قلم مقصوف

السلام على من أتبع الهدى

[mostafa-gad]

ب ربك يا مريم .. من خبأ القمر عني ؟ من تداعت له ألامي و داست قدمه على جبيني ؟ من تناسى بأني أطعمت الجائع و أمنت الخائف و صافحت المنتصر ؟ .. ب ربك يا مريم من أخفاكي عني ؟

[mostafa-gad]

على ما يبدو.. على ما يبدو أن الأشياء جميعها تغيرت، وأن الحال ليس كما كان.. على ما يبدو أن الوقت أبطء والمكان أضيق والظروف المحيطة جميعُها تدعو إلى الصمت التام.. على ما يبدو.. على ما يبدو أن الصمت الأن هو قمة الحكمة

[mostafa-gad]

لو دخلت العشرينات، فخليني بسرعة أقولك حاجات تنفعك وأنا داخل الأربعينات كان نفسي حد يقولهالي بدري: - صلي وواظب وتأدب مع ربنا - ماتشربش سجاير ولو على سبيل التجربة - ماتوشمش جسمك بأي نوع وشوم سواء دائم أو مؤقت - حوّش وإشتري دهب حتى لو سبايك ربع جرام - إشتغل سنة على الأقل كول سنتر - إلعب رياضة وإختار هواية - تقبل الهزائم وتقبل رغبة الناس في الخروج من حياتك - إعرف كل الناس وإتكلم مع كل واحد بطريقته - أول قصة حب عادة مش بتنجح - أول خطوبة محتمل بشكل كبير ماتكملش - يا تتجوز بدري قبل ال ٢٣ يا تتجوز قبل ال ٣٣ ولو ماقررتش الجواز حوش وإتعلم - إتعلم حرفة عشان بتنفع في الأيام الصعبة - لو عندك الإمكانية إعمل مشروع صغير ولو من البيت - العيلة أهم من الصحاب - ماتوافقش الغلط لمجرد إن الناس وافقت - مشاعر الناس مش دائمة ومتغيره فبلاش تصدق ١٠٠٪ إن ده أخويا وده صاحبي وده حبيبي - متخليش حد يطلب منك حاجة بقلة ذوق وقّف وصحح وعرفه غلطه - إحترم نفسك قبل ما تحترم حد، وقتها الدنيا كلها هاتحترمك - وأخيراً.. الصدقات بتصحح الطريق وبتخليك ترضى عن نفسك واظب عليها - لما أفتكر حاجة تاني هاقولك

[mostafa-gad]

بحس إن البيوت المُرتّبه المُنمّقه أصحابها مش بيحبوا بعض، بحس الفوضى والكراكيب وألعاب الأطفال المرميّه في كل أطراف البيت بتضيف أجواء دافية كلها محبّه، الجاكيت المركون اللي كل ما حد يفتح باب في الشتا بيلبسه ومع الوقت بتنسوا هو كان بتاع مين أصلاً !! كروكس الحمّام - أعزّكم الله - اللي البيت كُله بيستخدمه وبيتنقل دافي من رجل لـرجل، المواعين وخاصة المواعين بعد المخبوزات اللي في الفرن اللي بيدفّي البيت.. كل الترتيب والمبالغة في الترصيص كلها حاجات بتنُم عن سيكوباتية دفينه

[mostafa-gad]

انا سألتك السؤال ده من 10 سنين تقريبا وبساله تاني بتتمني ايه

مش فاكر الإجابه كانت إيه وقتها.. دلوقتي بتمنى الهدوء والسكون والكثير من السُكات وأيام كتيرة مفيش فيها حاجة تتعمل غير السلام .. وأشوف بنتي بخير

[mostafa-gad]

ما دمنا معًا والعالَم يلفظ أنفاسه الأخيرة دعينا نُحسن استقبال النهاية دعينا نُلقي نظرةً أخيرة على الثلج المُذاب وعلى المحيط الجاف، والغابة المُحترقة وعلى كنيسةٍ مهجورة، ومسجدٍ فارغ دعينا نهوي سويًّا في فوهة بركانٍ خامد ونبتسم باتساعٍ لشهابٍ يندفع نحونا على أية حال… كانت الرحلة تستحق فلنلتقِ مرةً أخرى، في عالمٍ أكثر رحمة

القاهرة 22 ديسمبر 2025

[mostafa-gad]

ممنون لكل التعقيدات والروتين والملل وظلم موقف وسرعة مرور أيام وزحام القاهرة القاتل وكل طعام غير مالح بالشكل الكافي فكرني بيكي، ممنون كثيراً للشتاء ولعن الله الشتاء وكل شتاء وإنتي مش فيه

[mostafa-gad]

ربما علينا أن نكتشف آفاقًا جديدة للتسامح، لعلّ أهمها أن نتسامح ونتساهل مع ماضينا؛ أن نتيقّن بأن ما حدث في الماضي قد وقع بكامل إرادتنا وطاقتنا، وأن تلك الأخطاء، بشكلٍ أو بآخر، كانت من صنع أيدينا. وأن الحاضر والمستقبل كذلك، سنخطئ ونضلّ ونندم، وهكذا هي سنّة الحياة.

