Untitled

[angkineeborah]

The mountains are my happy place https://www.instagram.com/p/CnjUWhdPBb5/?igshid=NGJjMDIxMWI=

[angkineeborah]

Hello 2023 #newyear #2023 https://www.instagram.com/p/Cm3qexUvs-D/?igshid=NGJjMDIxMWI=

[angkineeborah]

Dear 2022 Thanks for so many lessons Bye Bye https://www.instagram.com/p/Cm1kbLgvJOo/?igshid=NGJjMDIxMWI=

[angkineeborah]

বৰদিন স্পেচিয়েল প্লাম কেক বা ৰাম কেক। প্লামকেক বা ৰাম কেক বনাবলৈ, ড্ৰাই ব্লুবেৰি, কেনবেৰি,ৰেচবেৰি, স্ট্ৰবেৰী, কিচমিছ, ড্ৰাই চেৰি প্ৰায় তিনি মাহ মান ৰামত( মই অল্ড মংক ব্যৱহাৰ কৰিছো) ভিজাই ৰাখিছো। উপকৰণ 1. ময়দা ২ ১/২ কাপ ( ৬২৫ গ্ৰাম) 2. আন চুইটেন ক’ক’ পাউদাৰ ২০০ গ্ৰাম 3. চেনি ১ ১/৪ কাপ পিহি চালি লোৱা(৩১২ গ্ৰাম) মই মিছা অলপ কম দিও। বেছি মিঠা খালে ২ কাপ চেনি দিব পাৰে। 4. বেকিং পাউদাৰ ১ চাহ চামুচ 5. বেকিং চ’ডা ১/২ চাহ চামুচ 6. কনী ৪ টা 7. বাটাৰ ১/২ কাপ (১২৫ মিলি) 8. ৰিফাইন তেল ১/২ কাপ (১২৫ মিলি) 9. ৰাম( অল্ড মংক) ত ভিজাই থোৱা ব্লুবেৰি, ষ্ট্ৰবেৰি, ৰেচবেৰি,কেনবেৰি, কিচমিছ, চেৰি ১ কাপ( ২৫০ গ্ৰাম) 10. কাজু ৭৫ গ্ৰাম মিহিকৈ কটা 11. আমণ্ড ৭৫ গ্ৰাম মিহিকৈ কটা 12. সজাবৰ বাবে চেনিৰসত থোৱা চেৰি কেইটামান। প্ৰনালীঃ 1. প্ৰথমে আতাইখিনি শুকান উপকৰণ ভালদৰে চালি মিহলাই ল’লো। 2. এটা বাতিত কণী, ৰিফাইনতেল, গলোৱা বাটাৰ ভালদৰে ফেটি ল’লো। 3. শুকান মিশ্ৰণখিনিত জুলীয়া মিশ্ৰনখিনি দি ভালদৰে মিহলালো। ফেটিব নালাগে। এখন চেপেটা চামুচেৰে কাট এণ্ড ফল্ড কৰি মিহলাই ল’লো। লগতে বেৰিখিনি তিয়াই ৰখা ৰামৰ পৰাও ১/৪ কাম দি মিহলালোলো। যদি মিশ্সনটো অলপ টান হয় , অলপমান গাখীৰ দি জুলীয়া কৰি ল’ব পাৰে। 4. ৬ ইঞ্চিৰ কেক টিনত বাটাৰেৰে গ্ৰিজ কৰি কেকৰ মিশ্ৰনটো আধালৈকে ভৰাই ওপৰত চেৰি দি সজাই ল’লো। 5. অভেন ২৪০ ডিগ্ৰীত প্ৰিহিট কৰি একেই তাপত ২৫ মিনিট বেক কৰিলো এইখিনি উপকৰণেৰে ৬ ইঞ্চিৰ ৩টা কেক হৈছে। বেকিং পাউদাৰ বেছি হ’ল বাবে অলপ ফাটি গ’ল। সকলোলৈকে বৰদিনৰ শুভকামনা থাকিল। https://www.instagram.com/p/CmmC9FWvNYa/?igshid=NGJjMDIxMWI=

[angkineeborah]

বিনা চিজলাৰ ট্ৰেৰে ছিজলাৰ ট্ৰে।

মোৰ চিজলাৰ ট্ৰে নাই তথাপিও নোখোৱাকে থাকিম নে? চিজলাৰ ট্ৰে তৈয়াৰ কৰিলো,

ট্ৰেত আছে

1. ফ্ৰেন্স ফ্ৰাই

2. Stir frying পাচলি

3. গ্ৰিল চিকেন উইথ হট এণ্ড স্পাইচি চচ

4. গ্ৰিল টফু উইথ হট এণ্ড স্পাইচি চচ

5. গাৰ্লিক ৰাইচ

6. লেটুচ পাত সজাবৰ বাবে

প্ৰনালীঃ

1. ফ্ৰেন্স ফ্ৰাইঃ আলু দীঘল দীঘল কৈ কাটি তেলত ফ্ৰাই কৰি নিমখ আৰু পেৰি পেৰি মচলা দিলো

2. Stir fry পাচলিঃ ৰঙা, হালধীয়া, সেউজীয়া কেপচিকাম, ব্ৰকলি, ফ্ৰেন্সবিন, গাজৰ, পিয়াজ দীঘল দীঘলকৈ কাটি বাটাৰত জালুক আৰু নিমখ দি হাই ফ্লেমত ভাজিলো।

3. গ্ৰিল চিকেনঃ বনলেচ চিকেনত আদা নহৰু পেষ্ট, চিলি ফ্লেক্স, জালুক, চয়া চচ দি বাটাৰত এখন কেৰাহীত কম জুইত ভাজিলো।

4. টফু( চয়া গাখীৰৰ পনীয় জাতীয় খাদ্য(ভিগানৰ বাবে) কেৰাহিত বাটাৰত গ্ৰিল কৰিলো।

5. টফু আৰু চিকেনৰ চচঃ এখন কেৰাহিত বাটাৰ আৰু অলিভ অইল গৰম কৰি, নহৰু পিয়াজ ভাজিলো। দুই চামুচ ময়দা দি ভালদৰে ভাজিলো। টমেট চচ, চিলি ফ্লেক্স, জালুক গুৰি, চয়া চচ, চিলি চচ মিহলাই কম জুইত ৫মিনিট ভালদৰে হাই ফ্লেমত সিজাই ডাঠ চচ বনালো।

6. গাৰ্লিকৰ ৰাইচঃ এখন কেৰাহীত বাটাৰ গৰম কৰি কুটা নহৰু আৰু পিয়াজ দি আগতে বনাই থোৱা ভাত দি , জালুক , নিমখ আৰু ধনীয়া দি ভালদৰে মিলালো।

পৰিবেশনঃ

এখন প্লেটত লেটুচ পাত দি গাৰ্লিক ৰাইচ, ফ্ৰেন্স ফ্ৰাই, পাচলি ভজা, চিকেন আৰু টফু আৰু চচ দি পৰিবেশন কৰিলো।

এনেদৰো চিজলাৰ প্লেটত দিলে আৰু ভাল লাগে।

[angkineeborah]

মই মোৰ মাক ২০০৪ চনতে হেৰুৱাইছিলো কেঞ্চাৰৰোগত। ২০০৩ চনত জণ্ডিছ হোৱাৰ বাবে ডাক্টৰৰ ওচৰলৈ যাওতেহে ধৰা পৰিল যে অভেৰিত চিষ্ট আছে আৰু অতি সোনকালে অপাৰেচন কৰিব লাগিব। মাৰ তাৰ আগলৈকে একো অসুখ নাছিল। মোৰ মনত পৰাৰে পৰা পানীলগা জ্বৰৰো দৰব এটা খাই পোৱা নাছিল। মায়ে আনকি তামোল এখনো নুচুইছিল, নাখাইছিল। কিন্তু মাৰ কেঞ্চাৰ হ’ল।

