MAHIRAP MAGMAHAL.
Mahirap magmahal lalo na kung ang pinanghahawakan mo lang ay yung salitang MAHAL KITA.
Mahal kita pero mas mahal ko siya.
Mahal kita pero bilang kaibigan lang.
Mahal kita pero hindi pwedeng maging tayo.
Mahal kita pero hanggang dito na lang tayo.
Mahal kita pero di ka nila gusto para sakin.
Sa dinami dami ng pero na pwede niyang sabihin, baka naman hindi ka talaga mahal kundi MAHALAGA lang.
Mahalaga tulad ng isang kagamitang ayaw mong mawala sayo.
Mahalaga tulad ng isang regalong ibinigay sayo ng taong malapit sa puso mo.
Mahalaga tulad ng pagpasa sa bawat pagsusulit sa paaralan.
Mahalaga tulad ng paborito mong laruan noong bata ka pa.
Mahalaga tulad ng isang pamilya, kamaganak o kaibigan.
Baka nga ganoon lang, baka nga mahalaga ka lang. Mahalaga ka sa kanya pero mahal mo siya. Ang sakit diba, sobrang MASAKIT MAGMAHAL.
Masakit magmahal lalo na kung pinaparamdam niya sayo na mahal ka niya pero malalaman mo na may iba pala.
Masakit magmahal lalo na kung yung natitirang pag-asa na mahalin ka niya ay biglang naglaho na parang bula.
Masakit magmahal lalo na kung magigising ka na lang isang araw tapos ay wala na siya.
Masakit magmahal lalo ng kung kailan ka hulog na hulog na ay saka ka niya bibitawan.
Masakit magmahal lalo na kung siya yung kaisa isang taong pakiramdam mo ay nagmahal din sayo ng totoo.
Masakit talaga ang magmahal pero hindi pa rin kaya ng taong bitawan ang pagmamahal. Patuloy ka pa ring nagmamahal kahit minsan hindi mo na kaya dahil sa dinami dami ng hirap at sakit na pinagdaanan mo dahil sa pagmamahal ay naniniwala ka pa ring MASARAP MAGMAHAL.
Masarap magmahal dahil ito yung nagpaparamdam sayo na nabubuhay ka.
Masarap magmahal dahil sa pagmamahal ka sumasaya ng sobra sobra kahit minsan ay para ka ng nababaliw.
Masarap magmahal dahil masarap yung pakiramdam ng may nagpapangiti, nagpapakilig, nagaalaga at nagpaparamdam sayo na mahal ka niya.
Masarap magmahal dahil ang sabi nga sa pinanood kong pelikula “It’s the closest thing we have to magic.”
Masarap magmahal dahil sadyang masarap magmahal.
Masarap magmahal kahit nasasaktan at nahihirapan ka. Kahit hindi pa ikaw ang piliin niya, kahit hindi pa ikaw ang mahalin niya. Ganoon naman diba pag nagmamahal ka, hindi ka dapat naghihintay ng kapalit dahil simula pa lang alam mo na, na hindi naman niya hiniling na mahalin mo siya, kusa mo siyang minahal. Pero sa kabila nito, hindi mo pa rin maiwasang UMASA.
Umasa na bukas paggising mo ay ikaw naman ang piliin niya.
Umasa na bukas ikaw naman ang mahalin niya.
Umasa na bukas kasama mo na siya.
Umasa na bukas magkaroon na ng “kayo”
Umasa ng bukas masaya na kayong magkasama.
Pero minsan hindi din maganda ang umasa dahil madalas yung pag-asa na yun ang unti unting umuubos sayo. Uubusin ka hanggang sa wala ng matira sayo, hanggang sa hindi mo na kayang magmahal pang muli. Kaya minsan, pag tingin mo at pakiramdam mo na wala na talaga, mahalin mo siya sa huling pagkakataon, pagkatapos ay BITAW NA.