@cu930pm-blog - Tumblr Blog

Posts

《妖氣報告》書展現身為答謝支持《妖氣報告》嘅讀者，小弟整左一套六款嘅角色貼紙隨書附送，係書展期間創造館單位先有架，數量有限，送完即止。除左《妖氣報告》之外，買小弟其他作品都會有另一樣嘢送俾大家留念嘅，之於係咩啦喎⋯⋯密切留意小弟fb專頁同ig啦。 #妖氣報告 #2018書展 #創造館 #陳四月

凡於書展購買以上四本小說其中一本，即送你「輪迴價目表」書簽一張。寫完《輪迴交易現場》之後，一直都想整張價目表玩下，但又諗唔到用咩方法送俾大家，除左故事中三位主角作出嘅交易之外，當然仲有好多A餐，B餐，C餐俾你「輪」得快樂，「投」得安心啦，如果人死後真係會去到輪迴交易所，你又會交易啲咩？ #陳四月 #創造館 #輪迴交易現場 #攻略鄰家七姐妹 #男人都愛住家飯 #書展見

謊遊記後話顛覆宗教本質，扭轉英雄人物

講下呢個故嘅製作吖，謊遊記係改編自「西遊記」嘅後續故事，從改寫西遊嘅大團圓結局變成師徒盡喪嘅悲劇，再揭示為上者背後想利用取經團隊淨滅西方一路妖精嘅陰謀。而被吃掉嘅唐僧，就再不斷輪迴，成為引誘妖精的誘餌，而團隊大師兄悟空，就為救師父出劫難而奮戰至現代。

呢個故事引入左七原罪嘅元素，七個單位嘅妖精分别係：

暴食之百眼魔君怠惰之白骨夫人憤怒之牛魔王家族色慾之蠍子精傲慢之九靈元聖嫉妒之九頭蟲貪婪之獅駝三妖

仲有仇恨之孫悟空

原著並無講妖精到底點黎，但從推斷，或者我個人見解，妖精嘅存在就好似白骨精咁，由執念、惡念而生，所以係謊遊記入面我加入左呢個解釋。

會寫謊遊記嘅主要原因除左因為西遊記好睇外，係因為西遊記得到後世好多不同人士嘅解讀。不同角色背後存在嘅關係，暗喻，甚至有反映政治，反映社會嘅意味，呢d解讀吸引我想試一次西遊改編故事。

「如來設局始西遊，輪迴百世還未休。」

呢個故事除左主題嘅「謊」，仲有幾個令我覺得好玩嘅點子。

守護唐三藏轉生的「悟空」有無食過唐僧肉，經歷千載百世嘅守候「悟空」對唐三藏呢個靈魂產生嘅感情，妖眾統帥到底係六耳彌猴還是真正嘅孫悟空，而想傾倒神權嘅妖眾統帥到底能否向如來佛祖同太上老君報復，幻術解除後六耳又會作出點嘅決擇。

妖眾統帥嘅真正身份，從連載初期到中後成為幾熱烈嘅討論話題，而呢個亦係今次故事我好喜愛嘅一個設定。

顛覆英雄人物，被出賣嘅齊天大聖決意誅天。佢制服天下妖精，借白象嘅幻術進行洗腦，再加上唐僧嘅血肉，成就左誅天大軍，不殺盡滿天神佛誓不罷休。

但到底孫悟空係咪正義？係咪真係一心為妖精帶來公平？係咪為解放唐僧靈魂不惜反天？定利用妖精殺上天庭？就算天庭盡滅被洗腦嘅妖精覺醒過來時又會覺得點？而假若天上無了神仙，凡人活係妖精嘅世界會係點呢？