মই ছবি মিট্টল নামৰ এগৰাকী ইউটিউবাৰক ফ’ল কৰো। SIT বুলি চোনেল এটা আছে , তাত ১৫/২০ মিনিটৰ ভিডিঅ’ আহে, চাই বিৰাট ভাল লাগে। তাত ছবিয়ে ৰোহিনী নামৰ চৰিত্ৰ এটা ৰুপায়ন কৰে। মই মাজে মাজে তেঁওৰ বিয়িং উমেন উইথ ছবি বোলা চেনেলটোও চাও। ৪১ বছৰীয়া , খুব এনাৰ্জেটিক এগৰাকী মহিলা। পাৰ্ফেক্ট বডি, খুউব হেল্ডি লাইফষ্টাইলত থকা মহিলা। এজনী ৭ বছৰীয়া ছোৱালী আৰু ২ বছৰীয়া ল’ৰা আছে তেঁওৰ। তেঁও বিৰাট সুন্দৰকৈ ল’ৰা ছোৱালীহাল ডাঙৰ কৰিছে। কিন্তু আজি এসপ্তাহৰ আগত তেঁও চচিয়েল মিডিয়াৰ যোগে এনাউন্স কৰিলে যে তেঁওৰ ব্ৰেষ্ট কেঞ্চাৰ ডিটেক্ট হৈছে, ষ্টেজ ২। ইমান হেল্ডি লাইফ জীয়াই থকাৰ পাছতো আৰম্ভনিৰ ষ্টেজত গমেই নাপালে।

ইমান খিনি লিখাৰ কাৰণ কেইটামান আছে, বিশেষকৈ মহিলা সকলৰ বাবে

আমি মহিলা সকলে নিজৰ স্বাস্থ্যৰ প্ৰতি বেছি ধ্যান নিদিও,গাৰ জ্বৰ গাতে যাই বুলি আনৰ আগত ফুটনিহে মাৰো।

কিন্তু মহিলা সকলৰ মাজত ব্ৰেষ্ট কেঞ্চাৰ হোৱাৰ সম্ভাবনা অত্যাধিক। ইয়াৰোপৰি অভাৰিয়ান আৰু এণ্ড্ৰমেট্ৰিয়েন কেঞ্চাৰো আছে। সেয়ে ৩০ বছৰৰ পাৰ কৰা পাছৰ পৰা ছমাহত এবাৰ ফুলবডি চেক আপ কৰাটো অতি জৰুৰি। আজিকালি ১০০০/১২০০তে ফুলবডি চেকআপ হৈ যায়। ইয়াৰোপৰি প্ৰতিমাহে আইনাৰ আগত থিয় হৈ নিজৰ বক্ষযুগল হাতেৰে টিপি টিপি পৰীক্ষা কৰিব লাগে। যদি দুয়োটা বক্ষৰ আকাৰ অসমান বা ভিতৰত কোনো গোটা বস্তুৰ অৱস্হিতি আছে যেন লাগে অনতি পলমে ডাক্টৰক দেখুৱাব লাগে। কেনেদৰে বক্ষযুগল পৰীক্ষা কৰিব তাৰ বহুত ভিডিঅ’ ইউটিউবত পাই যাব।

ইয়াৰোপৰি তলৰ কথাকেইটাও মহিলা সকলে গুৰুত্ব দিয়া উচিত।এইবোৰৰ কেঞ্চাৰৰ লক্ষণ বুলি ডাঠি ক’ব নোৱাৰি , কিন্তু এনে হ’লে এবাৰ ডাক্টৰক দেখুৱাই নিচিন্ত হৈ লোৱা ভাল।

১.পিৰিয়ডচৰ বাহিৰে যদি এবনৰমেল ভেজিনেল ব্লিডিং হৈ আছে।

২. ডায়েট বা এক্সচাইজৰঅবিহনে আনএক্সপেক্টেড ৱেইট লচ।

৩.ক’লা , দাঠ, বেয়া গোন্ধ যুক্ত ৰক্তস্বাব।

৪. পেলভিচ অংশ আৰু পেটৰ বিষ

লগতে পৰিয়ালৰ অতীত বৃতান্ত থাকিলেও সাবধান হোৱা উচিত।

অলপমান কেয়াৰ ল’লে আমি কেঞ্চাৰৰ দৰে ৰোগক প্ৰথম ষ্টেজতে ধৰাপেলাব পাৰো আৰু তেতিয়া সুষ্ঠ হৈ উঠাৰ প্ৰক্ৰিয়া সোনকাল হয়।

আৰু এটা কথা, পুৰুষ- মহিলা সকলোৱে এটা মেডিকেল ইঞ্চুৰেন্স কৰাই থোৱাটো অতি জৰুৰী।আজিৰ চিকিৎসা খৰচ ইমান বেছি। কেঞ্চাৰ বুলি নহয় আন বেমাৰৰ বাবেও বহুত দৰকাৰী। আননহ’লেও অটল অমৃত কাৰ্ডখন উলিয়াই থোৱা ভাল

[angkineeborah]

#কাবেৰীৰ_কাহিনী

মই যেতিয়া ফুৰিবলৈ যাও মোৰ দুটা বস্তুৰ প্ৰতি ভীষণ আকৰ্ষণ আছে। এটা হ’ল দুখন দেশৰ বৰ্ডাৰ চোৱা আৰু আনটো হ’ল নদী এখনৰ আৰম্ভনি আৰু সাগৰত মিলিত হোৱা শেষ অংশটো ছোৱা।

কেইবছৰমান আগতে কাবেৰী নদীৰ তামিলনাডুৰ পুম্পুহৰ নামে ঠাইত সাগৰত মিলিত হোৱা দেখিছিলো আৰু দুমাহ মান আগতে কৰ্ণাটকাত পশ্চিমঘাটত পৰ্বতমালাৰ ব্ৰহ্মগিৰিক টালা কাবেৰী নামৰ ঠাইৰ পৰা কাবেৰী নদী আৰম্ভ হোৱা ঠাইখিনিও দেখাৰ সৌভাগ্য হৈছিল।

লগতে নদী এখনৰ লগত জড়িত পৌৰাণিক কথাও জানি বৰ ভাল লাগে। প্ৰথমে কাবেৰী নদী কেনেকৈ জন্ম হৈছিল তাক শুনি লও।

এসময়ত ভাৰতবৰ্ষত এজন খুব বিনয়ী, ভাল ৰজা আছিল, যাৰ নাম আছিল কাৱেৰ।তেঁও ভগৱান শিৱৰ খুব ভক্ত আছিল আৰু সদায় তেঁওৰ প্ৰজাগনৰ ভালৰ বাবে কাম কৰিবলৈ প্ৰস্তুত আছিল। তেঁওৰ বহু বছৰ যোৰা সাধনাত সন্তুষ্ট হৈ শিৱই তেঁওক এগৰাকী কণ্যাৰ পিতৃ হোৱাৰ সৌভাগ্য প্ৰদান কৰিলে আৰু সেই দেৱকণ্যাৰ নাম ৰখা হ’ল কাবেৰী। কাৱেৰী ডাঙৰ হোৱাৰ পাছত বিখ্যাত মুণি অগস্ত্যৰ লগত বিবাহ কাৰ্য সম্পন্ন কৰা হয়।সকলো সুকলমে চলি থকাৰ মাজতে ৰজা কাৱেৰৰ ৰাজ্যত সুৰাপদ্মা নামৰ ৰাক্ষসে আহি আমনি দিবলৈ ধৰিলে আৰু নিজৰ শক্তিৰে ৰাজ্যত বৰষুণৰ এটা কণিকাও পৰিবলৈ নিদিলে, ফলত ৰাজ্যৰ নদ নদীবোৰ শুকাই গ’ল। এদিন অগস্ত্য মুনি গা ধুবলৈ বুলি ওলাই যাবলৈ লওতে, তেঁও পত্নী কাবেৰীক অকলে এৰি যাবলৈ ভয় কৰি কমন্ডলুতে এচলু পানীলৈ ৰূপান্তৰিত কৰি লগত লৈ গ’ল। তেও গৈ এখন মৃতপ্ৰায় নদীৰ কাষ পালগৈ আৰু কমন্ডলুটো নদীৰ কাষত ৰাখি নদীত নামিল। তাকে দেখি ভগবান গনপতিয়ে এটা গৰুৰ ৰূপলৈ কমন্ডলুটোত থেলামাৰি দিলে আৰু তাত পানীৰ ৰূপত থকা কাবেৰী এখন বৃহৎ নদী হৈ ববলৈ লাগিল।

কাবেৰী নদী কৰ্ণাটকাত আৰম্ভ গৈ তামিলনাডুৰে বৈ গৈ সাগৰত পৰিছেগৈ। পুৰণি তামিল সাহিত্যত কাবেৰীক পুন্নি বুলিও উল্লেখ কৰা আছে। গোদাৱৰী আৰু কৃষ্ণাৰ পাছত কাবেৰী দাক্ষিনাত্যৰ তৃতীয় বৃহৎ নদী। দক্ষিণভাৰতত কাবেৰী নদীৰ কাবেৰীআম্মাৰ ৰূপে পুজা কৰা হয়।

