Дурдаагүй үлдсэн дурлал
Гайхамшигт хайрын түүхүүд дундаас галзууртлаа дурласан мөртлөө холоос л хайрласаар хоцорсон хүмүүсийн түүх яригдалгүй үлддэг. Үргэлж л өгсөн зүйлийнхээ хариуг нэхдэг хүмүүсийн дунд, хайрандаа шаналж, гуньж, өөрийгөө зольж байгаадаа л жаргалтай байдаг хүн цөөхөн. Дал хүрсэн өвгөний зүрхийг өөрийнх нь бололгүй эмгэн болсон эмэгтэй л булиглуулж чадна. Магадгүй зүрхнийх нь эцсийн цохилт түүний төлөө байсан ч харамсаж чадахгүй. Зүгээр л дурлачихсныхаа төлөө тэр дотроо хэдэн арван удаа шатна, зовно, тамлагдана. Цээжиндээ багтахгүй болсон зүрх нь энгэрээ урчих шахам тийчлэхэд ч дурласан хүн хамгийн жаргалтай мэдрэмжийг түүнээс л авах болно.
Чамайг хараад хичнээн цаг бэлдсэн хайрын үгээ дотогшоогоо залгичихаад, хэл ам нь эвлэхгүй зогсох эр чамд л хайртайгаа хэлж байвал өрөөл татанхай болсон ч хамаагүй. Өөрийг чинь л харж байвал хэдэн цагаар ч хамаагүй ширтэж чадах тэр дурласан хүний нүд. Өөрт чинь цэцэг өгөхийн тулд өдөржин үүдний чинь хаалгыг татах бэлтгэл хийсэн ч чадна. Тэгээд чи гэртээ байхгүй байсан ч хэзээ нэгтээ гарт чинь атгагдах, өөрөөс нь хавьгүй азтай цэцгийг харангаа чамайг инээмсэглэн хүлээх тийм л эр хүн. Чамд дурласан залуу болзоондоо бэлдэхийн тулд хэдэн өдрийн өмнөөс товлож, хэсэгхээн төлөвлөгөө нь амжилтгүй болвол үхэн үхтлээ харамсаж мэднэ.
Чамайг “Өөрийнх чинь болъё оо” гэж хэлэхэд хүртэл хайлчихаж мэдэх цасанд хүрч байгаа юм шиг л хуруугаа хүргэж ядах тэр л чамд жинхэнээсээ хайртай. Дэндүү нандин болохоор өөрөөсөө хүртэл чамайг харамлана. Элин нисэхийг чинь тэр юунаас илүү эрхэмлэнэ. Тэгээд тэнгэрийг саравчлан яг л ээж шиг чинь сайхан бүхнийг хүсэх тийм л зоригтой эр хүн. Цээжиндээ хөнгөхөн гунигласан ч цэлмэг тэнгэрт жигүүрээ дэлгэж байгааг чинь хараад аз жаргал хүснэ. Дэндүү хайртай гэхдээ дэрвээд явахыг чинь зөвшөөрч чадна.
Олны дунд уул шиг тэр эр чиний л хажууд байхдаа урсаж чадна. Харахад хад чулуу шиг тэр эрийг чи л хайлуулж бас хатуужуулж чадна. Өөрийг чинь хариу нэхэлгүйгээр хайрласан эр л өөр нэгний үрийг энгэртээ наачихаад явж байхад чинь үнэрлээд өнгөрөх зоригтой байна. Түүний зүрх цээжиндээ нурсан ч чамайг жаргалтай байгааг хараад буцаад эвлэх тэнхэлтэй байдаг.
Өтөл болж эр нөхрийг чинь өнгөрсөн хойно, чамд дурласан “өвгөн залуу” энэ насныхаа хамгийн сүүлийн болзоог өөртэй чинь хийхийн тулд ямар нэг аргаар сиймхий хайж л суудаг. Суугаа болсон өвгөн хүртэл шүү. Хайр ийм л хүчтэй. Бас харгис!
Өөрийнх нь болоогүйн төлөө өширхөх тухай төсөөлж ч үзээгүй тэр залуу чамайг зовлонд унахад чамаас илүү шаналж мэднэ. Чамд галзууртлаа дурласан залуу л өөрт чинь эрх чөлөө олгох тийм их зоригтой. Тэгээд бас хариу нэхэхгүйгээр хайрлах хүсэлтэй. … GOOLINGOO
dailybridgerton
vaporwave
tangentwithtanner
andulkaphoto
kaledo-art
dededos
theartofmadeline
germansingergirl
