@sseenmmeem - Tumblr Blog

ما هقيت الشمس تبطي في الغياب

لين شفت النور عن عيني يغيب

مع غروب الشمس يا كثر العذاب

والحزن ديره وانا فيها غريب

ليت فيه اسباب يوم الحب غاب

الله اكبر يوم انادي ما يجيب

أظلمت في عيني أحلام الشباب

لا طريق ولا صديق ولاحبيب

زاد حزني وزاد فى قلبي اغتراب

وين مالِد النِظر دمعي سكيب

شفته اقفى وحال من دونه ضباب

ومن بعدها صار جرحي مستصيب

فاتح (ن) له فالحشى مليون باب

والنتيجه يجرح القلب ويغيب

لا ضاق صدرك والليالي تحدتك

‏اصبر عليها والصبر زين لو طال

‏واحذر تدوّر عند الأنذال حاجتك

‏لا تقضي الحاجة ولا تستر الحال

‏واحذر تبيّن لأقرب الناس شدتك

‏لو تزعله لحظة حكت فيك الأجيال

‏وان صرت ضيف الناس لاتطول‏ مدتك

‏غالي تجي وتروح يا طيّب الفال

طَلت اللي من الإهمال ... ما عاد طَلت

و إستباحت بعد عامين و أكثر ، وصالي

عودت في ظلالي ، و جلست ، و استظلت

و إرتفع صوت نبضٍ كان ، ماهو بـ عالي

و ناظرَتني .. و قبل تقول لي حرف ، هلت

دمعة عيونها اللي ، خلت الدمع غالي

و بعد لحظة سكينة بالشجاعة تحلت

و فاجأتني : بـ كيف الحال ، يا كل حالي

قلت : ما من جديد .. مع إبتسامة تعلت

وجهي اللي نحَل سبه ظروف الليالي

قالت : الحب يبدو مثل رغبة و قلت

قلت : يا مكثرك و أنتي لحالك ، فـ بالي

ابا اقضب عنان الطامح الجامح العاصي ابا المس حنان الساهم الحالم الساري

ابا اجمع شتاتي عقب رحلات غرباتي واناغم هواجيسي على باكي اوتاري

تعبت وجرحني يا اهل المعرفة دربي وطالت مسافاتي وانا اطارد افكاري

وراها توارى من ورا حاضر ايامي وراها تسافر من ورا قدرة اسفاري

وراها تواري عجزي تشوفه عيوني وراها تطير وكلي قيود واعذارِ

حبسني رماني بالثرى والسما حلمي اغازل سحاباتي وانا اكتب لها اشعاري

اروّح لها صوتي مع رايح النسمه واقول امطري ياغيمتي جفت انهاري

ويمسي علي الليل خالي وانا خالي لا باح لي سرّه ولا بحت باسراري

نجوم السما تقدح وليلي بها ساكن عجيب السكون بليل فيه الفلك جاري

ويافكري الهارب ويانوري الغارب بدونك فراشاتي تهاوت على ناري

وانا لو عذرت الغير مااعذر افكاري انا موطن افكاري ودار الفكر داري

من يوم ما لبايته صارت هلا لليوم ، أدور عن حبيبي الأولي

اللي سرقني بالقبول و بالحلا من مجمل أصحابي و من خيرة هلي

إيلين صار الشك ، ينتاب الملا و طاحت عليه الأعين و طاحت علي

عن كل لحظة معه .. جعلي ما خلا راضي ، و يا ما أبعد رضاي من زعلي

دفعني من مواصله ، دفعة بلا و خلا لهيب الصمت يصلاني صلي

و شلون من هدا لي البال ، أولى ؟ أصبح يسبب حيرتي ، فيما يلي

و عيونه اللي كان يملاها الغلا وش اللي خلاها بدمعه تمتلي ؟

الفقد من مشاعري ، شرب و كلا و من كثر ما أنا أشتقت له ، أشتقت لي