কৰাগু পৰ্বতৰ পৰা ওলাই কাবেৰী নদীয়ে ডেক্কান অধিত্যকাৰে বৈ গৈ মাণ্ডিয়া জিলাত দুটা নদীদ্বীপৰ সৃষ্টি কৰিছে, শ্রীৰংগাপটনা আৰু শিভানাসমুদ্ৰা।শিভানাসমৱদ্ৰাত নদীখনে বিখ্যাত শিভানাসমুদ্ৰা জলপ্ৰপাতৰ সৃষ্টি কৰিছে। এই জলপ্ৰপাততে এছিয়াৰ প্ৰথমটো হাইড্ৰলিক পাৱাৰ প্লান্ট ১৯০২ চনতে বনোৱা হৈছিল।

কাবেৰী নদীয়ে কৰ্ণাটকাৰ পৰা তামিলনাডৱ সোমোৱাৰ সময়ত ধৰ্মপুৰী জিলাত হক্কেনাক্কল জলপ্ৰপাতৰ সৃষ্টি কৰিছে । যোৱা দেওবাৰে মোৰ হক্কেনাক্কল জলপ্ৰপাত দেখাৰ সৌভাগ্য হৈছিল। সেইয়া পাছত লিখিম।

তামিলনাডুৰ মাজেৰে বৈ গৈ মাইলাড়ুটুৰাই জিলাৰ পুম্পুহৰত বংগোপ সাগৰত মিলিত হয়।

এইয়া হৈছে হিন্দুসকলৰ পবিত্ৰ কাবেৰী নদীৰ কাহিনী।

ফটোত কাবেৰী নদীৰ আৰম্ভনি আৰু সাগৰত মিলিত হোৱা দুয়োঠাইৰে ফটো দিয়া হৈছে।

[angkineeborah]

মোৰ তিৰুমালা তিৰুপতি মন্দিৰ দৰ্শন

বহুত বছৰৰ আগতেই মন বান্ধিছিলো, এবাৰ তিৰুপতি বালাজী মন্দিৰলৈ যাম। অন্ধ্ৰ প্ৰদেশৰ চিত্তৰ জিলাত তিৰুমালা পাহাৰৰ ওপৰত আছে শ্রী ভেংকটশ্বৰা স্বামীৰ মন্দিৰ। এই মন্দিৰ শ্রী ভেংকটশ্বৰা স্বামী মানে বিষ্ণুৰ আন এটা ৰূপত উৎসৰ্গিত। মন্দিৰভাগক তিৰুপতি মন্দিৰ আৰু তিৰুপতি বালাজী মন্দিৰো বোলা হয়।বিশ্বাস আছে যে কলি যুগত হোৱা অনাচাৰক বাধা দিবলৈ তেঁও ইয়াত বিৰাজমান।সেয়ে এই ঠাইখণ্ডক কলি যুগৰ বৈকুন্ঠ বুলিও কোৱা হয় ।

এই মন্দিৰ তিৰুমালা তিৰুপতি দেৱস্হানম নামৰ কমিটিৰ দ্বাৰা পৰিচালিত যিটো অন্ধ্ৰ প্ৰদেশ চৰকাৰৰ অন্তৰ্গত।

তিৰুমালা পাহাৰ শেষাচালেম নামৰ পৰ্বতমালাৰ এটা অংশ আৰু সাগৰপৃস্থৰ পৰা ২৭৯৯ ফুট ওপৰত অৱস্থিত। এই পৰ্বতমালাৰ সাতটা শৃংগ আছে যি শেষনাগৰ সাতটা মুৰক দৰ্শাই।তিৰুপতি বালাজী মন্দিৰ এই শৃংগমালাৰ সাত নম্বৰ শৃংগ যিটো শ্রী স্বামী পুষ্কাৰিনী নামৰ প্ৰবিত্ৰ পুখুৰীৰ দক্ষিন ফালে আছে , ভেংকটাদ্ৰি তাত অৱস্থিত।

তিৰুমালা বালাজী মন্দিৰৰ বিষয়ে এটা সুন্দৰ কাহিনী আছে। প্ৰথমতে সেইটোকে কৈ লঁও।

দ্বাপৰ যুগৰ সময়ত আদিশেষ বা শেষনাগ বায়ুৰ লগত এটা বাজিত পৰাজিত হৈ শেষচালেম পৰ্বতত থাকিবলৈ লয়।

কলি যুগৰ সময়ত কেইজনমান ঋষি মুনিয়ে যজ্ঞ কৰি থাকোতে নাৰদ মুনিয়ে আহি ক’লে যে যজ্ঞৰ ফল ত্ৰিমুৰ্তি, ব্ৰহ্মা , বিষ্ণু মহেশ্বৰৰ মাজত কাক দিয়া যাব? সকলোৰে মাজত আলোচনা হ’ল আৰু শেষত, ভৰিৰ তলুৱাত এটা অতিৰিক্ত চকু থকা ভৃগু ঋষিক তিনিওজনৰে পৰীক্ষা ল’বলৈ পথোৱা হ’ল।

তেওঁ গৈ ব্ৰহ্মা আৰু শিৱৰ ওচৰত পালেগৈ কিন্তু দুয়োজনেই তেঁওক আওকান কৰিলে। ভৃগুৱে খঙত তিঙিৰিতুলা হৈ ব্ৰহ্মা আৰু শিৱক শাপ দিলে যে মৰ্ত্যত ব্ৰহ্মাক কোনেও পুজা নকৰিব আৰু শিৱৰ কেৱল লিংগৰহে পুজা হ’ব, মুৰ্তিৰ পুজা কৰা নহ’ব। খঙে কোপে জৰ্জৰিত হৈ ভৃগু ঋষি বিষ্ণুৰ কাষ পালেগৈ। বিষ্ণুৱেও জানি বুজি ভৃগু ঋষিক আওকাণ কৰিলে।এই কথাত খং খাই ভৃগু ঋষিয়ে বিষ্ণুৰ বুকুত গোৰ মাৰি দিলে।ভগবান বিষ্ণুৱে খং নকৰি ভৃগুৰ ভৰি মোহাৰি ক্ষমাহে খুজিলে। কিন্তু এই কথা লক্ষ্মী দেৱীয়ে অপমানিত বোধ কৰিলে যিহেতু বিষ্ণুৰ বক্ষস্থলত লক্ষ্মী দেৱীয়ে বাস কৰে। সেয়ে তেঁও বৈকুন্ঠৰ পৰা আহি কোলহাপুৰত যোগসাধনা কৰিবলৈ ল’লে।

বিষ্ণুৱেও লক্ষ্মী দেৱীৰ সন্ধানত মৰ্ত্যলৈ আহি শ্রীনিৱাস ৰূপলৈ তিৰুমালাত যোগ সাধনা কৰিবলৈ ল’লে। লক্ষ্মী দেৱীয়ে শ্রীনিবাসৰ কথা গম পাই ব্ৰহ্মা আৰু শিৱক প্ৰাৰ্থনা জনালে।

ব্ৰহ্মা আৰু শিৱই নিজকে গাই আৰু দামুৰিলৈ পৰিবৰ্তিত কৰিলে আৰু লক্ষ্মী দেৱীয়ে সেইসময়ত তিৰুমালা শাসন কৰা চোলা বংশৰ ৰজাক সেই গাই দামুৰী অৰ্পন কৰিছে। গাইজনীয়ে চৰিবলৈ যাওতে শ্রীনিবাসক সদায় গাখীৰ দিয়া আৰম্ভ কৰিলে। কিন্তু তাকে দেখি গৰখীয়া ল’ৰা এজনে গাইজনীক মাৰিব খোজাত শ্রীনিবাসে আঘাট খিনি গাত পাতি ল’লে। এইকথাত ক্ৰোধান্বিত হৈ শ্রীনিবাসে চোলা ৰজাক অসুৰ হ’বলৈ শাপ দিলে। ৰজাই ক্ষমা ভিক্ষা কৰাত শ্রীনিবাসে ক’লে যে ৰজাই অক্ষৰাজ হৈ জন্ম ল’ব আৰু তেঁওৰ জীয়ৰী পদ্মাৱতীক শ্রীনিবাসলৈ বিয়া দিলেই পাপ খণ্ডন হ’ব।

