النهارده يوم مش لطيف... مش لشئ غير إني حاسة إني فاض بيا من نفسي ومبقتش طايقة نفسي ولا حياتي.
أنا بقالي كتير اوي ببعد و losing track لحد ما الموضوع خرج عن السيطرة ولحد ما مبقتش عارفة أنا مين أصلاً ولا بعمل ايه.
مش بس كنت ببعد عن الحاجات الكويسة وببطل أعملها، وده عمال يزيد مع الوقت، ده أنا كمان بقيت بعمل حاجات غلط ودي برده بتزيد مع الوقت.
بقيت تايهة تماماً وحاسة إني انتكست في حياتي كلها وعلى كل الأصعدة الدنيا بايظة ومش لطيفة خالص.
النهارده حسيت كإني أخدت ضربة كده أو قلم حسسني ايه ده في ايه، ايه اللي أنا فيه ده وايه اللي بعمله ده.
للأسف حاسة ده جه متأخر وبعد ما الدنيا عكت مني في حاجات بصورة متنفعش خالص، بس بقول الحمد لله برده على كرمه بيا وإنه متركنيش في غفلتي وحسيت بالفوقة دي حتى لو ده مخليني حاسة إني مش طايقة نفسي بس ده أحسن ما كنت أفضل في الحالة الغريبة والتوهان ده.
لسه من يومين كنت عمالة افكر إني حاسة إني بجد مفتقدة للصحبة الصالحة حواليا وعايزة ارجع ابقى وسط ناس تساعدني على الإستقامة وإن حياتي تبقى نضيفة كده...
بس النهارده انا استوعبت إن وضعي critical أكتر من كده وأسأل الله إن يكون النهارده بداية إني أفوق لنفسي وارجع زي ما كنت وأفضل يا رب.
اللهم لك الحمد وانت المستعان.
اللهم انك عفو تحب العفو فاعف عني.