叫一聲佛祖，回頭無岸，跪一人為師，生死無關。

踏碎靈霄，放肆桀驁，世惡道險，終究難逃。

《悟空》中呢兩句歌詞，正正就像妖眾統帥孫悟空

然後係我地嘅主角，被洗腦以為自己是孫悟空嘅六耳彌猴，另一個活在謊言下受盡劫難嘅角色。

故事中以為自己係「悟空」嘅六耳，守護住不同嘅唐僧轉生達千百年之久，。千百年來除左戰鬥，佢經歷過更多嘅感情變化，無論係對凡間、對師父、對妖精。千百年嘅觀察到底又會令六耳有點嘅改變？六耳到底係咪為女死為女亡？係咪唔挑戰極權就係愚昧？佢嘅決定到底係為蒼生，為芯穎，定係為每一個唐三藏？

且怒且悲且狂哉，是人是鬼是妖怪，不過是，心有魔債。

我要這鐵棒有何用，我有這變化又如何。

這兩句歌詞又正好表現六耳嘅心態。

而「金箍當頭，欲說還休。」對兩位悟空，有著不同嘅深層意義，好慶幸能聽住戴荃首咁有意境嘅歌，去寫我嘅謊遊記。

謊遊記，係一個寫情嘅故事。補圓，係個故事嘅主軸，哪怕這結局有讀者覺得失望，點解不是一齊殺上去打佛祖，六耳點解唔反強權，妖眾統帥都唔係好巴閉，上面原來仲有元始天尊同靈寶天尊架咩（同太上老君一樣嘅三清），覺醒六耳好op有主角光環⋯⋯

一個故事嘅結局，滿足不到所有讀者，但呢個結局算係表現到我想呈現嘅結局。

一個小說會載著幾多情感，幾多意思，我諗應該留俾睇嘅人自己感受同發掘。每一個細節原因（甚至點解出招要叫招名）如果我都逐一大家解說，我諗睇個故事會無趣得多。西遊記得到好多後世人解讀，當然我嘅故事不是名留青史的巨著，但解讀，都係留番讀者隨自己嘅見解，感受，閱歷去得出你心目中嘅「謊遊記」啦。

「西遊記」可以有「西遊補圓計劃」，「謊遊記」都可以有「謊遊補圓計劃」，但到底係以點嘅型式，我相信一個故事，可以有好多可能性，最後感謝喜歡這故事的每位，為故事畫上人物設定嘅積哥，或者不久嘅將來，真係會出現謊遊後續嘅外傳，甚至新的連載，像這一幅得道成仙的芯穎帶著初生之犢，踏上新的旅程。

#謊遊記 #西遊記 #陳四月

《謊遊記》人物設定 19 仙. 唐芯穎

故事連結陳四月：

https://facebook.com/cu930pm/

插畫連結陳積：

https://facebook.com/jacchanff/

大家好！久等了！為大家送上在故事最終回，為左等待心愛嘅六耳彌猴轉世，修煉成仙，精通七十二變，身材同功夫都進化左嘅女主角 — 唐芯穎

仲有仲有，咁耐冇見我又點會咁冇誠意呢！送上轉生後，變左馬騮仔嘅悟空同六耳阿彌！

係「謊遊記」連載尾聲時，有讀者估到兩大妖猴最終會同歸於盡，但相信冇咩人會估到最後我地JK 三藏會成為仙神，苦等愛人千年間除魔滅妖，呢份深情正正對應返當初守護不同三藏轉世千年嘅六耳，實在係令人滾動呀！其實故事中，芯穎要二郎神教佢七十二變，之後得到觀音之力保住性命時，四月已經留下伏筆，係「情理之內，意料之外」

而係故事最後，芯穎終於搵返悟空同六耳兩隻小猴，仲收左佢地為徒，實行「正太小猴男友育成計劃」，非常鬼馬。我今次嘅人設就係應四月要求，設定成佢地已經跟左芯穎一段時間有所成長嘅造型！手執金鋼棒，野性自負嘅悟空！頭載金鋼圈，冷靜乖巧嘅六耳！