কথামতেই শ্রীনিবাসে পদ্মাৱতীৰ লগত বিবাহ কৰি তিৰুমালা পাহাৰত থাকিবলৈ ল’লে। এই কথা গম পাই লক্ষ্মী দেৱী খঙে ৰোষো আহি পদ্মাৱতীৰ লগত বাক বিবাদত লাগি গ’ল। শ্রীনিবাসে দুয়োৰে কাজিয়া সহিব নোৱাৰি , তাতে এক শিলাখণ্ডলৈ ৰূপান্তৰিত হ’ল।

ব্ৰহ্মা আৰু শিৱই আহি লক্ষ্মী দেৱী আৰু পদ্মাৱতী দুয়োকে এইবোৰৰ আৰত থকা কাৰণটো অৱগত কৰিলে যে বিষ্ণুয়ে শেচাচেলাম পৰ্বতত থাকি কলি যুগত হোৱা অন্যায় অবিচাৰ পৰা মানুহক বচাব। ইয়াকে শুনি লক্ষ্মীদেৱী আৰু পদ্মাৱতী দুয়ো শিলাৰূপ ধাৰণ কৰিলে আৰু লক্ষ্মী দেৱী শ্রীনিবাসাক বুকুৰ বাওফালে আৰু পদ্মৱতী সোঁ ফালে বিৰাজমান হৈ ৰ’ল।

966CE ত মন্দিৰটোৰ প্ৰথম পল্লব বংশ ৰাণী চামাভাই সজাৰ নিদৰ্শন পোৱা যায় । তাৰ পাছত চোলা বংশৰ আৰু শেষত বিজয়নগৰ সাম্ৰাজ্যৰ কৃষ্ণদেৱাৰায়ায়ে মন্দিৰটো সজাইছিল।

বাৰু ইতিহাস বহুত হ’ল। মুল কথালৈ আহো।

২০১৯ চনৰ ৬ নম্বেবৰত মোৰ চুলিখিনি কৰ্কট ৰোগীৰ বাবে দান দিওতেই ভাবিছিলো মই তিৰুমালা শ্রী ভেংকটশ্বৰা মন্দিৰলৈ যাম। কিয়নো এই মন্দিৰৰ এটা প্ৰথা আছে, বহুতে মনৰ আশা পুৰ্ণ হ’বলৈ ভগবানক প্ৰাৰ্থনা কৰে আৰু পুৰণ হোৱাৰ পাছত এই মন্দিৰত গৈ চুলি খুৰাই দান দিয়ে পুৰুষ মহিলা শিশু সকলোৱে। চুলি আমাৰ সকলোৰে প্ৰিয়, বিনা চুলিত আমি আমাক ধুনীয়া নেদেখো। সেয়ে চুলি দান কৰাৰ অৰ্থ হ’ল আমি আমাৰ অংকাৰৰ শেষ হ’বলৈ দিও। মানসিক ফালৰ পৰা , ব্যক্তিগত অভিজ্ঞতাৰ পৰা কও, দেখিবলৈ শুনিবলৈ সহজ, কিন্তু চুলি খুৰাই দিয়াতো সহজ নহয়।তিৰুপতি দান দিয়া চুলিখিনিও আৰ্তজনৰ বাবে উইগ বনোৱাত ব্যৱহাৰ কৰা হয়।

মই সাধাৰণতে অকলেই ফুৰো যদিও সময়ৰ নাতনিৰ বাবে এইবাৰ টুৰ পেকেজ এটা ল’লো। ২৫০০ টকাত এচি চেমি শ্লিপাৰ বাচত বাংগালোৰৰ পৰা লৈ গৈ দৰ্শন কৰোৱাই আকৌ বাংগালোৰলৈ ওভটাই আনিব, মুঠ ২৪ ঘন্টা। ইয়াৰ লগত ভি আইপি দৰ্শনৰ ৩০০ টকা মুল্যৰ টিকট, ব্ৰেকফাষ্ট, লান্স অন্তৰ্গত ।

ৰাতি ১১ বজাত বাংগালোৰৰ পৰা যাত্ৰা আৰম্ভ হ’ল। আৰামদায়ক বাছখনে নি তিৰুপতি পোৱালেগৈ পুৱা ৩.৩০ বজাত। তাত নি এখন হোটেলত সকলোকে সুকীয়া ৰুম দিয়া হ’ল গা পা ধুই কাপোৰ সলাই ল’বলৈ। তিৰুপতি মন্দিৰৰ ড্ৰেছ কোড আছে। মহিলা সকলে শাৰী , হাফ শাৰী আৰু চালোৱাৰ কামিজ পিন্ধিব লাগিব। কুৰ্টাৰ লগত জিন্স পেন্ট বা লেগিংচ পিন্ধিব নোৱাৰিব। পুৰুষৰ বাবে ধুতি -কুৰ্টা/চাৰ্ট বা কুৰ্টা পাইজামা।

গৰম পানীৰে গা মুৰ ধুই , মেখেলা চাদৰ এযোৰ পিন্ধি , গামোচাখন কান্ধত লৈ ওলাই আহো মানে ৪ বাজিছে। বাহিৰত তেতিয়াও আন্ধাৰ। এইবাৰ আমাৰ বেগবোৰ আমি বাংগালোৰৰ পৰা অহা বাছ খনত থৈ আন এখন বাছত বহি ল’লো। এইখন বাছে তিৰুপতিৰ পৰা তিৰুমালা পাহাৰত থকা শ্রী ভেংকটশ্বাৰা স্বামীৰ মন্দিৰলৈ। বাছত বহাৰ লগে লগে আমাক টিকটৰ কপিও দি দিলে। মাজ ৰাষ্টাত এবাৰ টিকট আৰু হাতৰ সৰু বেগটো স্কেন কৰাৰ পাছত পাহাৰৰ অকোৱা পকোৱা ৰাষ্টাৰে ওপৰলৈ ৰাওনা হ’লো। ইতিমধ্যে পাহাৰৰ মাজৰ পৰা ধলফাঁট দি বেলিটো ওলাই আহিছিল। তিৰুমালা পাহাৰৰ ওপৰত মন্দিৰ প্ৰাংগন পোৱাৰ পাছত যি সকলে কেশদান কৰিব , তেওলোকক এঠাইত নমাই দি বাকী সকলক ৰাতিপুৱাৰ আহাৰৰ বাবে অন্ধ্ৰপ্ৰদেশ চৰকাৰৰ ৰেষ্টুৰেন্ট খনলৈ লৈ যোৱা হ’ল। কফি ইডলী বড়াৰে ৰাতিপুৱা আহাৰ খোৱাৰ পাছত গাইডে সকলোৰে ফোন, ডিজিটেল ঘড়ী সকলোবোৰ লৈ ল’লে, এইবোৰ মন্দিৰত নিষেধ। সকলোকে মন্দিৰৰ গেটলৈ নি কেনেদৰে যাব লাগে , কি কৰিব লাগে আৰু কি কৰিব নালাগে, কোনফালে ওলাই আহিব লাগে ভালদৰে বুজাই দিলে। মহিলা সকলক মুৰত মৰা ফুল খুলি ল’বলৈ কলে , কিয়নো তাত ফুল অকল ভগবানেহে শিৰত ল’ব পাৰে।

আঠ বজাত আমি প্ৰবেশ কৰিলো,লোহাৰ জালিৰে আবৰা দীঘল দীঘল কৰিডৰ। ফু মাৰি ভাত খাব পৰাকৈ চাফা। ফেনৰ সুব্যৱস্থা ।প্ৰায় ৫০০ মিটাৰ আঁতৰে আঁতৰে খোৱা পানীৰ সুব্যৱস্থা। ভাগৰিলে বহিবলৈও চকী আছে। সপ্তাহান্ত আৰু উৎসৱৰ সময়ত লাখ লাখ মানুহ আহে যদিও মই বুধ বাৰে যোৱা বাবে সেইদিনা প্ৰায় ৩০/৩৫ হাজাৰ মান দৰ্শনাৰ্থী আছিল। আমাৰ দৰ্শনৰ সময় আছিল ৮ বজাৰ পৰা ১০.৩০ বজাৰ ভিতৰত। তাত সকলোৱে কানাড়া আৰু তেলেগু ভাষাতে কথা কৈছিল বাবে মোৰ অসুবিধা হৈছিল কিন্তু আমাৰ বাছতে যোৱা সুনীতা আৰু তেঁওৰ স্বামীয়ে মোক প্ৰতিটো কথা ইংৰাজীত বুজাই দিছিল। মন্দিৰৰ প্ৰবেশদ্বাৰৰ পৰা মন্দিৰৰ ভিতৰলৈকে যাবলৈ প্ৰায় দেৰঘন্টা সময় লাইনত ৰ’ব লাগিছিল আৰু এইখিনি ঠাইত মুঠ ৫ বাৰ স্কেনাৰে দি সকলোকে পৰীক্ষা কৰিছিল। শাৰী পাতি থাকোতে গোবিন্দা গোবিন্দা ধ্বনিৰে মুখৰিত হৈ আছিল আৰু এটা বেলেগ ধৰণৰ পৰিবেশ হৈছিল, সকলোৰে চকু সিক্ত হৈ উঠিছিল। সেই অনুভৱ লিখি প্ৰকাশ কৰিব নোৱাৰি।

