@sseenmmeem - Tumblr Blog

Posts

حداك الحلم عن طيش الشباب لصحوة الإدراك

‏بعد عشرينك اللي من ربيع العمر مسروقه

‏بديت تحسب الأيام المقابيل و تعد إخطاك

‏كثر ما كنت شاعر يحسب حسابات منطوقه

‏اسولف لك عن شعور الندم يا عقلي الشكاك

‏تقول انه ورى حدب الضلوع مضيعٍ نوقه

جيتي بعد غيبه تثيرين الأوجاع

وتجددين بنصـف ساعه وداعك

يا حيلة الله كيـف تبغين ملتاع

ينسى الهموم وضيعته من ضياعك

في غيبتك تبدلت كل الأوضاع

وفي جيتك أخشى تبدل طباعك

لا تدخليني فـي متاهات وصراع

ثنتين ما أقواها جفاك وصراعك

حبي محيط وموج الأشواق دفاع

مع موجة الأشواق فلي شراعك

وشاطي حناني لك ميادينه وساع

لو تأمرينه يقترب منك طاعك

أمد وأعطي بـس بالوصل طماع

كثر الطمع يغريني ارفـع قناعك

الليـل لقلوب المواليف جماع

وأنتي لليل الوصـل زاد إمتناعك

تقلين سري بيـن جمـع الملا ذاع

قلت السبب يا نور عيني شعاعك

ترى الرجا بك يا هوى البال ما ضاع

داري غرورك لا يسبـب ضياعك

ماني لهرجة حاسدي فيك سماع

وارجوك لا يصغي لهرجه سماعك

راع العهـود السابقـه للهوى راع

اللي كتبـت بنودها مـن يراعك

قلبي على عهدك وللغير ما طاع

لو كان غيري كان بالرخص باعك

أنا معـك وافي ولا ني بخداع

وأنتي وفيـه مـا لفاني خداعك

قلبي إذا غبتي مـن الهـم يرتـاع

وما راعني ما ظن في يـوم راعك

عودي إلي ولا تثيرين الأوجاع

ما عاد يتحمـل فـؤادي وداعك

جينا والميعاد عيونك

وميعاد عيونك ما يكذب

يا بهجة خاطر مظنونك

ابعدهم عن بالك وإقرب

كل اللي حولك يفدونك

لا تشغل بال ولا تتعب

والله ما فيهم من لونك

لا زين أوصاف ولا مذهب

أنت أغلى والباقي دونك

وأنت أحلى منهم وأعذب

وأنت اللي حبك ما يخونك

وأنت اللي يخونك ما ينحب

توك تدري إني مجنونك

أجل من اول وش تحب

الله الله يالدروب المستقيمة

كيف أجادل واحدٍ ماهوب قدي

شرهة العاقل على النفس الكريمة

واحتفظ ب الرد في مزحي وجدي

يفرح الجاهل ويحسبها هزيمة

ما درى عيني لمثله ما تلدي

صدتي عن بعض خلق الله غنيمة

ما يوالف قلبي القلب المصدي

الله أكبر يا الظروف اللي مثل زند الفتيلة

‏كل مامرت حياتي وش أقول و وش أخلّي

‏الليالي وجهها شاحب وسكّتها طويلة

‏ماخذة حزني دروس و ماخذه ضيقي تسلّي

‏وان بلتني بالدموع اللي مثل وبل المخيلة

‏أتذرّى بـ الشعور اللي مثل دمع المصلّي

أمشي وهمي جبل يمشي معي وين ما أروح

أزريت أشيل الجبل وأزريت لا أفارقه

كل الخطاوي تعب كل الليالي جروح

أرضي هجير وسمايه شمسها حارقه

ماغير روح التحدي في عروقي تفوح

قوة صمودي على جور الزمن خارقه

هذا وأنا عزتي دايم قبالي تلوح

لين أصبحت في حياتي ميزة فارقه

أرفض شعور الندم وأرفض طمان السفوح

لو كان فيه الحياة اغصونها وارقه

مادام فيني نفس يذري وفيني طموح

باب وراه اعتزازي… طارقه..طارقه

رغم امتداد التعب عيا يموت الطموح

والشمس بكره ورغم أنف الدجى شارقة

سترة الصمت ما نقدر نخون العهد

‏اتركيني تحت ضفّك سوات الدخيل

‏الحقيقة تزعـل معظم أهـل البلـد

‏والريـا والمجامل ما وراها حصيـل

‏مقدر أشكيك يا حزني وبثـي لأحد

‏غير لله، وهو حسبـي ونعم الوكيـل

‏كيف أخاف النهاية والكفن واللحد

‏وأنا في كل يوم ألبس ثياب القتيـل

‏منهكً بالجروح الماضيـة والجـدد

‏واتهجس عساي ألقى لحظي بديل

‏واهـنيّ الغريـر الـي يضمـه مهـد

‏مـن يدينٍ تحط إلـى يدينٍ تشيـل

‏أعتقـد والحيـاة بكبرهـا معتقـد

‏مُبتداهـا وصول، ومُنتهاهـا رحيـل

يضيق صدر و ينكشف مستور

و تحن روح و تاصل أقصاها

و يزيد كَسر .. الخاطر المكسور

إليا تِذكر ، مَن تناساها

و أنا ، مـا أعرف الف ولا أدور

مَع نوبة الشوق ، و سواياها

أرجَع .. لذاك المنزل المهجور

أرجَع ، عشان أحضِن بقاياها

و أسترجع الماضي ، بكل سرور

إيلين عيني ينتثر ماها

مشاعري تاقت ، شعور شعور

من يوم لقتني مقفاها