希望大家會喜歡，亦希望係不久將來佢地會再喺大家面前，上演更精彩夢幻嘅大活劇！

#陳四月 #陳積 #謊遊記

《謊遊記》人物設定 18 真！孫悟空

故事連結陳四月：https://facebook.com/cu930pm/

插畫連結陳積：https://facebook.com/jacchanff/

實在係型到我有d感動，率領妖軍誅天屠神嘅妖眾統帥，真！孫悟空！

佢被佛祖出賣，佢被六耳取代，師父唔認得佢，師弟又分唔到佢，佢野性難馴，佢以牙還牙，佢有血有肉，佢係靈明石猴，真正嘅孫悟空。

陳積 #三頭六臂都幾唔方便 #中二病唔係罪 #原著開技都有鳩叫 #悟空又曳曳啦 #想睇覺醒六耳 #仲有L排畫

#孫悟空 #陳四月 #謊遊記

《謊遊記》人物設定 17 六牙白象

故事連結陳四月：

https://facebook.com/cu930pm/

插畫連結陳積：

https://facebook.com/jacchanff/

老二係大象，仲要白色

今晚九半，大結局。

陳積 #積高最初畫到個樣好善良 #善良的肥仔 #肥仔都姓死 #唐僧肉致肥 #終於結局 #仲有排忙 #忙咩卵嘢 #過幾日話你知

#陳四月 #謊遊記 #六牙白象

《謊遊記》人物設定 16 青獅

排排坐但又坐得幾有霸氣，獅駝三妖老大，文殊坐騎，青獅。

重要的事要講三次之第三次，今晚無文

#老大係獅子老三係大雕咁老二係 #老二係象其實好合理 #紅孩兒都有食雪茄可以開心share #但大叔食雪茄係啱feel #其實咁坐得耐係好唔舒服 #鍾意佢畫得後面獅子有d咖哩味

#青獅 #謊遊記 #陳四月

《謊遊記》人物設定 15 金翅大鵬雕

其實畫得幾靚的大雕，嘩原來畫左1x隻⋯⋯

海軍三巨頭⋯⋯吖⋯⋯係獅駝國三妖。

重要的事要講三次，第二次，今晚無文。

#老三係雀仔老二係咩 #個名唔多老黎 #原著話飛得好快 #火雲邪神話天下武功唯快不破

#陳四月 #金翅大鵬雕 #謊遊記

《謊遊記》人物設定 14 九頭蟲

故事連結陳四月：https://facebook.com/cu930pm/

插畫連結陳積：https://facebook.com/jacchanff/

便當早已預備。

主管故事連載進入階段，淨番嘅大妖，除左獅駝三妖之外，仲有妖眾統帥，無緣加入誅天戰役嘅e位靚仔，九頭蟲到底係咩春呢？

九頭蟲係西遊原著入面非常神秘，無人知佢點解咁好打，係邊到黎，最後逃走去邊，有人懷疑最後無左一個頭嘅九先生，去左日本，演化成八岐大蛇。

問題黎啦，蟲啵，又鳳頭？蛇定龍呀？係咪四月又寫錯字？拿今鋪真係唔關我事，大家睇睇下面，唔係你下面👇🏻

關於九頭蟲，最常見的一種說法是「九頭鳥」，因為「蟲」並非專指昆蟲，古代也用來指各種走獸、飛禽等。比如《水滸傳》里的老虎，不叫老虎叫「大蟲」。

我們可以排除一個選項了，那就是九頭蟲並不是蛇，因為蛇是沒有腳的，從描述中基本可以看出九頭蟲就是九頭鳥。如來曾經說過：

周天之內有五仙，乃天地神人鬼；有五蟲，乃蠃鱗毛羽昆。

這個九頭蟲就是五蟲中的羽類。

關於九頭蟲，中國的文獻中也有記載，九頭鳥又稱鬼車、鬼鳥、姑獲鳥，是古代中國神話傳說中的妖鳥。因為在夜裏發出車輛行駛的聲音，得名鬼車。

九頭鳥的傳說，實脫胎於《楚辭》和《山海經》中的一些古老的中國神話。《山海經·大荒北經》中載：「大荒之中，有山名北極天桓，海水北住焉。有神九首，人而鳥身，名曰九鳳。」這九頭鳳就是九頭鳥的最早說法。