মন্দিৰ গৰ্ভ গৃহত সোমোৱাৰ পাছত প্ৰায় ৩০ চেকেণ্ড মানৰ বাবে শ্রীভেংকটশ্বৰাৰ মুৰ্তিভাগ দেখি ইমান সময়ৰ ভাগৰ পলাই ফাট মাৰিলে। হাতযোৰ কৰি , চকুত পানীৰে এটাই প্ৰাৰ্থনা কৰিছিলো, প্ৰভু সদায় লগত থাকিবা।

মন্দিৰৰ পৰা ওলাই চৰণামৃত লৈ , আমাৰ পেকেজত অন্তৰ্ভুক্ত থকা লাডিডু প্ৰসাদম লবলৈ আগবাঢ়িলো। তিৰুপতি মন্দিৰৰ লাডু প্ৰসাদৰ যি সোৱাদ সেইয়া ক’তোৱেই নাই।

মন্দিৰ পৰিষৰৰ পৰা ওলাই আহোতে ১০.৩ বাজিল।নিজৰ নিজৰ ফোন সংগ্ৰহ কৰি দুপৰীয়াৰ আহাৰ গ্ৰহন কৰিবলৈ গ’লো। দক্ষিণ ভাৰতীয় আহাৰেৰে পেট পুৰাই লোৱাৰ পাছত আমাক তিৰুমালা পৰ্বতৰ পৰা তললৈ লৈ অনা হ’ল।

এইবাৰ তিৰুপতিৰ পৰা ৫ কিমি দুৰৰ তিৰুচানুৰত থকা পদ্মাৱতী আম্মাভাৰী মন্দিৰলৈ। কোৱা হয় পদ্মাৱতী মন্দিৰ দৰ্শন নকৰিলে শ্রী ভেংকটশ্বৰা মন্দিৰ দৰ্শনৰ ফল পোৱা নায়ায়। পদ্মাৱতী দেৱী লক্ষ্মীৰ এটা ৰূপ আৰু শ্রীভেংকটশ্বৰাৰ পত্নী।

ৰঙা পদুম এপাহেৰে দেৱীৰ চৰণত সকলোকে মংগলৰ বাবে প্ৰাৰ্থনা ল’লো।

ইয়াতো দৰ্শনৰ বাবে প্ৰায় একঘন্টা লাগিলেও পানী , ফেন সকলোৰে সুব্যৱস্থা আছে।

মন্দিৰৰ সন্মুখৰ ষ্টেণ্ডত আমাৰ বাচ ৰৈ আছিল। ভাগৰুৱা দেহটো বাচৰ চিটত এৰি দিওতে কিন্তু মন কৰিছিলো, মনত অকনো ভাগৰ নাই। হয়তো এনেবোৰ ঠাইলৈ আহিলে মানসিক ভাবে সবল হোৱা যায়। চাৰিঘন্টা যোৰা ওভটনি যাত্ৰাৰে বাংগালোৰ পোৱাৰ পাছত ২০ ঘন্টীয়া যাত্ৰাৰ অন্ত পৰিল।

গোবিন্দা 🙏

[angkineeborah]

আজি আন্তঃ জাতিক নাৰী দিৱস। এইবাৰৰ নাৰী দিৱসৰ থিম জেণ্ডাৰ ইকুৱেলিটি টুডে ফৰ চাচটেনেবল টুমৰু।

নাৰীক সদায় কোমল, লাহী দেখুওৱা হয়। নাৰীয়ে সচৰাচৰ নাইট চিফ্টত কাম নকৰে। নাৰীক আজিও বিভিন্ন ক্ষেত্ৰত দৰমহা/মাননি দিয়াৰ সময়ত পুৰুষতকৈ কম দিয়া হয়।

নাৰীক সন্তান প্ৰতিপালন আৰু চাকৰিৰ ক্ষেত্ৰত এটাক বাচি ল’বলৈ বাধ্য( ইনডাইৰেক্টলি মৰমেৰে বুলি কয়) কৰোৱা হয়।

প্ৰায়বোৰ নাৰীয়ে মন পচন্দৰ কাপোৰ পিন্ধিবলৈ, অলংকাৰ পিন্ধিবলৈ , খাবলৈ পতিৰ মৰমৰ শাসন ভৰা পৰামৰ্শ ল’ব লাগে। জিয়ৰী কালত বিয়া নোহোৱা ছোৱালী এজনীক প্ৰায়েই কোৱা যায়, ফুৰিবলৈ মন গৈছে, গিৰিয়েৰৰ লগত যাবি। আৰু পঢ়িবলৈ মন আছে , গিৰিয়েৰৰ ঘৰত পঢ়িবি। আনকি পিৰিয়ডচ পেইনৰ সময়ত ডাক্টৰৰ তাত গ’লে কয়, বিয়াৰ পাছত ঠিক হৈ যাব, তাৰ অৰ্থ চেক্সুৱেল ৰিলেচনৰ পাছত কাৰোবাৰ বিষ ঠিক হবও পাৰে। তাৰকাৰণে বিয়া হোৱা বাধ্যতামুলক। এটা অসুখৰ দৰৱ বিয়া নহয়।

এজনী ছোৱালী অকলে ফুৰিবলৈ গ’লে হাজাৰ প্ৰশ্ন। পাৰিলে সাহসী মহিলাৰ টেগ দি দিব। আৰে বাবা ল’ৰা এটা অকলে ফুৰিবলৈ গ’লে সাহসী ল’ৰাক টেগ দিয়ে জানো? এনেকুৱা ডিমিন কৰা টেগ আমাক নালাগে।

পুৰুষে নিবিঘ্নে উঠিব পৰা বাছ এখনত উঠোতে মহিলাই হাতত পিন লৈ উঠিব লাগে , তেনেহ’লে বাছত লেডিচ চিট ৰখাৰ কোনো প্ৰয়োজন নাই।

সৰুতেই ছোৱালীৰ হাতত পুতলা, কিটচেন চেট তুলি দিয়াৰ বিপৰিতে ল’ৰা সন্তানৰ হাতত তুলি দিয়া হয় গাড়ী, এৰোপ্লেন। এই পক্ষপাতিতা কিয়?

মাক দেউতাৰ মৃত্যু হ’লে ল’ৰা সন্তান নাথাকিলে, সমন্ধীয় বৰদেউতাক বা খুৰাকৰ ল’ৰাই মুখাগ্নি কৰিব , কিন্তু নিজৰ ছোৱালীজনীৰ সেই অধিকাৰ নাই।

ল’ৰা লাগিলে ৰাতি দহবজাতে ঘৰ সোমাওক, ছোৱালী সন্ধিয়া লগাৰ আগত ঘৰ সোমাব লাগিব।

মন নাথাকিলেও বিয়াৰ পাছত ছোৱালীক পতিৰ উপাধি ব্যৱহাৰ কৰিবলৈ মৰমেৰে(?) বাধ্য কৰা হয়।

অকল ঘৰুৱা কন্দলেই ডিভৰ্চৰ কাৰণ নহয়, আজিৰ যুগত কোনেও কম্প্ৰমাইজ কৰি নাথাকে , যদি কম্পেটিবিলিটি মেটচ নকৰে। এনে ক্ষেত্ৰত ছোৱালী জনী ওলাই আহিব খুজিলে হাজাৰ মন্তব্য, সংসাৰ ভঙা ছোৱালী ইমান ভাল গিৰিয়েক পোৱাৰ পাছত। ল’ৰাজন কিন্তু বাচি থাকে এনেবোৰ কথাৰ পৰা।

কোনোবাই কাৰোবাক গালি পাৰিলেও ক’ব হাতত খাৰু পিন্ধ, মেখেলা পিন্ধ। মহিলাৰ কাপোৰ আৰু পুৰুষৰ কাপোৰৰ মাজত ইমান ভেদভাব কিয়?

