“လာမည့်နှစ်သစ်တွင် စစ်ရေးပိုပြင်းထန်မည်ဟု KNU အသိပေး ”
စစ်တပ်ကို အပြောင်းအလဲ လုပ်ချင်တဲ့ သူတွေရှိမှာပဲ တပ်မှူး တပ်သားတွေက။ အဲဒီလိုတပ်မှူး တပ်သားတွေကလည်း အချိန်အခါကောင်းပဲဖြစ်တယ်။ ဒီလို အချိန်အခါကောင်းကို လုံး၀ အဆုံးအရှုံးမခံဘဲနဲ့ ၂၀၂၅နှစ်အတွင်းမှာ အမြန် ကျနော်တို့ လက်တွဲဖို့လိုတယ်" - ပဒိုစောတောနီး ဟန်နွေ/People’s Spring ၂၀၂၅နှစ်သစ်တွင် စစ်ရေးအသုံးပြုမှု ပိုမိုပြင်းထန်မည်ဖြစ်ကြောင်း ကရင်အမျိုးသားအစည်းအရုံး (KNU) ပြောရေးဆိုခွင့်ရှိသူ ပဒိုစောတောနီးက ပြောကြားခဲ့ပြီး စစ်ကောင်စီတပ်ကို အပြောင်းအလဲ ပြုလုပ်လိုသည့် တပ်မှူးတပ်သားများအတွက်လည်း အခွင့်အခါကျောင်းဖြစ်၍ လက်မလွှတ်ဘဲ တော်လှန်ရေးတပ်များနှင့် ပူးပေါင်းရန် ဖိတ်ခေါ်လိုက်သည်။
" ကျနော်တို့က စစ်ရေးနည်းလမ်းအရ မဖြေရှင်းချင်ပေမယ့်လို့ ကိုယ့်ကိုယ်ကိုယ် ခုခံကာကွယ်တဲ့နည်းရော စစ်အာဏာရှင်စနစ်လုံး၀ ချုပ်ငြိမ်းစေဖို့အတွက် စစ်ရေးနည်းလမ်းကတော့ မလွှဲမသွေကို သုံးသွားရမှာဖြစ်တယ်။ အဲဒါအပြင် လာမယ့် ၂၀၂၅မှာလည်းစစ်ရေးနည်းလမ်းနဲ့ ဖြေရှင်းမှုကလည်း ပိုပြီးပြင်းထန်လာမယ့်ဆိုတာ ရှင်းရှင်းလေး မြင်နေရတယ်ဆိုတာ ဘယ်လိုမှပြောစရာမရှိတော့ဘူး။ ဘာဖြစ်လို့လဲဆိုတော့ စစ်ရေးနည်းလမ်းနဲ့ ဖြေရှင်းမှပဲ ဒီလူ(စစ်ကောင်စီ)တွေက နားလည်မယ့်သူတွေဆိုတာ ကျနော်တို့ မြင်နေရတယ်"ဟု ပဒိုစောတောနီးက ပြောသည်။ နိုင်ငံရေးပြဿနာကို ဖြေရှင်းရာ၌ အကြမ်းနည်းမသုံးခြင်ကြောင်း၊ ငြိမ်းချမ်းစွာ အဖြေရှာလိုသော်လည်း စစ်ကောင်စီကဲ့သို့သောသူများနှင့်မည်သို့မှ စကားပြော၍ မရကြောင်း ၎င်းကဆိုသည်။
စစ်တပ်အတွင်း၌လည်း အပြောင်းအလဲ ပြုလုပ် လိုသည့် တပ်မှူးတပ်သားများ ရှိမည်ဟု ယုံကြည်ကြောင်းလည်း ပဒိုစောတောနီးက ပြောသည်။ " စစ်တပ်ကို အပြောင်းအလဲ လုပ်ချင်တဲ့ သူတွေရှိမှာပဲ တပ်မှူး တပ်သားတွေက။ အဲဒီလိုတပ်မှူး တပ်သားတွေက လည်း အချိန်အခါကောင်းပဲဖြစ်တယ်။ ဒီလို အချိန်အခါကောင်းကို လုံး၀ အဆုံးအရှုံးမခံဘဲနဲ့ ၂၀၂၅ နှစ်အတွင်းမှာ အမြန် ကျနော်တို့ လက်တွဲဖို့လိုတယ်”ဟု ပဒိုစောတောနီးက ပြောသည်။ စစ်တပ်သည် ပရော်ဖက်ရှင်နယ်စစ်တပ် တစ်ခု ဖြစ်လာရန်လိုအပ်သည်ဟု ၎င်းက ဆိုသည်။ တပ်မှူးတပ်သားများအနေဖြင့်လည်း ပြည်သူကိုအကာအကွယ်ပေးရန် တာဝန်ရှိသည့်အပေါ် ပြုပြင်ပြောင်းလဲရေးကို လုပ်ဆောင်ရန်လိုအပ်ကြောင်း ပဒိုစောတောနီးက ပြောသည်။
