#filkasaysayan

[studythunder]

Eat (Grind), Sleep (Grind), Grind, Repeat: Isang Kritikal na Pagsusuri sa Bullet Journaling Trend

Una, ano ang bullet journal?

Isa itong personal na sistema ng pag-aayos na ginawa ni Ryder Carroll noong 2013. Ito ay mahihintulad sa isang planner, maliban na lang na ito ay personalized at walang limitasyon sa kung ano ang gustong gawin dito.

Para magsimula ng isang bullet journal, kinakailangan lamang ng kwaderno at panulat. Upang mas maunawaan paano iset-up ang bullet journal, maaaring pumunta sa https://bulletjournal.com/, ang opisyal na website na gawa ni Carroll. Maaari ring panoorin ang video (link sa baba) tungkol sa basics ng bullet journaling na ginawa ko noong nakaraang taon para sa isang proyekto sa Ingles.

Bullet Journaling 101 by Ann

[studythunder]

Kasaysayang Makikita sa Bullet Journal: Kasalukuyang Kamalayan

Ang bullet journal (o bujo, sa maikling salita) ay nilikha noong 2013 at patuloy na lumalaki ang komunidad ng mga taong gumagamit nito hanggang ngayon (Carroll, n.d.). Napakatanyag ng bullet journaling hindi lamang sa mga kabataan kundi sa mga matatanda rin sapagkat nakatutulong ito sa pag-ayos ng daloy ng kanilang buhay. 

Ngunit bakit nga ba kailangang ayusin o i-organize ang buhay? Galing dito, mahihinuha natin na busy at mabilis ang takbo ng mundo natin ngayon. Ang pagsikat ng bullet journaling at iba pang productivity techniques ay katunayan ng lipunang hinihimok ng kapitalismo. Gusto ng kapitalismo na productive ang mga tao dahil mas episyente ito sa paggamit ng mga limitadong resources, na nagdudulot sa mas mataas na kita. Mataas ang dinedemenda ng kapitalismo kaya’t dumarami ang gawain ng mga tao at umabot ito sa punto na ang oras para sa pahinga ay kinakain na rin ng pagtatrabaho (Gregg, 2015). Ito ang dahilan kung bakit nais ng mga taong kumapit sa mga sistemang nagbibigay sa kanila ng kontrol sa sarili nilang buhay, katulad na nga ng bullet journaling (Babur, 2018).

[studythunder]

Grind Culture

Ang bullet journaling ay tanyag sa mga social media gaya ng Tumblr, Instagram, at Youtube. Ang tumbalik nga eh, sapagkat isa sa mga layunin ng bullet journaling ay ang pagbibigay ng pahinga galing sa social media at teknolohiyang nakapalibot sa mundong ito na minsan ay nakasasakal na. Kahit ganun, patuloy pa rin ang pag-post ng mga tao sa kanilang mga maaayos at magagandang bullet journal spreads. 

https://www.instagram.com/eggyeul/

https://www.instagram.com/lilynzst/

Maliban sa pagpapakita ng pangangailangan ng lipunan ng validation galing sa social media, pinapakita rin nito ang pagpapahalaga sa grind culture. Ang grind culture ay ang pag-iisip na dapat walang tigil ang trabaho at okupado dapat ang isang tao mula umaga hanggang gabi. Alinsunod nito ang ideya na kapag mas busy o abala ka, mas tagumpay ka sa buhay (Johnson, 2020; Smoak, 2020). Siyempre, may ibang mga tao na nagpo-post sa social media dahil ito ang kasiyahan nila, ngunit hindi maitatanggi na isang pagmamalaki ang pagkakaroon ng bullet journal na punong-puno ng mga gawain at kaganapan dahil ibig sabihin nito ay may patutunguhan sila sa buhay. 

[studythunder]

Konsumerismo

https://www.instagram.com/p/B-gJE-5huLy/

Ang isa pang ipinapakita ng bullet journaling trend ay ang kultura ng konsumerismo. Sa larawan sa itaas, makikita na bukod sa bullet journal spread ay mayroong highlighters sa gilid. Maaaring isinama ito para mas maging mukhang estetik ang larawan, ngunit mahahanap ang produktong ito sa iba pang mga post sa ibaba.

https://www.instagram.com/p/CBa6u0rlrky/

https://www.instagram.com/p/CKO3NKLl9Z0/

Sa katunayan, ang highlighter na ito ay ang isang tatak na nagngangalang Zebra Mildliners, at ito ay isa lamang sa napakaraming popular na produktong makikita sa mga bullet journal na post. Bagama’t walang patakaran sa paggawa ng bullet journal na kailangang gamitin ang mga produktong ito, laganap pa rin ito sa komunidad. Dahil dito, nagkakaroon ng pressure na bumili kahit hindi naman kinakailangan, at ito mismo ay repleksyon ng kulturang konsumerismo sa lipunan (Campos-Ferreira, 2021; Whitman, n.d.). Kahit hindi sinasadya, napapalaganap ang pag-iisip na kailangang bumili ng mga materyal na bagay upang maging kaakit-akit sa sarili at sa iba.

[studythunder]

Worth it ba ang bullet journaling?

