بحبك اكتر من اي شئ… بحبك وكان موناي اشوف نفس الحب دا في عيونك
مشتافه ليك اكتر من اهلي … وكان جد نفسي اشوف الشوق دا منك
يارب لو كنت شاعره كبيره … او حتى رسامه صغيره
كنت كملتى كل تعابير الدنياه في وصف ريدي
دا انا كنت كملتى كل الوان الكون فيك وخليت القمر ما يظهر تاني
جواي ريد بغير كل اجواء السنه جواي
فؤادي مرة بردان ومرات طاير في ربيع شوفتك
عليك الله خليك حنون علي و معاي.. ما اصل الحنيه ما ذادت إلا من جمالك
اووف ما عارفه قعد اكتب اقول في شنو … لى حاسه اني بهلوس ساي؟؟!ا
بحبك ولله بحبك … خليك من كلام الافلام ونزار
اسمعني انا و عليك الله ما تخليني انتظر سااي
يلد بحبك… بحبك لى صعب تفهمه؟؟
كلام اي بت في سن ال14 الى 18 سنه … سن لا بنفهم فيه معنى الحب ولا معنى المعنى في الحياه
ما غباء ولا اي شئ , بس الموضوع ومافيه انو مافي اصلاٌ زول عارف معنى بحبك ولا اي شئ من الكلام الفوق دا
لو هي مشت وقالت ليه كده تبقى البت دي يا كدي ي كدي..
لو هو قال ليها الكلام دا يبقى هو … واحد لا عندو اخت ولا شئ
ولو الإتنين اتفقوا على الكلام الفوق دا يبقى هى جيبو … وهو جسمها
عندنا لا حب معروف ولا الكراهيه معترف فيها
اشرف شئ الزول ممكن يعملو.. يدس مشاعرو و يعمل نايم
ما اصلو هي ح تحبو حب مجنون بس عشان هي بت مستحيل تتنازل وتوريهو
و هو اكيد راجل و ح يتنازل …. بس هي بت ولازم تتاقل شويه عشان هي بت
وما دايره يقولوا عليها خفيفه … وهو ي بقى اهبل و لعب دور الصبور
او طفش ولحق صحبتها.,,, وكان صبر واكيد في الاخير الهانم ح تتكرم و توافق عليه
ح يبقوا مع بعض فتره… يتقابلوا , يتحاضنوا , يتباوسوا.. ويقيفوا
لانوا بعد كل شئ.. ي هي قالت انا م بقدر استناه لامن يكون نفسو… ا
ي هو قال: انا ما بتجوز وحدي مرقت معاي .. لانوا اكيد مرقت مع غيري كمان
لا ولله, عندنا زكاء بنتحسد عليه
و المصيبه ازا حصلت بالصدفه و الإتنين اتجوزوا, اول شئ ح يجي في بال الناس
اكيد غلط فيها عشان كدي قعد يجوزوهم.ا
في مجتمعي الناس تكتب عن الحب كتير, ويستخدموا كلمة بحبك اكتر من استغفرلله
تلقى اي زول بيتعلم الرسم من خلال رسم القلوب في اي مكان واي زمان
والف بت ح تقول الكلام الفوق , والف ولد ح يقولو كمان
بس في الأخير الموضوع يتشقلب و يتمقلب لى موضوع تاني خاااااااااااااااااااااااااااااااااااااااالص
و يجيك الشاب او الشابه يقولوا ليك “انت لسه في زمن الحبكانيه” ا
ولما انا اجي من عمر ال12 ولى الليله اقول انا ما بأمن بالحب .. معناتو انا ي كضابه, او غبيه,او قعد افوت احلى شئ في الدنياة .ا