القلب يقنعني ، بتجديد الولا و العقل ينصح ، بالقرار المفصلي

وما خذت خطوة صوب نسيانه ، ولا قدمت ماضينا .. على مستقبلي

تعال ياللي بالغلا محتويني تعال شف حالي بعد جور الايام

ليتك تحس بـ لوعة الهم فيني ماكان تتركني مع الوقت منضام

وشلون تقسى وانت مني وفيني وشلون تعدمني قبل وقت الاعدام

حبك خلق فطره فيني من سنيني صار في حياتي يصدر احكام واحكام

يامن ملكت القلب واسهرت عيني وياملح خفوقي تسكنه طول الاعوام

حلمي وصالك فالزمن صدقيني ماهمني شهره ولا همني اعلام

اسهر واحادث الليل واصفق يميني تاخذني الحيره على درب الاوهام

كنت مخطي ابعتذر واعذريني واصدق معاذيري تترجمها الاقلام

اما تعالي يالغلا وارحميني ولا العزا لجفنن من العام مانام

أنا الذي ما أبدي على الناس سرّي من خوف سودان الوجيه تحكي به

أصبر على ظيم الدهر والتعرّي من شان من يرضى عليّ الغليبة

و أبعد مجالي عن عيال التزرّي من لا هوى قلبي دواه المغيبة

وأخاف لي من مجلسٍ ما يذرّي في جانبه بومٍ حساسه صليبه

و سوالفٍ مابين بحثٍ و تحرّي يجرح فؤادي عيّه و ابتلي به

يرضيني المقسوم خيري و شرّي سبحان من لا تعلم الناس غيبه

أحدٍ على ربعه يحب التحري للشر بلاس و خيره بجيبه

هذاك يالربع أنا منه متبرّي لو عضّني ناب الدهر ما انتخي به

من خوف يضحك لي و هو يستغرّي يفتل حبال السّو ما يندري به

يفرح عليّ بكل شيٍّ يمرّي و إن شاف يمّي خير عنّي نهيبه

لا تامن الخوّان لو زخرف حكاه من خان بك مرّه يبي باكر يخون

وافطن ترى زول الرّجاجيل توّاه كم واحدٍ يعجبك زوله وهو دون

يا طيّب الشارات من يوم منشاه احذر عدوّك لايغدرك على هون

ترى عدوك غايته فيك ومناه يزرع بصدرك من قنا رمحه طعون

والّلي رضع لبوة عدوّك توقّاه الجرو ولد اللبوة الّلي تعرفون

للطّير يالصقّار بالرّيش مغواه الجاهل الّلي باكثر الريش مفتون

للحُر والشبوط ماكر ومجناه والفرق بالافعال لو هُم يطيرون

من لا يحس بقيمتك وأنت موجود ما هو بناشد عنك لا صرت غايب

حاول تفرق بيض الأيام والسود يا قلب ما كل الحبايب حبايب

اللي يبيك يجيك لو دونك قيود يكسر على شانك خشوم الصعايب

واللي يبي فرقاك لو دربك ورود ما جاك لو إنك من أدنى القرايب

يا شينها لا قيل حظ وتوافيق ‏والحظ سيء والتوافيق قلّه

‏تتعب على حاجه ولا فيه تحقيق ‏وتزرع جميلك ما يظللك ظلّه

‏مشينا ف الرمضا رقينا الشواهيق ‏غصنا بحر جينا على المود كلّه

‏مابي ملامه من جميع المخاليق ‏حنا ركضنا الوقت دقه و جلّه

وكل أمرك للكريم ويسمح امرك ‏كل ما دكت على صدرك روابع

‏وإفرد همومك على سجاد صدرك ‏لا تضيّقها وحلم الله واسع

‏ولا تطاول في قصير الشبر شبرك ‏ولا تنازل عن شيّمك ولا تراجع

‏ولا تواضع للوضيع يضيع قدرك ‏منت مجبورٍ على بعض التواضع

البارحة يوم الخلايق نياما بيحت من كثر البكا كل مكنون

