يا أهلًا باليوم اللي حاسه فيه بالحياة أخيرًا..
بقالي كتير كتير عايزة أكتب عن يومي هنا -بشكل مختلف عن تدوين اليوم الخاص بيا- كمحاولة إني أكون حاضرة أكتر ف اليوم وملاحظة بيعدي إزاي وإيه بيحصل فيه وأحاول أصور حاجات من اليوم كتوثيق لنفس السبب، إني أكون عارفة إيه اللي بيحصل
المهم ماكنتش عارفة أكتب، حاسه إني نسيت إزاي ممكن أشارك حاجة، بس النهارده أنا مصحصحة وكتبت ف نوتس الحاجة اللي كانت بتحصل وأحس إني عايزة أكتب عنها ف وقت ما حصلت
النهارده صحيت على المطبخ غرقان مايه بشكل عجيب غير مفهوم لحد دلوقتي، كنت حاسه إني مغيبة وقت ما قومت ولقيت كمية المايه دي في الأرض ووإحنا بننشفها ومحمد بيتكلم حاسه إني مش سمعاه، ماعرفش عقلي عمل بلوك كده عشان نعمل اللي المفروض نعمله بسرعة قبل ما المايه هتدخل ع السفرة وأوضة النوم خلاص ف مفيش وقت نپروسيس حاجة ولا نفكر ولا نتكلم ولا نذبهل حتى، ولا ده كان عادي عشان كنت لسه صاحية وصحيت مفزوعة على صوت محمد ف وقت ما صدقتتتت إني كنت رايحة ف النوم لدرجة إني ماكنتش سمعاه ف الأولؤ ف ماكنتش فايقة مش أكتر، بس إحنا الاتنين حالنا مكانش كويس والجو كان متكهرب كده وكان فيه غضب ف الأجواء -مش تجاه حد للتاني، غضب ف العموم-
بعدها زعلت من موقفنا ده، آه اللي حصل مكانش شويه وكان مفاجئ كمان ف كان صعب شويه بس حسيت إنه ماذا لو كنا أضفنا بعض المرح للعناء؟ مش كان هيبقى أحسن؟ مش دي الڤايبس اللي حابه أطفالنا يكونوا فيها لما يحصل مواقف مفاجئة سخيفة وصعبة وده هيحصل كتير بطبيعة الدنيا يعني، ليه التنشنة؟ ليه العبوس دههه؟ ما هو ماحصللششش حاجة، آه كان ممكن ناخد زوحليقة ف المايه ونقول وييييي بس مكانش فيه خساير غير المشايات اللي اتبلت وربع سجادة السفرة، مش حوار يعني، والغلط مش مقصود من الأول وحتى مش مفهوم إيه اللي حصل بالظبط
دي كانت لحظة من اللحظات اللي عايزة أمسك كل الأهالي أعجنهم ضرب، الأهالي اللي طلعت نماذج زينا بتتخض وبتتصرف بشكل مبالغ فيه من الجدية والصرامة ف المواقف الطارئة وده شيء بيزود صعوبتها أصلًا، واتمنيت مانبقاش من الأهالي دي وعايزة نقعد قعدة عرب كده نشوف هنعمل إيه ف الآثار اللي طلعنا بيها من تربيتنا دي وهنصلحها إزاي
ولكن سبحان الله اليوم أخد منحنى تاني بلطف ربنا وكرمه وده اللي خلاني أبص للموقف ولرد فعلنا أصلًا ومافضلش سايبة نفسي للي حصل وقاعدة مش مظبطة وأعصابي تعبانة ويومي كله يتضرب- وهو كان تلت تربعه اتضرب فعلًا-🤭
المهم النت وحش جدًا بقاله يومين وفيه حاجات مش شغالة خالص كأن مغيش نت، وكنت هتصل بخدمة العملا النهارده نشوف الكلام على إيه، بس قولت لنفسي قومي رستري الراوتر يا بت يا يم يم كده لما نشوف، و واو! يا ريت البني آدم ببساطة الراوتر والله ويا ريت ييجي على باله فكرة إنه يرستر حاله ولا دماغه بعد أي حاجة بتحصل ويرجع لرشده كده
لما رجعت لرشدي قومت أشوف المطبخ بيقول إيه وفتحت دورة التربية الإيجابية، المدربة كانت بتقول إن احتياج الإنسان الأساسي إنه يحس بالانتماء، وتصرفات الأطفال من تمرد وغيره ده عشان يجذبوا الإنتباه لإنهم حاسيين بالغربة، ف حسيت إنه وه! شوفت طفلي الداخلي واقف على جنب بيبصلي عاى استحياء، سنين عمري كله مش حاسه بانتماء وسط أهلي وعيلتي، بس جيس وات؟ ولااااا أي تصرف من تصرفات الأطفال دول، مكانش فيه غير عقل ورزانة وشطارة وولا مرة عملت مشكلة لا مع أهلي نفسهم ولا إني حطيتهم ف مشكلة بسببي، ف حسيتني عايزة أعيط، وعايزة أتمرد على كِبر، أعمل الحاجات التافهة -الغلط والعيب من وجهة نظرهم- كلها كلها دلوقتي وأشوف إحساسها إيه، الحاجات التافهة الغلط دي هي زي إني أغني مع الأغاني مثلًا.. إحنا بعيد أوي
بفكر نفسي للمرة التالتة بس تقريبًا للأسف إني مقارنش نفسي دلوقتي بنفسي زمان، ولا أتمنى أكون كويسة زي زمان، بل أكون كويسة زي نفسي دلوقتي في حياتي دلوقتي بظروف دلوقتي بنسخة جديدة خالص ماعدتش عليا قبل كده
فيلم Remarkably Bright Creatures لذيذ وبقالي كتير ماشوفتش فيلم يحسسني إني هحبه كده، وشكرًا.
izzy806
discoholicmusic
gummygunk
kianamaiart
jbbartram-illu
jacobvanloon
theartofmadeline
yousharknotpass
