فيه شخصية في مسلسل إي آر، ربما أشهر شخصية في المسلسل وأكتر شخص محبوب، اسمه مارك جرين
..مارك جرين شخص رائع؛ دكتور شاطر، طيب مع العيانين، بيعامل الناس كلها كويس، وضعه العائلي كويس، مع مراته ومع بنته، اختار يمارس الطب في مستفى عام على الرغم من إمكانية تحقيق دخل أكبر بكتير في العمل الخاص…كل الخيارات الرومانسية والأخلاقية بطريقة أو بأخرى
في حلقة من الحلقات، بيواجه مشكلة في الشغل، حالة ولادة بتتعقد وبتحصل ملابسات بتخليه في مأزق، الست بتموت، هو مش تخصصه، فيه تقصير من الجميع، فيه سؤال أخلاقي/قانوني كبير بيوجّه ليه من إدارة المستفى عن مسؤوليته عن الواقعة، وبيتفتح تحقيق
بغض النظر عن اللي حصل أو اللي بيحصل بعد كده،
فيه حلقة اسمها “It’s not easy being green”
كنت دايماً بفهم الاسم ده في سياق إن مارك جرين شخص استثنائي ورائع، كل الناس تتمنى تكونه أو تتمنى يكون في حياتها، بس محدش بيفكر إنها أصلاً حاجة صعبة جداً إنك تبقى مارك جرين..الخيارات الأخلاقية مش سهلة، ومخالفة توقعات الناس مش سهلة، إنك تكون عندك إجابات على طول مش حاجة سهلة، إن الناس تنتظر دايماً منك الأفضل، مش سهل
من وقت ما شوفت الحلقة ي من سنتين تقريباً، ودايماً الجملة بتيجي في بالي، “مش سهل إنك تكون مارك جرين"، انتَ هتتمنى ده، وساعات عقلك هيقولك انك ده، بس ده مش سهل، مش سهل إنك توصله، ومش سهل تفضل عليه
لسه النهاردة بس بالمصادفة عارف إن دي أغنية مشهورة، أشهر نسخة ليها هي النسخة المرفقة، وفيه نسخ تانية لراي تشارلز وسيناترا، وفي صفحة ويكيبيديا عن الأغنية، بيقولوا ان عادة الأغنية بقت ترتبط بالأسى على الذات وبتثير تساؤلات عن الهوية، وده في سياق الحلقة مفهوم جداً، والأغنية حلوة بغض النظر عن أبعادها واسقاطاتها
لسه واخد بالي وانا بكتب من المفارقة اللطيفة عن اللون الأخضر، وعنِك، وإنه مش سهل تبقى أخضر بشكل عام
بس يعني..ده هامش عن الندرة والمَعَزّة والخَضَار الجميل اللي في الدنيا دي، اللي خدتي منه تسع أعشار وسبتي للعالم عُشر يمشي نفسه بيه
https://www.youtube.com/watch?v=z4ZxxHbJGbY
2087
vaporwave
ellievsbear
