فيه مجالات كتير ليها مُريدينها. الغُنا، الكورة، التمثيل، والقراية عامة والشِعر خاصة.. والقراية وتحديدًا الشِعر يعتبر الأقل نصيبًا من المريدين بين كل المجالات.. عشان كده لما بتكلم عن فؤاد حداد بمنتهى الحُب.. الناس عادة ما بتفهمش ايه ده، ومين ده.. وليه؟.. ولأني بطبعي بحب دايمًا أفلسف معظم الأشياء.. انا حاولت -في عيد ميلاده- اجاوب سؤال "ليه فؤاد حداد؟"
١)كل مجال في الدنيا بيكون فيه نجومه المُضيئة على مر تاريخُه، سواء القُدام أو الجُداد..في الكورة، والغنا، والعِلم كمان...في الشعر بقى فيه في الفُصحى المتنبي..وأبو العامية (فؤاد حدّاد).
أول مرة قريت لحداد ماعجبنيش. قُلت: "إيه ده يا عم!، أُمال إيه والد الشُعراء والكلام ده..دي بروباجندا ع الفاضي وبتاع"...تاني مرة القدر ساق لي شِعر فؤاد، حسيت إني ضيعت وقت كبير من عُمري جاهل بالعظمة اللي كانت قدامي دي، وكأنه الخمر الحلال الوحيد الذي تتذوقه فيطير عقلك شعاعًا من فرط طلب المزيد...عبقرية فؤاد حداد أجبرت الجميع بالإعتراف بيها، معاصريه قبل الأجيال اللي بعده...فؤاد حداد كان عبقري في ترويض اللغة، بيلعب بالمترادفات ويقُص الكلمة يديها معاني، ويقدر يكتب زي ما بيتنفس.. بمنتهى السهولة. فؤاد حدّاد واحد من أولياء الله الصالحين اللي كان بيمشي يكتب تنبؤات وتحصل بعدها بسنين.. ليه فؤاد حداد؟
٢)من ضمن أسباب حُبي لفؤاد حداد، إنه -على المستوى الإنساني- بطل. كُلنا بنخاف نختار، كلنا بنحب نبقى مايعين في إختياراتنا ونسيب الدُنيا تختارلنا عشان ما نتحملش عواقب إختيارتنا...فكرة الإختيار والقرار صعبة جدًا.. كلنا بنخاف نفضَّل حاجة على حاجة وبنحب نلعب السهلة المضمونة.. حدّاد إختار!. ضحى بحاجات غالية ومهمة وقيمة في سبيل حاجات تانية هو عايزها ومؤمن بيها...قد يكون فؤاد حداد ما عاشش النموذج المثالي للفرد في المجتمع كما تنص عليه الأعراف والكتالوج، لكنه عاش زي ما فؤاد حداد عايز يعيش، عاش زي ما فؤاد حداد لازم يعيش...ليه فؤاد حداد؟
٣)فؤاد حداد يساري. انضم وهو في العشرينات لتنظم (حدتو) وكان عضو بارز فيه...كان بيدافع عن الفقرا والمهمشين والغلابة في كل مكان...وكان شايف (ناصر) أمل في تحقيق العدالة..ورغم إن ناصر أعتقله ٩ سنين، في الوقت اللي اتهم فيه الشيوعيين في حريق القاهرة..لكن حداد فِضل يحبه وشايف فيه الأمل وكتب ديوان (حنبني السد) عن اقتناع...فؤاد حداد مقتنع زيي بنفس الحاجة.. وعاش طول حياته بيدافع عنها..ليه فؤاد حداد؟
٤)وقت ما قابلت فؤاد حداد، كنت وحيد..ماكانش ليا غيرُه..كان هو مؤنسي الوحيد..بحكيله، وبشكيله، وبسمع منه عن حياته ورفاقته ومرضُه وآلمُه..و بتعلم منه!. اتعلمت من فؤاد حدّاد حاجات كتير جدًا..اتعلمت منه إن الإنسان من واجبه يكون قوي، ومن واجبه في نفس الوقت يكون رحيم (وتخلي كل يوم إيدك تخشَنّ..وكل يوم قلبك أرق وأحنّ)..واتعلمت منه إن الأخوة أهم من أي شئ في الدنيا و عرفت إن (مش حلوة بين الإخوات يا كلمة لأ) و (مش حلوة بين الإخوات يا كلمة أنا)..وحذرنّي من فرط الإحساس والإنسانية وقال:(الشعور بالإنسانية أليم)..علمني حُسن الغزل وجَميل الحُب لما قال: (الحب أرحم..لما يبقى مُغازلة)..ما خلانيش أفقد الأمل في الناس وخلاني أفضل أراهن عليهم (مفيش حياة إلا عند غيرك..تعيش في خيرُه ويعيش في خيرك)..علمني أعيد تشكيل العالم وتحويل القبيح لجميل ورؤية الجمال في وسط الحُزن، لما كان ايديه في الكلبشات: (و من الحديد بعمل شجر وغصون)..وعلمني درس مهم جدًا جدًا هو إن مهما بعدنا عن ناس أو سبنا ناس كلنا بنفضل ندوب دايمة على قلوب بعض، مهما كنا مش محتاجينهم، ومهما آذيناهم أو آذونا علمني إنه: (فيه آثر للعِشرة مهما تهون)... علمني إن الجمال مش هو الجمال المُرهِق المثالي، وإن الجمال الحقيقي هو الجمال اللي نابع من شقا وحُزن أصيل..جمال العادية وتميزها..و ده اللي كنت عايز أشرحه لواحدة قبل كده..كنت عايز أقولها إنه قال:(أنا بكره الحُسن اللي من غير شقا) وإنها جميلة....ليه فؤاد حداد؟...عشان فؤاد حداد علمني أهم درس ممكن أتعلمه..علمني أسامح كل حاجة وأي حاجة..إلا حاجة واحدة بس...
فؤاد حداد طبعًا..فؤاد حداد دايمًا عشان "كل شئ...كل شئ -إلا الخيانة- يجوز"
vaporwave
areudirty
theartofmadeline
pixelskylines
janainaart