قمت اتوجد وانثر الماء على ما من موق عين دمعها كان مخزون

ولى ونة من سمعها ما يناما كني صويب بين الأضلاع مطعون

وإلا كما ونت كسير السلاما خلوه ربعة للمعادين مديون

في ساعة قل الرجا والمحاما في ما يطالع يومهم عنه يقفون

وإلا كما ونت راعبية حماما غاد ذكرها والقوانيص يرمون

تسمع لها بين الجرايد حطاما من نوحها تدعي المواليف يبكون

ردي علي الصوت ردي حياتي صمتك على شكوى حنيني مذله

اما اقطعي حبل الوصل بالنجاتي والا عطيني باقي الود كله

لا توعديني عذب الصبر ذاتي والبعد حالي مع عنا الوجد سله

اشكي الجفا لك ما شفيتي شكاتي الوعد الأول للقا فات حله

يرضيك يصبح شملنا للشتاتي يرضيك نرضي كل نفسٍ مغله

يرضيك لا فرحوا بهمي عداتي واقفوا يقولون الغضي عاف خله

ردي علي الصوت يكفي السكاتي قولي لغيرك ماهفا القلب للّه

لا انت فارس هالرمال ولا نوارس هالبحر

أعظم حروبك خيال واقصر دروبك سفر

شايلٍ هم الصديق وشايلٍ هم العدا

ليه تمشي والطريق كل ما خلص بدا

وليت به شيٍ يدوم وانت في الآخر بشر

لا انت عاشق هالزمن ولا مشانق هالزهر

انت تحتاج الأمان لو تعانق لك حجر

شايلٍ هم الغياب وشايلٍ هم اللقا

كافي ضيعت الشباب لايضيع الي بقا

ما لأوهامك لزوم وانت في الآخر بشر

غرق كل الورق والشوف غبش بين حجّانك تعبت أكتب كلام الحب وتعاندني دموعي

تشيله حرف حرف وتذبل الورده ببستانك وانا أسهل شي وأصعب شي لو بقول موجوعي

ترجّيتك بضعف الحب ما توزن بميزانك تشد الحبل لين يصير بين إيديك مقطوعي

ترى هالقلب ما يتحمّل تخلّيه ينشانك وهو حتّى على صغره غدالك صوت مسموعي

أنا حتى الهروب اللّى نويته صار عنوانك ما دامي لا مشيت بكل درب تصير موضوعي

أشوف السحب وأشوف المطر والعشب بألوانك وأخلّي النجم لامني سهرت بليلك شموعي

سمعت لي كلمةً مدري وش أقصاها حزت بصدري وانا ماني بهارجهـا

لوكـل كلمة الى جتنا تبعناها بعنا الثمينة بسعر ما يخارجها

لو مرت السمع ما كنا سمعناها ونقفل الرأس عنها لا يبرمـجها

ومن يم هذا لهذا ما نقلناها والناس واجد وتلقى من يروجهـا

ومن جابها بين خلق الله ووداها لو به مراجـل ترى نفسه يسمجها

ومن عامل الناس في سابق خطاياه يقعد بدار خلا ما داج دايجهـا

أي كف شكلتك وبروزتك وعلقتك كنت فيض الوان كانت موجة الممكن شذاك ضيعتك العين في زحمة الوحده لقتك تشتكي وحدة زحام تنكر به خطاك اذكرك تفرد جناحين والكون ورقتك غامس ريشك بحبر فقط يشبه صفاك توقف اللحظة وتنفض لحنك وموسقتك في ثوانيها وتنشر على الدنيا دفاك كنك الحلم ، امسكت بك عيوني واطلقتك من بديت بروعة الطير واخجلت الشباك رغبة غرقت بعزتك بالضو اغرقتك غبت حتى غيبتك قربت تلغي سواك لين أكل جوع البراويز تمر موافقتك من وفيت بموعدك نفسه الموعد محاك

Trending Blogs

Recently Viewed Blogs