بما إن النهارده الخميس، وكده يبقى عدى بالظبط أسبوعين على بداية الموضوع، اختصاراً مشكلتي مع الأكل هي إني بدأت إني أحس بتقلصات في بطني و nausea من الأكل من يوم الخميس بالليل.
الأول أنا قضيت أول يومين تلاتة كده في حالة إنهيار وعياط بسبب موقفين تقال كانوا حصلوا معايا في وقت واحد منهم مشكلة في البيت كبيرة، فكده كده مفكرتش أدور على أكل أو أطلع آكل ولا كنت بعمل حاجة غير إني أعيط طول اليوم.
بعد اليومين تلاتة دول بدأت معدتي تنكمش لإني حرفياً مأكلتش فيهم أي حاجة وبقيت مبجوعش أساساً ولا ليا نفس للأكل.
فاست فورورد كمان كام يوم على الحال ده بدأت أحاول آكل بقى، لكن كنت كل ما آجي أضغط على نفسي وأجبرها وآكل أي حاجة برجعها. شوية بشوية الموضوع بقى مؤلم لجسمي ومرهق اوي وبقيت حاسة إني بفقد طاقتي مع الوقت.
زودت محاولات إني آكل أو أشرب أي حاجة وكنت حتى بجيب حاجات خفيفة وكمية قليلة وبرده مفيش فايدة مفيش حاجة ثبتت في بطني.
أول مرة أشرب حاجة كان بعد 5 أو 6 أيام تقريباً.
طبعاً المشروب اللي شربته مدانيش طاقة ولا حاجة ففضل جسمي في حالة وهن كده.
إلى جانب ده مكنتش بنام برده غير ساعتين تلاتة الصبح وخلاص على كده فحقيقي كان جسمي منهك جداً.
أنا مش فاكرج كل التفاصيل بس أعتقد أول أكل كان في اليوم التاسع. من وقتها بقى وأنا في محاولات مستمرة مع نفسي وأقصى تطور وصلتله إني يا آكل كورن فليكس، يا ربع ساندوتش لو عايزة الأكل يستقر في بطني. أي زيادة عن كده كنت برجع... ولازم كنت آكل على مراحل مش كله مرة واحدة.
بعد كده بقيت بجوع بقى جداً الحقيقة لكن برده مش قادرة آكل اللي يسد جوعي.
أول مرة امبارح من وقت اللي حصل كنت أنزل الشغل مع البنات وبصراحة فتحوا نفسي وأكلت على خفيف كده لما رجعت وبعدين عملت الغلطة بتاعة إني أزود شوية علشان كنت جعانة اوي فرجعت في الآخر.
النهارده بقى صحيت من النوم جعانة اوي وأكلت ساندوتش جبنة في فينو صغنون معاهم في الشغل والحمد لله مرجعتش. وبعدين قالوا نخرج نروح سينابون، روحت معاهم علشان بحاول اتخطى اللي انا فيه وأبقى كويسة وأكلت حتتين كده منها وبعدين قعدت أهبل بقى 😁
خدت الباقي طبعاً معايا وأنا ماشية وقومت جايبة تشيلاتا وبعدين عديت على ماكدونالدز جبت كيدز ميل ناجتس علشان كانت نفسي رايحة للناجتس اوي ... وكل ده بقى طبعاً مش قادرة آكله لإن من وقت الساندوتش وبعدها قطمتين السينابون وأنا بطني حاسة فيها صخرة وتعباني اوي. بس من شوية قولت لا أجوع بالليل ولا حاجة قومت جبت التشيلاتا شربتها وإني حالياً ندمانة ندم كبير من عدم الراحة اللي في بطني 😅 ربنا يستر بس وتفضل كل حاجة في بطني.
