Şeir Dünyamız...

Sənin gözəlliyin qəlbindədir... Sən mənim şeir dünyamsan... Z,

[seirdunyam]

Mәһәbbәt cürbәcür olur. Adam gülә, çiçәyә, torpağa quşlara — çox şeyә mәһәbbәt bәslәyir. Hәtta evdә saxladığı pişiyi dә sevir. Ancaq bir mәһәbbәt dә var ki, o bunlar heç birinә oxşamır. Hamısından üstündür. O adamlar ki, sevmәyi bacarmırlar, onlar şikәstdirlәr. Bәli, һәqiqәtәn, belәdir... Sevmәyәn ürәk, sintetik ürәk kimi һissiyyatdan mәһrumdu.

— “Sevdasız aylar”, Salam Qədirzadə.

[seirdunyam]

Vətən uğrunda ölənlər, ölümündən doğular. Biz vətən məcnunu, el aşiqi, sülh əsgəriyik, Biz vətən naminə ölsək, dirilərdən biriyik. — Bəxtiyar Vahabzadə.

[genceli94]

Torpağım üstünə kölgələr salan Mənim varlığımın cilası-bayraq. Zəfərdən doğulmuş Göytürkdən qalan Qurdbaşlı bayrağın balası bayraq.

Üçrəngli bayrağın kölgəsində mən Qaraca torpağı vətən görmüşəm. Zəfər güllərini dövri-qədimdən Bayraq işığında bitən görmüşəm. Bayraq mənliyimdir, bayraq kimliyim, Bayraq-öz yurduma öz hakimliyim.

Harda əcdadımın ayaq izi var, Bu zəfər bayrağım orda dikəlsin. Keçdiyi yerlərdə dağlar, yamaclar Onun hüzuruna salama gəlsin. Tarixdən qədimdir, zamandan qoca Mənim bayrağıma sancılan hilal.

Aləmə nur saçdı tarix boyunca Məbədlər başına tac olan hilal. Daim ucalasan! Savaş günündə Əsgər silahıyla səni tən görüm. Yalnız zəfər çalmış şəhid önündə Səni alqış üçün əyilən görüm.

(B. Vahabzadә)

[seirdunyam]

Lakin biliksiz və siyasi düşüncəsi olmayan adamların silahları da qələbə qazana bilməz. Qəhrəmanlıq yalnız silah deyil, bilik də tələb edir.

Məmməd Səid Ordubadi, Qılınc və qələm.

[seirdunyam]

Sən mənim köksümdə çarpan ürəksən,  Mən sənin köksündə — kiçik bir zərrə.  Mənə qanad verən odlu diləksən,  Adına, özünə Vətən deyirəm,  Çölünə, düzünə Vətən deyirəm. 

Səni heca-heca oxşayıram mən, Səni heca-heca əzizləyirəm; Əlim ürəyimin üstündə hərdən Şəhərdən-şəhərə gümüş qanadla Göydə uça-uça əzizləyirəm.

Dağında vüqarlı qartal oluram, Dünya ayağımın altında qalır… Səndən uzaqlarda xəyal oluram Həsrətdən gözümün kökü saralır. Görüşə tələsən cavanlar kimi, Saata baxıram qatarlarda mən. Ən əziz, müqəddəs ünvanlar kimi, Köksümün altında uyuyan Vətən!

Axırsan çay kimi damarlarımda, Çopur qayana da qaynayır qanım. Böyüklü-kiçikli arzularım da Adınla bağlıdır, Azərbaycanım! Sən mənim köksümdə çarpan ürəksən, Mən sənin köksündə – kiçik bir zərrə. Mənə qanad verən odlu diləksən, Adına, özünə Vətən deyirəm, Çölünə, düzünə Vətən deyirəm.

— İsa İsmayılzadə. 

Füzuli, 1992.  Photo by Khalid Askerov.

[seirdunyam]

Sanki günəşi də oğurlayıblar, Qaranlıq nə qədər qatıdır, sıxdır. Bu çirkab içində təmiz yaşamaq, Bəlkə də ən böyük qəhrəmanlıqdır.

— Xəlil Rza Ulutürk.

[seirdunyam]

Narini unutma.

Əgər böyüsə idin Saçlarını darardım Sənə çanta alardım Anan da qalsa idi Yanaqlarını öpüb Səni yola salardı İncə əlindən tutub Məktəbə aparardım Əgər böyüsə idin Kim olardın görəsən? Polis, müəllim, həkim Hər kim olmaq istəsən Arxayın ol gül qızım Mən arxanda olardım Evimiz dağılmasa Ürəyim dağlanmasa Mən də sənlə böyüyüb Səninlə dağ olardım Əgər böyüsə idin Saçlarını darardım Həyətimizdən sənə qızılgül toplayardım Sən hər gülümsəyəndə Yenə nəfəs alardım Narin qızım, naz qızım Nə olar, qalsa idin Mənə qanad olardın Sənə qurban olardım

— Rəfiqə Hacılı.

[okuryazarlar]

“Benim derdim su birikintisinin sınırları değil; benim derdim, denizi düşünmemiş balıklarla yaşamak." 

Samed Behrengi

[seirdunyam]

GECƏLƏR.