কোনোবা মেকআপ কৰি ভালপোৱা ল’ৰাই মেকআপ কৰিলে, শাৰী পিন্ধলে , সেইজনক ক’ব ছোৱালীৰ দৰে কিয় পিন্ধিছে? ছোৱালী এজনীয়ে চুলি কাটি পেন্ট চাৰ্ট পিন্ধিলে ক’ব ল’ৰা দৰে লাগিছে, মতাকালু।

কাপোৰৰ , মেকআপৰ কি জেণ্ডাৰ আছে? কোনে ডিচাইড কৰিছিলে কোনে কি পিন্ধিব।

এইবোৰ পক্ষপাতিতা।

নাৰীৰ পৰিচয় তিনিটা, অমুকৰ জীয়েক, অমুকৰ ঘৈনী, অমুকৰ মাক।

এইটোক পৰিচয়কে বুকুত বান্ধি নাৰীয়ে মৰমৰ বান্ধোনৰ নামত গোটেই জীৱন পাত কৰে। বান্ধোন বান্ধোনেই, মৰমৰে হওক বা খঙৰে হওক। মৰমৰ বান্ধোনৰ নামত নাৰীক কিমান এক্সপ্লইট কৰা হয় কোনে হিচাপ কৰে। অকল পাকঘৰত সহায় কৰি, জিন্স বা চালোৱাৰ কামিজ পিন্ধিবলৈ দি , সপ্তাহত /মাহেকত/বছেৰেকত এবাৰ ফুৰাবলৈ নিয়াটো নাৰী সবলিকৰণ নহয়। বছৰৰ এদিন মেখেলা চাদৰ পিন্ধি গোলাপ আদান প্ৰদান কৰি , কেক কটাই নাৰী সবলিকৰণ নহয়।পুৰুষ মহিলাক অধিকাৰ সমান হওক।

আহক এই নাৰী দিৱসত নাৰী আৰু পুৰুষৰ মাজত থকা পক্ষপাতিতাক আতৰাই কও

Break the Bias

#womensday2022

[angkineeborah]

#উত্তৰভাৰতৰ_খাদ্য

লিট্তি চৌখা।

উত্তৰ ভাৰতৰ বিহাৰ আৰু উত্তৰ প্ৰদেশত লগতে চুবুৰীয়া দেশ নেপালত বহুত ভাবে প্ৰচলিত এটা খাদ্য হ’ল লিট্তি চৌখা। বনাবলৈ সহজ আৰু বিৰাট স্বাস্থ্যকৰ চাট্তু আৰু আটাৰে বনোৱা লিট্তি বিহাৰৰ দৰে কৃষিপ্ৰধান ৰাজ্যৰ লোকসকলে কাম কৰাৰ সময়ত সোনকালে ভোক নালাগিবলৈ খাইছিল।

উপকৰণঃ

আটাৰ লাডু বনাবলৈ

1. ১ ১/২ কাপ আটা

2. ১/৩ কাপ মিহি ডালিয়া। লিট্তি বনাবলৈ জাতত পিচা মোটা আটা ব্যৱহাৰ কৰা হয়। সেইবিধ আটা পাবলৈ টান বাবে সাধাৰণ আটাৰ লগত মিহি ডালিয়া মিহলি কৰা হৈছে।

3. ১ টেবুল চামোচ তেল

4. নিমখ

5. পানী

ফিলংৰ বাবে

1. ১/২ কাপ চাট্তু

2. ১ টা মজলিয়া পিয়াজ মিহিকৈ কুটা

3. ২-৩ কেচা জলকীয়া মিহিকৈ কুটা

4. ১ ইঞ্চি আদা মিহিকৈ কুটা

5. ২-৩ ফুটা নহৰু মিহিকৈ কুটা

6. ২ টেবুল চামোচ ধনীয়াপাত মিহিকৈ কুটা

7. নিমখ

8. ১ টেবুল চামোচ মিঠাতেল

9. ১ টেবুল চামোচ আচাৰৰ মচলা। আমৰ অচাৰ হ’লে ভাল।

চৌখাৰ উপকৰণ

1. ১ টা ডাঙৰ বেঙেনা পুৰি লোৱা

2. ২-৪ কোঁহ নহৰু পুৰি লোৱা

3. ৩ টা বিলাহী পুৰি লোৱা

4. ২টা আলু পুৰি লোৱা

5. ১/২ ইঞ্চি আদা মিহিকৈ কুটি লোৱা

6. ২ টা কেচা জলকীয়া মিহিকৈ কুটি লোৱা

7. ১ টেবুলচামোচ ধনীয়া মিহিকৈ কুটি লোৱা

8. নিমখ

9. ১ টেবুল চামোচ মিঠাতেল

লিট্তি যিহেতু ঘিত ডুবাই খোৱা হয়, সেয়ে

1. ১ কাপ ঘি গলাই লোৱা।

প্ৰনালীঃ

আটা মৰাৰ প্ৰণালীঃ

আটা , ডালিয়া আৰু নিমখ মিহলাই আটাখিনি কোমলকৈ মাৰি ল’ব। অলপ তেল সানি ভালদৰে মথি এখন তিতা কাপোৰেৰে ঢাকি থ’ব।

ষ্টাফিং তৈয়াৰ কৰাৰ প্ৰনালী

ওপৰত উল্লেখ কৰা ষ্টাফিমৰ সকলোবোৰ বস্তু ভালদৰে মিহলি কৰি ল’ব। পানীৰ ব্যৱহাৰ নকৰিব।

লিট্তি বনোৱাৰ প্ৰনালী

আটাৰ মজলীয়া ধৰণৰ লাডু বনাই অলপ মান বেলি তাত ২ চামুচ ষ্টাফিং ভৰাই ভালদৰে বন্ধ কৰি গোটা লাৰুৰ আকাৰ দিব। এনেদৰে লিট্তি খিনি বনাই ল’ব। তিতা কাপোৰেৰে ঢাকি থ’ব যাতে শুকাই নাযায়

পৰম্পৰাগত ভাবে গোবৰৰ পৰা বনোৱা উবলা ( cow dung cake) জ্বলাই তাত লিট্তি পোৰে। সেইটো সুবিধা নাই বাবে মই অভেনত ২০০ ডিগ্ৰী উষ্ণতাত ২৫ মিনিট বেক কৰিছো। বেক কৰাৰ পাছত গেছ জ্বলাই অলপ পুৰি দিছো।

অভেন নাথাকিলে শুকান কেৰাহি এখনত জুই কমাই ৩০ মিনিট মান লুটিয়াই ভালদৰে ভাজি লৈ গেছ জ্বলাই পুৰি ল’ব।

চৌখা বনোৱাৰ প্ৰণালী

চৌখাৰ আটাইখিনি সামগ্ৰী মিহলাই ভালদৰে পিটিকি ল’ব।

লিট্তি বোৰ ঘিত ভালদৰে ডুবাই চৌখাৰ লগত পৰিবেশন কৰিব।

[angkineeborah]

FB_46:

কাতি বিহু বুলি কলেই মনত পৰে , তুলসী ভেটিটোলৈ। ৰাতিপুৱা সোনকালে উঠি এটাই কাম এমাহ আগৰে পৰা বাহিৰা বহীৰ পাছফালে আঁকি থোৱা 10 তা মান ডিজাইনৰ পৰা আটাইতকৈ ভালটো বাছি লোৱা। সেইকথাটোতো ভণ্টি আৰু মোৰ মাজত সৰু সুৰা কাজিয়া এখন