老實說，其實我係好想改e條友做九頭龍嘅，因為有金翅大鵬雕啦嘛，又雀仔⋯⋯俾條龍玩下吖大佬⋯⋯但咁改⋯⋯又好失去原著角色嘅風味，所以我都係乖乖地，私人醒招九霄鳳嗚你叫下啦⋯⋯

同樣係長頸多頭，如果謊遊記九頭蟲vs妖氣報告八岐素真，又會點呢？🤔咬咬咬咬咬咬咬咬咬⋯⋯

#九頭蟲 #謊遊記 #陳四月

《謊遊記》人物設定 13 地藏王菩薩

故事連結陳四月：

https://facebook.com/cu930pm/

插畫連結陳積：

https://facebook.com/jacchanff/

大願之肉餅，地藏王

謊遊記中首位出手嘅菩薩級人物，其實係原著中佢嘅戲份非常少，但作為陰間最高位嘅大佬級人物，唔係唔出黎露兩手呀，不過係我故事露兩手，係要付出代價嘅⋯⋯

四大菩薩中，唯獨地藏王嘅坐騎係無係凡間搞過事，其他三隻都有襲擊取經團隊嘅前科，諦聽擁有聽穿真偽嘅特異功能，係法拉利，林寶堅尼同寶時捷都無架，所以我特別俾e隻乖豬同佢主人一個機會大顯身手。

大願之地藏王，有地獄不空誓不成佛嘅氣魄，係我改編入面，除左原有嘅寶珠錫仗之外，我私人醒左套「六道輪迴秘法」過佢表演下，襯番個地獄feel嘛，唔通真係放勝男出黎話我係陰間王咩⋯⋯

雖然佢已經變左肉餅，但e個角色係佔左重要嘅位置，迫妖統出真功夫，打到全妖化妖統露靈石之軀，仲有以「人間道」變出唐三藏搞喊人，e幾幕重要場景，都係靠地藏王帶出。

故事進入倒數階段，妖眾淨落黎嘅大妖除左孫悟空，仲有九頭蟲同獅駝三妖，到底積哥支筆快？定我派便當派得快呢？

我地又九半見啦

#陳四月 #謊遊記 #地藏王菩薩

《謊遊記》人物設定 12 九靈元聖

故事連結陳四月：

https://facebook.com/cu930pm/

插畫連結陳積：

https://facebook.com/jacchanff/

我最喜愛男妖精！之一～傲慢之妖精，九靈元聖

係西遊記原著入面，有本事吊起孫悟空黎打嘅，其實唔少，特別係e位大叔，你上網search下e位大叔個名，就會見到唔少佢post寫住「秒殺孫悟空」，無錯，係秒殺！咁當然主角有光環，所以係無死嘅。

九靈元聖係太乙救苦天尊坐騎，太乙救苦天尊以道家體系黎講，屬三清四御果層，簡單d講即係最高級別啦。

九頭獅王，手下有六隻獅妖（加一堆嘰嘰兵），佢充份體現左「豬隊友能害死全家」e個道理，手下黃獅精想打唐僧主意俾取經隊吊打至死，做大佬嘅就出頭報仇，但可惜悟空最勁嘅，唔係隻揪，係吹雞，最後主人一到，尊師重道，就俾人拉左番差局⋯⋯吖⋯⋯係天庭。

訪間有好多文章討論西遊記入面邊隻妖精最好打，注意，係妖精，有人話係青牛，有人話係金翅大鵬雕，又有人話係九靈元聖，好難有一個肯定嘅答案，因為問唔到原著作者，但九靈元聖有一個我特別欣賞嘅地方。

