- افكار مريضه فشخ - اقرأ علا مسئوليتك الخاصه
**أولا قبل ما تقرا دا حاول تتجرد من كل معتقداتك و ايديولوجياتك**
انتا تعرف انتا فين جوا جسمك ؟ او انتا ايه جوا جسمك ؟
انتا بتعرف تتحكم فجسمك مش اكتر , بتعرف تحرك ايدك اليمين لما تعوز و بتعرف تمشي و تنط
بس انتا فين بين ايدك و رجلك و كل جسمك دا ؟
طيب انتا ايه خلاك تقتنع ان روحك , أو ذاتك الحئيئيه دي كامنه جوا جسمك اصلن ؟ ما يمكن تكون فمكان تاني خالص
لما بتحلم انك بتقع من فوق جبل مثلا , انتا بتحس بكل جوانحك انك بتقع فعلا , بتحس حتا بالهوا بيخبط فوشك
و لما بتحلم انك -لا مؤاخذه- نايم مع واحده , كل حاجه فيك بردو بتبئا مقتنعه انك بتعمل كدا فعلن
انتا بئا عرفت منين ان الحياه اللي انتا عايشها دي موجوده فعلا و مش حلم كبير اوي ؟
ما يمكن روحك اللي فمكان ما مصورالك كل حاجه بتحصل حواليك , مصورالك الحياه الي انتا عايشها دي بكل تفصيله فيها
و ان اصلا مفيش وجود للوجود الي انتا شايفه و عايشه
انتا ليك اصحاب و معارف و ناس بتشوفها من بعيد لبعيد و ناس بتشوفها فالشارع مره و مش بتشوفها تاني ابدا
انتا عرفت منين ان الناس دي حئيئيه , موجوده و مدركه زيك كدا بالظبط ؟
ما يمكن كل دول موجودين علشان بس انتا تشوفهم ؟
و ان مفيش حاجه بتحصل خارج نطاق ادراكك ؟ مش يمكن اللعبه كلها معموله علشانك ؟
انتا بتشوف الاصفر و اخوك بيشوف الاصفر , و انتو الاتنين متفقين ان دا اصفر
بس انتا عرفت منين انك شايفو بنفس الطريئه الي اخوك شايفه بيها ؟
ما يمكن هوا شايف الاصفر احمر مثلا , بس الناس من و هوا صغير بيوروله دا و يئولو عليه اصفر
مش يمكن علشان كدا ازواق الناس مختلفه ؟ عشان كل واحد بيدرك الالوان و كل حاجه بطريئه مختلفه
انتا كنت ايه قبل بداية الخليقه ؟ ولا حاجه صح ؟
مهو لازم يكون فيه حاجه , الولا حاجه دا شيء معداش علينا كبنيآدمين ابدا
ايه مفهوم العدم ؟ ايه مفهوم الولا حاجه ؟
