تقریباً چھ ماہ سے ان تین ننھی منی افغان بچیوں کو دیکھ رہا ہوں۔ ان میں سے سب سے بڑی شاید نو یا دس سال کی اور سب سے چھوٹی چھ سال کے آس پاس ہو گی۔ سردیوں کی بدن کو چیرتی ہوائیں ہوں یا گرمیوں کا دہکتا سورج، پھٹے پرانے کپڑوں میں ملبوس، عموماً ننگے پاؤں یہ تین شہزادیاں اپنے تانگے کو لے کر جگہ جگہ پھرتی ہیں۔
کوڑے کے بڑے ڈرم ان کا خاص ہدف ہیں جسے کھنگال کر نہ جانے کیا کچھ چنتی رہتی ہیں۔ زیادہ تر ان کا ہدف گلی سڑی سبزیاں، گوبھی کے ڈنٹھل، بوسیدہ کپڑے، سڑاند پھیلاتے پھل اور ان جیسی دیگر چیزیں ہوتی ہیں۔
کوڑے کے بڑے بڑے ڈرموں سے چمٹی یہ تینوں لڑکیاں دور سے ایسی چیونٹیاں لگتی ہیں کہ پورے قبیلے کے لیے رزق مہیا کرنا ان کے ذمہ لگا دیا گیا ہو۔ ایک ایک شاپر کو چیڑ پھاڑ کے دیکھتی ہیں کہ شاید رزق کا کوئی دانا اس میں سے برآمد ہو جائے۔ آپس میں پشتو زبان میں مسلسل باتیں بھی کرتی رہتی ہیں۔ اگرچہ کم عمری میں ہی بقا کی جدوجہد کرتے وہ بہت پختہ مزاج ہو چکی ہیں لیکن کبھی کبھار بچپنا حاوی ہو جاتا ہے تو ایک دوسرے پر کوڑا پھینکنے لگتی ہیں۔ ابھی تک انہوں نے یہی کھیل سیکھا ہے۔ اس دوران ان کا گھوڑا سکون سے ایک طرف کھڑا رہتا ہے یا کبھی سڑک کنارے گھاس چرنے چلا جاتا ہے۔ اگر آپ لمحاتی طور پر اپنی ذات کو ترک کر کے اوروں کی ذات کا چولا خود پر اوڑھ سکتے ہیں اور اگر ایک وقت میں بہت سی زندگیاں جی سکتے ہیں تو ان بچیوں کا مشاہدہ آپ کو زندگی کے ایسے پہلوؤں سے روشناس کرا سکتا ہے جو کسی کتاب میں نہیں مل سکتے۔ آپ گھنٹوں انہیں دیکھ کر خود سے الجھ سکتے ہیں۔
ان کے ساتھ کبھی کوئی بڑی عمر کی عورت یا مرد نہیں دیکھا۔ یہ ہمیشہ اکیلی ہوتی ہیں۔ جب یہ کوڑے کے ڈرم کی تہہ تک جھانک لیتی ہیں تو پھر گلیوں میں گھس جاتی ہیں۔ ایک ایک گھر کا دروازہ کھٹکھٹاتی ہیں اور کوڑے کی صدائیں بلند کرتی رہتی ہیں۔ زیادہ تر گھر ان کی صداؤں پر خاموش رہتے ہیں، بعض لوگ دروازہ کھٹکھٹانے کا برا مان کر انہیں جھڑکنے پہنچ جاتے ہیں۔ کچھ خواتین خاموشی سے شاپر باہر رکھ دیتی ہیں جو ان کے تانگے میں پڑی گندگی میں اضافہ کرتے رہتے ہیں۔
اگر آپ ان بچیوں کی تصویر بنانے کی کوشش کریں تو ایک قیامت آ جاتی ہے۔ جونہی آپ نے کیمرے کا رخ ان کی طرف کیا، یہ چلتے گھوڑے سے چھلانگ لگا دیتی ہیں۔ اس دوران زمین پہ گر کر چوٹیں بھی آ جائیں تو انہیں پرواہ نہیں ہوتی۔ یہ فوراً اٹھ کر کوئی پتھر اٹھا کر آپ کی طرف اچھال دیتی ہیں اور ساتھ ساتھ اپنی زبان میں زور زور سے گالیوں نما الفاظ بھی نکالتی رہتی ہیں۔ آج صبح کے وقت ایک گھر کے باہر جھانکتی شاخوں سے امرود توڑنے کی کوشش کر رہی تھیں تو خاموشی سے ان کی تصویر کھینچ لی ہے۔
ان کے ساتھ کوئی اجنبی بات کرنے کی کوشش کرے تو یہ ایک دم سے وحشی ہرنیوں کی طرح بھاگنے کو تیار ہو جاتی ہیں۔ اگرچہ بچپن سے ہی بقا کی جنگ لڑتے بہت کچھ سیکھ چکی ہیں لیکن جب سہم کو گھوڑے کی طرف بھاگتی ہیں تو ان کے اندر کا عدم تحفظ کھل کر باہر آ جاتا ہے۔
افغانستان میں کئی دہائیوں سے جاری خانہ جنگی کی وجہ سے یہ بچیاں اسلام آباد میں کوڑے سے اپنا اور اپنے گھر کا رزق تلاش کر رہی ہیں۔ سیاست کے سینے میں دل نہیں ہوتا ورنہ ٹھٹھرا دینے والی سردی میں انہیں کوڑے کے ڈھیر سے برسرپیکار دیکھنا اس بےمعنی جنگ کو ختم کر دینے کے لیے کافی ہے۔ افغان سرزمین ایک تازہ خانہ جنگی کے لیے تیار ہو رہی ہے جس کے نتیجے میں اپنے والدین کی شفقت کے سائے میں پلتی بڑھتی ایسی بے شمار بچیاں سڑکوں، گلیوں اور چوراہوں پر رزق تلاش کرنے پہ مجبور ہو جائیں گی۔ نہ جانے انسان کی خونی جبلت کب تک ایسے منظر سے نظریں چراتی رہے گی۔
titsay
theartofmadeline
stormborns
jacobvanloon
blakekathryn
