شايف أي أمل ممكن يغير أي وضع أنا فيه دلوقتي ، كل اللي شايفه هو أني اختار إني افضل زي ما أنا و أعيش عمري كله كده وأرضي ، و استحمل لحد ما يقضي الله امراً كان مفعولا .
