DIYARYO QUADRIO

11 - Quadrio  |  Pangkat 1  

[diyaryoquadrio]

Pagtapos sa Aking Pinagsimulan

Walong taon na ako nag-aaral sa Don Bosco at ako ay nasa ikalabing-isang baitang. Ilang taon na lamang ay patapos na ang aking paglalakbay bilang isang Bosconian. Marami akong maaalala sa DBTI Makati. Ang aking mga guro, mga kaklase, pati na rin ang mga pagkain, at marami pang iba. Habang ako’y palapit nang palapitsa  dulo, naaalala ko ang aking mga naranasan. Minsan inaalala ko ang unang araw ko sa paaralan na ito. Una kong nakilala ang Don Bosco Makati dahil sa aking ama, isang Bosconian noon. Lagi niya sinasabi kung gaano kahalaga ang oras niya sa Don Bosco Makati. Dahil sa kaniyang mga kwento, nagkaroon ako ng interes sa paaralang ito. Nagsimula ako mag-aral sa DBTI Makati noong ako ay nasa ika-apat na baitang. Lumipat kami sa Makati sa panahon na ito at napahanga ako sa laki ng lungsod. Nabigla ako noong pumasok ako sa Don Bosco.  Halos nawalan ako ng gana mag-aral dahil hindi ako makasabay sa aking mga kaklase. Sa mga unang linggo sa paaralan, mag-isa lang ako kumakain tuwing tanghalian at di ako masyado nagsasalita sa klase. Ngunit sa paglipas ng mga taon, nagkaroon ako ng mga kaibigan.  Mga kaibigan na kasama ko pa rin hanggang ngayon. Sa tagal ko sa paaralan na ito, hindi ko mabilang ang mga magagandang karanasan na nakuha ko. Habang tumatagal, bumuti ako bilang isang tao at tumaas ang aking mga grado. Tinuruan ako ng Don Bosco Makati na ipakita ang aking tunay na sarili, gayundin na walang limitasyon sa aking mga kakayahan. Namana ko ang ugaling Bosconian at naging kultura ko ang kultura ng Don Bosco. Nasa kalahati na ako sa taon ng paaralan at unti-unti ako napaisip. Ano ang mangyayari kung hindi ako pumasok sa Don Bosco Makati. Hindi ko makikilala ang aking mga kaibigan. Maaari na iba ang aking magiging ugali. Maaari na hindi ako magiging mabuting Kristiyano.  Nagpapasalamat nalang ako na tinadhana ako sa paaralan na ito. Kaya naman, kung may pagkakataon kang pumasok at mag-aaral sa Don Bosco Makati, kunin mo ang pagkakataon na iyon. Tunay na magiging mahalaga ang oras mo bilang isang Bosconian. 

[diyaryoquadrio]

Patungo sa Walang Katiyakan

Hindi nakakalimutan ng isang Bosconian ang pakiramdam ng pagbabago ng pagtaas ng baitang. Ang mga bagong mga guro, kurikulum, iskedyul, at mga kaklase; layout na hindi pamilyar. Ang pananabik na pakiramdam, epekto ng kinabukasang hindi mahuhulaan. Mga planong panibago at oportunidad sa Senior High School na departamentong magbubukas ng pinto para sa bawat ambisyoso at determinadong Bosconian na paparating. Dalawang taon na hindi makakalimutan dahil sa masigla at makabuluhang alaala. Istrukturang palaging nakikita tuwing dumadaan ay masarap pasukan. Gusaling simula ng iyong buhay bilang matandang mga binata. Mga kaalaman at ekspiryensyang magpapatayo bilang mabuting mamamayan; binibigay sa Senior High School Department.  Mga bagong pasilyo’y madadaanan, bawat taong makakasalubong at guro sa SHS ng Don Bosco na makakausap, dito lamang ay maisasagawa. Kumplikadong mga problema at layunin ay pagsasanayin sa loob ng dalawang taon. Paghuhugis ng iyong kahusayan at diskarteng tanging Bosconians lamang ang may kayang gawin. Pasyon at karunungang sumasailalim sa loob ng bawat silid-aralan ng Braga Building at dedikasyon sa sariling ebolusyon. Bawat hakbang, baiting, at oras; kasayahan sa ekspresyon at pagpapatunay sa sariling pagkatao, kaalaman, at kakayahan bilang isang bosconian.

