أرابيسك

[ahmed-beedo38]

اللهم جنبنا الحرام وولاد الحرام 🙏🏻

[ahmed-beedo38]

لو عاوز العالم ياخدك بجدية ويبطل يستهين بيك بشكل عام ف أول حاجة لازم تعملها إنك تخرج من دور المظلومية وتبطل تتكلم بوعي الضحية وتبطل ندب وصياح

جو أنا الدنيا جاية عليا ومحدش بيحبني ومليش أصحاب، عزيزي/ عزيزتي محدش بيحب يصاحب حد نداب وصيوح وشكاء بكاء، محدش ناقصه قرف في حياته، كلنا مكتفيين

تحياتي

[ahmed-beedo38]

أقولك مفاجأة؟ الدكتور والفقيه وعالم الذرة وبتاع البتنجان المخلل اللي انت بتستشيره في أي مسألة مفروض عليك تاخد حيثياته وتفكر فيها وتبحث وراه وتقرر بعدها إيه المناسب ليك وتعمله، لأن الشخص ده بشر وارد يكون علمه قاصر، ووارد يكون معندوش ضمير ولا بيراعي أمانة مهنته، ووارد يكون بيضلك بآرائه وأهوائه الشخصية

كام دكتور بيكتب دوا أو بيطلب من المريض فحوصات مش ضرورية لمجرد إنه متعاقد مع الشركة أو المركز اللي بيقدم الخدمة ف بياكل عيش من وراك؟ كام شخص محسوب علينا عالم دين وهو بيديك فتوى متفصلة على ذوقه أو ممكن يكون ناقلها من حد قالها من 1000 سنة وحتى مشغلش عقله فيها وغير متسقة مع الواقع والعالم فأضلك بيها وقلب حياتك جحيم؟

بقف كتير أوي عند آية "الذين ضل سعيهم في الحياة الدنيا وهم يحسبون أنهم يحسنون صنعا"، وآية "وقالوا ربنا إنا أطعنا سادتنا وكبراءنا فأضلونا السبيلا"، ف خد بالك انت مكلف تختار وهتتحاسب على اختياراتك قدام ربنا ف متسلمش دماغك لحد لأن "ولا تزر وازرة وزر أخرى"، لو هو هيتحاسب على الضلال اللي وقعك فيه، ف انت بردو هتتحاسب إنك خدت كلامه مسلمات ولم تتبين ولم تستخدم نعمة العقل والوسايل اللي ربنا وهبهالك خصوصًا في عالم مفتوح زي عالمنا والوصول فيه لأي معلومة لا يمنعه غير الكسل

وأخيرًا الحياة اختبارك انت، وبعدها هتقف قدام ربنا لوحدك وتتحاسب على أفعالك واختياراتك انت، مش هينفع تقوله يارب أصل هم قالولي، مش هينفع تعيشها بدماغ وآراء حد تاني، آه "فاسألوا أهل الذكر إن كنتم لا تعلمون" لكن ده من باب العلم مش أكتر والقرار في الأول والآخر ليك

ربنا ينور بصيرتنا جميعًا ويهدينا للحق والصواب ويرزقنا الوسيلة❤️

[ahmed-beedo38]

رُبما من أتقل الدروس اللي اتعلمتها بالهارد واي هي أن الحياة ما بتعتذرش. مفيش اعتذار هيجي. ولا كل الأسئلة اللي مخك بيسألها هيكون ليها إجابة. ولو فيه حكمة وراء الشيء مش دايما الأيام هتكون مُنصفة معاك وتاخد بإيدك ليها!

ممكن كل اللي هتطلع بيه الدرس اللي اتعملته، وأنك وقعتك المرة الجاية تكون أخف وتجاوزك ليها يكون أسرع!

[ahmed-beedo38]

[ahmed-beedo38]

من أعجب الحاجات في الكون بالنسبة لي هو الرزق، ما بفهموش والله، تبقى كل المعطيات قدامك بتقولك انت خسرت كل حاجة وربنا في لمحة يعوضك كأنك لم تخسر عمرك، سبحانك يارب في تدابيرك وقدرتك ❤️

[ahmed-beedo38]

لما بشوف حد الدنيا جت عليه وربنا جبر بخاطره، بفرح فرحتين فرحة إن الشخص ده أتعوض وفرحة إن دوري أكيد جاي لا محالة.