লাগেই, মোৰ পছন্দ হোৱাটো তাইৰ নহয় তাইৰ হোৱাটো মোৰ নহয়। শেষত গৈ এটা পছন্দ হোৱাৰ পাছত দৌৰ পাছফালে মাটি খান্দিবলৈ। এপাছি মাটি হেপো টেপো লৈ আগফালে আনি তুলসী ভেটি সাজিবলৈ সাজু।ভণ্টি সাজু লাচনী পাঁচনী কৰিবলৈ। আকৌ এটা অথন্তৰ। এইবাৰ দেউতাই চিঞৰিলে, "তহঁতে যি কৰ কৰি থাক কিন্ত নতুন তুলসী পুলি ৰুব নালাগে , যি কৰ পুৰণা জোপাতে কৰিবি। " লগেলগে ভণ্টি মুখ কলা। কাৰণ আমাৰ যি ডিজাইন ,পুৰণা ডাঙৰ তুলসী জোপাত ভাল নালাগিব, পুলিটোৰ ওপৰত চাল এখনো দিয়াৰ কথা আছে। বহুত কন্দা কটা , ওফোণ্ড পতাৰ পাছত আলটিমেটলি আমাৰ তুলসী ভেটি বনোৱা পৰ্ব আৰম্ভ হয়গৈ আৰু। ভণ্টি যোগালি মই মেইন মিস্ত্ৰী। দুই তিনি ঘণ্টা মান বোকাৰে লুটুৰি পুতুৰী হৈ ভেটি বনোৱাৰ কাম চলি থাকে, লগতে চলি থাকে মাৰ গালি। ভন্টিয়ে মাজে মাজে চকীদাৰীয়ো কৰিব লগা হয়, নহলে যে আমাৰ ইউনিক ডিজাইনটো কোনোবাই চুৰি কৰি নিব পাৰে টো !! অৱশেষত ডিজাইনৰ খচৰাৰ 70 % একে হোৱাৰ পাছত শেৱালি ফুলেৰে সজোৱা ভেটিটো আমাৰ দুয়োজনীৰে পছন্দ হোৱাৰ পাছত আমি চোতাল মুচিবলৈ লওঁ। গোটেই চোতাল খন মুচিহে আমাৰ শান্তি। তাৰ পাছত অপেক্ষা সন্ধিয়ালৈ। মায়ে বুট কল নাৰিকলৰ খৰাহীটো তুলসী তলত থৈ গাওঁৰ পোৱালিমখা অহালৈ ৰৈ থাকে। গাঁওৰ সিটো মূৰৰ পৰা দলটো আহে আৰু প্ৰতি ঘৰতে দুই তিনিটাকৈ লগ লাগে, আমাৰ ঘৰ আহি পোৱালৈকে দলটোত 20/25 জন মান সদস্য হয়গৈ। সকলোৰে হাতে হাতে বুট কলৰ টোপোলা। আমাৰ পদূলিৰে সোমাওঁতেই আৰম্ভ কৰা ব্ৰহ্মা আদি কৰি বা তুমি চিত্ত প্ৰাৰ্থনাটো স্পীদৰ কোঁৱৰ তুলসীৰ তল পাওঁতে শেষয়েই হৈ যায়, জয় অ হৰি জয় ৰাম কৈ বুট ভৰোৱা পালিথিনৰ কেৰি বেগ টো মেলি দিলেই হল। শেষৰ জনৰ টোপোলাত বুট কল ভৰোৱা হয় মানে কাষৰ বৰ্তাৰ ঘৰত ব্ৰহ্মা আদিকৰি আৰম্ভ হৈয়েই। আমিও কেৰি বেগ এটা লৈ লগতে দৌৰ দিওঁ। সাধাৰণতে মই আৰু ভন্টিয়ে সন্ধ্যা লগৰ পাছত ঘৰৰ পৰা ওলাবলৈ নাপাওঁ, কিন্তু কাতি বিহুৰ দিনাই সন্ধিয়া ওলোৱাত পাৰমিচন আছে। সেই দিনটোত মুকলি হোৱাৰ কথাটোৰ পুৰা সুবিধাটো লৈ গাওঁৰ শেষ মানুহঘৰলৈকে কাতি বিহুৰ বুট খাই উভতি অহালৈ ৰাতি 8 মান বাজে, লগত 2 কিলো মান বুট, 2 দৰ্জন মান কলৰ দাঙিব নোৱাৰা এটা টোপোলা। বুট বোৰ টো খাব নোৱাৰোৱেই.. মায়ে ৰাতিৰ ভাতৰ লগত খাবলৈ অলপ মান ভাজে, বাকীখিনি পাছদিনা জুনজুনিয়ে খাই ( জুনজুনি মোৰ গৰু জনীৰ নাম )।

এই যে কাতি বিহু, আমাৰ কাৰণে কিন্তু সৰুতে এটা ডাঙৰ উৎসৱে আছিল। বিহুৰ কেইদিনমান আগৰে পৰা মায়ে বিহুৰ কাপোৰ ধুইছিল(গাঁও বোৰত বিহুৰ কাপোৰ ধোৱাটোও ডাঙৰ পৰ্ব দেই, নেদেখাই বুজি নাপাব ), ঘৰ চাফা কৰিছিল, কমকৈ হলেও পিঠা কেইটামান বনাইছিল।বিহুৰ দিনা পুৱা, আমি পিঠা, দৈ চিৰাৰে বিহুৰ জালপানো খাইছিলো।কঙালী হলেও আজিৰ দৰে কঙালী নাছিল।কাতি বিহুটো অকল ৰচনাৰ কিতাপত থকা বিহু নাছিল, আমাৰ বাবে বিহু তিনিটাই আছিল।

এতিয়া ভাবিছো, অফিচৰ পৰা গৈ টাবত থকা তুলসীৰ তলতে চাকি এগছ দিমগৈ। তুলসী ভেটি সাজিবলৈ ফ্লেটত আৰু কত সুবিধা আছে !! পিঠা-পনাটো বাকী দুয়োটা বিহুতেই বনোৱা নহয়গৈ।

এনেকুৱা সময়তে আকৌ গাঁওৰ ঘৰলৈ যামগৈ যেন লাগে! আকৌ বোকাৰে লুটুৰি পুতুৰি হৈ চোতাল মুচিম !!

সকলোলৈকে কাতি বিহুৰ শুভেচ্ছা থাকিল। বিহুটি জীয়াই থাকক।

[angkineeborah]

কমলাৰ বতৰ এইয়া। সতেজ কমলাৰ কোঁহৰ পৰা বনোৱা কমলাৰ বৰফি। ভাৰতৰ নাগপুৰ কমলাৰ বাবে বিখ্যাত।এইবিধ মিঠাই কমলাৰ বতৰত নাগপুৰত পোৱা যায়। নাগপুৰৰ বিখ্যাত মিঠাই। পৰিয়ালৰ মানুহ নাগপুৰত থাকে বাবে এইবাৰ খাই চাবলৈ পালো। মন নভৰিল, সেইকাৰণে নিজেই বনাই পেলালো। ৰূপত অলপ কম হলেও সোৱাদত একেবাৰে একে।

কমলাৰ বৰফি

উপকৰণঃ

১. কমলাৰ কোহ ৫০০ গ্ৰাম। কমলাৰ ফুটাবোৰৰ পৰা সাবধানে পাতল বগা বাকলিটো,গুটি আৰু বগা আঁহ বোৰ গুচাই ল’ব। ভালদৰে চাফা নহ’লে তিতা ভাব এটা আহিব।

২. ২০০ গ্ৰাম নাৰিকলৰ শুকান গুৰি। ফ্ৰেছলি গ্ৰাইণ্ড কৰা হ’লে নহ’ব। দোকানত ডেচিকেটেড নাৰিকলৰ গুৰি পোৱা যায়।

৩. ১৫০ গ্ৰাম মাৱা/খোয়া

৪. ১ কাপ ২৫০ গ্ৰাম চেনি

৫. কমলাৰ এচেন্স। নাথাকিলে কমলাৰ বাকলি শুকুৱাই তাৰ গুৰি দিব পাৰে। একো নিদিলেও হ’ব, খালী গোন্ধট কম হ’ব

৬. এচিকুট কমলা ৰঙৰ ফুড কালাৰ। নিদিলে এক নাই, ৰংটো ভাল নহ’ব।

৭. এচামুচ ঘিউ

প্ৰণালীঃ

১. প্ৰথমে খোয়া বা মাৱা খিনি এখন কেৰাহীত অলপ ভাজি ল’ব যাতে তাত থকা পানী খিনি নাইকিয়া হৈ যায়।

২.এতিয়া কমলাৰ কোঁহখিনি কেৰাহী এখনত দি দিব। ১০ মিনিটমান সময় ভালদৰে হাই টেম্পেচাৰত সিজিব দিব। কোহবোৰ ভালদৰে ভাঙি দিব।

৩. ১০ মিনিট মান পাছত ২৫০ গ্ৰাম ( মিঠা বেছি খালে অলপ বেছি দিব পাৰে) চেনি দিব। টেম্পেচাৰ হাই ৰাখিব।চেনি গলিব যে, অলপ পানী পানী হ’ব।

৪. ৫ মিনিট মান সিজোৱাৰ পাছত তাত নাৰিকলৰ গুৰি দিব। নাৰিকলৰ গুৰিটো আমি আছলতে বৰফিটো বান্ধ লোৱাৰ বাবে দিও। আপোনাৰ কমলা আৰু চেনিৰ মিশ্রনটো কিমান ডাঠ হৈছে তাৰ ওপৰত ভিত্তি কৰি নাৰিকলৰ গুৰিখিনি মিহলাব। ওপৰত দিয়া পৰিমানৰ মতে ২০০ গ্ৰাম নাৰিকলৰ গুৰি লাগে। কম বেছি আপুনি ঠিক কৰি ল’ব।

