Discover Top Posts Tagged with #23.8.2024

حبيبتي يا سارّة، ريت عمري كله فداكِ يا سارّة ويكون قليل، ريت كان كل الوجع فيّا ولا فيكِ وريت ده كان عزايا.

واحشاني وبناديكِ طول اليوم، من امبارح بناديلك وبقول "حبيبتي يا سارّة" ومستنية تبعتيلي ونكمّل كلام ولسه مستنية ونفسي تيجي تقوليلي "كانت مزحة تقيلة الدم كتير، أنا هون رورا" ونكمّل ونضحك ونبكي نبكي نبكي! لو بكيت العمر كله عليكِ والله ما يكفي ولما أناديلك هفضل مستنياكِ تردي عليا

أنا فاتحة الشات بقالي ساعات وبحاول أفهّم نفسي ليه مبعتلكيش؟ ازاي كل ده متكلمناش؟ المفروض نبقى سهرانين دلوقتي وبتحكيلي عن قد ايه كنا احنا الاتنين شكلنا أهبل عشانك بخير وعشانك لسه هنا! لسه لحد دلوقتي مردتش على لينا، عزا ما أوقحني صح؟ أنا بس عايزة آجي أكلمك وأسألك أقولها ايه؟ وليه بتقول الكلام ده؟

مش عايزة الكلام يبقى عني بس مش عارفة أرسم الخط الفاصل بينك وبيني لأن مفيش! احنا واحد! ودلوقتي بفتكر كلامك وإننا سوا دايمًا، بكل شي، حتى الموت.

بتمنى متكونيش حاسة إنك لوحدك يا حبيبتي، مش عايزاكِ تحسّي إنك لوحدك، مش عارفة ازاي أبطّل أحس إني لوحدي ومحتاجالك وأبكيلك وأبكيكِ، فأنا جاية أبكي عليكِ وعليّا

سارّة قلبي، وجودها زي الحلم الجميل، أرق من النسمة وأسطع وأدفى من الشمس، "بتصحى كأن الشمس مستنية تاخد إذن وبتغني كأن الناس كلها حلوة". لازم العالم كله ينعيها ويبكي عليها.

سارّة صادقة، حقيقية، مُحبّة، حنونة، جسورة، رقيقة، شاعرة، مثابرة، جدعة، حقّانية، مؤمنة وأجمل إنسانة وأم ورفيقة ممكن أي حد يحلم بيها حتى. رقيقة وحنونة لدرجة بتزور قبور غرباء وتزرعلهم وردة، مُحبّة وجميلة لدرجة بتمشي تقول لكل حد حتى لو أنون إنها بتحبه وبتبعتله عبوطات وغناني، وإنسانة حقيقية وأم وربيعة لدرجة تخلّي غيابها جرح ميتداويش ولا يلمّ. مطرح ما تمشي الدنيا تفرح بها، كل العيون الطيّبة تحبّها.

كنت محظوظة بوجودها في حياتي، لحوالي سنة كان عندي ربيعة وأخت وأم وبنت وحبيبة وإيد ممدودة بكل حنان وحضن مفتوح طول الوقت، ولا مرة زعلتني! ولا حتى بالغلط! هدية من السما ملحقتش أتهنّى بيها ولا أحبّها كفاية، اللي في القلب أكتر من كده بكتير. على قد الحظ على قد الألم، وعلى قد الحب على قد الأسى يا سارّة، وأنتِ يا حبيبتي كتبتيلي بوست مخصوص عن الكرب والأسى والوجوم فأكيد عارفة.

يمكن مش كل اللي هنا كانوا محظوظين كفاية إنهم يتحاوطوا بطيفها وإنهم يبدؤوا كل يوم بأحلى صباح منها أو يشوفوا عن قُرب قد ايه الإنسانة دي خسارة حقيقية ومفيش عزا يكفّيها ولا مواساة تعوّض خسارتها، بس لا زلتوا محظوظين عشان مش هتختبروا كم الألم ده ولا هتحسوا إنكم خسرتوا روحكم معاها. قلبي اتخلع.

مفيش حاجة قادرة تواسيني يا حبيبتي، مفيش غير مواساتك ووجودك أنتِ اللي يقدروا يكفكفوا دموعي ويحضنوني ونتمتم سوا لحد ما ننام يمكن كل ده يطلع مش حقيقي. يمكن كل ده كابوس، أكيد كابوس، إي؟

لسه فيه كتير أوي أوي معملناهوش! لسه محتاجاكِ ولسه مستنية كاسة المتّة والنبيد اللي هنفتحه سوا والهزار والضحك في المطبخ والحفلات والرقص والإيد الحنونة اللي بتعمل أزكى أكلات وبتطبطب أحنّ طبطبة! لسه فيه أغاني كتيرة عشانك ولسه هنشوف أفلام ومسلسلات سوا! مش عارفة أروح فين ولا أروح لمين غيرك، الأول كنت هركب طيارة وهجيلك، دلوقتي معرفش محتاجة أطلع كام سما، ولا أنزل كام أرض...

مش قادرة أقول رحمة ونور، مش قادرة أتخيل حتى إن بعد ما كنا بنقولها سوا عن حبايبنا أقولهالك! واحشاني يا حبيبتي يا سارّة وكنت بشتاقلك وأنا وأنتِ هنا هنا هنا، مش عارفة أعمل ايه دلوقتي ومحتاجة تقوليلي أعمل ايه؟ أعمل ايه يا حبيبتي؟ مش فاهمة، ومفيش غيرك هيفهمني من غير ما أتكلم حتى!

مستنياكِ يا سارّة، يا حبيبتي يا سارّة، وهفضل مستنياكِ...

"كلما قلتُ بقربي، تنطفي نيرانُ قلبي

زادني الوصلُ لهيبًا، هكذا حال المحبِ

لا بوصلي أتسلّى، لا ولا بالهجر أنسى

ليس للعشق دواءٌ، فاحتسبْ عَقلًا ونفسًا."

سامعاها بصوتك، أنا بحبك، وريتك تقبريني، وروحي فداكِ ومستنياكِ!

#y #23.8.2024