عن الوقت :)
اوقات كتير بتروح و اوقات كتير بتيجي و اوقات بضيع و اوقات نفسنا انها ترجع و اوقات نفسنا ننساها و اوقات نفسنا نشوفها و بنتخيلها
طول عمري امي تقعد تقولي كفاية تضييع وقت بقي ….ده يا بنتي الوقت زي السيف ان لم تقطعيه قطعك الكلمة دي لما كانت بتتقالي كنت بضايق اوي اي نعم مبعملش حاجة برده بعد ما بتتقالي بس كانت بضايقني عشان انا عارفة اني بضيع وقت كتير و مقصرة في مزاكرتي و في كل حاجة و علي طول قاعد علي النت و خلاص
يعني علي قد ما هي مفيدة لينا كأرأ و حوارات و مواضيع و اخبار و كلام علي قد برده ما هيا بعدانا عن حياتنا كلها و عن علتنا مثلا تلاقيك وانت قاعد عليها الوقت جري و ملحقتش تعمل اي حاجة و نتيجة اليوم ايه في الاخر ولا حاجة خالص
انا سعات من كتر ما انا قاعدة علي النت انسي اكل ….اه والله مش بهرج
امي لما كانت بتقترح عليا اعمل حاجة تانية كانت بتقولي ارسم اقرأ او اوضب الاوضة بتاعتي :D
بس الحاجات دي بيجلها وقت و الواحد بيزهق منها او بتخلص…. يعني مش هقعد طول اليوم ارسم او اقرأ او اوضب الاوضة بتاعتي مثلا حتي لو اخدوا يوم مش هياخدوا اكتر من كده فا فعلا كل حاجة ليها وقتها و بنروح
زي لما حد يموت علي قد ما انت كنت بتعيط و زعلان عليه علي قد ما مع الوقت مش بتنساه بس الوقت و الدنيا بتخدك او بتلهيك عشان كده ممكن ذكري اللي مات ده تيجي في بالك فجأة و تروح مع الوقت
الاوقات اللي نفسك انها ترجع
زي الوقت اللي بتبقي قاعد فيه مع اصحابك او مع اهلك او عن ذكرايات المدرسة او عن موقف او نكتة ضحكتك عن قاعدة حلوة او عن اول حب في حياتك او عن وقت نفسك انه يرجع مع حد انت كنت بتحبه بس هو مش معاك دلوقتي
و عن الاوقات اللي نفسنا ننساها
عن وقت موت حد انت بتحبه او عن وقت خنقاتك مع اهلك او عن وقت افتكرت موقف ضايقك قبل ما تنام و نفسك تنساه او عن وقت الشهادة مثلا
و عن اوقات نفسنا نشوفها او بنتخيلها
في الحته دي بقي كل واحد مننا ليه تخيلاته مختلفة الكتيرة الحقيقة …….فا بلاش نتكلم عنها خالي الوقت ده ليك انت يعني حاجة خاصة بيك انت بس !!