" မဟုတ်ဘူးဆိုရင် ၂၀၂၅က အင်မတန်ဆိုးဝါးတဲ့ စစ်ကောင်စီရဲ့ ကံကြမ္မာတစ်ခုကို ဖန်တီးတော့မယ်ဆိုတာရှင်းရှင်းလင်းလင်း မြင်နေရပြီ။ အနောက်ဘက်မှာရော အရှေ့ဘက်မှာရော မြောက်ပိုင်းဘက်မှာရော တောင်ဘက်ပိုင်းမှာရော ၂၀၂၅က သူတို့အတွက် ရွေးစရာကို မရှိတော့တဲ့ နှစ်တစ်ခုလို ဖြစ်သွားတော့မယ်ဆိုတာ ရှင်းရှင်းလင်းလင်းမြင်နေရတယ်”ဟု ပဒိုစောတောနီးက ပြောကြားသည်။ စစ်ကောင်စီအနေဖြင့် ၂၀၂၅တွင် ထွက်ပေါက်အဖြစ် ရွေးကောက်ပွဲ ပြုလုပ်မည်ဟု စိတ်ကူးပါက အိပ်မက်သပ်သက်သာဖြစ်မည်ဟုလည်း ပြောကြားသည်။ " ဘယ်လိုမှ မဖြစ်နိုင်ဘူး။ ကျနော်တို့ကလည်း ဒီလိုမျိုးဖြစ်မယ့်ဟာကို အဖြစ်ခံမှာ မဟုတ်ဘူး” ဟု ပဒိုစောတောနီးက စစ်ကောင်စီ၏ ရွေးကောက်ပွဲကို လက်မခံကြောင်း ပြောသည်။
စစ်ကောင်စီအနေဖြင့် လက်ရှိပုံစံအတိုင်း မိုက်ကမ်းစွာ ဆက်လက် လုပ်ဆောင်ပါက စစ်ကောင်စီတပ်ဖွဲ့ဝင်များ၏ နိဂုံး ကောင်းမွန်မည်မဟုတ်ဟုလည်း သတိပေးသည်။ " အဲဒါကြောင့်မို့လို့ အချိန်ရှိတုန်း ကျနော်တို့ ပြောနေတဲ့အချိန်မှာ သေချာနားထောင်ပြီး သေချာ ဆုံးဖြတ်ကြပါ။ အထူးသဖြင့် ပြုပြင်ပြောင်းလဲရေးလိုချင်တဲ့ စစ်တပ်ထဲမှာ ရှိတဲ့ တပ်မှူးတပ်သားတွေကို ကျနော်တို့ အဲဒါပြောချင်တယ်။” ဟုလည်း ပဒိုစောတောနီးက ပြောသည်။ KNUဗဟိုအနေဖြင့် စစ်တပ်အာဏာသိမ်းပြီးနောက်ပိုင်း စစ်ကောင်စီတပ်ဖွဲ့ဝင် သောင်းချီ ပြုန်းတီးအောင် တိုက်ခိုက်ချေမှုန်းနိုင်ခဲ့သည့် တိုင်းရင်းသား တော်လှန်ရေးတပ်ဖွဲ့ဖြစ်ပြီး စစ်ကောင်စီတပ်စခန်း ၁၄၀ ကျော်ကို သိမ်းပိုက်ထားသည်။ လတ်တလောတွင် KNU တပ်မဟာ(၆) နယ်မြေတွင် စစ်ကောင်စီတပ်နှင့် တိုက်ပွဲများနေ့စဉ်ဖြစ်ပွားလျက်ရှိရာ တော်လှန်ရေး ပူးပေါင်းတပ်များ၏ တိုက်ခိုက်မှုများကြောင့် စစ်ကောင်စီတပ် အထိနာလျက်ရှိသည်ဟု KNU ဗဟိုက ယနေ့ ထုတ်ပြန်သည်။