Bagama’t ang blog na ito ay itinatag ko noong 2019, nagsimula akong mag bullet journal noong 2015 pa lang. Noong una kong natuklasan ang sistemang ito, namangha ako sa ganda ng mga spreads kaya bilang isang batang mahilig lumikha, pinag-aralan ko ito. Nagsimula ang bullet journaling sa akin bilang isang outlet para sa creativity, ngunit tunay itong nakatulong sa aking maging mas organisado. Gayunpaman, minsan napapaisip ako kung sulit nga ba ang oras at mga taong ibinuhos ko rito. Oo, napadali nga nito ang pagtapos ko ng mga gawain, ngunit paano na ang ibang aspetong sinakripisyo ko? Gaya ng mga nabanggit ko sa pagsusuri, nadala rin ako noon sa grind culture at konsumerismo na pumapaligid sa bullet journaling. Naalala ko na kapag hindi ko natatapos lahat ng gawain sa to-do list ay unti-unti akong nagagalit sa sarili ko. Nahimaling din ako sa mga stationery, at tuwing pumupunta ako sa National Bookstore ay bumibili ako ng mga colored pens, brush pens, at iba pa na hindi ko naman na kailangan dahil sapat na ang koleksyon ko (siguro nakagastos na ako ng mahigit kumulang Php 10,000 sa kabuuan). 

Ngunit sa huli, masasabi ko naman na worth it ang pagtangkilik ko sa bullet journaling. Kahit may mga beses na hindi ito nakabubuti sa akin, sa tingin ko mas lamang pa rin ang pakinabang na nakuha ko rito. Natuto akong maging mas malikhain, maayos at responsable. Sobrang nakatulong din ang bullet journaling kapag nas-stress na ako sa dami ng gawain sa paaralan. Pagkalipas din ng panahon ay natutunan ko na ang halaga ko ay hindi nakabatay sa aking pagiging produktibo, at pinapayagan ko ang sarili ko na magpahinga habang hindi nanghihinayang sa “nasasayang” na oras. Hindi na rin ako gaanong nagpapadala sa pag impulse buy ng mga stationery dahil marunong na akong i-kontrol ang sarili ko. Hindi naman pala kasi bullet journaling ang ugat ng mga problema ko noon kundi ang sariling pag-iisip ko. Nawa’y balang araw ay magbago rin ang pag-iisip ng lipunan sa mga nakapapahamak na kaisipang pinapalaganap nito.

[studythunder]

Sanggunian:

Babur, O. (2018, October 22). Why do millennials love bullet journals? Control. Vox. Retrieved from https://www.vox.com/the-goods/2018/10/22/17996604/bullet-journal-control-planners-bando-appointed

Campos-Ferreira, D. (2021, February 11). Issues with the "studyblr" community: Her campus. Her Campus. Retrieved from https://www.hercampus.com/school/tcnj/issues-studyblr-community/

Carlos, D. (2019, December 30). Bullet journals are in, but so is my anxiety. Sunday Edit. Retrieved from https://edit.sundayriley.com/bullet-journal/

Carroll, R. (n.d.). The bujo backstory. Bullet Journal. Retrieved from https://bulletjournal.com/blogs/bulletjournalist/the-bujo-backstory

Cornell, B. (2021, May 14). The Hustle and the Burnout Culture: Why you're better off not feeding into it. collegelifetoday. Retrieved from https://www.collegelifetoday.com/blog/wellness/hustle-burnout-culture

Crestani, B. (2017, March 14). Why you need a bullet journal in your life. ACUITY. Retrieved from https://www.acuitymag.com/business/why-you-need-a-bullet-journal-in-your-life

Gregg, M. (2015, November 13). The productivity obsession. The Atlantic. Retrieved from https://www.theatlantic.com/business/archive/2015/11/be-more-productive/415821/

Johnson, S. (2020, February 12). Being obsessed with being productive ... is unproductive. The Washington Post. Retrieved from https://www.washingtonpost.com/lifestyle/wellness/being-obsessed-with-being-productive-is-unproductive/2020/02/11/82358570-437d-11ea-b5fc-eefa848cde99_story.html

Nathaniel, L. (2019, November 26). Grind culture. Medium. Retrieved from https://medium.com/@lewisibdp/grind-culture-e2aa2b84ab5c

Sanders, F. (2019, April 8). Why didn't bullet journaling work for me? Medium. Retrieved from https://medium.com/@freya.fms/why-didnt-bullet-journaling-work-for-me-784471717d6d

Smoak, M. (2020, December 11). The harm of America's obsession with productivity. The Horizon. Retrieved from https://horizon.westmont.edu/4521/oped/the-harm-of-americas-obsession-with-productivity/

Webb, A. (2019, November 6). Why it's finally time to put an end to toxic hustle culture. Study Breaks. Retrieved from https://studybreaks.com/college/ending-toxic-hustle-culture/

What are bullet journals & why are they so popular? The Online Pen Company. (n.d.). Retrieved from https://www.theonlinepencompany.com/blog/what-are-bullet-journals-why-are-they-so-popular

Whitman, L. E. (n.d.). Critical discourse analysis of an online studying community. Academia.edu. Retrieved from https://www.academia.edu/35034688/Critical_Discourse_Analysis_of_an_Online_Studying_Community