[ahmed-beedo38]

الموضوع بيبقى أصعب لما ما تبقاش حتى عارف إيه بيبسطك علشان تسعى له

[ahmed-beedo38]

ساعات كده هتضطر تعيش بشوية زعل صغيرين جواك عمرهم ما بيروحوا

[ahmed-beedo38]

التوقيت الرسمي لتربيط الخيوط ببعضها واكتشاف انك طول الفترة اللي فاتت كنت عبيط القرية في الحدوتة

[ahmed-beedo38]

فيه محاولات مستميتة لتصدير صورة مثالية عن كل شيء، كله بيعلّي على بعض عشان يثبت انتصارات وهمية في حياته المهنية، لحظات سعيدة في علاقة، خروجة رايقة ومليانة صور، فرح ما حصلش، من خلال صور كلها ضحك واوت فيتس ماحصلتش، بس بينسوا في النهاية أن كل ده Fake واللي مبسوط من حاجة فعلا في حياته مابيحاولش كل المحاولات دي عشان يثبت ويصدر أنه مبسوط.

[ahmed-beedo38]

- شيء صعب إنك تحس بكل تفصيلة ، تشوف الخوف و هو و بيتمشي براحته جوه دماغك و أنت بتحاول تهرب بلا جدوى ، و لو قررت تواجهه غالباً هتسلم له دماغك لعدم قدرتك على السيطرة .

شعور جعان بيلتهم كل شيء ممكن تحس بيه فرح حزن ضيقة لازم يكون رقم واحد، الموضوع أشبه بجرح معرض للهواء و كل ما الهواء يلمسه تتألم .

مش قادر أوصف قد ايه ده شعور مؤذي ، و بيعبث بالحاضر و الماضي و المستقبل

لو هتمنى حاجة واحدة بس هتكون إني اتجاوز الشعور ده و بس و يكون في فرصة لمشاعري الآخري تشم نفسها .

ارجوك خف يا خوف

[ahmed-beedo38]

فين ايام الاكتئاب الجميل اللي كان بيتراضى بشنطة حاجة حلوة من السوبر ماركت.

[ahmed-beedo38]

النهارده قرأت جملة ضمن مجموعة نصايح للصحة بتقول "استنضف في أي حاجة تدخل جسمك وأي حاجة بتستخدمها على جسمك" وحاسة إن كلمة "استنضف" قاعدة عامة تنفع لأي حاجة في الحياة

يعني بعد ما نطبقها على المثال اللي فوق استنضف في الناس اللي بتعرفهم، واستنضف في تعاملاتك، واستنضف في الكلام اللي بيطلع منك، واستنضف في المحتوى اللي بتشوفه أو بتقرأه، واستنضف في اللي ترتضيه لنفسك، واستنضف في أفكارك واللي بيدخل قلبك وهكذا

ف من الآخر استنضفوا يا جماعة لأن الحياة وسط النضافة جميلة أوي حقيقي✌️❤️

[ahmed-beedo38]

اكتشفت ان اختبارك في الدنيا اللي هتتعلمه من الناس اللي هتعدي عليك في حياتك موجود في أية "لن تستطيع معي صبرا"، القصة كلها في اشخاص بتستفز حاجات جواك انت لازم تتعلمها ومعندكش صبر تتعلمها على سبيل المثال لو انت شخص عصبي هيتكرر في حياتك ظهور الناس الباردة تلاجة، لحد ما تحاول تلاقي طريقة للتعامل معاهم فعصبيتك هتقل لحد ما يحصل التوازن الطبيعي، لو انت شخص معطاء بشكل اوفر مش هتقابل غير المستغلين والبخلا، لحد ما الصفة دي تتوازن وتدي بعقل، الدرس ده كلفني تلت عمري عشان اتعلمه بس هو مفتاح كل العلاقات في حياتك، يارب حد يستفاد منه.

[ahmed-beedo38]

كل يوم تقرر فيه تصحى تتجاهل فيه كل اللي كتمته في قلبك وتتعامل مع نفسك انه ما حصلش حاجة وتشرب قهوتك بتقرب أكتر لنسخة بشعة منك هتنفجر قريب لأتفه الأسباب.

[hamadaalam]

و اخرتها يا علي 💔