Səhərlərim — boyasız, gündüzlərim — qorxusuz Gecələrim —  narahat, gecələrim — yuxusuz. Başbaşayıq sübhə tək mənimlə fikirlərim, Gecələrə açılır gizli-gizli sirlərim. İndi mən qısılmışam gecələrin qoynuna Boylanıram içimdə gah əvvələ, gah sona. Gecələr — sığnaq yerim, gecələr — pənah yerim, Gecələr bir-birilə döyüşən fikirlərim. İnanardı ağıl da öz içimin səsinə Şirin xəyallarımın yumşaq mütəkkəsinə Baş qoyardım bir zaman Xəyalı gerçək kimi yaşayardım bir zaman. İndi qurban verməyə hazıram bir yad kimi Min-min səhərlərimi, min-min gündüzlərimi Bir anlıq sükutuma, bir yuxusuz gecəmə. Qəm sükuta dəm tutur, gecələr sükut qəmə. Allahın bal yuxusu mənə haram gecələr Sürünürəm gündüzlər, yaşayıram gecələr. Anam deyərdi: “Oğul, sən gecə doğulmusan Bəlkə buna görə də gecəquşu olmusan”. Mən təpədən dırnağa indi səbrəm, dözüməm, Çoxluğumda başqası, təkliyimdə özüməm. Verdiyin tənhalığı geri götürmə, Allah, Gecəmlə həsb-halı mənə çox görmə, Allah. Mənim mənə ən yaxın sirdaşımdır gecələr, İçimə damcılayan göz yaşımdır gecələr. Gecələr sığnaq yerim, gecələr pənah yerim, Səhərlər açılanda qapanır kirpiklərim. Öyrəndim gecələrden Qaranlıq içində mən Ulduz-ulduz yanmağı, Özümə qapanmağı, içimə boylanmağı. Gecələrin sahibi, gündüzlərin quluyam, Mən gündüzlər adiyəm, gecələrsə uluyam. Gecələr çiçəklənir söz gülşənim, söz bağım Gecələrin şahıyam, yoxdur mənim ortağım.

 — Bəxtiyar Vahabzadə.

[seirdunyam]

AZƏRBAYCAN OĞLUYAM.

Azərbaycan oğluyam,  Odu Allah sanmışam. Anam torpaq, Atam od, Mən oddan yaranmışam: 

Od kimi istiqanlı, Seltək dəliqanlıyam. Həyat qədər qədiməm, Torpaq qədər şanlıyam. Od kimi yandıranam. Su kimi söndürənəm Məni yandırsalar da, Suda batırsalar da, Yenə mənəm, mən mənəm! 

Köküm üstə bitmişəm, Şöhrətim var, Şanım var. Mənim gələcəklə də Öz əhdi-peymanım var. Azərbaycan oğluyam, At belində doğuldum; Zamanın qazanında Neçə dəfə dağ oldum. Mənim damarlarımda Gur sellər çağlamışdır.  Anam cəngilər üstə Məni qundaqlamışdır.  Azərbaycan oğluyam, Min ildir, öz adımın Keşiyində durmuşam, Silahım olmayanda Nifrətimi barıttək Qəlbimə doldurmuşam... Hünər göstərməyincə Adsız yaşamışam mən. Dədəm Qorqud ad verdi Mənə öz hünərimdən. Yoluma nur çiləyən, Qoluma qüvvət verən Eşqim, ustadım oldu; Adım doğdu hünərdən Hünərim, adım oldu. Azərbaycan oğluyam, Yaşım adımdan qədim. Heç kəsin toyuğuna Ömrümdə "kiş" demədim. Kimsənin torpağında Gözüm yox; bilsin aləm Torpağımdan bir çərək Kimsəyə də vermərəm. Mən bir qədim mahnıyam Xallarım əlvan-əlvan. Musiqim - Qarabağdır, Sözlərimsə - Naxçıvan. Bu torpaqda yaranmış Koroğlunun cəngisi, Qıratın üzəngisi! Özümə vurulmadım, Sevinc də görmüşəm mən, Sitəm də, Dərd də, Qəm də... Sabirin göz yaşıyla Özümə gülmüşəm də. — Bəxtiyar Vahabzadə.

[genceli94]

Ruhun şad olsun Bəy !

[seirdunyam]

Ümiddən əl üzmə, gəl çarə qılaq, Göyərmək deyildir danədən uzaq. Ümidsiz bir işdən, səbr etsən əgər, Bir ümid işığı parlaya bilər. Hər ümidsiz işdə bir çox ümid var, Qaranlıq gecədən ağ səhər doğar.

—  Nizami Gəncəvi.

[seirdunyam]

Əməyinizə sağlıq.Bloqunuz huzur verdi✨

Salam. Xoş sözləriniz üçün minnətdarıq! 

Mütaliə ilə qalın! :) 

[seirdunyam]

Çoxaağolun ki belə postlar paylaşırsınız👏Universitetə hazırlaşanda o qədər oxuyurdum bu əsərləri,hətta bir kitabı 6 dəfə təkrar etmişəm😂sizin sayənizdə yenidən o günlərimə döndüm..Uğurlarınız bol olsun💫

Bloga yetərincə diqqət ayırmadığımızdan bu mesajı indi görürük. Çox təşəkkür edirik xoş sözləriniz üçün. 

Mütaliə ilə qalın! :) 

[seirdunyam]

Əgər qadın aciz, öz haqlarından məhrum və cahildisə deməli millətin yarısı xəstə, iflic vəziyyətdədir.

Məhəmməd Əmin Rəsulzadə.

[seirdunyam]

[seirdunyam]

Bu dünya qəribə bir əyləncədir, Dünya sərt, mən bəzən uşaqxasiyyət. Yaşadım, bilmədim bu dünya nədir, Bilmədim, dünyada nədir səadət. Kədərim dünyanın vecinə deyil, Sevincim necə bəs, düşürmü yada? Bəlkə dünya üçün, bu – heç nə deyil, Nə qədər sevinc var, qəm var dünyada.

— Nəriman Həsənzadə.