[diyaryoquadrio]

Halina Sa Don Bosco

Ang Don Bosco Technical Institute – Makati ay isang paaralang Salesiano na may layuning hubugin ang mga kabataan na maging mabuting Kristiyano at tapat na mamamayan. Ipinagmamalaki ng institusyong ito ang tatlong antas ng edukasyon, particular ang mababang antas, mataas na antas, at ang TVET o Technical-Vocational education and Training. Nahahati sa dalawa ng mataas na antas ng edukasyon, ang Junior at ang Senior High School. Sa modernong at makabagong Fr. Carlo Braga Building makikita ang mga klasrum ata pasilidad ng mga estudyanteng nasa Senior High School.

Tulad ng ibang paaralan, pipili ang mga mag-aaral ng strand na sa paningin nila ay nababagay sa propesyong kanilang tatahakin. Ang mga strand na maaaring pagpilian ng mga mag-aaral ay ang STEM, ABM, HUMMS, at VMA. Ang mga ito ay may iba-ibang specialized o dinadalubhasang asignatura na tutulong sa mga estudyante sa kanilang pagpasok sa kolehiyo. Anuman ang piniling strand ng mag-aaral ay tiyak na kalidad na edukasyon ang maibibgay ng mga gurong may kakayanan at pagnanais na magturo. Inihahanda rin ng institusyon ang mga mag-aaral para sa mundong laging nagbabago, kumplikado, at walang katiyakan o tinatawag ring VUCA World sa Ingles. Ang kabiguang maituro ang mga katangiang ito ay maaaring magdulot ng negatibong epekto sa mga mag-aaral.

Ang departamento ng Senior High School ay nakatuon sa pananaliksik at paghahanap ng makabagong solusyon sa makabagong problema. Binibigyan ang mga estudyante ng pagkakataong mag-isip ng lunas sa isang problema nang sa gayon ay mahasa ang ibang paksang hindi naituturo sa normal na talakayan. Nagbibigay din ang departamento ng asignaturang para lamang sa pananaliksik. Sa asignaturang ito ay binibigyan ang mga mag-aaral ng pagkakataong lumikha ng sariling pananaliksik gamit ang makatotohanang datos na mula sa totoong mga tugon.

Panghuli, maipagmamalaki ng Don Bosco Makati ang kabuuan ng paraan ng pagututuro nito. Ginagamit ng paaralan ang paraang holistic. Ito ay nangangahulugang hindi lamang aspeto ng pag-iisip ang hinubog sa mga mag-aaral, kundi, pati na rin ng aspeto ng pag-uugali, pakikipagkapwa, at pananampalataya. Ang bawat klase ay may asignaturang tinatawag na Christian Living. Dito pinag-uusapan ang ebanghelyo sa nakaraang Linggo, at ang mga isyung nakapalibot sa Simbahang Katolika. Ang buong paaralan din ay nagdaraaos ng Banal na Misa kada-buan upang mapanatiling buhay ang pnanampalataya ng mga mag-aaral at mga guro.

Ang Don Bosco Technical Institute – Makati, partikular ang departamento ng Senior High School, ay nagbibigay ng mataas na kalidad ng edukasyon sa kanilang mga mag-aaral. Ibinibigay at nilalampasan ng paaralan ang inaasahang kalidad ng mga mag-aaral at ng mga magulang, gayundin ng Kagawaran ng Edukasyon. Inihahanda ng paaralan ng mga estudyante para sa mga problema at hadlang na ibabato sa kanila ng mundo. Kasabay ng mga paksang ito ang paghubog sa mga kabataan na maging malapit sa Diyos. Sa tulong ni San Juan Bosco, patron ng paaralan, at ni Maria, Tulong ng mga Kristiyano, nawa’y maging tapat na mamamayan at mabuting Kristiyano ang inyong mga anak sa kanilang pagpasok sa insitusyong ito.