৫. এই মিশ্রনটো ইমানলৈকে ভাজিব যাতে, মিশ্রণটোৰ পৰা পানী ফুট ফুট কৈ ওলোৱা বন্ধ হয়।পানী থাকিলে ভালকৈ বান্ধ নাখাব আৰু সোনকালে নষ্ট হৈ যাব। লগতে এচিকুট কমলা ৰং দি দিব।

৬. এতিয়া মিশ্রণটো ভালদৰে শুকাই গ’লে খোয়া খিনি ভালদৰে মিহলাব, যাতে কমলাখিনিৰ লগত ভালদৰে মিলি যায়, গোটা বান্ধি নৰয়। এচামুচ ঘিউ দিব।লগত এচামুচ কমলাৰ এচেন্স বা কমলাৰ বাকলি গুৰি খুউব মিহি কৰি দিব। খোৱা খিনি মিলি গ’লে , বেছি দেৰি জুইত নাৰাখিব। নহ’লে টান হৈ যাব বৰফি। ৫ মিনিট মান পাছত গেছ/ইণ্ডাকচনৰ পৰা নমাব।

৭. এখন প্লেটতত বাটাৰ পেপাৰ লগাই( বাটাৰ পেপাৰ নাথাকিলে, নৰমেল বগা কাগজত ঘিউ লগাই) ভালদৰে সমানকৈ মেলি দিব। ড্ৰাই ফ্ৰুউটচ দিলে মিহিকৈ কাটি চটিয়াই দিব।

৮. ঠাণ্ডা হ’লে মন পচন্দৰ আকাৰত কাটি ল’ব

হৈ গ’ল নাগপুৰ স্পেচিয়েল অৰেঞ্জ বৰফি।

[angkineeborah]

চকলেট চিনামন ৰ’ল

উপকৰণঃ

ৰ’লটো বনাবৰ বাবে

1. ময়দা ৪ কাপ

2. চেনি ৩/৪ কাপ

3. ১/২ কাপ গলাই লোৱা বাটাৰ

4. কণী ২টা

5. কুহুমীয়া গাখীৰ এককাপ

6. ড্ৰাই ইষ্ট ১ আৰু১/২ চামুচ

ফিলিংৰ বাবে

1. ডাৰ্ক চকলেট ১০০ গ্ৰাম

2. ব্ৰাউন চুগাৰ ৩ টেবুল স্পুন(যদি মিঠা চকলেট ব্যৱহাৰ কৰিছে চেনি কমকৈ ল’ব, মই আনচুইটেন চকলেট ব্যৱহাৰ কৰিছো।)

3. চিনামন(ডালচেনি) পাউডাৰ ২ টেবুল চামুচ

4. ২ টেবুল চামুচ কোমল(গলোৱা নহয়) বাটাৰ

প্ৰণালীঃ

প্ৰথমে কুহুমীয়া গৰম গাখীৰত চেনি৩/৪ কাপ আৰু ইষ্টখিনি প্ৰুফ হ’বলৈ দিব প্ৰায় ১৫ মিনিট। গাখাৰ উটলা গৰম ব চেঁচা হ’লে ইষ্টখিনি মৰি যাব। কুহুমীয়া গাখীৰহে ল’ব।

১৫ মিনিটৰ পাছত মিশ্রনটো ভালদৰে মিহলি কৰি, তাত গলোৱা বাটাৰ, কণী দুটা ভালদৰে ফেটি মিহলাই লৈ , ময়দা খিনি অলপ অলপকৈ দি ভালদৰে মথি ল’ব। চাব যাতে বৰ টান লডা নহয়। অলপ কোমলকৈ মথা ড’টো তিতা কাপোৰ এখনেৰে ঢাকি থ’ব ১৫/২০ মিনিট মান

এতিয়া সেই সময় খিনিতে ফিলিঙটো তৈয়াৰ কৰি লও

এটা পাত্ৰত ডাবল বইলাৰ কৰি চকলেট খিনি গলাই তাত , ব্ৰাউন চুগাৰ, কোমলাই লোৱা বাটাৰ, চিনামন পাউডাৰ, ভালদৰে মিহলাই ল’ব । চাব যাতে মিশ্রনটো পনীয়া নহয়।

এতিয়া ৰেষ্ট দি থোৱা ময়দাৰ ড’ টোৰ পৰা অলপ ডাঙৰ চাইজৰ (এইটো পৰিমানত বনালে দুটা ভাগ কৰিলে হ’ব) টুকুৰা লৈ ভালদৰে বেলি ল’ব। ডাঙৰকৈ বেলিব যাতে বেছি ৰ’ল বনাব পাৰে একেবাৰতে। এতিয়া বেলি লোৱা ৰুটিখনত চকলেট আৰু চিনামন পাউডাৰৰ মিশ্রনটো ভালদৰে স্প্ৰেড কৰি দিব।

এটা চাইডৰ পৰা আৰম্ভ কৰি ৰুটিতো ৰ’লৰ আকাৰত(তিল পিঠা পকোৱাৰ দৰে) পকাই দিব। শেষৰ খিনিত অকন পানী লগাই ভালদৰে চিস কৰি দিব।

এতিয়া এডাল সুতা লৈ দীঘল ৰ’লটোৰ পৰা সৰু সৰু টুকুৰা কাটি ল’ব।

১৮০ ডিগ্ৰীত অভেন প্ৰি হিট কৰি ল’ব ১০ মিনিট। এতিয়া ১৮০ ডিগ্ৰীত ২০ মিনিটৰ বাবে বেক কৰিব।

আপোনাৰ বেলোতে ডাঠ হৈছে বা ৰ’লটোৰ টুকুৰা কৰোতেবেছি ডাঙৰ হৈছে তেতিয়া বেছি সময় লাগিব পাৰে। টুঠপিক ভৰাই চেক কৰি চাব তেতিয়া।

ওপৰত চুগাৰ পাউদাৰ দাষ্ট কৰি পৰিবেশন কৰক।

[angkineeborah]

মই ১৯৯৩/১৯৯৪ চনত লিখা কবিতা(পদ্য?) দুটা। দুয়োটা আমাৰ দিনৰ জনপ্ৰিয় আলোচনী মৌচাকত প্ৰকাশ পাইছিল। আজি মনত পৰিলত ইয়াতে ৰাখি থ’লো। ইমান বছৰ হ’ল কিন্তু আখৰে আখৰে মনত আছে।

১. জুনজুনী

মোৰ এজনী গৰু আছে নাম তাইৰ জুনজুনী

ৰাতিপুৱাই তাইক দিব লাগে ৰুটি

যদি পুৱা ৰুটি নাপায় হেম্বেলিয়াই থাকে

ৰুটি পালে মনে মনে ওঠ চেলেকি মৰে

ৰুটি খুৱাই দেউতায়ে লগালে বৰ লেঠা

ৰুটি নাথাকিলে আমাৰ ঘৰত লাগি যায় খকা খুন্দা।

২. মোৰ ভন্টি

মোৰ ভন্টি অকনমানী

ঠুনুক ঠানাক মাত

খোজকাঢ়ে মজিয়াত

থুপুক থাপাক

মই লও পঢ়িবলৈ

তাইকো কিতাপ লাগে

বিং বিং বাং বাং

কিবাবোৰ পঢ়ে

পেহী থাকে ওচৰত

ক খ শিকাই

ক খ ফুটে তাইৰ

কিন্তু ঘ টো থাকি যায়।

[angkineeborah]

Mysuru Dasara is the Nadahabba means state festival of Karnataka.It is believed that Devi Chamundeswari killed demon Mahishasur here in this place on the auspicious day of Vijaya Dashami and the place was named as Mahishapura. From Mahisapura it is now called Mysuru or Mysore Mysore city is located at the foot of Chamundeswari hills.

Dasara festival was started by the king of Vijaynagar in about 14th century. The 412th Dussehra has been organized from September 26, 2022 to 5th October,2022.

On Vijayadashami, the last day of Dasara, the festival is marked by processions with decorated elephants known as Jamboo Savari. The main attraction of this procession is the idol of the Goddess Chamundeshwari which is placed on a golden mantapa on the top of a decorated elephant.

Another attraction to the festival is that the Mysore Palace and Mysore city is lighten up with thousands of light. The festivity is grand and it is a experience of lifetime .