وكما قال الله عزّ وجلّ: إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِثْلُهُ ۚ وَتِلْكَ الْأَيَّامُ نُدَاوِلُهَا بَيْنَ النَّاسِ

[mostafa-gad]

بتسمع ايه دلوقتي ؟

إكتشفت مصادفة كده قناة على يوتيوب بتعمل إعادة توزيع لأغاني راي تراثية ولكن بصيغة جاز وبلوز فمسحول فيها بشكل كبير

[mostafa-gad]

اشتقنا لتدويناتك با مصطفى، أين أنت؟ يارب بخير

هنا وهناك وهكذا ، كل ما أفتكر بدخل أكتب حاجة

[mostafa-gad]

14 سنة في تمبلر !

[mostafa-gad]

وارد جداً تتقارب من شخص، تعجب بيه، يحصل بينكم بعضٍ ما من العواطف، تدخلوا في دائرةٍ ما لوحدكم، و توصلوا لذروة الحالة ونشوتها.. ثم يحصل شيء ما بردو تاني خالص يبدل مشاعرك تجاهه و يبدله تجاهك.. إنت أصلك مش نبي عشان تُتبع أينما ذهبت.. وارد جداً تتساب و تتبدل المشاعر الرايحه لك.. ف تقبلها لأنك يوماً ما هتردها للأخرين.. المشاعر متغيره زي النفوس بالظبط والشاطر اللي يقدر يحقق فضيلة الإستمرارية، ماتضمنش اللي معاك و تقول خلاص، لان لو عشرتكم عشرين سنة وارد يمّلَك و يتغير.. ولذلك متبقاش ممل و تزعل لما تتبدّل الناس عليك

[mostafa-gad]

كنت أتمنى معرفش أقرا ولا أكتب.. ماحبتش العلام بالمرّه.. كنت أتمنى أكون جاهل معرفش أنا مولود فين ولا تاريخي أيه ولا أي لعنات صابتني وكل جيلي في الحاضر وستصيبه في مستقبل قريب وبعيد.. كنت أحب معرفش حاجة عن الجغرفيا ولا فين فلسطين ولا مين إستشهد ولا فين.. كنت أحب أكون عامل بالأُجرة لا عنده أحلام ولا تطلعات ولا المفروض يظهر للعلن إلا وقت الصلوات.. ماحبتش تماماً فكرة الثقافة والحضارة والتمدن والإلمام بمآسي الدنيا لأني شيلتها كلها في راسي وعجزت قبل المعاد..

[mostafa-gad]

ليه بتستكر عليا إني اعيش الذكريات حرام عليك ارحم شوية كفاية تجريح الاهات :)) من أجل ذكرى قديمة

بلاش تشمت غيري فيا بلاش تلومني ع اللي فات ليه تجرحني بكلامك طب ما تهجر من سكات.. من أجل السلطان جورج

[mostafa-gad]

عارفه أيه الأهم من أني بحبك ؟

أنا مصدقك - أنا بدعمك - أنا موجود

عارفه أيه الأهم من كل الوعود ؟

إني مهما ألف الكون ،

لـ حضنك ،

لـ شعر ضفايرك المتشبك ،

لـ صوفك المتلعبك ،

ألوانك الزاهية ،

و لأنك الوحيدة الأولى و الناهية ..

لازم هاعود

عارفه أيه الأفيد من كُل المضادات ؟

إن بيني و بينك إتحاد ،

إن يوم ما يغيب الأخر منّا عن الأخر

للأخر الحق في إطلاق المُظاهرات ،

لـ قفل الميادين ،

لـ وقف الحال و المحتالين

لحين ظهور المختفين ،

لـ حين رجوع اللي ناوي غ الغيابات

عارفه ليه البُعد عنّك

زي حر إمبارح الضُهر ؟

لأن فيكي من العدالة

أن يخلص كُل العُمر ،

لأني يآما و يآما تواجعت بـ ألام العُهر ،

لأني مرتوي قبلك كاسات المُر ،

و لأنك صوفيّة بـ تشديد الياء ،

فـ تسمحي أقولك بـ شياكة

و بمنتهى الحياء

إنك فـ أول ما تختارُه عنيا

و يليكي الملونين و الخمريين

و البيض و السمر ؟

#مصطفى_جاد

29/05/2015

[mostafa-gad]

تصدقني لو قولتلك إن من ٢٠١٤ لحد ٢٠٢٠ مش فاكر أي حاجة في الفترة دي؟ تصدقني لو قولتلك إني فعلاً ناسي حتى أسماء الناس في الفترة دي وأشكال وشوشهم وبفتكر بالصدفة؟ أعتقد إن عقلي في الفترة دي كان مشتت لدرجة إنه نسي يخزن حاجات كتير أو كان متعمد.. ولو كان متعمد فألف شكر يا أبو العقول والله

[mostafa-gad]

بيني وبينك الأمور مش مبشره والأوضاع تقلق والمستقبل ماتقدرش تشوف خطوتين منه بالتوقع والتحليل والكلام ده كله والأمر لو متروك بدون رابط كان زمان الواحد أتجنن.. لكن هنا يجي أعظم رابط وهو الإيمان بالله.. شيء حاسم وقاطع جواك بيقولك مستقبل إيه وخوف إيه وتحليل عميق أيه!! إعمل اللي عليك وتيقن بإن الله عز وجل هيفتحلك أبواب إنت نفسك لو قعدت ألف سنة تفكر فيها عمرها ما كانت هاتخطر على بالك.. سمي الله وتيقن وتوكّل وتفاءل بإنه لن يضيع أجرك طالما بتحسن العمل