ازاي تنزل أحدث software عن طريق iTunes
أوقات كتير بتحصل لنا مواقف سخيفة إننا نحتاج إننا ننزل سوفتوير جديد بسبب مشكلة حصلت فجأة في الموبايل مثلا أو لأي سبب تاني, وأحيانا برضه بنحتاج إننا نعمل التحديث للسوفتوير عن طريق ال itunes بسبب مشكلة في الموبايل بتمنع إننا ننزل التحديث بالطريقة العادية, في اللحظة دي بتحس بتوتر وإنك مش هتعرف تعمل حاجة زي دي فالنهارده هنحاول نوصلك أد إيه الموضوع بسيط وإنها مجرد خطوات هنعملها وكل حاجة هتبقى تمام.
الأدوات
مش هتحتاج أكتر من كابل usb أصلي أو موثق من أبل، لابتوب أو كمبيوتر متوصل بإنترنت ثابت، itunes أحدث إصدار
ملحوظة : بمجرد ما بدأت الخطوات متشيلش الموبايل من الكابل خالص واتأكد إنك في مكان الإنترنت فيه مبيفصلش
الخطوات
في البداية هتوصل الموبايل بجهاز الكمبيوتر أو اللاب توب بتاعك، لو دي أول مرة توصله هيظهرلك رسالة على الموبايل بيسألك هل انت واثق في الجهاز ده ولا لأ، بعد إجابتك هيظهرلك على ال itunes فوق على الشمال شكل تليفون هتختاره
بعد ما تختار تليفونك هتختار Summary وهيظهرلك الصفحة زي اللي في الصورة بالظبط
في البداية أنصحك إنك تعمل backup قبل أي خطوة، من جزء Automatically back up اختار This Computer وبعد كده هتختار Back up now
أول لما ال Back up يخلص هنبدأ في تاني جزء وهو أساس موضوعنا النهاردة, زي ما وضحنا في البداية إنك احتمال تكون محتاج تعمل تحديث واحتمال تكون محتاج تنزل سوفتوير من البداية.
التحديث
من نفس الصفحة ( Summary) هتختار check for update وبعد كده هتختار Download and update
سوفتوير جديد
في الحالة دي موبايلك بيكون حصل فيه مشكلة ومحتاج سوفتوير، أنواع المشاكل إن يكون موبايل بيعمل Restart متواصل، بيكون ظاهرلك علامة ال itunes
في الحالات دي بتكون لازم تنزله سوفتوير جديد، المشكلة هنا إنك لو مش عامل Backup للأسف معظم الداتا هتروح ومش هتقدر ترجعها.
الخطوات
في حالة إن موبايلك من أول 5 لحد 6s+ هتوصل الموبايل باللاب توب أو الكمبيوتر وهتدوس على زرار ال power مع زرار ال Home وبمجرد ما الموبايل شاشته تقفل هتشيل إيدك من زرار ال Power وهتفضل ضاغظ على زرار ال Home
، لحد لما يظهرلك علامة زي الشكل اللي في الصورة، أما في حالة إن موبايلك أحدث من iPhone 6s+ بتعمل نفس الخطوات بس بدل زرار ال Home بتدوس علي الزرار المسؤول عن تخفيض الصوت.
بنفس الخطوات اللي عملناها في التحديث بس المرة دي هتختار Restore iPhone وهتنتظر إن الجهاز يرجع يشتغل بشكل طبيعي بعد انتهاء تنزيل السوفتوير
في المقال حاولنا نوضح الخطوات بشكل بسيط بس مستنيين الأسئلة بتاعتكم لو فيه أي حاجة مش واضحة أو أي مشكلة واجهتكم في أي خطوة من الخطوات اللي فاتت.