AN SYUDAD
Sabi mo: "Maduman ako sa ibang banwa, ibang tampi, mahanap ibang syudad na mas maray kisa digdi. Ano man na baluon ko nakadestino nang magpalya asin an puso ko nakalubong na garo baga ini gadan. Hasta nuarin ko tutugutan an isip luway na malapa digdi? Sain man ako magsalingoy, sain man maghiling, maan ko an mga itom na guho kan sakong buhay, digdi kun sain ginasto an dakol na mga taon, linustay, rinaot nin bilog.” Dai ka makakadukay nin bagong rona, bagong tampi. Lalamagon ka pirmi kan syudad. Malakaw ka sa parehong mga tinampo, magurang sa parehong pagtaraid, uubanon digdi sa pareho man sanang mga harong. Pirmi kang mauli sa syudad na ini. Dai ka na maglaom sa iba pa: mayo nin barko para saimo, mayo nin dalan. Siring kan pagsayang mo kan buhay mo igdi, sa sadit na surok na ini, rinaot mo naman ini sa lambang gampi kan kinaban.
(Constantine Cavafy, “The City”)