لإشراقها ، مِن ليلها المنثور

و لإقبالها صوبي ، و لـ حكاها

و كان الشعور .. اللي ما شاف النور

شعوري ، إني بـ أتخطاها

اللي ماهو قاسمه ربي لا يمكن يصير

‏الله كفيل العباد وكافل ارزاقها

‏نفسك لا تُسجن وتصبح لـ الاماني أسير

‏واذا اغربت دنيتك ابحث عن اشراقها

‏مدام نبض الكرامه في ضلوعك حصير

‏اصبر وتاقف لك الدنيا على ساقها

‏لازم تشع ان قالها الله امانيك

‏مهما غفت في ليل الأقدار شمسك

‏

‏لا يشغلك عن فرحة الجاي ماضيك

‏ولا يسرقك من واقعك صوت هجسك

‏ولا تيأس ان يبست منابت مساعيك

‏بكرة يسيل الغيم ويطول غرسك

‏رضاك عنك عن رضاهم يكفيك

‏ ويغنيك عن حب البشر حب نفسك.

خلّك اكبر من تفاصيل الضعوف

‏وخل ذاتك لو تعزوى عزوتك

‏

‏انتزع عن وجه حلمك كل خوف

‏وافرض بروس المعالي سطوتك

‏

‏وعن طموحك لاتعذر بالظروف

‏اصنع ظروف تليق بـ هقوتك

‏الطيب يا راعي المشاريه ما فاد

‏بعض الوصل والودّ والجود تبذير

‏

‏من لا يقدّرني على روس الأشهاد

‏لا ينتظر منّي حشيمه وتقدير

‏

‏اللي قطع لي درب بقطع له بلاد

‏واللي بدا الجفوه عليه المعاذير

‏

‏السالفه ماهيب منّات و عناد

‏الطيب رده طيب والكير بالكير

ما هقيت الشمس تبطي في الغياب

لين شفت النور عن عيني يغيب

مع غروب الشمس يا كثر العذاب

والحزن ديره وانا فيها غريب

ليت فيه اسباب يوم الحب غاب

الله اكبر يوم انادي ما يجيب

أظلمت في عيني أحلام الشباب

لا طريق ولا صديق ولاحبيب

زاد حزني وزاد فى قلبي اغتراب

وين مالِد النِظر دمعي سكيب

شفته اقفى وحال من دونه ضباب

ومن بعدها صار جرحي مستصيب

فاتح (ن) له فالحشى مليون باب

والنتيجه يجرح القلب ويغيب

لا ضاق صدرك والليالي تحدتك

‏اصبر عليها والصبر زين لو طال

‏واحذر تدوّر عند الأنذال حاجتك

‏لا تقضي الحاجة ولا تستر الحال

‏واحذر تبيّن لأقرب الناس شدتك

‏لو تزعله لحظة حكت فيك الأجيال

‏وان صرت ضيف الناس لاتطول‏ مدتك

‏غالي تجي وتروح يا طيّب الفال

طَلت اللي من الإهمال ... ما عاد طَلت

و إستباحت بعد عامين و أكثر ، وصالي

عودت في ظلالي ، و جلست ، و استظلت

و إرتفع صوت نبضٍ كان ، ماهو بـ عالي

و ناظرَتني .. و قبل تقول لي حرف ، هلت

دمعة عيونها اللي ، خلت الدمع غالي

و بعد لحظة سكينة بالشجاعة تحلت

و فاجأتني : بـ كيف الحال ، يا كل حالي

قلت : ما من جديد .. مع إبتسامة تعلت

وجهي اللي نحَل سبه ظروف الليالي

قالت : الحب يبدو مثل رغبة و قلت

قلت : يا مكثرك و أنتي لحالك ، فـ بالي

من يوم ما لبايته صارت هلا لليوم ، أدور عن حبيبي الأولي

اللي سرقني بالقبول و بالحلا من مجمل أصحابي و من خيرة هلي

إيلين صار الشك ، ينتاب الملا و طاحت عليه الأعين و طاحت علي

عن كل لحظة معه .. جعلي ما خلا راضي ، و يا ما أبعد رضاي من زعلي

دفعني من مواصله ، دفعة بلا و خلا لهيب الصمت يصلاني صلي

و شلون من هدا لي البال ، أولى ؟ أصبح يسبب حيرتي ، فيما يلي

و عيونه اللي كان يملاها الغلا وش اللي خلاها بدمعه تمتلي ؟

الفقد من مشاعري ، شرب و كلا و من كثر ما أنا أشتقت له ، أشتقت لي

القلب يقنعني ، بتجديد الولا و العقل ينصح ، بالقرار المفصلي

وما خذت خطوة صوب نسيانه ، ولا قدمت ماضينا .. على مستقبلي

تعال ياللي بالغلا محتويني تعال شف حالي بعد جور الايام

ليتك تحس بـ لوعة الهم فيني ماكان تتركني مع الوقت منضام

وشلون تقسى وانت مني وفيني وشلون تعدمني قبل وقت الاعدام

حبك خلق فطره فيني من سنيني صار في حياتي يصدر احكام واحكام

يامن ملكت القلب واسهرت عيني وياملح خفوقي تسكنه طول الاعوام

حلمي وصالك فالزمن صدقيني ماهمني شهره ولا همني اعلام

اسهر واحادث الليل واصفق يميني تاخذني الحيره على درب الاوهام

كنت مخطي ابعتذر واعذريني واصدق معاذيري تترجمها الاقلام

اما تعالي يالغلا وارحميني ولا العزا لجفنن من العام مانام

Trending Blogs

Recently Viewed Blogs