မြဝတီမြို့သို့ ထိုးစစ်ဆင်လာသော နိုင်ငံတော်အဆင့် အောင်ဇေယျစစ်ကြောင်းသည် မြဝတီမြို့သို့ မရောက်နိုင်ပဲ KNLAဦးဆောင်သော PDF ပူးပေါင်းတပ်ဖွဲ့များ၏ ပိတ်ဆို့တိိုက်ခိုက်မှုကြောင့် ရှေ့ဆက်မတိုးနိုင်ဘဲ ဒေါနတောင်ပေါ် တောနောရေတံခွန်အနီး၌သာ ပိတ်မိနေသည်။ ၂၀၂၄ ဒီဇင်ဘာ ၃၁ ရက်တွင်လည်း ကေအဲန်ယူ - တပ်မဟာ (၆) KNLAဦးဆောင်သော တော်လှန်ရေးပူးပေါင်းတပ်ဖွဲ့များ၏ ပိတ်ဆို့တိုက်ခိုက်မှုကြောင့် စစ်ကောင်စီတပ်သားတစ်ချို့သေဆုံးခဲ့ပြီး အမြောက်အများဒဏ်ရာရခဲ့ကြောင်း၊ စစ်ကောင်စီတပ်ထံမှ လက်နက်ခဲယမ်းတစ်ချို့ ထပ်မံသိမ်းဆည်းရမိခဲ့ကြောင်း ထုတ်ပြန်သည်။ ပိတ်မိနေသည့် စစ်ကောင်စီတပ်အနေဖြင့် လက်နက်ခဲယမ်းများ လျှော့နည်းလာပြီး ရိက္ခာများလည်း ပြတ်လပ်နေကြရာ ထိုစစ်ကြောင်းမှ စစ်သည်တစ်ချို့သည်လည်း အာဏာဖြင့် ညွန်ကြားလာသော အထက်အမိန့်အား မလိုက်နာနိုင်တော့ဘဲ အလံဖြူထောင်၍ တော်လှန်ရေးပူးပေါင်းတပ်ဖွဲ့ထံ အများအပြား အလင်းဝင်လာနေကြကြောင်း အသိပေးသည်။
KNU ဒူးပလာယာခရိုင်၊ တပ်မဟာ (၆)မှ ကျန်ရှိနေသေးသော စစ်ကောင်စီတပ်၏ဗျူဟာကုန်းနှင့် တပ်စခန်းများအား KNLA ဦးဆောင်သော တော်လှန်ရေးပူးပေါင်းတပ်ဖွဲ့များမှ နေရာအနံ့ နေ့စဥ်နှင့်အမျှ ပိတ်ဆို့တိုက်ခိုက်လျှက်ရှိနေပြီး ရန်သူအား ခြွေစစ်စနစ်ဖြင့် အမြှစ်ပြတ်သည်အထိ ဖော်ဆောင်လျှက်ရှိသည်ဟုဆိုသည်။
ခြွေစစ်စနစ်ဖြင့် အထိနာလျှက်ရှိသော စစ်ကောင်စီတပ်များသည် လက်နက်ကြီးများဖြင့် သော်လည်းကောင်း၊ လေယာဥ်အပြင် ဒရုန်းများဖြင့် သော်လည်းကောင်း တော်လှန်ရေးပူးပေါင်းတပ်ဖွဲ့များအား ပြန်လည်ဗုံးကြဲ ပစ်ခတ်လျှက်ရှိဟု အသိပေးသည်။
စစ်ကောင်စီတပ်၏ ပစ်ခတ်မှုကြောင့် တစ်ချို့သော လက်နက်ကြီးကျည်များမှာ ပြည်သူနေကျေးရွာများအတွင်းသို့ ကျရောက်ပေါက်ကွဲပြီး ကျေးရွာနေ ပြည်သူများလည်း ဘေးလွတ်ရာသို့ ထွက်ပြေးတိမ်းရှောင်နေကြရကြောင်း၊ ထိုကျရောက်ပေါက်ကွဲမှုကြောင့် ပြည်သူတစ်ချို့လည်း ထိမှန် သေဆုံး၊ ဒဏ်ရာရခဲ့ပြီး ပြည်သူပိုင် ဥယျဥ်ခြံမြေနှင့် အိုးအိမ်ပစ္စည်းများစွာလည်း ထိမှန်ပျက်စီးခဲ့ရကြောင်း အသိပေးထားသည်။
လာမည့်နှစ်သစ်တွင် စစ်ရေးပိုပြင်းထန်မည်ဟု KNU အသိပေး " စစ်တပ်ကို အပြောင်းအလဲ လုပ်ချင်တဲ့ သူတွေရှိမှာပဲ တပ်မှူး တပ်သားတွေက။ အဲဒီလိုတပ်မှူး တပ်
