#everydaystoryteller

[esraa-suza]

الكهربا امبارح قطعت علينا واحنا في الشُغل ومرجعتش فا مشينا بدري علي الض ُهرية كده، ومشيت في نفس الشارع اللي كنت بمشي فيه أيام الكلية *هو انا بعدي عليه كل يوم الصراحة بس مبحسوش غير في الضهرية* و قابلت طلبة الكلية وهما مروحين أو لسة رايحين، وهبت عليَا نسايم البُعد وتراب الوقت ده بالذات والفترة دي من العُمر..فرحِت كده شوية و نسيت

[esraa-suza]

ريحة المُعطر الجديد اللي جيبناه في الشُغل هيا نفس الريحة القديمة اللي كانت موجودة ساعتها أول ما اشتغلت، وكل أما يبخ بخة دماغي بتلف ويجي على بالي الشعور الأولي من الرهبة والفرحة والخوف وكل حاجة

[esraa-suza]

ماما بتحكيلي عن عيانة عندها في السبعينات مدندشة ف نفسها و حابة الحياة بتقولها و بتحكيلها عن زمان وانها لفت الدنيا و راحت أفراح كتير وكانت بتحب تساعد في حل المشكلات بتخيلني بعد سنين بس مش في السبعين، في الأربعين مثلاً وبخاف من الرقم المجرد وبخاف من اللي هيحصل، ياترى الست دي كان عندها نفس التخوف لما كانت قدي، ولا انا اللي مش بالشجاعة الكافية اللي تخليني أعيشها زي ما هيا و ما اهتمش ولا حتى أخاف!

[esraa-suza]

قبل السلام

بعد أما رقص رقصتُه الأخيرة اللي هتأهلة للفوز وجه تحية لأمه السيدة الكبيرة الساكنة في وسط الجمهور، من غير ما حد يدرى ولا يعرف عنها حاجة، سلم عليها و وجه التحية، الكاميرا زومت عليها والناس أدركتها، بصت لهم بخِفة ورجعت عينها صوب المكان اللي كانت فيه عليه هو وبس..هيا مش عايزة بصاتهم ولا محتاجة التحية..هيا عاشت طول عمرها محور حياتها ناس معينة، لا عمرها اتطلعت لشُهرة ولا حبيتها، بس هيا بتحبُه هو، ويمكن ده اللي خلى لشكل كسوفها معنى

[esraa-suza]

طيب، خليني أعترف اني ببعد عن الحاجات وببعد عن الكلام الحِلو وبعرض عنه لمجرد إني خايفة عليه من البوح، خايفة لما يظهر ويطلع ميبقاش بالشكل اللي أنا متصوراه..ميطلعش زي صورته اللي في خيالي خليني أعترف ان ده بيرهقني فعلاً..أنا عايزة وقادرة على الوصف بس الوصف مبيساعنيش..بيبعد عني في لحظة ما بحتاجه، بيخوني كتير، عشان كده ببعد عنه ومبقربش..بس هو اللي بيقرب.. هو اللي بينبش فيَا وعايزني اّخد الخطوة..وأنا لسة على عهدي القديم وخايفة