就係赤手空拳，唔用兵器，佢老哥本人就係一件人間兇器，一諗到e到，就覺得如果pk戰佢同七夜打番場⋯⋯都應該幾刺激。

再次感謝陳積，無女妖畫架啦，你死左條心啦，後面有一推硬漢等你呀！好多汗油淋淋果種呀！

廢話講完，九半見

#謊遊記 #九靈元聖 #陳四月

《謊遊記》人物設定 11 蠍子精

故事連結陳四月：https://facebook.com/cu930pm/

插畫連結陳積：https://facebook.com/jacchanff/

係愛呀哈利，色慾之妖精，蠍子精姐姐

原著中曾一嘢拮到如來佛祖都叫痛，係西遊記中數一數二好抽嘅女妖精，原著中佢嘅下場，係悟空請來二十八宿中嘅昴日星君（原著ko左百眼魔君嘅公雞君。）一個雞啼嚇到佢現形再亂棍打死。

對於原著，訪間有一個疑問，百眼魔君同蠍子精都係蟲蟲，又都咁好打，點解蜈蜙精就唔洗死，蠍子精就橫屍街頭，邊個有得留低邊個要死到底有無準則？有說法指出作者有心刻畫有後台（例如有跟名師父或者做坐騎）的妖精大多數都會被放過，而無嘅，好似蠍子精ed自成一家又得罪過如來佛祖嘅，就無得留低。

西遊記到底係咪反映當時社會現狀我就真係唔敢講，但謊遊記就絕對無針對任何宗教嘅意思，有連登讀者問我係咪好僧佛教，唔通寫妖氣我又同滿天神佛過唔去咩⋯⋯故事創作啫。

蠍子精係原著中我特別喜愛嘅女妖，並不是因為靚女（但講到好靚），佢係最接近打動唐僧嘅女妖，知書識禮，同阿唐僧吟詩作對調情味十足，加上有連如來都痛痛嘅實力，以現今社會嘅說法，蠍子精係充滿知性美嘅女強人，而且佢對唐僧，係真心愛慕，所以改編e個角色時我都刻畫得特別有愛。

不過我係有虐殺自己鐘意角色嘅病癮，所以姐姐嘅下場⋯⋯都幾慘豬下。

今晚九半，雖然係星期日但連載重開，殺害唐詩蕊嘅大妖現身，妖眾統帥嘅身份，都就黎正式解開，九半見。

#蠍子精 #陳四月 #謊遊記

《謊遊記》人物設定10 妖衆統帥

故事連結陳四月： https://facebook.com/cu930pm/

插畫連結陳積： https://facebook.com/jacchanff/

「決意碎天屠神之霸者」— 妖衆統帥

「謊遊記」中最大嘅奸角，身份未明的大Boss! 外貌同悟空一樣，同時就係策劃當年伏擊抵達大雷音寺嘅西經團隊，導致如來啟動「西遊補圓計劃」，一切事端嘅始作俑者！

故事連載到此，好多讀者一直推測佢嘅真正身份，到底佢係孫悟空？定六耳彌猴？大家從佢嘅說話，行為，目的引起討論！呢種熱鬧嘅投入氣氛真係好正！

強大有魅力嘅奸角往往會比主角受讀者歡迎，更係故事成功與否嘅關鍵，如果你問魔王點解要征服世界，佢答你：「因為呢個係我畢生嘅志願，that’s all」相信你會即刻收檔罷睇。四月描寫反派嘅能力係前作「妖氣報告」中嘅白翼已有目共睹，今次「謊遊記」呢位妖眾統帥，我個人非常喜歡，特別最近大戰蠍子精，混世二猴嘅表現，只能用「霸氣盡露」來形容

今晚9半，我地一齊來見證呢位Final Boss 全妖化有幾勁！殺呀！

#妖衆統帥 #謊遊記 #陳四月

《謊遊記》人物設定9 鐵扇公主