#10.52pm

[hoperose4]

I've been so upset about how ugly I am lately :/

[hoperose4]

بقالي فترة حاسة إني مش مظبوطة خالص، مش عارفة أوصف أو حتى أحدد ايه الشعور بالظبط بس على طول حاسة بشعور سئ جداً وحرفياً حاسة بضيق صدر (معنوي).

حاسة إني مش حاسة بطعم لأي حاجة وجوفاء تماماً من المشاعر ومفيش حاجة متطلعة ليها وكل اللي مسيطر عليا هو شعوري إن كل حاجة هتخلص وإني حاسة إنها قربت تخلص.

أنا أصلاً عندي مشكلة خوف زايدة من فكرة الموت، وبتيجي عليا فترات بيحصلي فيها حالات هلع مبالغ فيه كده وببقى حاسة إني خايفة وبقعد أعيط وبيبقى كل تصوري إني خلاص قربت أموت. الفترة دي أنا مبنهارش ولا أعيط، بحس إني مخنوقة وعايزة أعيط بس مش قادرة، بس برده الموت مسيطر على تفكيري جداً وبنام وأقوم حاسة خليط ما بين زي ما قولت إني حاسة إن كل حاجة هتخلص وما بين إني مرعوبة من فكرة الموت وشعور التعب اللي أنا حاساه..

وعقلي بيقعد يصورلي كل حاجة بقى ويربطها بالموضوع ده.

اللي زايد الطين بلة بقى إن في شعور مريب جداً متمثل في إني حاسة إني مقصرة في العبادة وإني أشغل يومي وحياتي بالعمل لآخرتي وإني حاسة إني مش عارفة أعمل ايه طيب وكتر الخوف أصلاً ده بيخليني أحس بشلل تام بدل ما أزود مثلاً في الطاعات لأ ببقى مش قادرة خالص أعمل حاجة.

والرعب معايا حالياً بيزيد بقى كل ما ألاقيني ربنا كارمني ونفسي مايلة لطاعة معينة مكنتش في العادي بعملها أو كل ما ألاقيني حريصة أكتر شوية في الطاعات لإن عقلي برده بيفضل يصورلي ربط ما بين ده وفكرة اقتراب الأجل.

جسدياً أنا برده حاسة إن في حاجة غلط، الأول مكنتش قادرة أحدد هي ايه، بحس إني مخنوقة وبفطس كده بس مش عارفة أوصفه بإيه أو هو فعلاً جسدي ولا لأ. أعتقد إني حاسة بالشعور اللي هو الواحد بيحسه لما يبقى مهبط كده أو ضغطه واطي. بس أنا حاسة ده حرفياً طول الوقت دلوقتي وهو شعور مرهق جداً :/

أو يمكن وصف أدق للحاجات الجسدية اللي انا حاسة بيها هي إني حاسة شعور زي اللي الواحد بيحسه بعد ما حد يخضه خضة جامدة مثلاً، الشعور الغريب الغير مريح اللي الواحد بيحسه بينتشر في بطنه وصدره ده، هو حاجة قريبة من كده اوي، كإني عندي adrenaline rush على طول أو عندي الfight and flight response شغال على طول مثلاً.

ده غير إني بقوم من النوم بالليل بسبب نفس الشعور ده كإن فعلاً حد خضني بقى، بتنفض كده واصحى على إن قلبي بيدق بسرعة جداً وجوايا شعور كإن حد خضني وروحي راحت كده.

وبقيت على طول triggered أو on edge، أي صوت مفاجئ جمبي بيخضني ويخلي جسمي يتنفض، وأوقات من غير ما يكون مفاجئ بس لو كان عالي شوية مثلاً بيحصل نفس الشئ.

كل الحاجات دي بقى بتزيد وتتفاقم جداً بالليل بالذات، وبيصحابها نوم بأرق وغير مريح ويتخلله الكوابيس، وحتى الاحلام اللي مش كوابيس بصحى حاسة إني مضايقة منها وإن في حاجة تقيلة كده على قلبي.

أنا متكدرة جداً وخايفة وتعبانة وحقيقي مش عارفة أعمل ايه 😔

((ملحوظة: بقيت بشغل الرقية الشرعية لما آجي أنام بس الوضع كما هو))